དྲག་ཆར་རླུང་འཚུབ་ཁྲོད་ཀྱི་གཞོམ་གཞིག་བྲལ་བའི་ཀརྨ་པ།

 ཀླུ་སྨྱོན་ཧེ་རུ་ཀ

བོད་ཀྱི་ལོ་རྒྱུས་ཀྱི་གླེགས་བམ་མང་པོའི་ཁྲོད་དུ་ཡང་དང་ཡང་དུ་མཐོང་རྒྱུ་ཡོད་པའི་ཚིག་འབྲུ་གསུམ་ནི་ཀརྨ་པ་ཞེས་པའི་ཡི་གེ་འདི་གསུམ་རེད། ཡིག་འབྲུ་འདི་གསུམ་བོད་ཀྱི་ལོ་རྒྱུས་ཆེ་འབྲིང་ཆུང་གསུམ་གྱི་ཁྲོད་ནས་ཅིའི་ཕྱིར་ཡང་ཡང་ཕྱིར་མངོན་ཡོང་དགོས་པ་རེད་ཅེ་ན། དེ་ནི་ཧ་ཅང་ལས་སླ་བ་ཞིག་སྟེ། བོད་པའི་སྤྱི་ཚོགས་ཁྲོད་དུ་ཤུགས་རྐྱེན་འགྲན་ཟླ་མེད་པ་ཞིག་བཟུང་ཡོད་པའི་ནང་བསྟན་ཆོས་ལུགས་ཀྱི་ཁྲོད་དུ་བླ་སྤྲུལ་ངོས་འཛིན་ཞུ་བའི་ལུགས་སྲོལ་རླབས་པོ་ཆེ་དེ་ཡང་ཐོག་མར་ཀརྨ་པ་ནས་མགོ་འཛུགས་བྱས་པ་ཞིག་ཡིན་ཞིང་། ཀརྨ་པ་རིམ་བྱོན་གྱིས་བོད་པའི་ལོ་རྒྱུས་ཁྲོད་དུ་ཆབ་སྲིད་ཁྲོད་ཤུགས་རྐྱེན་དེ་ཙམ་ཆེན་པོ་ཞིག་འཇོག་གནང་མཛད་མེད་ན་ཡང་། ཆོས་ལུགས་ཀྱི་ལོ་རྒྱུས་ཁྲོད་དུ་གོང་ས་ཏྰ་ལའི་བླ་མ་མཆོག་དང་འདྲ་བར་ཀརྨ་པ་དེ་བོད་ཀྱི་ལྷ་སྐལ་འཕགས་མཆོག་སྤྱན་རས་གཟིགས་དབང་མིའི་རྣམ་པར་བྱོན་པ་ཞིག་ཏུ་ཡོངས་སུ་གྲགས་ཤིང་གྲུབ་ཡོད་ཅིང་། ཁོང་གི་མཚན་ལ་ཡང་གོང་ས་མཆོག་དང་འདྲ་བར་རྒྱལ་དབང་ཀརྨ་པ་ཞེས་ཆེ་བསྟོད་ཞུས་ཡོད།  

སྤྱིར་ན་ཀརྨ་ཞེས་པ་འདི་ནི་ལེགས་སྦྱར་གྱི་ཡི་གེ་ཞིག་ཡིན་པ་དང་། དེ་ལ་བཟང་ཕྱོགས་ནས་འཕྲིན་ལས་ཞེས་བསྒྱུར་ཡོད་པ་ཅུང་ཟད་དམན་པའི་ཕྱོགས་ནས་ལས་ཞེས་བསྒྱུར་ཡོད་པས། བླ་མ་ཞིག་གི་རླུང་རྟ་ཆེ་རུ་རྒྱུགས་སྐབས་ཁོང་གི་འཕྲིན་ལས་རྒྱས་བཞིན་ཡོད་པར་སྨྲ་བ་དང་། ཡང་བླ་མ་དེའི་ཆོས་སྲིད་ཀྱི་བྱ་བར་ལམ་འགྲོ་དེ་ཙམ་མ་རྒྱུགས་སྐབས་དེ་ནི་ཁོང་གི་ལས་རེད་ཅེས་བརྗོད་སྲོལ་ཡང་ཡོད། དེ་ལ་ངོ་མཚར་རྒྱུ་ཅི་ཡང་མེད་པ་སྟེ། བདག་ཅག་གི་སྟོན་པས་ཀྱང་ཁོང་གི་ཞབས་མཐེའུ་ལ་ལྷས་བྱིན་གྱི་སྒྱོགས་རྡོ་ཕོག་པ་དང་སྐུ་རྒྱབ་ན་བ་སོགས་ཁོང་གི་ལས་ཀྱི་ལྷག་མ་ཡིན་པར་གསུངས་ཡོད་པས། རང་རེའི་བླ་ཆེན་ཀརྨ་པ་ལྟ་བུས་ཀྱང་སྐབས་རེར་འཕྲིན་ལས་རྒྱས་ཏེ་སྙན་གྲགས་འཕེལ་བ་དང་། ཡང་སྐབས་རེར་མ་ཉེས་ཁ་གཡོག་ཕོག་སྟེ་ལས་ཀྱི་ལྷག་མ་མྱོང་དགོས་པ་དེ་ནི་ནང་པ་སངས་རྒྱས་པ་ཞིག་གི་ངོས་ནས་ཧ་ཅང་ལས་སླ་བོའི་སྒོ་ནས་ངོས་ལེན་བྱེད་ཐུབ་པ་ཞིག་མ་ཡིན་ནམ།

ལོ་རྒྱུས་ཀྱི་རླུང་འཚུབ་ཁྲོད་དུ་ཀརྨ་པ་སྐུ་ཕྲེང་རེ་ཟུང་ལ་སྐུ་ངལ་འཕྲད་དེ་ཁོང་གི་གདན་སར་བཞུགས་མ་ཐུབ་པར་འཇང་ས་དམ་ཡུལ་དུ་ཕེབས་དགོས་བྱུང་བ་སོགས་ལོ་རྒྱུས་ཀྱི་གླེགས་བམ་ཁྲོད་དུ་བརྙེད་རྒྱུ་ཡོད་ཅིང་། དེ་དུས་སུ་ཡང་ཀརྨ་པ་ཁོང་ཉིད་ཀྱི་མཛད་པ་འཕྲིན་ལས་ལ་བར་ཆད་རེ་ཟུང་ཐེབས་ན་ཡང་སངས་རྒྱས་ཀྱི་བསྟན་པ་དེ་ཕྱོགས་གང་སར་སྤེལ་བ་ལ་ཐུགས་སྐྱེད་ནམ་ཡང་ཞུམ་པ་མེད་པར་ཕྱོགས་ཀུན་ཏུ་ཕེབས་བཞུད་གནང་བ་ཞིག་རེད་འདུག ཁྱད་པར་དུ་ཏྰ་ལའི་བླ་མ་སྐུ་ཕྲེང་བཅུ་གསུམ་པས་ཀརྨ་པ་སྐུ་ཕྲེང་བཅུ་དྲུག་པ་མཆོག་སྐུ་གོང་མའི་ཡང་སྲིད་དུ་ངོས་འཛིན་བཀའ་ཡིག་ཕེབས་པ་ནས་བཟུང་ཏྰ་ལའི་བླ་མ་དང་ཀརྨ་པ་མཆོག་གི་འབྲེལ་ལམ་དེ་ལོ་རྒྱུས་ཀྱི་སྟེང་ནས་བལྟས་ན་ཚད་གཞི་ཧ་ཅང་མཐོན་པོ་ཞིག་ལ་བསླེབས་འདུག

དམིགས་བསལ་ཀརྨ་པ་སྐུ་ཕྲེང་འདི་བར་མཚོན་ན་སྐུ་ཕྲེང་བཅུ་བདུན་པར་ངོས་འཛིན་ཞུས་པའི་རྗེས་དེ་གར་རྒྱ་ནག་གཞུང་གིས་ཆབ་སྲིད་ཀྱི་ལག་ཆར་བེད་སྤྱོད་གཏོང་རྩིས་རབ་དང་རིམ་པ་ཞིག་བྱས་པ་ཡོངས་གྲགས་དང་། ཁྱད་པར་དུ་ཁོང་རྒྱ་ནག་གི་གྲོང་ཁྱེར་ཞིག་ཏུ་ཕེབས་དུས་རྒྱ་དཔོན་ཞིག་གིས་ཤེལ་བུམ་ནང་དུ་བླུགས་པའི་ཉ་ཆུང་ཆུང་འགའ་སྤྱན་འབུལ་ཞུས་ཏེ་འདི་ལ་ཐུགས་མཉེས་པོ་ཡོད་དམ་ཅེས་བཀའ་འདྲི་ཞུས་པར། དེ་དུས་དགུང་ལོ་ཧ་ཅང་ཆུང་ཆུང་ཡིན་པའི་ཀརྨ་པས། “བུམ་པ་ཆུང་ཆུང་འདིའི་ནང་དུ་ཉ་འདི་སྐྱིད་པོ་ཏོག་ཙམ་ཡོད་སྲིད། ཡིན་ན་ཡང་ཉ་འདི་ཡངས་ཤིང་རྒྱ་ཆེ་བའི་རྒྱ་མཚོའི་ནང་དུ་འགྲོ་བཅུག་པ་ཡིན་ན་དེ་ལས་ལྷག་པའི་སྐྱིད་པོ་ཞིག་ཡོང་ངེས་རེད” ཅེས་གསུངས་པ་དེ་སྐབས་དེའི་རྒྱ་གཞུང་གི་མགྲིན་ཚབ་དུས་དེབ་<<ཀྲུང་གོའི་བོད་ལྗོངས་>>ཞེས་པའི་ངོས་སུ་བཀོད་ཡོད་པ་ཁོ་བོས་མཐོང་མྱོང་། ཁོ་བོས་དེ་དུས་གོང་འཁོད་ཀརྨ་པའི་གསུང་དུམ་བུ་དེ་བཀླགས་རྗེས་ལོ་ན་རྒན་ཞིང་སྲིད་དོན་གྱི་ཉམས་མྱོང་གིས་ཁེངས་ཤིང་དྲེགས་པ་ཆེ་བའི་རྒྱ་ནག་དཔོན་རིགས་དག་གི་འཁྲིས་སུ། དགུང་ལོ་ཆུང་ཡང་དགོངས་པ་བཞེས་ཕྱོགས་ཐད་ནས་འགྲན་ཟླ་བྲལ་བའི་རང་བཞིན་ཁྱད་པར་འཕགས་པའི་ཀརྨ་པ་མཆོག་ལ་རང་དབང་མེད་པར་དད་གུས་ཤིག་སྐྱེས་མྱོང་།

རྒྱ་ནག་གཞུང་གི་མགོ་ཁྲིད་དག་ནི་བོད་ཀྱི་ཆབ་སྲིད་གནས་སྟངས་ལ་རྒྱུས་མངའ་ཆེ་ཞིང་རྒྱལ་སྤྱིའི་སྤྱི་ཚོགས་ཁྲོད་དུ་བོད་པའི་ཆོས་བརྒྱུད་ཀྱི་དབུ་ཁྲིད་སྙན་གྲགས་ཅན་དག་བེད་སྤྱོད་བཏང་སྟེ་བོད་མི་རིགས་ལ་དབང་སྒྱུར་རབ་དང་རིམ་པ་ཞིག་བྱས་ཡོད་ལ། གོང་ས་ཏྰ་ལའི་བླ་མ་མཆོག་ཕྱི་ཕྱོགས་སུ་བཞུགས་ཤིང་། ཀུན་གཟིགས་པཎ་ཆེན་སྐུ་ཕྲེང་བཅུ་བ་མཆོག་དགོངས་པ་ཆོས་དབྱིངས་སུ་ཐིམ་ཚུལ་བསྟན་པའི་རྗེས་ཀྱི་ལོ་ཟླ་དེ་དག་གི་ནང་དུ། ཀརྨ་པ་མཆོག་ནི་རྒྱ་ནག་གཞུང་ལ་དགོས་མཁོ་ཆེས་ཆེ་བའི་བོད་ཀྱི་བླ་ཆེན་ཞིག་ཡིན་ཞིང་། གལ་སྲིད་རྒྱ་གཞུང་གིས་ཁོ་ཚོའི་འདོད་པ་དང་མཐུན་པའི་སྒོ་ནས་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་དང་རྒྱལ་གཅེས་ཆོས་གཅེས་ཞེས་པའི་རྩ་དོན་དག་ཀརྨ་པ་མཆོག་གི་ཀླད་པའི་ནང་དུ་འབད་མེད་ལྷུན་གྲུབ་ཏུ་ལྡུག་ཐུབ་པ་ཞིག་བྱུང་ན། དེ་ལས་ལྷག་པའི་སྲིད་གཞུང་གི་བསམ་དོན་འགྲུབ་པ་ཞིག་འབྱུང་ཐབས་མེད་པ་ལྟ་བུ་ཡིན་ན་ཡང་། དགུང་ལོ་ཆུང་ཡང་གཟིགས་རྒྱང་ཧ་ཅང་རིང་པའི་ཀརྨ་པ་མཆོག་གིས་རང་ཉིད་གཅིག་བུ་དང་། ཡང་ན་རང་ཉིད་གང་ལ་གཏོགས་པའི་ཆོས་བརྒྱུད་གྲུབ་མཐའ་དེ་གཅིག་པུའི་ཁེ་ཕན་ལ་མ་གཟིགས་པར། གཞི་རྒྱ་ཆེ་བའི་བོད་ཀྱི་མ་འོངས་རྩ་དོན་དང་བོད་མི་དམངས་ཀྱི་རེ་བ་ངོ་མ་དེ་ལ་གདེང་འཇོག་གིས་འཛམ་གླིང་གི་སྒལ་ཚིགས་སམ་ས་གཞིའི་ཡང་རྩེར་གྲགས་པའི་རི་བོ་ཧི་མ་ལ་ཡ་བརྒལ་ནས། བོད་མིའི་དབུ་ཁྲིད་གོང་ས་ཏྰ་ལའི་བླ་མ་མཆོག་བཞུགས་པའི་རྡ་རམ་ས་ལར་ཤར་རྒྱག་ཕེབས་པ་རེད།

རང་ཡུལ་བཞག་སྟེ་མི་ཡུལ་འགྲིམས་པའི་དུས་དེ་ནས་བཟུང་སྟེ་ད་ལྟ་ལ་ཐུག་གི་བར་དུ། ཀརྨ་པ་མཆོག་གིས་དགུང་ལོ་མཐོ་ཞིང་མཛད་བྲེལ་ཆེ་བའི་གོང་ས་ཏྰ་ལའི་བླ་མ་མཆོག་གི་བཀའ་སློབ་ཚིག་གཅིག་ཡན་ཆད་ལ་གུས་རྩི་ཞུས་ཏེ་སློབ་དཔོན་དང་སློབ་མའི་བར་གྱི་དམ་ཚིག་གསེར་སྲང་སྟོང་ཕྲག་ལས་གྲུབ་པའི་འགྲན་ཟླ་མེད་པའི་མཆོད་སྡོང་ཞིག་བཞེངས་གྲུབ་ཡོད་ཅིང་། དེ་དང་མཉམ་དུ་དགུང་ལོ་གཞོན་པའི་བླ་ཆེན་ཞིག་ལ་དགོས་པའི་གནའ་རབ་དང་དེང་རབ་ཀྱི་ཤེས་བྱ་རིག་པའི་གནས་མང་པོར་ཐུགས་བརྩོན་ཆེན་པོས་སློབ་སྦྱོང་གནང་སྟེ་ངེས་པ་དོན་གྱི་པཎྜི་ཏ་སྐུ་ན་གཞོན་པ་ཞིག་ཏུ་འཚར་ལོངས་བྱུང་ཡོད།

ཡིན་ན་ཡང་ཕྱོགས་གཅིག་ནས་ཀརྨ་པ་མཆོག་བོད་ནང་བཞུགས་དུས་རྒྱ་གཞུང་གིས་ཕྱོགས་གང་ས་ནས་ཁོ་ཚོའི་ལག་ཆར་འགྱུར་བའི་རེ་བ་བྱས་ཏེ་སྲིད་འཛིན་ཅང་ཙེ་མེན་སོགས་མཐོ་རིམ་དཔོན་རིགས་ཀྱིས་མཇལ་འཕྲད་སྣ་ཚོགས་ཞུས་པ་དང་། ཕྱོགས་གཞན་ཞིག་ནས་རྒྱ་གར་གཞུང་གིས་ཀརྨ་པའི་ཡང་སྲིད་རྩོད་རྙོག་ལས་འཕྲོས་ཏེ། སི་ཏུ་རིན་པོ་ཆེ་མཆོག་རྒྱ་གཞུང་གི་སྲིད་ཕྱོགས་དང་འབྲེལ་བ་ཡོད་པར་དོགས་པ་ཟོས་ནས་ཕྱི་སྐྱོད་བཀག་འགོག་བྱས་པ་སོགས་ཀྱི་ཉེར་ལེན་གྱིས། རྒྱ་གར་གཞུང་གིས་ཀརྨ་པ་མཆོག་ལ་ཡང་དངོས་ཤུགས་བརྒྱུད་གསུམ་ནས་མིག་ལྤགས་ཏོག་ཙམ་གཟེང་བཞིན་ལྟ་གིན་ཡོད་པ་ཡོངས་གྲགས་དང་། ཀརྨ་པ་མཆོག་རང་ངོས་ནས་ཀྱང་མཁྱེན་བརྩེ་ནུས་གསུམ་དང་མཁས་བཙུན་བཟང་གསུམ་ཁྱད་དུ་འཕགས་ཏེ་མཚན་སྙན་ཆེན་པོ་ཆགས་དུས་རང་བཞིན་གྱིས་དེ་ལ་མི་དགའ་བའི་ཕྲག་དོག་གིས་ཡིད་སེམས་མྱོས་པའི་སྐྱེ་བོ་མ་རུང་བ་དུ་མ་ཞིག་ཀྱང་ཕྱོགས་གང་སར་ཡོད་པ་ནི་འགྲོ་བ་མིའི་སྤྱི་ཚོགས་ཀྱི་ཆོས་ཉིད་ཅིག་ཡིན་པས། ཀརྨ་པའི་མཛད་འཕྲིན་གྱི་བར་ཆད་ཅེས་པ་དེ་ནི་ནམ་ཡང་རྐྱེན་དང་འཕྲད་ན་ལྡང་རུང་གི་ཚུལ་དུ་ཡོད་པ་ཞིག་རེད།

ཀམ་ཚང་བཀའ་བརྒྱུད་པར་མཚོན་ན་ཀརྨ་པའི་དབུ་ཞྭ་ནག་པོ་དེ་ནི་མཁའ་འགྲོ་སྟོང་གི་དབུ་སྐྲ་ལས་གྲུབ་པ་ཡིན་སྐད་ཀྱིས་ལོ་རྒྱུས་ཁྲོད་དུ་ཧ་ཅང་རྩ་ཆེར་བརྩི་སྲོལ་ཡོད་པའི་ཞྭ་མོ་ཞིག་རེད་ལ། དད་ལྡན་མང་ཚོགས་ཁྲོད་དུ་ཀརྨ་པ་དང་ཧ་ལམ་གོ་ས་མཉམ་པའི་ཆོས་ལུགས་ཀྱི་དངོས་རྫས་ཤིག་རེད་ཅེས་བརྗོད་ཆོག་པ་ལྟ་བུར་སྣང་། ཡིན་ན་ཡང་ཀརྨ་པ་འདི་བར་མཚོན་ན་ལོ་རྒྱུས་ཀྱི་རྒྱབ་ལྗོངས་ཧ་ཅང་རིང་བའི་དབུ་ཞྭ་འདི་ལ་ཡང་དེ་ཙམ་ཆགས་ཞེན་ཆེན་པོ་གནང་མཁན་ཞིག་རྩ་བ་ཉིད་ནས་མིན་པར། དུས་ཚོད་ཀྱི་འགྱུར་བའི་ཀློང་ནས་ཆོས་ལུགས་ཀྱི་དངོས་རྫས་འདི་ཚོ་དེ་ཙམ་བློས་མི་ཐོངས་པ་ཞིག་ཏུ་ནམ་ཡང་གཟིགས་ཀྱི་མེད། དཔེར་ན་ཁོང་གིས་ཞྭ་ནག་དེ་རྒྱ་དཔོན་ཅང་ཙེ་མེན་ལ་ཡང་གཡོག་ཆོག་པ་ལྟ་བུའི་བཀའ་མོལ་གསུངས་པ་དེ་ལས་ང་ཚོས་ཁོང་གིས་ཕྱི་དངོས་པོ་ལས་ནང་སེམས་ཀྱི་མཛེས་སྡུག་དེ་གལ་ཆེར་གཟིགས་བཞིན་ཡོད་པ་མཐོང་ཐུབ།

སྐབས་བབས་ད་རེས་ཀྱི་ཀརྨ་པའི་བླ་བྲང་གི་དངུལ་དམར་དོན་རྐྱེན་འདི་ནི་ཆུང་ཆུང་བྱས་ན་བོད་པའི་ཆོས་བརྒྱུད་ཀྱི་བླ་ཆེན་ཞིག་ལ་མི་ཁྲི་ཕྲག་གིས་མ་སྐུལ་དང་བླངས་ཀྱིས་ཕུལ་བའི་དངུལ་དངོས་ཕྱིར་མངོན་པ་ཙམ་ཞིག་དང་། ཆེན་པོ་བཟོས་ན་ཡུལ་ཁྲིམས་དང་མི་མཐུན་པར་རྒྱལ་ཁབ་འདྲ་མིན་དུ་མའི་དངུལ་དམར་ཟུར་ཉར་བྱས་པའི་དོན་རྐྱེན་ཞིག་རེད། བོད་པའི་བླ་མ་དང་བླ་བྲང་གི་ལས་བྱེད་བར་གྱི་འབྲེལ་བ་སྤྱི་དང་མཚུངས་པར་ཀརྨ་པའི་བླ་བྲང་གི་ལས་བྱེད་དག་གིས་ཕྱག་ལས་གནང་སྟངས་ཐད་ཀརྨ་པས་མ་འོངས་སྔོན་གཟིགས་ཀྱིས་བཀའ་མོལ་གནད་འགག་ཅན་ཞིག་གསུངས་མྱོང་བ་སྟེ། དེ་ནི་ལོ་གཉིས་སྔོན་ཀརྨ་པ་འདི་ག་ཨ་རིའི་སེ་ཨ་རོལ་ས་གནས་སུ་ཕེབས་དུས་ན་ལེནྡྲ་ཆོས་ཚོགས་སུ་ས་གནས་བོད་རིགས་མི་དམངས་ལ་མཇལ་ཁ་བཀའ་སློབ་ཅིག་བསྩལ་དུས། ཞབས་ཞུ་བ་དག་གིས་བླ་མའི་ལས་དོན་ལ་འགོག་རྐྱེན་བཟོ་བཞིན་ཡོད་ཅེས་ཧ་ཅང་ཞལ་གསལ་བོའི་སྒོ་ནས་གསུངས་སོང་ལ། དེ་ལ་བརྟག་དཔྱད་ཞིབ་འཇུག་གནང་འདོད་ཡོད་ན་དེ་དུས་དེར་ཡོད་པའི་བོད་མི་དག་ལ་དྲིས་ན་གསལ་བོ་རེད།  ཡིན་ན་ཡང་གསལ་བོར་ཞུ་དགོས་པ་ཞིག་ལ་ཁོང་གིས་ངའི་ཞབས་ཞུ་བས་ངའི་ལས་དོན་ལ་འགོག་རྐྱེན་བཟོ་ཡི་ཡོད་ཅེས་གསུངས་མ་སོང་བར། སྤྱིར་གཏང་རྒྱུན་ལྡན་གྱི་གནས་ཚུལ་ལྟ་བུར་གསུངས་སོང་།

ངས་དེ་རིང་སྔ་དྲོར་རང་ཉིད་ཀྱི་སློབ་མ་བོད་ཕྲུག་ཨ་རིར་སྐྱེས་པ་གཉིས་ལ་གོང་ས་ཏྰ་ལའི་བླ་མའི་<<ངོས་ཀྱི་ཡུལ་དང་ངོས་ཀྱི་མི་མང་>>ཞེས་པའི་དེབ་དེ་ཀློག་རོགས་བྱས་དུས། སྟེས་དབང་གིས་སྤྱི་ལོ་༡༩༥༩ལོར་གོང་ས་ཏླ་ལའིོ་བླ་མ་མཆོག་བོད་ནས་རྒྱ་གར་ལུང་བར་སྐྱབས་བཅོལ་ལ་ཕེབས་དུས། བོད་དང་རྒྱ་གར་གྱི་ས་མཚམས་བརྒལ་ལ་མ་བརྒལ་གྱི་དུས་སུ་གནམ་གཤིས་སྡུག་པོ་ཞིག་གི་རྐྱེན་གྱིས་ཁོང་གི་གསོལ་གྲོད་བསྙུངས་པའི་དུས་དེར། རྒྱ་གར་གྱི་རླུང་འཕྲིན་ཁག་གིས་ཁོང་རྟ་ལས་ལྷུང་སྟེ་སྐུ་གཟུགས་ལ་བརྡབ་སྐྱོན་ཚབས་ཆེན་བྱུང་ལུགས་ཤིག་བསྒྲགས་ཏེ། མི་མང་གི་སེམས་པ་སྡུག་བསྔལ་ལ་སྦྱར་ཚུལ་ཞིག་དང་ཁ་ཐུག་ཁེལ་སོང་བས། རྒྱ་གར་གྱི་གསར་འགྱུར་ཚན་པ་འདི་དག་གིས་དུས་རབས་ཕྱེད་ཀའི་སྔོན་ནས་བཟུང་སྟེ་བོད་པའི་དབུ་ཁྲིད་ཆེན་པོ་འདི་ཚོའི་སྐོར་མགོ་ཚོས་ལ་མ་ཚོས་པའི་གནས་ཚུལ་སྤེལ་རྒྱུར་གོམས་བསྡད་ཡོད་པ་ཞིག་ཏུ་མཐོང་སོང་།

གང་ལྟར་ཐེངས་འདིར་ཀརྨ་པར་འཕྲད་པའི་གནས་ཚུལ་འདི་ནི་བོད་པའི་ཞི་བྱེད་གཅོད་ཀྱི་ཆོས་ལུགས་པ་དག་གིས་མཚན་མོར་དུར་ཁྲོད་སོགས་གཉན་ཁྲོད་དུ་ལྷ་འདྲེར་ལུས་སྦྱིན་གཏོང་དུས། གལ་སྲིད་དམིགས་པ་དེ་ལམ་དུ་འགྲོ་བཞིན་ཡོད་ཚེ་ལྷོངས་ཟེར་བའི་ལྷ་འདྲེས་ཆོ་འཕྲུལ་སྣ་ཚོགས་བསྟན་ཏེ་སྒོམ་ཆེན་གྱི་རྟོགས་པའི་གདེང་ཚད་ལ་ལྟ་སྲོལ་ཞིག་ཡོད་པ་དེ་དང་ཧ་ཅང་མཚུངས་པར། ཀརྨ་པའི་མ་འོངས་པའི་སྐུ་ཚེའི་མདུན་ལམ་རིང་མོའི་སྟེང་གི་འབྱུང་སྲིད་པའི་དཔལ་འབྱོར་དང་ཆོས་ལུགས། ཆབ་སྲིད་དང་རིག་གཞུང་སོགས་སྣེ་མང་རྙོག་འཛིང་གི་ཁྲོད་དུ་དཀའ་ངལ་ཅི་བྱུང་ལ་གདོང་ལེན་བྱེད་དགོས་པའི་ཚོད་བགམ་ཞིག་ཏུ་མཐོང་བས། བོད་མི་ས་ཡ་དྲུག་དང་བརྩེ་དུང་གི་འབྲེལ་ཐག་ཧ་ཅང་དམ་པའི་ཀརྨ་པ་མཆོག་ཐེངས་འདིའི་དངུལ་དམར་དོན་རྐྱེན་གྱི་དྲག་ཆར་རླུང་འཚུབ་འདི་ལས་རྣམ་པར་རྒྱལ་ཏེ། ཆོས་སྲིད་གང་ཐད་ནས་བོད་མི་རིགས་ཀྱི་ངེས་པ་དོན་གྱི་དབུ་ཁྲིད་ཁྱད་པར་འཕགས་པ་ཞིག་ཏུ་འགྱུར་བར་སྨོན། ཀརྨ་པ་མཁྱེན་ནོ།།