༢༠༡༠ ལོའི་བོད་ནང་གནས་ཚུལ་ཆེ་ཁག་ཕྱོཊ་བསྡུས།

འདི་ག་གསར་ཁང་གིས་ལོ་རེ་རེའི་ལོ་མཇུག་ཙམ་ལ་༧གོང་ས་མཆོག་གི་མཛད་འཕྲིན་གལ་ཆེན་ཁག་དང་བོད་ནང་གི་གནས་ཚུལ། བཙན་བྱོལ། དེ་བཞིན་རྒྱ་ནག་དང་རྒྱལ་སྤྱི་བཅས་ཀྱི་གསར་འགྱུར་ཆེ་ཁག་ཕྱོགས་བསྡོམས་ཀྱིས་བསྐྱར་སྤེལ་བྱེད་སྲོལ་ཡོད་པ་ལྟར། འདི་ལོའི་༼ བོད་ནང་གི་གནས་ཚུལ་ཆེ་ཁག་ཕྱོགས་བསྡུས ༽ བྱས་ཡོད།  

བོད་ཟླ་དང་པོའི་ཚེས་ ༡ ཉིན་ནས་བཟུང་རྔ་པ་ཀིརྟི་དགོན་དང་བསེ་དགོན་པ། མཚོ་ལྷོ་ཀོས་ནན་ཀླུ་ཚང་དགོན་གཙོས། བླ་བྲང་བསང་ཆུ་རྫོང་ཙ་ཡུས་ཞང་ལྷ་སྡེ་སོགས་ཀྱི་སྐྱ་སེར་གཉིས་ཀྱིས་མར་མེ་ཁྲོམ་སྐོར་དང་མ་ཎི་གསོག་སྒྲུབ་སོགས་ཀྱི་སྒོ་ནས་མྱ་ངན་ལོ་སར་སྲུང་གཙི་བྱས་ཡོད།

ཕྱི་ཟླ་ ༣ ཚེས་ ༩  ནས་རྨ་ཆུ་རྫོང་བོད་ཡིག་སློབ་འབྲིང་དང་སློབ་ཆུང་། འབར་ཁམས་མི་རིགས་སློབ་འབྲིང་དང་ཁམས་འབྲི་རུ་རྫོང་རྩ་ལ་ཤང་ལྟེ་བའི་སློབ་ཆུང་།  ཀན་ལྷོ་གཙོས་བོད་ཡིག་སློབ་འབྲིང་གསུམ་པ་དང་ཁུལ་སློབ་འབྲིང་། ཞིན་ཧྭ་བོད་ཡིག་སློབ་འབྲིང་བཅས་ཀྱི་སློབ་མ་ཚོས་ཞི་བའི་ངོ་རྒོལ་བྱས་སྟབས། སློབ་གྲྭ་ཁག་ཅིག་གི་སློབ་སྤྱི་དང་དགེ་རྒན་ཕྱིར་ཕུད་དང་དངུལ་གྱི་ཉེས་ཆད་བཏང་བ་དང་། སློབ་མ་ཁག་ཅིག་ལ་ཁྲིམས་ཆད་དང་བཀག་ཉར་བྱས་ཏེ་སློབ་གྲྭ་སྒོ་བརྒྱབ་པ་དང་སློབ་མཚམས་བཞག་པའི་གནས་ཚུལ་བྱུང་ཡོད། 

ཕྱི་ཟླ་ ༤ བ་ཙམ་ནས་རྒྱ་གཞུང་གིས་རྡུང་རྡེག་ཚ་ནན་གྱི་ཁ་ཕྱོགས་བོད་རིགས་རྩོམ་པ་པོ་དང་སྨྱུག་ཐོགས་པའི་ཐོག་ལ་བསྐོར་ཏེ། རྩོམ་པ་པོ་ཞོགས་དུང་དང་ཐེའུ་རང་། བུད་ངྷ་དང་ཇོ་ལེབ་ཟླ་བ་སོགས་ལར་ཞེན་ཅན་གྱི་རྩོམ་པ་པོ་དང་རྩོམ་སྒྲིག་པ། དགེ་རྒན་སོགས་འཛིན་བཟུང་བཀག་ཉར་བྱས་པར་མ་ཟད། ཁོར་ཡུག་སྲུང་སྐྱོབ་དང་སྤྱི་ཚོགས་ཞབས་ཞུའི་ལས་དོན་བསྒྲུབ་མཁན་དང་ཚོང་པ་ཀརྨ་བསམ་འགྲུབ་སྤུན་མཆེད་དང་རྡོ་རྗེ་བཀྲ་ཤིས་སྤུན་མཆེད། བསོད་ནམས་བག་བྲོ་སོགས་བཙོན་འཇུག་ཁྲིམས་ཆད་བཅད་ཡོད།

ཕྱི་ཟླ་ ༤ བའི་ཚེས་ ༡༤ ཉིན་ཡུལ་ཤུལ་སྐྱེ་རྒུ་མདོར་ཚད་རིམ་ ༦༌༩  ཅན་གྱི་ས་ཡོམ་བརྒྱབ་སྟེ། ཞང་དང་གྲོང་བརྡལ་ ༩ ལྷག་གི་དགོན་པ་དང་གྲོང་སྡེ། སློབ་གྲྭ་ཁག་བཅས་སུ་གནོད་སྐྱོན་ཚབས་ཆེན་བྱུང་ཞིང་། མི་ ༢༦༩༨  འདས་གྲོངས་དང་། མི་ ༡༤༠༠༠ ལ་རྨས་སྐྱོན་ཚབས་ཆེན་ཕོག་པ་མ་ཟད། བོད་མི་མང་པོ་ཞིག་གར་སོང་ཆ་མེད་དུ་གྱུར་ཡོད། ས་ཡོམ་དེ་བརྒྱུད་ནས་བོད་ཆོལ་གསུམ་ཁ་ནས་སྙིང་རྗེ་རོགས་སྐྱོར་དང་ཞལ་འདེབས་བསྡུ་རུབ་ཀྱིས་མཐུན་སྒྲིལ་ལག་རྡང་གཅིག་ཏུ་སྦྲེལ་ཏེ་ཆིག་སྒྲིལ་གྱི་ནུས་པ་བླ་ལྷག་ཏུ་ཐོན་ཡོད།

ཕྱི་ཟླ་ ༨ པའི་ཚེས་ ༡༡ ཉིན་ཀན་ལྷོ་འབྲུག་ཆུ་རྫོང་དུ་རི་ཉིལ་འདམ་ཟེགས་ཀྱི་དོན་རྐྱེན་བྱུང་སྟེ། མི་ ༡༡༠༠ ལྷག་འདས་གྲོངས་དང་མི་ ༢༠༠༠ བོར་བརླག སྡོད་ཁང་ ༣༠༠༠ ལྷག་ཆུའི་ནང་འཐིམས་པ། ཁང་པ་ ༧༧༠ ལྷག་བརྡིབ་ཉེན་ལ་ཐུག་པ། མི་མང་ཁྲི་ ༢ ལྷག་གནས་སྤོར་བྱ་དགོས་བྱུང་བ་སོགས་ཀྱི་གནས་ཚུལ་ཚབས་ཆེན་བྱུང་ཞིང་། འདི་ལ་ས་གནས་མང་ཚོགས་ཚོས་མི་ཁྲི་ ༡ ལྷག་རྐྱེན་ལམ་དུ་ཕྱིན་སྐོར་ཡང་བརྗོད།

སྐད་རིགས་རང་དབང་།

ཕྱི་ཟླ་ ༩ ཚེས་ ༡༩ ཉིན་མདོ་སྨད་རེབ་གོང་ནས་མགོ་བརྩམས་ཏེ། བོད་ཁུལ་གྱི་སློབ་གྲྭ་ཆེ་འབྲིང་ཆུང་གསུམ་མང་པོ་ཞིག་གིས་“ མི་རིགས་འདྲ་མཉམ། སྐད་རིགས་རང་དབང ” ཞེས་པའི་འབོད་ཚིག་འོག་རྒྱ་གཞུང་ལ་ངོ་རྒོལ་བྱས་ཡོད་ཅིང་། དེ་ནི། ༼ ༢༠༡༠ ལོ་ནས་ ༢༠༡༢ ལོའི་བར་མཚོ་སྔོན་ཁུལ་གྱི་དུས་ཡུན་འབྲིང་རིང་གི་སློབ་གསོའི་བཅོས་བསྒྱུར་དང་འཕེལ་རྒྱས་འཆར་འགོད་རྩ་གནད། ༽ ཅེས་པའི་བོད་སྐད་ཡིག་ཕལ་བར་བཞག་པའི་སྲིད་ཇུས་དེར་མི་འདོད་པའི་རྣམ་འགྱུར་བསྟན་ཡོད།

ཕྱི་ཟླ་ ༡༡ པའི་ནང་བོད་ལྗོངས་ཀྱི་འབྲོག་ཁྱིམ་ ༡༢༩༤༩ གཏན་སྡོད་མིན་པའི་དབང་གིས་གྲོང་བརྡལ་གྱི་རྣམ་པར་བསྒྱུར་རྒྱུའི་གསལ་བསྒྲགས་བྱས་ཏེ་ལག་ལེན་བསྟར་མུས་ཡིན་འདུག་ལ། ༢༠༡༥ བར་མཚོ་སྔོན་གྱི་འབྲོག་ཁྱིམ་འབུམ་ ༣ དང་ཁྲི་ ༢ གྲོང་སྡེ་ཅན་དུ་བསྒྱུར་འཆར་ཡོད་པ་ལྟར། མཚོ་སྔོན་མང་རའི་འབྲོག་པ་རྣམས་མགོ་མང་གྲོང་བརྡལ་དུ་གནས་སྤོར་དང་། མགོ་ལོག་ས་ཁུལ་གྱི་འབྲོག་པ་ཁག་ཅིག་འབའ་རྫོང་ཉེ་འདབས་སུ་གནས་སྦོར། མཚོ་བྱང་མདོ་ལ་རྫོང་གི་འབྲོག་སྡེ་ཁག་ཅིག་ཨ་རིག་ཞང་གི་ཉེ་འདབས་སུ་གནས་སྤོར་སོགས་ཀྱི་ལས་འཆར་མགོ་འཛུགས་བྱས་ཡོད།  

ཕྱི་ཟླ་ ༥ བ་ཡས་མས་ནས་བོད་ཁུལ་གྱི་ས་ཁུལ་ཁག་ཅིག་ནང་མཉམ་ལས་ཁང་ཟེར་བ་ཞིག་ལག་བསྟར་བྱས་ཏེ། མཚོ་ནུབ་ཐེམ་ཆེན་དང་རྨ་ལྷོ་སོག་རྫོང་། རེབ་གོང་བཅས་སུ་མ་རྐང་མཉམ་ལས་ཁང་ཚོད་ལྟ་བྱས་པ་བརྒྱུད། འབྲོག་པའི་རྩྭ་ས་དང་ཕྱུགས་ཟོག་མཉམ་ལས་ཁང་གི་མ་རྐང་དུ་བཞག་སྟེ། འབྲོག་ཁུལ་ཡོངས་མཉམ་ལས་ཀྱི་ངོ་བོར་བསྒྱུར་བའི་སྲིད་ཇུས་ལག་བསྟར་བྱེད་མགོ་བཙུགས་ཡོད་པ་དང་། སྲིད་བྱུས་འདིས་ས་གནས་མ་ཚོགས་ཚོར་རིག་གནས་གསར་བརྗེ་སྐབས་ཀྱི་མང་ཚོགས་གཞུང་གཅིག་ཅན་གྱི་དུས་ཚོད་དེ་དྲན་གསོ་ཡི་འཇིགས་སྣང་ཆེན་པོ་ཞིག་བསླངས་ཡོད་འདུག

 གསར་འགོད་པ། དོན་གོ