བོད་ཀྱི་ལོ་གསར་གཅིག་གྱུར་བྱ་རྒྱུ་ཡིན།

སྐྱིད་སྡུག་མཉམ་མྱོང་བྱ་དགོས་ཟེར། སྐྱིད་ཀྱི་ལོ་སར་སོ་སོ་ཟེར། མི་རིགས་རིག་གཞུང་གཅིག་གྱུར་ཟེར། དུས་ཆེན་ལོ་སར་མི་གཅིག་ཟེར། རྒྱ་ལོའི་ལོ་སར་ཟེར་བ་འདི། དོན་ལ་ཧོར་གྱི་ལོ་སར་ཡིན། སྲིད་ཀྱི་འགྱུར་འགྲོས་མ་གོ་བར། སྲིད་མིན་ཐག་གཅོད་བྱེད་པ་མཚང།
ལོ་ནམ་སར་ཁྱད་པར་མི་ཆེ་ཡང། སྐྱིད་སྡུག་གི་ངོ་བོ་མཚོན་གལ་ཆེ།
སྲོལ་སར་བ་སར་བ་མ་ཕྱེས་ན། ལམ་སར་བ་སར་བ་གང་ནས་རྙེད།
ཁྱིམ་ཆེ་རུ་ཆ་རུ་མ་བཏང་ན། བོད་ཆོལ་གསུམ་ཁྱིམ་གཅིག་ག་ལ་ཤོང།དོན་འདི་ལ་གནད་འགག་མི་ཆེ་ན། རྒྱ་དམར་པོས་འགོག་སྡོམ་ཅི་ལ་བྱེད། དོན་དེ་བས་ལོ་སར་གཅིག་གྱུར་གལ།

བོད་ཀྱི་ལོ་རྒྱུས་ནང་དུ་རྒྱུ་རྐྱེན་སྣ་ཚོགས་པའི་དབང་གིས་ཆོལ་ཁ་གསུམ་གྱི་སྐད་དང་གོམས་གཤིས་ལ་སོགས་པ་གཅིག་གྱུར་མ་ཡོང་བར་ཁ་ཐོར་དུ་གནས་དགོས་བྱུང་བ་དང་ད་ལྟའི་ཆར་འཛམ་གླིང་གི་ཆོས་ཉིད་ལ་ལྡོག་ཏུ་མེད་པར་མི་རྣམས་ཀྱི་བསམ་བློའི་འདུ་ཤེས་ལ་འགྱུར་བ་འགྲོ་བཞིན་པ་ལྟར་དུ་བོད་འདི་ཡང་སིལ་བུར་ཐོར་བའི་ཀྱག་ཀྱོག་གི་དཀའ་སྡུག་མང་བོའི་ཁྲོད་དུ་དུས་རབས་ཀྱི་འགྲོས་ལྟར་གཅིག་གྱུར་གྱི་ལྟ་བའི་མྱུ་གུ་འབུ་བཞིན་པ་འདི་ནི་བདེ་སྐྱིད་ཀྱི་ལམ་ཁ་བཟང་བོ་ཞིག་དང་ཕྱི་ནང་མི་དམངས་ཀྱི་འདོད་བློ་དང་མ་འོངས་པའི་རང་རེའི་འཐབ་རྩོད་ཅིག་ཀྱང་ཡིན།

ང་ལྷ་སའི་ལོ་གསར་ལ་ཆ་རྒྱུས་དེ་ཙམ་མེད་མོད་ང་ཚོས་ལོ་རྟག་པར་བརྙན་འཕྲིན་ལས་མཐོང་བའི་ལྷ་སའི་ལོ་གསར་དེ་ནི་རྒྱ་བོད་ཤན་སྦྱར་གྱི་ལོ་སར་ཞིག་རེད། འོན་ཀྱང་ཨ་མདོའི་ལོ་སར་བོད་གོས་གྱོན། བོད་སྐད་བཤད། བོད་གླུ་བླངས་སྟེ་བོད་ཀྱི་ལོ་སར་འདི་འདྲ་ཞིག་ལོས་ཡིན་བསམ་པ་ཞིག་སར་གིན་ཡོད་ལ། ལོ་རེ་བཞིན་སྙིགས་དོར་བཅུད་ལེན་ལ་འབད་བཞིན་ཡོད། ལྷ་སའི་ལོ་སར་དེ་ལས་ལྡོག་སྟེ་རྒྱའི་ལོ་སར་དང་འདྲ་བར་རྒྱ་འཁྲབ་སྟེགས་ཇུས་འགོད་བྱེད་སྟངས་དང་གུང་ཁྲན་ཏང་ལ་བསྟོད་གླུ་ལེན་སྟངས་སོགས་ཚད་བརྒལ་རང་བཞིན་གྱི་སྤྲེལ་ལད་སྤྲོ་ཚོགས་ཤིག་ཡིན་པ་ལས་བོད་རྒྱ་སུ་ཞིག་གི་ལོ་སྟངས་ཤིག་མིན། རྒྱའི་ལོ་སར་ལ་ཡང་གུང་ཁྲན་ཏང་ལ་བསྟོད་གླུ་འདི་འདྲ་ལེན་སྲོལ་མི་འདུག ན་ནིང་གི་ལྷ་སའི་ལོ་སར་ལ་ལྟོས་དང་རྒྱ་སྐད་མི་གོ་མཁན་ཞིག་ཡིན་ན་ལོ་སར་གྱི་སྤྲོ་ཚོགས་ལ་རོལ་མྱོང་བྱ་ཐབས་མི་འདུག. ད་ནི་ང་ཚོས་འགྱུར་བ་ཞིག་གཏོང་ན་ལོ་སར་སྟངས་ལ་འགྱུར་བ་ཞིག་གཏོང་དགོས་པར་སྣང་།

གླེན་འགའ་ཞིག་གིས་སྐྱིད་ན་སྐྱིད་མཉམ་སྡུག་ན་སྡུག་མཉམ་བྱེད་ན་ལོ་གསར་མཉམ་གཏོང་བྱེད་དགོས་ཟེར་བ་ནི་ལྐུགས་རྟགས་རང་རེད།
ང་ཚོ་ཡར་ཐོན་ཅན་གྱི་རྒྱལ་ཁབ་ལ་མིག་དཔེ་བལྟ་མི་དགོས་སམ།
ཨ་རི་སྟོབས་ཆེན་རྒྱལ་ཁབ་ལྟོས་དང་ཁོང་ཚོ་སྐྱིད་ན་སྐྱིད་མཉམ་སྡུག་ན་སྡུག་མཉམ་རེད་དེ།་
མངའ་སྡེ་རེ་རེ་ལ་ཁྲིམས་ལུགས་སོ་སོར་ཡོད་པ་རེད་མ་ཟད་དར་ཆ་ཡང་མི་འདྲ་བ་དེ་འདྲ་ཡོད་འདུག་པས།
ད་ཁོང་ཚོ་རྗེས་ལུས་དང་སྐྱིད་སྡུག་མི་མཉམ་པའི་རྒྱལ་ཁབ་རེད་དམ།
བཅོས་དགོས་ན་ད་ལྟའི་ལོ་ཐོ་འདི་དག་བཅོས་དགོས།
ད་འོ་ན་ཆོལ་ཁ་གསུམ་ཆ་ལུགས་གཅིག་སྐད་གདངས་གཅིག
བྱེད་དགོས་སམ་
ད་དུང་ཆོས་ལུགས་གཅིག་བྱེད་དགོས་སམ།
བོད་མི་ཐམས་ཅད་ནང་ཆོས་བྱེད་དགོས་སམ།
དེ་འདྲའི་བསམ་ཚུལ་ནི་རྒྱ་གུང་ཕྲན་ལས་ཀྱང་གདུག་འཚུབ་ཆེ་བ་ཞིག་གོ།

ལོ་སར་གཅིག་འགྱུར་བྱེད་པར་རྒྱབ་སྐྱོར་ཡོད། རྒྱུ་མཚན་མང་དུ་ཡོད།
གཞིས་བཞུགས་བོད་མི་ཁོང་ཚོའི་ལ་རྒྱ་དང་སེམས་ཤུག ཆོད་སེམས་དང་སྙིང་སྟོབ་ནི་ཆེས་བསྔགས་འོ་སུ་མཐོང་།
མ་ཟད། བོ་ལ་ལོ་གསར་བརྩི་ལུགས་མང་བ་ལ་མ་ལྟོས་པར། ལོ་སར་གཅིག་འགྱུར་བྱེད་མི་ཐུབ་པ་ཞིག་མ་རེད། རྒྱུ་མཚན་ནི། སྔོན་ང་ཚོ་ཆོལ་ཁ་གསུམ་སོགས་ཕན་ཚུན་འགྲིུམ་འགྲུལ་མི་བདེ་བ་དང་། ཀུན་ལ་གཅིག་འགྱུར་གྱི་གསར་འགྱུར་བརྒྱུད་ལམ་སོགས་མེད་ཕྱིར་རིག་གཞུང་དང་ལུགས་སྲོལ་མང་བོ་ཞིག་གཅིག་འགྱུར་ཤུན་དུ་དཀའ་ནའང་། ད་ལྟ་དེ་ལས་ལྡོག་ཏེ་གསར་འགྱུར་བརྒྱུད་ལམ་མང་བོ་གཅིག་འགྱུར་ཡོད་པ་སོགས་ཀྱིས་ང་ཚོའི་ལོ་གསར་སོགས་གཅིག་འགྱུར་བྱ་བར་དེ་ཙམ་མི་དཀའ་ལ། མ་ཟད་གལ་ཏེ་གཅིག་འགྱུར་མ་བྱས་ན་བརྒྱུད་ལམ་ཁག་ནས་རྒྱང་སྤྲང་བྱེད་མི་བདེ་བ་སོགས་མགོ་འཐོམས་རྙོགས་འཛངས་ཆེ་བ་ད་ལྟ་ལ་ལྟོས་དང་ཤེས་སླ།
གཅིག་འགྱུར་བཏང་ན་དེ་ལས་ལྡོག་པའི་དགེ་མཚན་མང་དུ་ཡོད། གཅིག་འགྱུར་གཏོང་ལུགས་དེའང་གཞིས་བྱེས་གཅིག་འགྱུར་གྱི་བོད་གཞུང་སྨན་རྩིས་ཁང་གི་སྐར་རྩིས་ལ་གཏུག་ན་ཡག་ཤོས་ཡིན། རྒྱུ་མཚན་ནི། བརྩིས་དེ་ནི་བྱང་ཤམ་བ་ལ་ནས་བརྒྱུད་པའི་དཔལ་དུས་ཀྱི་འཁོར་ལོའི་ཟབ་ཆོས་ལ་ཕྱི་ནང་གཞན་གསུམ་ཀྱི་དུས་འཁོར་ཡོད་པའི་ནང་ཚན། ཕྱི་དུས་ཀྱི་འཁོར་ལོའི་ལུགས་སུ་བརྩིས་ཡོད་ཕྱིར། བརྩི་སྲོལ་གཞན་ལས་ཁྱད་དུ་འཕགས་ཡོད་ལ། བོད་ཀྱི་ཐུན་མོང་མ་ཡིན་པའི་ཁྱད་ཆོས་ལྡན་ཡོད། མ་ཟད། བརྩི་ལུགས་ཀུན་གྱི་ནང་ནས་ཆེས་ཕྲ་ཞིབ་ཀྱི་རྩིས་ཡིན། དེ་ཕྱིར་ཟླ་ལྷག་དང་ཉི་ལྷག་དུས་འདྲ་མིན་དུ་བྱུང་བ་ཤེས་ཞིང་། འབྱུང་བའི་འཕྲོད་སྦྱོར་སོགས་ཆེས་འཕྲ་མོས་སྒོ་ནས་གཏན་ལ་འཕབ་ཐུབ་མཁན་གྱི་རྩིས་ཁོ་ན་དེ་ཡིན་པ་སུས་ཀྱང་བརྙོན་དཀའ་བར་མཐོང་བ་སོགས་ཀྱིས་སོ། །།

ལོ་གསར་གཅིག་གྱུར་གཏོང་དགོས་ན་དང་པོ་རང་ཉིད་མི་རིགས་ཀྱི་མེས་པོ་སྲོང་བཙན་སྒམ་པོའི་ལོ་རྒྱུས་དང་། ཆབ་སྲིད། དམག་དོན། དཔལ་འབྱོར། རིག་གཞུང་། སྐད་ཡིག ཐབས་ཇུས། ལ་རྒྱ་དང་སྙིང་སྟོབས་བཅས་ལ་སློབ་སྦྱོང་གཅིག་གྱུར་བྱེད་དགོས།

ད་དུང་རྒྱ་གར་གྱི་རྒྱལ་པོ་ཨ་ཤོ་ཀའི་ལོ་རྒྱུས་དང་། ཆབ་སྲིད། དམག་དོན། རིག་སྟོབས་སོགས་ལ་ཕྱིར་མིག་གཅིག་གྱུར་བལྟ་དགོས།

ད་དུང་ཧོར་ཇིང་གེར་རྒྱལ་པོའི་ཆབ་སྲིད་དང་། དཀའ་ཚེགས། དམག་དོན། མི་འབོར། སྟོབས་ཤུགས། ཐབས་ཇུས། གཅིག་གྱུར་སོགས་ལ་བློ་རྩེ་གཅིག་གྱུར་གཏོད་དགོས།

དེ་བས་མིག་གི་མདུན་དུ་ཁ་གསབ་བྱེད་ཐབས་བྲལ་བའི་ཆབ་སྲིད་ཀྱི་གནད་དོན་ཐད་ལ་གཅིག་གྱུར་བལྟ་དགོས་ཏེ། དེ་ཡང་རྒྱ་ནག་གི་ཆེས་རླབས་ཆེན་གཙོ་འཛིན་མའོ་ཙེ་ཏུང་གི་བློ་རིག་དང་། ཆབ་སྲིད། ཐབས་ཇུས། དམག་དོན། སྟོབས་ཤུགས། ཉམས་མྱོང་། སྙིང་སྟོབས། ལྟ་གྲུབ། དཔལ་འབྱོར་། མི་འབོར། གཅིག་གྱུར་སོགས་ལ་སློབ་སྦྱོང་ཡག་པོ་བྱས་ཏེ་ཆོལ་གསུམ་གོམ་བུའི་ནུས་པ་དང་སྟོབས་ཤུགས་ཡོངས་སུ་རྫོགས་མཚམས་ད་གཟོད་གཞི་ནས་གཅིག་གྱུར་བཟོ་དགོས།

དེ་ནས་དགོངས་པའི་གཏིང་དཔོག་པར་དཀའ་བའི་རླབས་ཆེན་བཙན་པོ་སྲོང་བཙན་སྒམ་པོའི་བུ་ཚ་རིགས་བརྒྱུད་གཅིག་པའི་བོད་རིགས་ཚོས་གཅིག་གྱུར་ལོ་གསར་སྔར་བས་བྱུང་མ་མྱོང་བ་གཅིག་གཏོང་དགོས་པ་རེད།

དེ་ལས་གཞན་ད་ལྟའི་ཆར་གྲི་མར་ལ་ཞུས་ན་མར་ཕམ་རྒྱུ་དང་། མར་གྲི་ལ་ཞུས་ན་མར་ཕམ་རྒྱུ་ལས་མེད། ད་དུང་མཛུམ་མོས་གནམ་ཡར་གཏེགས་པའི་ནུས་པ་དོན་དངོས་ཐོག་མེད་སྟབས་ང་ཚོས་རྩ་བ་བརྟན་པོ་ཞིག་གཙུགས་ཏེ།

རིམ་པས་བཙན་པོ་སྲོང་བཙན་གྱི་དྲན་རྟེན་རྡོ་རིང་ཆེན་མོ་གནམ་བསྐོས་དགའ་བ་བརྒྱ་ལྡན་གྱི་འབྱུང་འགྱུར་དུས་རབས་གསར་པ་ཞིག་གི་ནང་མི་རབས་གསར་པའི་ལོ་གསར་གཅིག་གྱུར་གཅིག་ཡོང་བར་ཚང་མས་བློ་རིག་གྲུང་པོ་བྱེད་དགོས་ལ་དེ་བས་ཀྱང་བུ་ཚ་གཅིག་གི་ཚེ་སྲོག་ལའང་གཅེས་སྤྲད་བྱས་ཏེ་རང་ཉིད་དང་པོ་འཚོ་དགོས་པ་དང་།

གཉིས་པ་སྟོབས་ཤུགས་འཛོམས་དགོས་པ། གསུམ་པ་ཐབས་ཇུས་མ་ནོར་བ་བཅས་ཡིད་གཟབ་བྱེད་གལ་ཆེ་བ་གནད་ཀྱི་དམ་པ་དེ་རང་ཡིན།།

སྐད་བཤད་དུས་ཡོད་དོན་མེད་གཉིས།།
བཤད་ཚད་དོན་ཡོད་འགྱུར་བ་མི་སྲིད་པས།།
བརྒྱ་བཤད་གཅིག་ལ་དོན་དག་ཡོད་གྱུར་ན།།
དེ་ནི་སྐད་ཆ་བཤད་པའི་སྙིང་བོར་སྒོམ།།

དཔེར་ན་ལྷ་མོ་དོན་གྲུབ་ཟེར་བའི་སྐད་ཆ་དང་འཁྱམས་པོ་ཟེར་བའི་སྐད་ཆ་གཉིས་ལྟ་བུའོ།།

ཧོར་རྩིས་མ་བཞག་པར་ཧོར་ལོ་བཞག་པས་ཅི་ཕན། ལོ་གསར་འདི་རྒྱ་ལོ་ཡིན་མིན་གང་ལྟར་ཡང་གལ་འགང་ཆེ་བའི་དུས་ཚོད་འདི་ལྟ་བུར་འཇམ་དཔལ་དབྱངས་སྐྱུར་དགོས་ཐུག་ནའང་བསྐྱུར་རྒྱུ་རང་རེད། ང་ནི་མི་ཚེ་འདིར་རི་བོ་རྩེ་ལྔ་ལའང་མི་མཇལ་ཐག་ཆོད་ཡིན།

ཇིང་གུར་རྒྱལ་པོའི་གཞུ་མཆོག་གིས། གནམ་འོག་དབང་དུ་སྡུད་པའི་དུས། མི་ཉག་བཙན་པོའང་ཕམ་གྱུར་བའི། ཧོར་ཟླ་གསུམ་པའི་རྒྱལ་སྟོན་དེ། རྒྱ་བོད་ཧོར་གསུམ་ལོ་སར་གྱུར། འདི་ནི་ཧོར་གྱི་གཟི་བརྗོིད་དང། བོད་རྒྱ་གཉི་གའི་ངོ་ཚ་ཡིན། ཡིན་ཡང་འདས་པའི་ལོ་རྒྱུས་ཏེ། དེང་སང་ཧོར་སོག་མིང་ཙམ་མོ། སྤྱིར་ན་བོད་ཀྱི་ལོ་སར་འདི། གཅིག་གྱུར་དགེ་མཚན་ཅི་བས་ཆེ།

ཨ་མདོའི་ལོ་གསར་འདི་རྒྱའི་ལོ་གསར་ཡིན་མིན་གྱི་སྐད་ཆ་གཡས་བསྐྱུར་བྱས་ཏེ་བཤད་ན། བོད་མི་ས་ཡ་དྲུག་ལས་མེད་ཀྱང་། ལོ་གསར་གཉིས་ཡོད་པ་འདི་༧གོང་ས་མཆོག་གིས་བོད་མི་རྩམ་གཟན་ཡོང་སྐྱིད་ན་མཉམ་སྐྱིད་དང་སྡུག་ན་མཉམ་སྡུག་གསུང་བཞིན་པ་དང་འགལ་བར་མ་ཟད། ཆབ་སྲིད་ཀྱི་ཆ་ནས་ཀྱང་འགྲེལ་བཤད་རྒྱག་བདེ་བོ་ཞིག་གཏན་ནས་མིན། གང་ལྟར། ཨ་མདོ་གཅན་ཚ་བ་དག་གིས་རང་ངོས་ནས་ཏ་ལྟ་གསར་བཞིན་པའི་ལོ་གསར་འདི་སྐྱོན་རུ་མཐོང་སྟེ་བསྒྱུར་རྒྱུ་ཟེར་ན། དེའི་ཐོབ་ཐང་ཁོང་ཚོ་ལ་ཡོད་པར་སོང་། ངས་ཁོང་ཚོའི་འདོད་དོན་འགྲུབ་པར་སྨོན་འདུན་ཞུ།

ཡག་པོ་འདུག རྒྱབ་སྐྱོར་ཞུ་གི་ཡིན། སྤྱིར་དུས་ཚེས་དང་ལོ་སར་གྱི་ངོས་ནས་དགེ་སྐྱོན་བགར་རྒྱུ་ཡོད་པ་མ་རེད། བོད་ཆོལ་ཁ་གསུམ་ལ་གཅིག་གྱུར་གྱི་ལོ་སར་དུས་ཚེས་ཤིག་སྒྲིག་དགོས་མིན་དེ། མི་རིགས་རང་གི་ད་ལྟའི་གནས་བབས་དང་མ་འོངས་པའི་ཕུགས་ཀྱི་དགེ་ཕན་ལ་བལྟས་ནས་ཐག་གཅོད་དགོས་པ་རེད། དེང་སྐབས་རྒྱ་ནག་གིས་རིག་གནས་དང་། ལོ་རྒྱུས། ཆབ་སྲིད། ཐ་ན་སྤྲ་མིའི་རུས་གདུང་གྱི་མཆེད་ཁུངས་སོགས་ཕྱོགས་གང་ཐད་ན་བོད་ལ་སིམ་འཛུལ་དང་། མ་འོངས་པར་ལོ་སྟོང་ཕྲག་འདས་རྗེས། ས་སྒང་འདིར་བོད་ཅེས་ངོས་འཛིན་ཞུ་ས་ཞིག་མེད་པ་བཟོ་བར་ཕུགས་རིང་པོས་ཐབས་ཇུས་སྣ་ཚོགས་འཐེན་བཞིན་ཡོད། དེར་བརྟེན་རྒྱ་ནག་གཅིག་གྱུར་དུ་ཡོད་པའི་གོམས་མཐའ་དག་མེད་དགོས་པའི་རྒྱུ་མཚན་མིན་མོད། རྒྱ་ནག་ཐ་དད་དུ་ཡོད་པའི་རང་གི་རིགས་གཞུང་གོམས་དག་ལ་ལྷག་པར་དུ་གཅེས་འཛིན་བྱ་རྒྱུ་དེ་འོས་ཤིང་འཚམ་པ་ཞིག་རེད།

གཞིས་བཞུགས་མི་བུ་སྙིང་སྟོབས་ཅན་རྣམས་ལ་བསྔགས་རྗོད་ཀྱི་མེ་ཏོག་གཏོར། འདི་དག་གིས་རང་མི་རིགས་ཀྱི་སྔ་རྗེས་ལ་བསམ་བློ་གསར་བའི་གོམ་སྟབས་བསྐྱེད་ཚུལ་ལ་ལྟོས་དང་སྤོབས་པ་མི་སྐྱེ་བ་སུ་ཞིག་ཡོད།

བྱེས་སྡོད་བོད་མི་རྣམས་ཀྱི་སྙིང་སྟོབས་ལ་བསྔགས་བརྗོད་ལ་རྗེས་སུ་ཡི་རང་ཞུ་བཞིན་ཡོད།