བཀའ་བློན་ཁྲི་པའི་དངོས་གཞིའི་འོས་བསྡུའི་བརྒྱུད་རིམ་ནང་མང་ཚོགས་ཀྱི་མདུན་སར་བཀའ་བློན་ཁྲི་པའི་འོས་མི་གསུམ་གྱི་བགྲོ་གླེང་ཚོགས་འཛོམས་དང་པོ་དེ་ཨ་རིའི་གྲོང་ཁྱེར་ཆེ་མོ་ནེའུ་ཡོག་གྲོང་ཁྱེར་དུ་གོ་སྒྲིག་གནང་ཐུབ་པ་དེ་ལ་ལྟ་ཕྱོགས་གཉིས་ཡོད། གཅིག་ནི་གྲོང་ཁྱེར་དེ་ཨ་རིའི་གྲོང་ཁྱེར་ནང་ནས་དཔལ་འབྱོར་དང་ཚོང་རའི་ཐོག་སྐད་གྲགས་ཆེ་བའི་གྲོང་ཁྱེར་ཞིག་ཡིན་ནའང་། དེར་འཛམ་གླིིང་མཉམ་འབྲེལ་རྒྱལ་ཚོགས་ཀྱི་བསྟི་གནས་ཡོད་པ་མ་ཟད། རྒྱལ་ཚོགས་ནང་རྒྱ་ནག་གི་གཞུང་ཚབ་ཆེ་མོའི་ལས་ཁུངས་ཀྱང་ཡོད། གྲོང་ཁྱེར་དེར་བཀའ་བློན་ཁྲི་པའི་འོས་མི་ཚོའི་བར་བགྲོ་གླེང་གོ་སྒྲིག་གནང་ཐུབ་པ་དེས་བཙན་བྱོལ་ནང་བོད་མི་ཚོས་འཛམ་གླིང་སྤྱི་མཚུངས་ཡར་ཐོན་ཅན་གྱི་མང་གཙོའི་ལམ་ལུགས་ལག་བསྟར་བྱེད་བཞིན་པ་དེ་རྒྱ་ནག་གི་གཞུང་ཚབ་ལ་བརྡ་གཏོང་ཐུབ་པ་བྱུང་ཡོད། དེ་ནི་བཙན་བྱོལ་བོད་མིའི་མང་གཙོའི་གཟི་བརྗིོད་དེ་རེད། གཉིས་ནི་གྲོང་ཁྱེར་དེ་ནི་བྱང་ཨ་རིའི་ནང་བོད་མིའི་འདུས་སྡོད་ཆེ་ཤོས་དེ་ཡིན་པས་ཕྱི་ཟླ་ ༣ ཚེས་ ༢༠ ཉིན་བཀའ་བློན་ཁྲི་པའི་འོས་བསྡུར་མཉམ་ཞུགས་བྱ་རྒྱུར་བོད་མི་ཚོ་གྲ་སྒྲིག་ཡིན་པ་དེ་ར་འཕྲོད་བྱས་ཡོད། དེར་བརྟེན་གོ་སྒྲིག་གནང་མཁན་ཚོར་ལེགས་གསོལ་དང་ཐུགས་རྗེ་ཆེ་ཞུ་བཞིན་ཡོད།
འོན་ཀྱང་བགྲོ་གླེང་གོ་སྒྲིག་གནང་ཕྱོགས་ལ་ད་དུང་ཡར་རྒྱས་གཏོང་དགོས་པའི་གནད་དོན་མང་པོ་མཐོང་བྱུང་། དེ་དག་ནི་རང་ཉིད་ཀྱིས་བགྲོ་གླེང་དེ་དྲ་རྒྱའི་ཐོག་མཐོང་བའིི་འཆར་སྒོ་ཙམ་ཞིག་ཡིན་པ་ལས་དངོས་སུ་བགྲོ་གླེང་ཚང་འཛོམ་ཐོག་བཅར་ཐུབ་མེད་སྟབས། ས་གནས་ཀྱི་དངོས་ཡོད་གནས་སྟངས་ཇི་བཞིན་ཞུ་ཐུབ་མེད། བགྲོ་གླེང་དངོས་གཞི་མགོ་འཛུགས་མ་གནང་གོང་ས་གནས་སྤྱི་མཐུན་ཚོགས་པའི་ཚོགས་གཙོས་བཀའ་བློན་ཁྲི་པའི་འོས་མི་གསུམ་གྱི་ལོ་རྒྱུས་ངོ་སྤྲོད་གནང་བར་རྒྱས་བསྡུས་ལ་ཁྱད་པར་འདུག རྒྱུན་སྲོལ་ལ་ཆབ་སྲིད་ཀྱི་བགྲོ་གླེང་ཚང་འཛོམས་འདི་འདྲར་ངོ་སྤྲོད་ཀྱི་ལོ་རྒྱུས་གང་ཐུབ་ཀྱིས་ཐུང་བ་གསུང་ཐུབ་ན་དེར་དགེ་མཚན་ཡོད་ཅིང་། མང་དྲགས་ན་འཆད་ལྷག་གི་སྐྱོན་ཡོང་གི་ཡོད། ལྷག་པར་ཆབ་སྲིད་ཀྱི་འགྲན་སྡུར་འདི་ལྟ་བུར་འོས་མིའི་ལོ་རྒྱུས་མང་ཚོགས་ལ་འགྲེལ་བཤད་བྱས་ན། དེས་མིའི་བསམ་བློན་ཤུགས་རྐྱེན་བྱེད་ཉེན་ཡོད་པས་དེ་རིགས་མ་འོངས་པར་འཛེམ་དགོས་པ་གལ་ཆེ་མཐོང་།
ནེའུ་ཡོག་གི་བཀའ་བློན་ཁྲི་པའི་བགྲོ་གླེང་གོ་སྒྲིག་གནང་མཁན་དང་གཙོ་སྐྱོང་བ་གཉིས་ལ་བགྲོ་གླེང་གི་འགྲོ་ལུགས་དང་སྒྲིག་སྲོལ་ཡིག་ཐོག་ཏུ་མེད་པ་ལྟ་བུ་མཐོང་བྱུང་། འོས་བསྡུའི་བགྲོ་གླེང་གོ་སྒྲིག་གནང་སྐབས་བགྲོ་གླེང་གི་འགྲོ་ལུགས་དང་སྒྲིག་སྲོལ་གང་ཡིན་སྔ་ས་ནང་གཏན་འཁེལ་ཟིན་དགོས་པ་མ་ཟད། སྒྲིག་སྲོལ་དེར་བགྲོ་གླེང་ནང་ཞུགས་མཁན་ཚོའི་མོས་མཐུན་གནང་དགོས་པ་དེ་གལ་ཆེན་པོ་རེད། སྒྲིག་སྲོལ་གསལ་པོ་མེད་པའི་རྐྱེན་གྱིས་དྲི་བ་དང་པོ་མགོ་འཛུགས་ཟིན་པ་དང་བགྲོ་གླེང་གཙོ་སྐྱོང་བ་དང་བཀའ་བློན་ཁྲི་པའི་འོས་མི་བློ་བཟང་སེང་གེ་ལགས་གཉིས་རྩོད་པ་བྱུང་སོང་། དེ་ནི་བགྲོ་གླེང་གཙོ་སྐྱོང་བས་ཐག་གཅོད་གནང་སྟངས་ཀྱི་སྐྱོན་རེད་སྙམ། ལན་འདེབས་ཀྱི་དུས་ཚོད་གཏན་འཁེལ་བྱས་པའི་ནང་ལན་གསུང་མཁན་གྱིས་ཚིག་དོན་གང་གསུངས་ཀྱང་། དེར་བགྲོ་གླེང་གཙོ་སྐྱོང་གིས་བཀག་འགོག་གནང་བ་དེ་བཟང་སྤྱོད་དང་འགལ་བ་རེད་སྙམ། གལ་སྲིད་དྲི་བའི་ལན་ཏག་ཏག་མ་གནང་བ་ཡིན་ན་བགྲོ་གླེང་གཙོ་སྐྱོང་བས་དྲི་བ་གཉིས་པ་གཏོང་རྒྱུའི་ལམ་སྲོལ་བཟོ་དགོས་པ་དང་། དེ་རིགས་སྔ་ས་ནས་བགྲོ་གླེང་གི་འགྲོ་ལུགས་དང་སྒྲིག་སྲོལ་ནང་གསལ་པོ་འཁོད་དགོས། སྤྱིར་བཏང་ཆབ་སྲིད་ཀྱི་བགྲོ་གླིང་དང་བཅར་འདྲི་བཅས་ལ་སྲིད་དོན་མི་སྣ་ཚོས་སོ་སོའི་འདོད་ཕྱོགས་ཀྱི་གནས་ཚུལ་དེ་ཨུ་ཚུགས་ཀྱིས་གསུང་སྲོལ་ཡོད་པ་དང་། མང་ཚོགས་ལ་གནས་ཚུལ་དེ་གསལ་པོ་ཆགས་ཐབས་ལ་ལན་དྲང་པོ་གསུང་གི་མེད་ན་ལན་གསལ་པོ་ཐོབ་ཐབས་ལ་བགྲོ་གླེང་གཙོ་སྐྱོང་བ་དང་བཅར་འདྲི་ཞུ་མཁན་ཚོས་གུས་བཀུར་ལྡན་པར་འདྲི་བ་གཉིས་པ་བཏང་སྟེ། ལན་འདེབས་གསལ་པོ་དང་དྲང་པོ་ཞིག་ཐོབ་ཐབས་གནང་དགོས། དེའི་འདྲའི་གནས་སྟངས་བྱུང་ན་ཆབ་སྲིད་པ་ཚོ་ཁོང་ཁྲོ་ལངས་པ་སོགས་ཅི་རིགས་ཡོང་གི་ཡོད་ཀྱང་། དེར་བཟོད་གསོལ་ཞུ་རྒྱུ་ལས་མ་འདས།
ནེའུ་ཡོག་གི་བགྲོ་གླེང་དེར་གཙོ་སྐྱོང་བས་འོས་མི་གསུམ་ལ་དྲི་བ་གཅིག་རིམ་བཞིན་བཀའ་འདྲི་གནང་སྐབས་འདྲི་བའི་ཚིག་དོན་ལ་འགྱུར་བ་ཡང་ཡང་འགྲོ་བ་དང་། དྲི་བའི་ནང་འགྲེལ་བཤད་རྒྱས་བསྡུས་ཀྱིི་སྐྱོན་བྱུང་སོང་སྙམ། དྲི་བའི་ངོ་བོ་གཅིག་ཡིན་ནའང་། འོས་མི་སོ་སོར་དྲི་བ་དེ་བསྐྱར་ཟློས་གནང་སྐབས་ཚིག་ལྷག་དང་། འགྲེལ་བཤད་མི་འདྲ་བ་གནང་སྟེ་ལན་གནང་མཁན་ཚོས་གོ་བ་མི་འདྲ་བ་བཞེས་ཏེ་ལན་འདེབས་གནང་སོང་། དཔེར་ན། ཡང་སྲིད་ངོས་འཛིན་ཞུ་ཕྱོགས་ཀྱི་གནད་དོན་ཐོག་བློ་བཟང་སེང་གེ་ལགས་དང་བཀྲས་མཐོང་བསྟན་འཛིན་རྣམ་རྒྱལ་ལགས་གཉིས་ཀྱིས་སྐུ་ཕྲེང་བཅུ་པའི་ཡང་སྲིད་ངོས་འཛིན་ཞུ་ཕྱོགས་སྐོར་ལན་གནང་ནའང་། བཀྲ་ཤིས་དབང་འདུས་ལགས་ཀྱིས་༧གོང་ས་མཆོག་གི་སྐུ་ཁམས་དང་འབྲེལ་བའི་ལན་འདེབས་གནང་སོང་བ་དེ་ནི་བགྲོ་གླེང་གཙོ་སྐྱོང་གིས་འོས་མི་གསུམ་སོ་སོར་དྲི་བ་གནང་སྐབས་འགྲེལ་བཤད་ཀྱི་ཚིག་བརྗོད་མི་འདྲ་བ་བྱུང་བ་ལ་བརྟེན་ནས་རེད་སྙམ།
སྤྱིར་བཏང་འོས་བསྡུའི་བགྲོ་གླེང་གནང་སྐབས་དྲི་བ་གཏོང་མཁན་གྱིས་ཡིག་ཐོག་དྲི་བ་གཅིག་འགྱུར་བཏང་ན་ལེགས་ཤོས་དང་དྲང་ཤོས་ཡོང་གི་ཡོད། སྐབས་རེར་བོད་མིའི་བསམ་བློར་བགྲོ་གླེང་ནང་དྲི་བ་གཏོང་སྟངས་དང་བཅར་འདྲི་གླེང་མོལ་ཞུ་སྐབས། དྲི་བ་གཏོང་སྟངས་ལ་ཁྱད་པར་ཡོད་པ་དེ་གསལ་པོ་མ་རྟོགས་པར་གནང་ཕྱོགས་གཅིག་འགྱུར་གནང་གི་འདུག དེ་ནི་སྐྱོན་རེད། འོས་བསྡུའི་བགྲོ་གླེང་སོགས་ཆབ་སྲིད་ཀྱི་བགྲོ་གླེང་ནི་ཤིན་ཏུ་ཚོར་སྣང་སྐྱེན་པ་དང་དྲི་བ་སོ་སོར་ལན་འདེབས་གནང་རྒྱུའི་དུས་ཚོད་རྒྱས་བཅད་ཡོད་པར་བརྟེན། ཐད་ཀར་དྲི་བ་གཏོང་བ་ལས་དེའི་ནང་འགྲེལ་བཤད་སོགས་གང་ཉུང་གནང་དགོས་པ་དེ་གཞི་རིམ་གྱི་དགོས་མཁོ་ཞིག་རེད་སྙམ། འདྲི་བའི་ལན་འདེབས་གནང་རྗེས་གསལ་བཤད་གནང་རྒྱུར་གོ་སྐབས་གཅིག་འགྱུར་གནང་དགོས་པ་དང་། གསལ་བཤད་ཐེངས་གཅིག་ལས་མང་བའི་གོ་སྐབས་གནང་ན་མི་རུང་། དཔེར་ན་ནེའུ་ཡོག་གི་བགྲོ་གླེང་ནང་དེ་འདྲའི་གནས་སྟངས་ཐེངས་གཅིག་གཉིས་བྱུང་སོང་སྙམ། དེ་ནི་བགྲོ་གླེང་ལ་གཏམ་བཤད་གནང་རྒྱུར་དུས་ཚོད་ཆ་སྙོམ་བཟོས་པ་དང་རྒྱབ་འགལ་ཡིན་པ་མ་ཟད། དེས་རྩོད་པ་རྒྱག་རྒྱུར་ཉེན་ཡོད། དེ་ནས་བགྲོ་གླེང་གི་སྒྲིག་སྲོལ་དང་ལམ་ལུགས་གསལ་པོ་མ་བཟོས་པའི་སྐྱོན་གཅིག་ནི་ལན་འདེབས་གནང་མཁན་གྱི་གོ་རིམ་ལ་བགྲོ་གླེང་མགོ་འཛུགས་ཟིན་རྗེས་བློ་བཟང་སེང་གེ་ལགས་ཀྱིས་དགོངས་ཚུལ་གསུངས་རྗེས་འགྱུར་བ་གཏོང་དགོས་བྱུང་སོང་བ་དེ་རེད། ལན་གནང་མཁན་སྔ་རྟིང་ཇི་ལྟར་གཏན་འཁེལ་གནང་དགོས་པ་བཅས་བགྲོ་གླེང་གི་སྒྲིག་སྲོལ་ནང་གསལ་ཡོད་པ་བཞིན་གཏན་འཁེལ་གནང་བ་ཡིན་ན། བགྲོ་གླེང་གནང་བཞིན་པའི་མུར་དགོངས་ཚུལ་གསུང་དགོས་ཆགས་རྒྱུ་མིན་པ་མ་ཟད། དེ་འདྲའི་གནས་ཚུལ་བྱུང་བ་དེས་བགྲོ་གླེང་གི་དྲང་ཚུགས་ལའང་འདྲི་བ་ཡོང་ངེས་ཡིན།
གཞི་རྩའི་བགྲོ་གླེང་གོ་སྒྲིག་གནང་བ་མ་ཟད། དེ་ཡང་དྲ་རྒྱའི་བརྒྱུད་འཛམ་གླིང་ཕྱོགས་མཐར་གཟིགས་ཐུབ་པའི་ཆ་རྐྱེན་བཟོས་པ་བཅས་ནི་བོད་མིའི་མང་གཙོའི་བརྒྱུད་རིམ་གོང་འཕེལ་གཏོང་རྒྱུར་གལ་ཆེའི་གཞོག་འདེགས་ཡིན་པས་བསྔགས་འོས་སུ་གྱུར། འོན་ཀྱང་ལས་དོན་ཇི་འདྲ་ཞིག་བརྩམས་ནའང་། སྤུས་ཚད་ལྡན་པ་གནང་ཐབས་ལ་འབད་བརྩོན་གནང་དགོས་པ་དེ་ཤིན་ཏུ་གལ་ཆེ་རེད་སྙམ། གལ་སྲིད་མ་འོངས་པར་བགྲོ་གླེང་དེ་རིགས་གོ་སྒྲིག་གནང་མཁན་ཡོད་ཚེ། དྲ་རྒྱའི་ནང་གྷོ་གྷིལ་བརྒྱུད་དེ་ཨ་རིའི་སྲིད་འཛིན་འོས་མིའི་བགྲོ་གླེང་གནང་སྟངས་སྐོར་དྲ་རྒྱ་མང་པོ་ཡོད་པ་འཚོལ་ཞིབ་གནང་སྟེ། གནས་ཚུལ་མང་པོར་སློབ་སྦྱོང་གནང་རྒྱུ་ཡོད་པས་ངེས་པར་གོ་སྒྲིག་གནང་མཁན་ཚོས་གོ་སྒྲིག་གནང་ཕྱོགས་ལ་སློབ་སྦྱོང་གནང་དགོས་པ་མ་ཟད། བགྲོ་གླེང་གཙོ་སྐྱོང་གནང་མཁན་ཚོས་ཀྱང་དེ་ནས་སློབ་སྦྱོང་གནང་ནས་ཡར་རྒྱས་གཏོང་དགོས་པའི་འབོད་སྐུལ་ཞུ་རྒྱུ་ཡིན།
བགྲོ་གླེང་གོ་སྒྲིག་གནང་སྐབས་གཅིག་འགྱུར་གྱི་འགྲོ་ལུགས་དང་སྒྲིག་སྲོལ་ཡོད་དགོས་པ་དེ་མེད་དུ་མི་རུང་བའི་དགོས་མཁོ་ཞིག་ཡིན་པ་དང་། དེ་ཡང་དངོས་གཞིའི་བགྲོ་གླེང་མགོ་འཛུགས་མ་གནང་གོང་འོས་མི་ཚོས་མོས་མཐུན་ཁས་ལེན་ཞུས་ཏེ། གཏན་འབེབས་གནང་དགོས་པ་ནི་ཧ་ཅང་གལ་ཆེ་བ་རེད། དཔེར་ན། ནེའུ་ཡོག་གྲོང་ཁྱེར་ནང་བགྲོ་གླེང་གནང་སྐབས་ལན་འདེབས་གནང་མཁན་སྔ་རྟིང་སུ་ཡིན་འོས་མི་གསུམ་སྡིངས་ཆར་ཕེབས་ཟིན་རྗེས་རྒྱན་དཀྲུགས་གནང་བ་དེ་ཤིན་ཏུ་མི་འོས། དེ་བཞིན་དྲ་རྒྱ་བརྒྱུད་བགྲོ་གླེང་རྒྱང་སྲིོང་གནང་གི་ཡོད་པར་བརྟེན་པར་ཆས་འཛུགས་སྟངས་ཡང་གཅིག་མཚུངས་བཟོ་ཐབས་ཀྱི་འབད་བརྩོན་གནང་དགོས་པ་ཡིན། དཔེར་ན། ནེའུ་ཡོག་གི་བགྲོ་གླེང་ལ་བརྙན་པར་ལེན་མཁན་ཚོར་པར་ཆས་གཅིག་ལས་མེད་པ་དེ་གཡོན་ངོས་སུ་བཞག་འདུག་པ་དེས་བློ་བཟང་སེང་གེ་ལགས་པར་ཆས་དང་ཉེ་བོ་ཡོད་པ་དེས་གསལ་པོ་མངོན་ཐུབ་ནའང་། བཀྲས་མཐོང་བསྟན་འཛིན་རྣམ་རྒྱལ་ལགས་པར་ཆས་ནས་ཐག་རིང་ཙམ་ཡོད་པར་བརྟེན་ཞལ་རས་གསལ་པོ་མཐོང་མི་ཐུབ་པ་མ་ཟད། སྐབས་རེར་ཞལ་རས་ཀྱི་ཕྱོགས་གཅིག་མ་གཏོགས་གསལ་པོ་མ་མཐོང་བ་སོགས་སྐྱོན་ཆ་འདུག གཅིག་བྱས་ན་དེ་དག་གནད་འགག་ཆེན་པོ་ཡིན་པར་ངོས་འཛིན་གནང་མེད་སྲིད་ཀྱང་། དྲ་རྒྱ་གཟིགས་མཁན་ཚོར་ཁྱད་པར་ཆེན་པོ་ཡོང་གི་ཡོད། རྒྱང་སྲིང་གི་ལས་རིགས་ལ་མཁས་པ་ཚོས་པར་ཆས་འཛུགས་སྟངས་ལ་ཁྱད་པར་ཆེན་པོར་ངོས་འཛིན་གནང་གི་ཡོད་མ་ཟད། སྡིངས་ཆར་གློག་འོད་རིགས་སྒྲིག་སྟངས་ཀྱིས་ཁྱད་པར་ཆེན་བཟོ་ཡི་ཡོད་པར་ངོས་འཛིན་བྱས་ཏེ། གྲ་སྒྲིག་གི་ལས་དོན་དེ་ཚོར་དུས་ཚོད་མང་པོ་གཏོང་སྲོལ་ཡོད།
མ་འོངས་པར་ད་དུང་བཀའ་བློན་ཁྲི་པའི་བགྲོ་གླེང་རིམ་པར་གོ་སྒྲིག་གནང་འཆར་ཡོད་ངེས་པར་བརྟེན། ད་ལམ་ནེའུ་ཡོག་ཏུ་གོ་སྒྲིག་གནང་བའི་བཀའ་བློན་ཁྲི་པའི་འོས་མི་གསུམ་གྱི་བགྲོ་གླེང་གི་གནས་ཚུལ་རྣམས་དཔེ་མཚོན་ཙམ་དུ་ཞུས་ནས་མ་འོངས་པར་གོ་སྒྲིག་གནང་ཕྱོགས་ལ་ཕན་ཁྱད་ཅུང་རེ་ཡོང་རེ་ཐོག་བསམ་ཚུལ་འདི་སྤེལ་བ་ཡིན།
ཕྱོགས་འཛིན་གྱི་རྣམ་རྟོག་ཉུང་ལ་མཁྱེན་བརྩེའི་བློ་མིག་གསལ་བའི་ན་གཞོན་སྤོབ་པ་ཅན་ཞིག་བཀའ་བློན་དུ་ཡོངས་བ་ཤོག
དྲ་གྲོགས་ཚོའི་ཐུགས་ལ་ངེས་དགོས་པ་ནི།
ཐོག་མར་རང་ཉིད་ཀྱིས་ད་ལྟ་བར་བོད་མི་རིགས་ཀྱི་ཆེད་དུ་ལས་ཀ་ཅི་ཞིག་བྱས་འདུག་གམ། ད་ལྟ་ག་རེ་བྱེད་ཀྱིན་འདུག་གམ། མ་འོངས་པར་ཅི་ཞིག་བྱ་རྩིས་འདུག་གམ། གང་ཞིག་བྱ་ཐུབ་ས་རེད་དམ་ཞེས་རང་ཉིད་ཀྱིས་རང་ཉིད་ལ་དྲི་བ་བཏང་། དེ་ནས་ལན་འདེབས་ཐུབ་ཀྱིན་འདུག་དང་མི་འདུག་གཟིགས་ཏེ། ཐོག་མར་རང་ཉིད་ཀྱང་རྒྱ་མར་འདེགས་རྒྱུ་དེ་གལ་ཆེན་པོ་མ་རེད་དམ།
ལྷག་པར་རང་བློ་རང་ལ་ལྐོག་ཏུ་མ་གྱུར་པ་ཡིན་སྟབས། བཀའ་ཁྲིའི་འོས་མི་སུ་དང་གང་ཞིག་འོས་མིན་དེ་བློ་གཟུར་བོར་གནས་པའི་ཐོག་ནས་རང་ཉིད་ཀྱི་འོས་ཤོག་གཅིག་པུ་དེ་འཕྲོ་བརླག་མི་འགྲོ་བ་ཞིག་དང་། རང་ཉིད་ཀྱི་འོས་མི་དེར་ཡིད་ཆེས་བློས་འགེལ་ཐོག་ནས་འོས་བླུག་དགོས་པ་ཡིན། དེ་ལྟར་བྱུང་ན་རང་ཉིད་ཀྱི་ལས་འགན་ཡང་འགྲུབ་པ་ཡིན་ལ། བོད་མི་རིགས་ཀྱི་སྤྱི་ཚོགས་འགན་ཁུར་ཞིག་ཀྱང་ཁྱེད་ཀྱིས་བསྒྲུབས་ཡོད་སྟབས། ཁྱོད་ཀྱང་བློ་བདེ་བག་ཕེབས་ངང་གནས་ཐུབ་ངེས་རེད།
སྤྱིར་བོད་མིའི་སྤྱི་ཚོགས་ཀྱི་གོམས་གཤིས་ཤིག་ལ་བོད་པ་གང་རུང་ཞིག་གི་མགོ་བོ་གཟེངས་སུ་ཐོན་གྱི་འདུག་ན། དེའི་མགོར་དབྱུག་པ་གཞུ་རྒྱུ་དེ་བོད་མིའི་རང་གཤིས་ལྟ་བུར་གྲུབ་འདུག་སྙམ། དེ་ལྟའི་དཔེ་མཚོན་ནི་སོ་སོས་ཐུགས་བསམ་བཞེས་དང་། གཡས་གཡོན་ཉེ་འབྲེལ་སོགས་ག་ས་གང་ནས་མཐོང་ངེས་རེད། ད་དུང་ཆོལ་ཁ་དང་ལུང་ཚན་སེམས་ཁོང་གི་གཅེས་འཛིན་གོང་བུར་གྱུར་ཏེ། བོད་སྤྱི་ཡི་བདེ་སྡུག་ཐོག་དགོངས་བཞེས་མི་གནང་བར་གང་དྲན་དྲན་ཐོག་རང་གི་ཕྱོགས་གཏོགས་བྱེ་བྲག་པ་གཅིག་ལ་ཤི་འཐམ་རོ་འཐམ་བྱེད་མཁན་དེ་ཚོས་སྤྱི་ཚོགས་འདིའི་ཞི་བདེ་ལྷིང་འཇགས་དཀྲོག་གིན་འདུག དྲ་ངོས་སུ་མཆན་བུ་གང་དང་ཅི་ཞིག་འདེབས་མི་འདེབས་དེ་རང་དབང་རེད། འོན་ཀྱང་རང་དབང་ལ་ཡང་ཚད་གཞི་གཅིག་ཡོད་ངེས་རེད། ཁ་ནས་གང་ཐོན་བཤད་ཅིང་བོད་མི་ནང་ཁུལ་ཚིག་གི་མཚོན་ཁ་བསྐོར་ན། ར་སྤུས་བཟོས་པའི་འུར་རྡོ་ར་ཡི་མགོ་ཐོག་ཏུ་ལྷུང་བའི་དཔེ་ལས་མ་འདས་པས་དེ་དོན་ཐུགས་ལ་འཇོག་རོགས།
བཀའ་བློན་གྱི་འོས་གཞི་སུ་ཡིན་རུང་དེ་དང་དེའི་སྐྱོན་ཡོན་གླེང་ཆོག་ཀྱང་གླེང་སྟངས་དེ་ཡང་རང་ཉིད་མི་ཞིག་ཡིན་པ་གཞིར་བཞག་སྐད་ཆ་ཤོད་དགོས་ལ། རང་ཉིད་ཀྱིས་ཉིད་ལ་ཞུ་དག་གཏོང་གིན་ད་གཟོད་གཞི་ནས་གཞན་དག་གླེང་ན་འོས་ཤིང་འཚམ་པ་ཞིག་མ་རེད་དམ། ང་ནི་བོད་མི་སྤྱིར་བཏང་བ་ཞིག་ཡིན་པའི་ངོས་ནས་རང་ཉིད་ཀྱི་སེམས་ཚོར་ཞིག་འདིར་ཤོད་ཀྱིན་ཡོད་པས། སེམས་ཚོར་དེ་སེམས་ཚོར་དུ་གཟིགས་རོགས།
མྱི་དགའ་བའི་གཏམ་་ལ་འདྲ་རྒྱུ་མེད།
དྲི་བའི་ནང་དོན་གཅིག་ཡིན་ཡང་དྲི་བ་གཏོང་ཕྱོགས་མི་འདྲ་བ་ནི་སྐད་ཡིག་གི་སྒྱུ་རྩལ་དང་ཐུན་མིན་གྱི་ཁྱད་ཆོས་རེད། རང་མི་རིགས་ཀྱི་སྐད་ཡིག་གི་སྟེང་ནས་དྲི་བ་བཏང་བའང་མགོ་མ་འཚོས་པ་ན་བཀའ་ཁྲིའི་འོས་ཁོངས་སུ་བཞུགས་པའི་ཆ་རྐྱེན་གང་ཡོད།