ཤེས་རབ་དགའ་ཚལ་སློབ་གླིང་དེ་སམ་བྷོ་ཊའི་ཁྱབ་ཁོངས་སུ་ཟླ་སྒྲིལ་གཏོང་བའི་མཛད་སྒོ་ཞིག་ཚོགས་ཡོད་ཅིང་། མཛད་སྒོའི་སྟེང་ཤེས་རིག་བཀའ་བློན་དང་སམ་བྷོ་ཊ་སྤྱི་ཁྱབ་འགན་འཛིན་རྣམ་གཉིས་ཀྱིས་མ་འོངས་པར་སློབ་གྲྭ་འདིར་ཡར་རྒྱས་གང་འཚམ་ཡོང་ངེས་ཡིན་སྐོར་གསུངས་ཡོད།
ཁ་སང་ཕྱི་ཚེས་ ༤ ཉིན་ཏེ་ཕྱི་ལུགས་ཀྱི་ལོ་གསར་ཚེས་མགོ་དང་སྟབས་བསྟུན་ཏེ། ངྷ་རམ་ས་ལའི་ཉེ་འཁྲིས་ཀྱི་ཤེས་རབ་དགའ་ཚལ་སློབ་གླིང་སམ་བྷོ་ཊའི་ཁྱབ་ཁོངས་སུ་རྩིས་སྤྲོད་རྩིས་ལེན་བྱས་པའི་མཛད་སྒོ་ཞིག་ཚོགས་ཡོད་ཅིང་། མཛད་སྒོའི་སྐུ་མགྲོན་གཙོ་བོར་བོད་གཞུང་ཤེས་རིག་བཀའ་བློན་ཐུབ་བསྟན་ལུང་རིགས་མཆོག་དང་། སམ་བྷོ་ཊ་སྤྱི་ཁྱབ་འགན་འཛིན་ཀརྨ་ཆུང་བདག་ལགས་རྣམ་གཉིས་གཙོས་པའི་འབྲེལ་ཡོད་ལས་བྱེད་ཁག་ཅིག་ཕེབས་འདུག མཛད་སྒོའི་སྟེང་ཤེས་རབ་དགའ་ཚལ་སློབ་གླིང་གི་འགན་འཛིན་བུ་ཕྲུག་ཤཱསྟི་ལགས་ཀྱིས་ངོ་སྤྲོད་བྱས་དོན། སློབ་གྲྭ་འདི་ནི་བོད་གཞུང་གི་ལམ་སྟོན་ལྟར་ ༡༩༩༣ ཟླ་ ༣ ཚེས་ ༧ ཉིན། བོད་ནས་གསར་དུ་འབྱོར་བའི་རང་ལོ་ ༡༨ ནས་ ༣༠ བར་གྱི་གཞོན་སྐྱེས་ ༡༠༠ ལྷག་ལ་དམིགས་ཏེ་ཐོག་མར་བཙུགས་པ་ཞིག་ཡིན་ཞིང་། སྐབས་དེར་སློབ་གྲྭའི་འཛིན་སྐྱོང་དབུས་སྣེ་ལེན་ཁང་གིས་གནང་ཡོད། ༢༠༠༢ ལོའི་ཟླ་ ༣ ཚེས་ ༡༧ ཉིན་སྣེ་ལེན་ཁང་གིས་བོད་གཞུང་ཤེས་རིག་ལ་རྩིས་སྤྲད་དེ་ད་བར་ཤེས་རིག་གིས་འཛིན་སྐྱོང་གནང་བ་རེད། ཕྱི་ལོ་ ༡༩༩༣ ནས་ ༢༠༡༠ ལོའི་ལོ་མཇུག་བར་སློབ་གྲྭ་འདིར་བོད་ནས་སློབ་མ་ ༦༤༥༣ ཙམ་འབྱོར་ཡོད་ལ། སློབ་གྲྭ་འདི་ནས་ལོ་ལྔའི་ཤེས་ཡོན་སློབ་མཐར་ཕྱིན་པ་ ༧༡༠ ཙམ་དང་། འཚེམ་བཟོ་སློབ་ཐོན་པ་ ༧༥ ། ལྷ་བྲིས་པ་ ༢༠ བཅས་བྱུང་ཡོད། ད་ཆར་སློབ་གྲྭ་འདིར་སློབ་མ་ ༤༢༥ དང་དགེ་ལས་ ༥༢ བཅས་ཡོད། ཁ་སང་ཕྱི་ཚེས་ ༣ ཉིན་སློབ་གྲྭ་འདི་ཤེས་རིག་ནས་སམ་བྷོ་ཊའི་ཁོངས་སུ་རྩིས་སྤྲོད་གཙང་མ་བྱས་ཡོད་ཅེས་བརྗོད་བྱུང་།
སྐབས་དེར་སམ་བྷོ་ཊ་སྤྱི་ཁྱབ་འགན་འཛིན་ཀརྨ་ཆུང་བདག་ལགས་ཀྱིས་བརྗོད་དོན། དེ་རིང་ནི་ཤེས་རབ་དགའ་ཚལ་སློབ་གླིང་འདི་སམ་བྷོ་ཊའི་ཁྱབ་ཁོངས་སུ་བླངས་པའི་ཉིན་དང་པོ་རེད། སམ་བྷོ་ཊ་སྤྱི་ཁྱབ་ཡིག་ཚང་ནི་བྱིས་པ་རང་ལོ་ ༣ ནས་ ༡༨ བར་གྱི་ཤེས་ཡོན་ཐོག་འགན་འཁུར་མཁན་ཞིག་ཆགས་ཡོད་སྟབས། དེ་རིང་སློབ་གྲྭ་འདིའི་སློབ་མ་ཚོ་ལོ་ཆེན་པོ་ཡིན་པ་མཐོང་སྐབས་ཅུང་མི་འདྲ་བ་ཞིག་འདུག དེ་རིང་ཤེས་རིག་ལས་ཁུངས་ཀྱིས་སློབ་གྲྭ་འདིའི་འཛིན་སྐྱོང་ཚང་མ་ང་ཚོར་རྩིས་སྤྲད་ཡོད། ཉིན་རེའི་འཛིན་སྐྱོང་སམ་བྷོ་ཊས་གནང་དགོས་ནའང་། ང་ཚོ་ད་དུང་ཡང་ཤེས་རིག་གི་ཁྱབ་ཁོངས་འོག་བསྡད་ཡོད་པ་རེད། ངས་ཁྱེད་ཚོར་བསམ་ཚུལ་ཁ་ཤས་ཤིག་བཤད་འདོད་བྱུང་། ཁྱེད་ཚོར་ཕར་ཕྱོགས་སུ་སྡོད་ས་དང་བཟའ་རྒྱུ་མེད་པར་རྒྱ་གར་ལ་ཡོང་བ་ཡིན་རྒྱུ་མ་རེད། ལ་ལུང་མང་པོ་བརྒྱུད་ཅིང་ལུས་ཀྱི་དཀའ་བ་སྤྱད་དེ་རང་སྲོག་འབེན་ལ་བཙུགས་ཏེ་ཡོང་བ་ཞིག་རེད། ཁྱེད་ཚོ་འདིར་ཡོང་དོན་ཐད་ཁྱེད་རང་ཚོས་བསམ་བློ་བཏང་ན་ལན་ཏག་ཏག་ཐེབས་ཀྱི་རེད། ངས་བསམ་ན། ཕར་ཕྱོགས་སུ་མི་རག་པ་མང་པོ་ཞིག་འདི་ནས་རག་ཐུབ་ཀྱི་ཡོད་སྟབས། ཁྱེད་ཚོ་འདིར་ཡོང་བ་ཞིག་རེད་བསམ་གྱི་ཡོད། དཔེར་ན། ༧གོང་ས་མཆོག་མཇལ་རྒྱུ་དང་། རིག་གཞུང་སློབ་གཉེར་གནང་རྒྱུ། བཙན་བྱོལ་དུ་འཚར་བའི་གཞོན་སྐྱེས་རྣམས་དང་མཉམ་འབྲེལ་བྱ་རྒྱུ་བཅས་ཀྱི་ཆེད་ས་ཐག་རིང་པོ་ནས་ཕེབས་པ་ཞིག་རེད། དེ་ལྟར་ཡིན་ན། སློབ་སྦྱོང་ཐོག་ཆུ་ཚོད་འཕྲོ་བརླག་ཏུ་རྩ་བ་ནས་གཏོང་རྒྱུ་ཡོད་པ་མ་རེད། བོད་ནས་མི་གཅིག་བསླེབས་ཀྱང་དེ་ནི་ང་ཚོའི་འཐབ་རྩོད་ལ་རྒྱབ་སྐྱོར་བྱེད་དུ་ཡོང་བ་རེད་བསམ་སྟེ་སེམས་སུ་སྤོབས་པ་སླེབས་ཀྱི་འདུག ཅེས་གསུངས་བྱུང་།
ཡང་ཁོང་གིས་མུ་མཐུད་དོན། ད་བར་སློབ་གྲྭ་འདིར་སློབ་ཕྲུག་ ༦༠༠༠ ལྷག་འབྱོར་ཡོད་ལ། དེ་ནི་ང་ཚོའི་འཐབ་རྩོད་ལ་རྒྱབ་སྐྱོར་བྱེད་དུ་ཡོང་བ་ཞིག་ཡིན་པས་ཧ་ལས་པའི་གཟི་བརྗིད་རེད། ཁྱེད་ཚོ་གཞིས་ལུས་བོད་མིའི་སྐུ་ཚབ་ངོ་མ་དེ་ཆགས་ཡོད། སྐུ་ཚབ་ངོ་མ་ཡིན་མིན་དེ་སོ་སོས་རང་ཉིད་ལ་དྲི་བ་འདྲི་རོགས། སྐུ་ཚབ་ཀྱི་ངོ་བོ་མཚོན་མཁན་ཞིག་ཡིན་བསམ་ན། སྐུ་ཚབ་ཀྱི་ངོ་བོ་མཚོན་ཐུབ་པ་ཞིག་ངེས་པར་གནང་དགོས། ལུས་ངག་གཉིས་དང་སློབ་སྦྱོང་བྱ་ཕྱོགས་གང་ཐད་ནས་སྐུ་ཚབ་མཚོན་ཐུབ་པ་ཞིག་དགོས་རྒྱུ་མ་ཟད། ལས་ཀའི་ཐོག་ཞུགས་རྗེས་སུའང་སྐུ་ཚབ་ངོ་མ་ཞིག་གནང་རྒྱུ་དེ་ཧ་ཅང་གལ་ཆེན་རེད། ངས་ཉིན་ཞིག་གསོག་སྒར་གྱི་སློབ་ཟུར་ཞིག་གིས་བཀའ་ཁྲི་བྱ་ཐུབ་རྒྱུའི་རེ་བ་བྱེད་ཀྱི་ཡོད་ལ། ཁྱེད་ཚོས་ཀྱང་དེ་འདྲའི་སེམས་ཤུགས་བསྐྱེད་ཅིང་། རིག་པ་བསྒྲིམས་ཏེ་སློབ་སྦྱོང་བྱ་དགོས་པ་རེད། ཅེས་གསུངས་བྱུང་།
མཇུག་ཏུ་སྐུ་མགྲོན་གཙོ་བོ་ཤེས་རིག་བཀའ་བློན་མཆོག་གིས་གཏམ་བཤད་གནང་དོན། བཀའ་ཤག་སྐབས་བཅུ་གཉིས་ནས་བཟུང་སློབ་གྲྭ་འདི་ཤེས་རིག་འོག་འཛིན་སྐྱོང་བྱས་པ་རེད། འཛམ་གླིང་ས་ཕྱོགས་གང་ནའང་བཀའ་བློན་ལས་ཁུངས་ཀྱིས་ཐད་ཀར་སློབ་གྲྭ་འཛིན་སྐྱོང་གནང་སྲོལ་ཡོད་མ་རེད། ང་ཚོའི་གནས་སྟངས་དེ་གཞན་དང་མི་འདྲ་བ་ཞིག་ཆགས་ཡོད་སྟབས། ད་བར་ཤེས་རིག་འཛིན་སྐྱོང་གནང་བ་རེད། བར་སྐབས་ཤིག་ནས་ཤེས་རིག་གིས་ཀྱང་སློབ་གྲྭའི་དགོས་མཁོ་དང་འཚམ་པའི་བསྒྱུར་བཅོས་བྱ་ཕྱོགས་ཐད་འཆར་གཞི་ཞིག་བསྒྲིགས་པ་མ་ཟད། ཤེས་རིག་དང་སམ་བྷོ་ཊ་གཉིས་ནས་འཛིན་སྐྱོང་ལྷན་ཚོགས་ཤིག་ཀྱང་བཙུགས་པ་རེད། ཡིན་ནའང་། ཕྱོགས་གཉིས་ཀར་རང་ཉིད་ཀྱི་ཉིན་རེའི་ལས་འགན་རེ་ཡོད་དུས། ཤེས་རབ་དགའ་ཚལ་སློབ་གླིང་གི་ཉིན་རེའི་འཛིན་སྐྱོང་ལ་ལྟ་རྟོགས་བྱེད་ཐུབ་མེད་པ་རེད། ཅེས་ཐོག་མའི་བརྒྱུད་རིམ་སྐོར་ངོ་སྤྲོད་གནང་བྱུང་།
ཡང་ཁོང་གིས་སློབ་གྲྭ་དེ་སམ་བྷོ་ཊར་རྩིས་སྤྲོད་བྱས་དོན་སྐོར་ལ། སློབ་གྲྭ་འདི་སམ་བྷོ་ཊའི་འོག་བཅུག་པ་ཡིན་ན། སམ་བྷོ་ཊ་ནི་སློབ་གྲྭའི་འཛིན་སྐྱོང་ཞིག་ཡིན་པའིོ་ཆ་ནས། འཛིན་སྐྱོང་ལྟ་རྟོགས་སྔོན་མ་ལས་ཇེ་ཡག་ཏུ་འགྲོ་བ་རེད། སྤྱིར་སློབ་གྲྭ་འདིར་མཚོན་ན་འགན་འཛིན་དང་དགེ་རྒན་རག་ཁག་པོ་ཡོད་པ་མ་ཟད། རག་ཀྱང་མགྱོགས་པོར་ཐོན་འགྲོ་ཡི་ཡོད། ཁྱེད་ཅག་གི་ད་ལྟའི་འགན་འཛིན་ཁོང་ཡང་སམ་བྷོ་ཊའི་སློབ་གྲྭ་ནས་ཡོང་བ་རེད་ལ། དེ་བཞིན། འདིར་ཕེབས་པའི་དགེ་རྒན་ཚོ་ཡང་སློབ་གྲྭ་གཞན་ལ་གནས་སྤོར་བྱེད་ས་ཡོད་པ་མ་རེད། དེ་འདྲའི་འཛིན་སྐྱོང་གི་དཀའ་ངལ་མང་དག་ཅིག་བྱུང་སྟབས་སམ་བྷོ་ཊར་རྩིས་སྤྲོད་དགོས་བྱུང་བ་རེད། ཐེངས་འདིར་སམ་བྷོ་ཊའི་འོག་རྩིས་ལེན་བྱས་པ་བརྒྱུད་དགེ་རྒན་ཚོར་ཕར་གཏོང་ཚུར་ལེན་བྱ་རྒྱུར་སྟབས་ཇེ་བདེར་སོང་ཡོད་པ་མ་ཟད། དགེ་ལས་ཚོར་ཡང་སློབ་གྲྭའི་ལས་འགན་ཡོད་པ་ཞིག་དང་། སློབ་ཕྲུག་ཚོ་ཡང་སློབ་གྲྭ་ཞིག་གི་ངོ་བོའི་ཐོག་འགྲོ་ཐུབ་པ་བྱུང་ཡོད། ཅེས་གསུངས་བྱུང་།
མཛད་སྒོའི་མཇུག་ཏུ་འདི་གའི་གསར་འགོད་པས་སློབ་གྲྭའི་འགན་འཛིན་མཆོག་ལ། སློབ་གྲྭ་འདི་སམ་བྷོ་ཊར་ཟླ་སྒྲིལ་བཏང་ན་སློབ་མའི་ཁྲིད་གཞི་ལ་འགྱུར་བ་འགྲོ་མིན་དྲིས་པར། ང་ཚོས་ངོས་ནས་རྒྱ་གར་རྒྱལ་ཡོངས་འཛིན་རིམ་བཅུ་པ་དང་བཅུ་གཉིས་ཀྱི་ཡིག་འབྲེལ་ཡིག་རྒྱུགས་གཏོང་ཐུབ་རྒྱུར་འབད་བརྩོན་བྱེད་ཀྱི་ཡོད་ཀྱང་། སློབ་མ་ཚང་མ་ཡིག་རྒྱུགས་ནང་ཞུགས་ཐུབ་མིན་ད་ལྟ་ཤེས་ཐུབ་ཀྱི་མི་འདུག གལ་ཏེ། ཡིག་རྒྱུགས་ནང་ཞུགས་ན་སློབ་ཚན་ཁ་ཤས་ཤིག་སྦྱང་དགོས་པ་རེད། ཅེས་དང་། སློབ་གྲྭ་ཟླ་སྒྲིལ་བཏང་ན་དགེ་ལས་ཚོར་གསོལ་ཕོགས་དང་སྡོད་ཁང་སོགས་ཀྱི་ཐོག་སྔོན་མ་ལས་ཡག་ཏུ་འགྲོ་གི་རེད་ཅེས་བརྗོད་བྱུང་།
ཤེས་རབ་དགའ་ཚལ་སློབ་གླིང་གི་བོད་དགེ་སྐལ་བཟང་ཉི་མ་ལགས་ཀྱིས་གནས་སྟངས་དེའི་སྐོར་བརྗོད་དོན།
སློབ་གྲྭ་ཞིག་ལ་མཚོན་ན་འཛིན་སྐྱོང་ཧ་ཅང་གལ་ཆེན་རེད། འཛིན་སྐྱོང་ཡག་པོ་ཡོད་མེད་ལ་མ་ལྟོས་པར་ཤེས་རབ་དགའ་ཚལ་སློབ་གླིང་ད་བར་འདི་ལྟར་ཕྱིན་པ་རེད་ལ། འཛིན་སྐྱོང་གྲུབ་འབྲས་ང་ཚོའི་མཐོང་གསལ་དུ་ཡོད་ལ། འདི་ནི་སྔོན་མའི་འཛིན་སྐྱོང་གིས་བཟོས་པ་ཞིག་ཀྱང་རེད། སམ་བྷོ་ཊའི་འཛིན་སྐྱོང་འོག་ཕྱིན་ཚེ། འཛིན་སྐྱོང་ལ་གྲ་སྒྲིག་དང་འགྱུར་བ་སོགས་ཡོད་ན། སློབ་ཕྲུག་གི་ཤེས་ཡོན་ཐོག་གྲུབ་འབྲས་ཡག་པོ་ཡོང་རྒྱུར་རེ་བ་ཡོད་ཀྱང་། འཛིན་སྐྱོང་ལ་འགྱུར་བ་མ་ཕྱིན་ཚེ་དམིགས་བསལ་གྲུབ་འབྲས་ཡོང་ཁག་པོ་རེད། ཅེས་དང་། སློབ་མའི་ཁྲིད་གཞིའི་ཐད་ཁོང་གིས། ལྷག་པར་དུ་ཡིག་འབྲེལ་གྱི་ལམ་ནས་རྒྱ་གར་སློབ་གྲྭ་ཁག་ཏུ་ཞུགས་ན་རྒྱལ་རབས་དང་སྤྱི་ཚོགས་ཚན་རིག་སོགས་བསླབ་རྒྱུ་གལ་ཆེན་རེད། ཅེས་བརྗོད་བྱུང་།
གསར་འགོད་པ། དཔལ་ལྡན།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
གསོག་སྒར་རམ་ཤེས་རབ་དགའ་ཚལ་སློབ་གླིང་ནི་གངས་སྐྱིད་དུ་རྐང་རྕེ་སྤོ་ལོ་བཞིན་རྡོག་ཐོ་ཡར་བཞུས་མར་བཞུས།
དངོས་གནས་མ་འོངས་པར་ཤེས་རབ་དགའ་ཚལ་སློབ་གླིང་ནསབཀའ་ཁྲི་ཐོན་གྱི་རེད། རྒྱུ་མཚན་ནི། ལོ་མང་དཀའ་ལས་རྒྱབ་མྱོང་བའི་སྐུ་ངོས་བྱས་རྗེས་ཅན་ཁོང་ཡང་རྒྱང་ཕུད་བཏང་ཚར་བ་རེད། ལོ་ཤས་རྗེས་སློབ་ཕྲུག་ལོ་ན་༡༨ཡན་ཚང་མ་མེད་པར་བཟོས་ཏེ་གཞི་རིམ་བྱིས་པའི་སློབ་གྲྭ་ཞིག་ཏུ་བསྒྱུར་ཏེ་བཀའ་ཁྲི་ཞིག་བཟོ་ངེས་རེད།
ངོ་མ་སྙིང་རེ་རྗེ་་སྐུ་ངོ་ཚོས་ཡར་ལ་རྩིས་སྤྲད་་མར་ལ་རྩིས་སྤྲད་་ད་དུང་ཁ་་ཡག་ལ་ཁྱེར་ནས་རྗེས་མ་བཀའ་ཁྲི་ལ་འདུག་པའི་སྐད་ཆ་བཤད་འཛིན་རིམ་བརྒྱད་པའི་ལག་འཁྱེར་མ་གཏོགས་མེད་ནི་ཞིག་བཀའ་སློན་ཁྲི་བ་འཇོག་གི་རེད་་་དང་སེང་ལས་ཁུང་ཆུང་ཆུང་ཞིག་ལ་འཛུལ་ན་འཛིན་རིམ་བཅུ་གཉིས་ཡན་གི་ལག་འཁྱེར་མེད་ན་འཛུལ་མི་ཐུབ་ཀི་་་ངོ་མ་ཡིད་སྐྱོ་གི་ཡ་་་་་་
སུས་སུ་ལ་རྩིས་སྤྲོད་བྱས་ཀྱང་། གང་ལྟར་གསོག་སྒར་སློབ་མ་ཚོ་ལ་མདུན་ལམ་གང་ཡང་ཡོད་མ་རེད། ལག་ཁྱེར་ལ་ངོས་ལེན་ཡོད་མ་རེད་ལ། ལོ་ལྔའི་རྗེས་སུ་ཁྱི་གློད་པ་ནང་བཞིན་གར་འགྲོ་གར་འདུག་ཧ་གོ་གི་མ་རེད། དེར་བརྟེན་མང་པོ་ཞིག་འུ་ཐུག་ནས་བོད་དུ་ལོག་འགྲོ་གི་ཡོད་རེད་ལ། མང་པོ་ཞིག་ཕྱི་རྒྱལ་ལ་འགྲོ་ཨེ་ཐུབ་ལྟ་ཡི་ཡོད་རེད། དེ་ལྟར་མ་བྱས་རང་བྱས་རེད། གཞུང་ཞབས་ཀྱི་ལས་ཀ་བྱེད་པའི་ཐོབ་ཐང་ནི་ཡོད་མ་རེད།
གསོག་སློབ་ནས་མང་ཆེ་བ་བོད་ཡིག་ཡག་པོ་ཡོད་མཁན་དེ་འདྲ་རེད། འོན་ཀྱང་དེ་ཚོ་ལ་རིན་ཐང་འཇོག་མཁན་མེད་པ་གསལ་པོ་རེད། སྒེར་སོ་སོས་གཞུང་འབྲེལ་མ་ཡིན་པའི་ཚོགས་པ་དེ་འདྲ་ལས་ཀ་ཙག་ཙིག་རེ་རག་ལ་རྩེ་གྲ་རེད།
གསོག་སློབ་ནས་ཐོན་པའི་མིས་བཀའ་ཁྲི་མི་འཇོན་པ་ཡོད་མ་རེད། དཔེར་ན། ད་ལྟའི་ཆར་སྤྱི་འཐུས་ནང་དུ་གསོག་སློབ་ནས་ཐོན་པ་ཡོད་རེད་ལ། ཚོགས་པ་ག་གེ་མོའི་འགན་འཛིན་དང་། རྩོམ་སྒྲིག་པ། རྩོམ་པ་པོ་སོགས་མང་པོ་ཡོད་རེད། དེ་དག་རང་ངོས་ནས་དཀའ་ལས་བརྒྱབ་པ་མ་གཏོགས། གཞུང་གིས་དམིགས་བསལ་ལྟ་རྟོག་བྱས་བཞག་པ་ཞིག་ཕལ་ཆེར་ཡོད་མ་རེད།
ཉེ་འཆར་གྱི་བཀའ་ཁྲིའི་གསུངས་བཤད་ཅིག་ཏུ་སློབ་གྲྭ་འདི་ལ་འཛིན་རིམ་བརྒྱད་པའི་ལག་འཁྱེར་ཀྱང་རེགས་ཐབས་ཡོད་པ་མ་རེད་ཟེར། དེ་རིང་འདིར་མ་འོང་བའི་བཀའ་ཁྲི་སློབ་གྲྭ་འདི་ནས་ཐོན་པའི་རེ་བ་ཡོད་ཟེར། ད་ཕལ་ཆེར་དུས་ཀྱི་མཐར་ཟད་པ་མིན་ནམ། འཛིན་གྲྭ་བརྒྱད་པའི་ལག་འཁྱེར་མེད་མཁན་གྱི་སྲིད་བློན་ཞིག་འབྱུང་ཉེན་ཡོད་དུས། དགུ་བཅུ་གོ་གྲངས་ནས་ཉིས་སྟོང་ལོ་ཡས་མས་སུ་བོད་ནས་མི་ཕོན་ཆེན་བཙན་བྱོལ་ལ་འབྱོར་གྱི་ཡོད་སྟབས་ཕྱི་རྒྱལ་གྱི་རོགས་དངུལ་ཕོན་ཆེན་རེགས་ཏེ་ཤེས་རིག་དང་བདེ་སྲུང་གཉིས་ཀྱི་བར་ནས་སློབ་གྲྭ་འདི་གཅེས་ཕྲུག་ལ་གྱུར་བ་རེད། ད་ལོ་རེ་བཞིན་བཙན་བྱོལ་བ་ཇེ་ཉུང་དུ་སོང་ན་བདག་མེད་དུ་འགྱུར་བཞིན་འདུག
སྤོབས་པ་མཐའ་ཡས་ལགས། གསོག་སློབ་ཙམ་དུ་མ་ཟད་གྲྭ་ས་ཁག་ལ་ཡང་དེ་ལྟར་རེད། དཔེ་ཆ་ཡག་པོ་ཡོད་མཁན་ཞིག་ལ་དཔེ་ཆ་མི་ཤེས་མཁན་རེ་ཟུང་གིས་ཕྲག་དོག་བྱས་ཏེ་འཁྲུག་པ་བརྒྱབས་ཏེ་གནས་དབྱུང་བཏང་བའི་ལོ་རྒྱུས་བྱུང་མྱོང་བ་རེད། འཛམ་གླིང་སུ་ཞིག་གི་སྒྲིག་གཞི་དང་མཐུན་ཁག་པོ་རེད།
གསོག་སྒར་སློབ་གྲྭའི་སློབ་མས་འཁྲུག་པ་བརྒྱབ་ན་སུ་ལ་ནག་ཉེས་ཡོད་མེད་ལ་མི་ལྟ་བར་ཕྱོགས་གཉིས་ཀ་གནས་དབྱུངས་གཏོང་སྲོལ་དེ་ཡག་པོ་མི་འདུག
ཤེས་རབ་དགའ་ཚལ་སློབ་གླིངབསྡད་དུ་འཇུག་རྒྱུ་མ་རེད། ཡར་ལ་རྩིས་སྤྲོད་རྩིས་ལེན་བྱས། མར་ལ་རྩིས་སྤྲོད་རྩིས་ལེན་བྱས། ངས་བསམ་ན་ཐེངས་བརྒྱ་ཁྲག་ཁ་ཤས་རྩིས་སྤྲོད་རྩིས་ལེན་བྱས་རུང་དེ་ལ་དམིགས་བསལ་གྱི་ཡར་རྒྱས་ཕར་ཞོགས་ཕྱོགས་གང་ཅི་ཐེབས་ནས་འཐུས་ཤོར་ལ་འགྲོ་ཉེན་ཆེ། རྒྱུ་མཚན་སྐུ་ངོ་ཚོའི་མིག་ལམ་ན་གསོག་སྒར་སློབ་མ་མི་ཡི་གྲས་སུ་ཚུད་ཀྱིན་མེད་པས་སོ།། མཐར་སྐུ་ངོ་ཚོས་རྒྱ་ནག་ལ་རྩིས་སྤྲད་ན་ལེགས་ཤོས་རེད།