ཨ་རྒྱའི་དམག་དོན་འགལ་བ།

ཁ་སང་ཕྱི་ཚེས་ ༡༡ ཉིན་གྱི་ཉིན་གུང་ཆུ་ཚོད་ ༡ ཙམ་ལ་ཟི་ཁྲོན་ཁྲིན་ཏུའུ་རུ་རྒྱ་ནག་གི་རིམ་པ་བཞི་བའི་ J-20 རྟགས་ཅན་གྱི་དམག་འཐབ་འཕུར་གྲུ་དེ་ཚོད་ལྟ་ཐོག་མ་བྱས་ཡོད་འདུག་ལ། དེ་ནི་ཨ་རིའི་རྒྱལ་སྲུང་བློན་ཆེན་རའོ་བྷིར་ཊི་(Robert Gates) ལགས་རྒྱ་ནག་ནང་དམག་དོན་གཟིགས་སྐོར་གྱི་སྐབས་དང་འཁེལ་ཡོད་འདུག ཁ་སང་ཕྱི་དྲོར་སྲིད་འཛིན་ཧུའུ་ཅིན་ཐའོ་དང་རའོ་བྷིར་ཊི་གཉིས་ཐུག་འཕྲད་སྐབས། ཧུའུ་ཡིས་ཐེངས་འདིའི་དམག་འཐབ་འཕུར་གྲུའི་ཚོད་ལྟ་དང་ཨ་རྒྱ་གཉིས་ཀྱི་དམག་དོན་གྲོས་མོལ་ལ་འབྲེལ་བ་གང་ཡང་མེད་སྐོར་བརྗོད་འདུག

ཨ་རིའི་རྒྱལ་སྲུང་བློན་ཆེན་རའོ་བྷོ་ཁྲི་ཡིས་གསར་འགོད་པའི་བཅར་འདྲི་དང་ལེན་བྱེད་སྐབས། སྤྱིར་ཡིན་ན་རྒྱ་ནག་གིས་དམག་འཐབ་འཕུར་གྲུའི་ཚོད་ལྟ་དེ་ཐེངས་འདིར་ཕྱིར་འཐེན་བྱ་དགོས་པ་ཞིག་ཆགས་ཡོད་ལ། རྒྱ་ནག་གི་སྲིད་དོན་དཔོན་རིགས་དང་དམག་དོན་དཔོན་རིགས་བར་གྱི་འབྲེལ་ལམ་ལ་བར་སྟོང་ངེས་ཅན་ཞིག་ཡོད་པ་མ་ཟད། རྒྱ་ནག་གི་དམག་དཔུང་གིས་སྐབས་རེར་གང་འདོད་དུ་འགུལ་སྐྱོད་བྱེད་ཀྱིན་ཡོད་པ་དེར་བློ་འཚབ་ཡོད་ལུགས་ཀྱང་བརྗོད་འདུག 

མིང་བརྗོད་འདོད་མེད་པའི་ཨ་རིའི་དཔོན་རིགས་ཤིག་གིས་གསར་ལམ་ཁག་ཏུ། ཐེངས་འདིར་ཨ་རིའི་རྒྱལ་སྲུང་བློན་ཆེན་རྒྱ་ནག་དུ་དམག་དོན་གཟིགས་སྐོར་དུ་སྐྱོད་བཞིན་པའི་སྐབས་དང་། དེ་བཞིན་རྒྱ་ནག་གི་སྲིད་འཛིན་ཧུའུ་ཅིན་ཐའོ་ཨ་རིར་རྒྱལ་དོན་འཚམས་གཟིགས་སུ་ཕེབས་རྒྱུར་བདུན་ཕྲག་གཅིག་ལས་མེད་པའི་སྐབས་འདིར། གནས་ཚུལ་དེའི་རིགས་བྱུང་བ་དེར་ཨ་རིའི་དཔོན་རིགས་ཚོའི་ངོས་ནས་བློ་འཚབ་བྱེད་ཀྱི་འདུག ཅེས་བརྗོད་འདུག

ཐེངས་འདིར་ཆབ་སྲིད་དཔྱད་བརྗོད་པ་འགའ་རེ་ཡིས་ཕྱི་ལོ་ ༢༠༠༧ ལོར་ཨ་རིའི་རྒྱལ་སྲུང་བློན་ཆེན་རའོ་བྷོ་ཁྲི་ལགས་ཀྱིས་ཡོང་ཁྱབ་གསལ་བསྒྲགས་སྤེལ་ཏེ། རྒྱ་ནག་གིས་ཕྱི་ལོ་ ༢༠༢༠ ལོའི་བར་དུ་དམག་འཐབ་འཕུར་གྲུ་བཀོལ་སྤྱོད་བྱེད་པའི་ནུས་པ་མེད་སྐོར་བརྗོད་ཡོད་པར་བརྟེན། ཐེངས་འདིར་ཁོང་རྒྱ་ནག་ནང་དམག་དོན་གཟིགས་སྐོར་དུ་ཕེབས་པའི་གོ་སྐབས་དང་བསྟུན་ཏེ། རྒྱ་དམག་གིས་རྐང་བཙུགས་ཏེ་ཁོང་ལ་རྒྱ་ནག་གི་ནུས་སྟབས་གསལ་འདེབས་དང་། ཨ་རིའི་དམག་དོན་སྒྲིག་འཛུགས་ལ་འགྲན་བསླངས་བ་ཡིན་སྐོར་བརྗོད་ཡོད།  

འདིའི་སྐོར་ལ་ཧོང་ཀོང་གི་དམག་དོན་དབྱེ་ཞིབ་པ་ཕེན་ཁི་ཧྥུ་ཡིས་བྷེ་བྷེ་སི་གསར་ཁང་ལ་བརྗོད་དོན། རྒྱ་ནག་གི་ J-20 རྟགས་ཅན་གྱི་དམག་འཐབ་འཕུར་གྲུ་དེ་ནི།  རྒྱ་ནག་རང་གི་དམག་འཐབ་འཕུར་གྲུ་རིམ་པ་བཞི་བའི་ཚད་གཞི་ཙམ་ལས། རྒྱལ་སྤྱིའི་ཚད་ལྡན་གྱི་དམག་འཐབ་འཕུར་གྲུ་རིམ་པ་བཞི་བ་ཅན་དག་དང་། ཨུ་རུ་སུའུ་དམག་འཐབ་འཕུར་གྲུ་རིམ་པ་ལྔ་བ་བཅས་དང་བསྡུར་ན། ད་དུང་སྒྲིག་འགོད་དང་ལག་རྩལ་གང་ཅིའི་ཐད་ཧ་ཅང་རྒྱང་ཐག་རིང་པོ་རེད། ཅེས་བརྗོད་འདུག

ཕྱི་ཚེས་ ༡༠ ནས་ཉིན་བཞིའི་རིང་ཨ་རིའི་རྒྱལ་སྲུང་བློན་ཆེན་ཀེ་ཚི་ལགས་ཀྱིས་ཨ་རྒྱ་གཉིས་ཀྱི་དམག་དོན་འགལ་བ་བསྐྱར་གསོ་དང་། བྱང་ཀོ་རི་ཡ་དང་སུའུ་ཊན་གྱི་རྡུལ་མཚོན་གནད་དོན་བཅས་ལ་གྲོས་མོལ་བྱས་ཡོད་ཀྱང་། ཨ་རྒྱ་གཉིས་ཀྱི་གཞི་རྩའི་དམག་དོན་གྱི་འགལ་བ་སེལ་ཕྱོགས་སྐོར་ལ་དོན་འབྲས་གང་ཡང་སོན་མེད།

གསར་འགོད་པ། ཚེ་རིང་རྒྱལ།