གལ་སྲིད་ཏྰ་ལའི་བླ་མ་བགྲེས་ཡོལ་དུ་ཕེབས་ཚེ།

ལིས་ཅང་ལིན་གྱིས་བརྩམས།  ས་དཀར་བཀྲ་ཤིས་ཀྱིས་བསྒྱུར།

ན་ནིང་ཕྱི་ཟླ་ ༡༠ བའི་ཚེས་༢༣ ཉིན། ཏྰ་ལའི་བླ་མས་ཁེ་ན་ཊའི་གྲོང་ཁྱེར་ཊོ་རོན་ཊོན་ནས་རྒྱ་བོད་བགྲོ་གླེང་འདུ་ཚོགས་ཐེངས་གཉིས་བའི་སྟེང་། ཁོང་ཉིད་ཀྱིས་བཙན་བྱོལ་གྲོས་ཚོགས་ལ་བགྲེས་ཡོལ་ཆ་ཚང་བྱ་རྒྱུའི་སྐོར་བརྗོད་རྒྱུ་ཡིན་གསུངས་བ་དང་། གནས་ཚུལ་དེ་ལམ་སེང་དོ་སྣང་བྱ་ཡུལ་ཆེན་པོ་རུ་གྱུར།  ཏྰ་ལའི་བླ་མའི་སྐུ་གཟུགས་ད་རུང་བདེ་ཐང་ཡིན་ལ་ལུས་ཤུགས་འཛོམས་ལྡན་ཡོད་མོད།  ཡིན་ཡང་གང་ལྟར་དགུང་ལོ་ ༧༥ ལ་སོན་པའི་བགྲེས་པོ་ཞིག་ཡིན་ལ།  ཁོང་གིས་བོད་མི་རིགས་ཀྱི་གསོན་གནས་དང་།  འཛམ་གླིང་ཞི་བདེ།  མིའི་རིགས་གྱི་བདེ་རྩའི་ཆེད་དུ་དུས་རབས་ཕྱེད་ཀའི་རིང་སྐུ་ལས་བསྐྱོན་ཡོད་པས་བགྲེས་ཡོལ་གནང་རྒྱུའང་བསམ་ཤེས་བྱ་ཐུབ་པ་ཞིག་རེད། ཡིན་ནའང་ཏྰ་ལའི་བླ་མ་བགྲེས་ཡོལ་དུ་ཕེབས་ཚེ་བཙན་བྱོལ་བོད་གཞུང་གི་འཁོར་བསྐྱོད་དང་།  བོད་རྒྱ་འབྲེལ་མོལ་ལ་མ་འོངས་པར་ཤུགས་རྐྱེན་ཅི་འདྲ་ཞིག་ཐེབས་སྲིད་དམ།

ཏྰ་ལའི་བླ་མ་ཅི་ལྟར་བགྲེས་ཡོལ་དུ་ཕེབས་རྒྱུ་ཡིན་ནམ།

ཏྰ་ལའི་བླ་མ་ནི་བོད་མི་རིགས་ཀྱི་ཆེས་མཐོའི་ཆོས་སྲིད་ཟུང་འབྲེལ་གྱི་འགོ་ཁྲིད་ཞིག་ཡིན་པས་ཆ་ནས་བགྲེས་ཡོལ་དུ་ཕེབས་ཆོག་ཆོག་ཅིག་གང་ལ་ཡོད།  ལོ་ངོ་བཅུ་ཕྲག་རིང་ཁོང་གིས་བཙན་བྱོལ་ཁྲོད་ཆབ་སྲིད་ལམ་ལུགས་བསྒྱུར་བཅོས་ལ་སྐུལ་འདེད་གནང་བ་དང་། བསྒྱུར་བཅོས་བསམ་བློའི་ཁྲོད་དང་བ་འདྲེན་པའི་ལྡོག་ཕྱོགས་ཀྱི་བསམ་བློ་ཞིག་ཡོད་པ་སྟེ། རང་ཉིད་ཀྱི་དབང་ཆ་བེད་སྤྱད་དེ་རང་ཉིད་ཀྱི་དབང་ཤུགས་ལ་སྟངས་འཛིན་བྱེད་ཀྱི་ཡོད་པ་རེད།  དེར་བརྟེན་ཏྰ་ལའི་བླ་མ་བགྲེས་ཡོལ་དུ་ཕེབས་འདོད་ཚེ་ངེས་བར་ཏུ་གོ་རིམ་ངེས་ཅན་ཞིག་བརྒྱུད་དེ་གྲོས་ཚོགས་ཀྱིས་ཆོག་མཆན་འཐོབ་དགོས།  ཏྰ་ལའི་བླ་མའི་ཐོག་མར་བཙན་བྱོལ་བོད་གཞུང་གྲོས་ཚོགས་ལ་གྲོས་གཞི་འདོན་དགོས་ལ།  གྲོས་ཚོགས་ཀྱིས་ཏྰ་ལའི་བླ་མ་བགྲེས་ཡོལ་གནང་རྒྱུའི་གྲོས་གཞི་ལ་བགྲོ་གླེང་བྱས་ཏེ། མཐར་འོས་ཤོག་གི་ལམ་ནས་ཐག་གཅོད་པ་དང་།  གལ་སྲིད་དགག་བྱ་བྱུང་ཚེ་གྲོས་གཞི་འདི་ལ་མོས་མཐུན་མེད་སོང་བ་དང་ཏྰ་ལའི་བླ་མས་མུ་མཐུད་ཆབ་སྲིད་ཀྱི་ལས་འགན་ཁུར་དགོས་བ་རེད།

གལ་སྲིད་གྲོས་ཚོགས་ཀྱིས་ཏྰ་ལའི་བླ་མའི་གྲོས་གཞི་དེ་ལ་མོས་མཐུན་བྱས་ནའང་ཏྰ་ལའི་བླ་མས་ཁུར་བོ་དེ་བཞག་ཆོག་ཆོག་ཅིག་མིན།  བཙན་བྱོལ་བོད་གཞུང་གི་བཅའ་ཁྲིམས་ལས་གཏན་འབེབས་ལྟར་ན།  ཏྰ་ལའི་བླ་མ་བགྲེས་ཡོལ་ལ་ཕེབས་པའམ་ཡང་ན་དགོངས་པ་རྫོགས་རྗེས་བཙན་བྱོལ་བོད་གཞུང་གིས་འོས་འདེམས་བརྒྱུད་མི་གསུམ་ལས་གྲུབ་པའི་སྡེ་སྲིད་ལྷན་ཚོགས་ཀྱིས་ཏྰ་ལའི་བླ་མས་ལས་འགན་འཁུར་དགོས།  བཙན་བྱོལ་གྲོས་ཚོགས་ཀྱི་འཁོར་བསྐྱོད་ལྟར་ན་ལོ་རེ་གྲོས་ཚོགས་ཐེངས་གཉིས་ལ་འཚོགས་པ་དང།  ཐེངས་འདིའི་གྲོས་ཚོགས་འཚོགས་དུས་ནི་ ༢༠༡༡ ལོའི་ཟླ་ ༣ ཚེས་༡༥ ནས་ ༢༠ བར་ཡིན། ཟླ་ ༣ཚེས་ ༢༠ ཉིན་ནི་ཏག་ཏག་འོས་འདེམས་ཀྱི་ཉིན་མོའང་ཡིན་ལ།  བཙན་བྱོལ་སྤྱི་ཚོགས་ཀྱིས་བཀའ་ཁྲི་དང་སྤྱི་འཐུས་འདེམས་དགོས། 

གྲོས་ཚོགས་འདི་ ༢༠༡༡ ལོའི་ཟླ་ ༥ བའི་ཟླ་མཇུག་ལ་བརྗེ་བོ་བརྒྱབ་དགོས་བ་དང་།  ཟླ་ ༦ པའི་ཚེས་ ༡ ཉིན་ནས་གྲོས་ཚོགས་སྐབས་བཅོ་ལྔ་བ་དེ་དངོས་སུ་འགོ་འཛུགས་རྒྱུ་ཡིན་པ་རེད། བཀའ་བློན་ཁྲི་བའི་འཕོ་འགྱུར་ཏེ་ཟླ་གཉིས་དང་ཕྱེད་ཀའི་རྗེས་ནས་འགྲུབ་རྒྱུ་རེད་ལ། ༢༠༡༡ ལོའི་ཟླ་ ༨ པའི་ཚེས་ ༡༤ ཉིན་བཀའ་ཁྲི་ཟམ་གདོང་རིན་པོ་ཆེ་ཡི་ལས་ཡུན་མཇུག་རྫོགས་པ་དང་ཁོང་གི་རྗེས་འཇུག་གིས་བཀའ་ཁྲི་གསར་བའི་ལས་འགན་ཁུར་རྒྱུ་རེད། དུས་ཚོད་གྱི་རེའུ་མིག་དེ་ལྟར་ན་ཏྰ་ལའི་བླ་མ་བགྲེས་ཡོལ་ལ་ཕེབས་རྒྱུའི་གྲོས་གཞི་དེ་སྐབས་བཅུ་བཞི་བའི་སྤྱི་འཐུས་གྲོས་ཚོགས་ཚོགས་དུས་མཐའ་མའི་སྐབས་བགྲོ་གླེང་བྱ་རྒྱུ་དང་། གལ་སྲིད་གྲོས་ཚོགས་ཀྱིས་གྲོས་གཞི་འདི་ལ་རྒྱབ་སྐྱོར་གནང་སྟེ་ཏྰ་ལའི་བླ་མ་འགྲེས་ཡོལ་ཆ་ཚང་ཕེབས་རྒྱུ་མོས་མཐུན་བྱུང་ནའང་། གཞུང་དང་གྲོས་ཚོགས་དེ་སྐབས་བཅོ་ལྔ་བའི་གྲོས་ཚོགས་གྲུབ་རྗེས་གཞི་ནས་མི་གསུམ་ལས་གྲུབ་པའི་སྡེ་སྲིད་ལྷན་ཚོགས་ཀྱིས་ཏྰ་ལའི་བླ་མས་ལས་ཚབ་ཀྱི་འགན་ཁུར་དགོས་བ་རེད།  གྲོས་ཚོགས་དང་བཀའ་ཁྲི་འཕོ་འགྱུར་འགྲོ་བཞིན་པའི་སྐབས་ཡིན་པས་༼དབང་ཆའི་བར་སྟོང་༽མི་འབྱུང་པའི་ཆེད།  གལ་སྲིད་གྲོས་ཚོགས་ཀྱིས་ཏྰ་ལའི་བླ་མ་འགྲེས་ཡོལ་དུ་ཕེབས་རྒྱུའི་གྲོས་གཞི་ལ་མོས་མཐུན་གནང་ནའང་ཁོང་ཉིད་བཀའ་ཁྲིའི་འཕོ་འགྱུར་སྐབས་དང་། ཡང་ན་མི་གསུམ་ལས་གྲུབ་པའི་སྡེ་སྲིད་ལྷན་ཚོགས་མ་འགྲུབ་སྔོན་ལ་བགྲེས་ཡོལ་ཕེབས་མི་ཐུབ་པ་རེད།

ཏྰ་ལའི་བླ་མ་བགྲེས་ཡོལ་དུ་ཕེབས་པར་དོན་སྙིང་ཅི་ཞིག་ལྡན་ནམ།

ཚང་མས་དོ་ཁུར་བྱེད་བཞིན་པའི་གནད་དོན་ཞིག་ནི་ཏྰ་ལའི་བླ་མ་བགྲེས་ཡོལ་དུ་ཕེབས་ཚེ་བཙན་བྱོལ་བོད་གཞུང་གི་འཁོར་བསྐྱོད་ལ་ཤུགས་རྐྱེན་ཅི་འདྲ་ཞིག་ཐེབས་སྲིད་དམ་ཞེས་བ་དེ་རེད། ཏྰ་ལའི་བླ་མ་མེད་ཚེ་བཙན་བྱོལ་བོད་གཞུང་རྒྱུན་ལྡན་ལྟར་འཁོར་བསྐྱོད་བྱ་ཐུབ་བམ། 

བཙན་བྱོལ་བོད་གཞུང་ནི་ ༡༩༥༩ ལོར་ཏྰ་ལའི་བླ་མས་བྲོས་བྱོལ་གྱི་ལམ་ནས་བཙུགས་པའི་གནས་སྐབས་སྲིད་གཞུང་དེའི་རྒྱུན་མཐུད་པ་ཡིན་ལ།  དེའི་ལོ་རྒྱུས་ནི་རྒྱ་ནག་སྲིད་གཞུང་གི་ལོ་རྒྱུས་ལས་ལོ་བཅུ་ཙམ་ཐུང་པ་རེད།  བཙན་བྱོལ་བོད་གཞུང་འདི་བྱེའུ་ཆུང་རུང་དོན་ལྔ་སྣོད་དྲུག་ཚང་ལྡན་ཡོད་ལ།  ཚད་ལྡན་གྱི་གཞུང་ལྟར་གཞི་རྩའི་ནུས་བ་ཆ་ཚང་ལྡན་ཡོད་དེ།  སློབ་གསོ་དང་ཆོས་ལུགས། བདེ་རྩ།  ཕྱི་འབྲེལ་སོགས་ཀྱི་མ་ལག་ཆ་ཚང་བ་ཡོད་ལ།  བཙན་བྱོལ་སྤྱི་ཚོགས་ཀྱི་འཛིན་སྐྱོང་དེ་སྔར་ནས་ཆ་ཚང་བའི་ལམ་ལུགས་ཤིག་ཆགས་ཡོད་པ་དང་།  ད་ལྟའི་བར་ཏུ་གནད་དོན་འགྱུར་ལྡོག་ཆེན་པོ་ཅི་ཡང་བྱུང་མེད།  གཞི་རིམ་འཛིན་སྐྱོང་གི་རྣམ་པ་ལ་བལྟས་ཚེ་ལམ་ལུགས་འདི་ནི་ཕན་ངེས་ལྡན་པ་ཞིག་རེད།  བཙན་བྱོལ་བོད་གཞུང་འདི་ལོ་ངོ་ལྔ་བཅུའི་རིང་གི་ལག་ལེན་བརྒྱུད་དེ་རྨང་གཞི་ཡག་པོ་བཏིངས་ཡོད་ལ།  མི་རབས་གསར་བའི་ཆོས་སྲིད་གཉིས་ཀྱི་དབུ་ཁྲིད་ད་ལྟ་ནར་སོན་ཡོད་པ་དང་།  རིམ་གྱིས་བཙན་བྱོལ་སྤྱི་ཚོགས་ཀྱི་དབུ་ཁྲིད་གནས་རིམ་དུ་འགྲོ་བཞིན་པ་རེད། དེར་བརྟེན་ཏྰ་ལའི་བླ་མ་འགྲེས་ཡོལ་དུ་ཕེབས་ཚེ་བཙན་བྱོལ་བོད་གཞུང་འཁོར་བསྐྱོད་མི་ཡོང་བའི་རྒྱུ་མཚན་ལ་ཡིད་ཆེས་བྱེད་མི་དགོས་པ་རེད། 

གཞན་ཏྰ་ལའི་བླ་མ་བགྲེས་ཡོལ་དུ་ཕེབས་ཚེ་རྒྱལ་སྤྱིའི་སྟེང་བོད་དོན་ལས་འགུལ་ལ་རྒྱབ་སྐྱོར་བྱེད་བཞིན་པར་ཤུགས་རྐྱེན་ཅི་འདྲ་ཐེབས་རྒྱུ་ཡིན་ནམ། མི་རིང་བའི་སྔོན་ང་རང་ལྡི་ལར་ཚོགས་པའི་སྐབས་ལྔ་བའི་རྒྱལ་སྤྱིའི་བོད་དོན་རྒྱབ་སྐྱོར་ཚོགས་ཆེན་ལ་ཞུགས་པ་དང་།  ཚོགས་ཞུགས་མི་སྣ་ཚང་མ་དམངས་ཁྲོད་ནས་ཡོང་བ་དང་གླིང་ཆེན་ལྔའི་རྒྱལ་ཁབ་༥༧ ཙམ་ནས་ཡོང་བ་རེད། ཚང་མས་དོ་སྣང་བྱེད་བཞིན་པའི་བརྗོད་གཞི་ནི་བོད་ཀྱི་ཁོར་ཡུག་དང་།  འགྲོ་བ་མིའི་ཐོབ་ཐང་།  རིག་གཞུང་སྲུང་སྐྱོབ་སོགས་ཡིན་ལ།  བརྗོད་གཞི་འདི་ཚོ་ནི་ཏྰ་ལའི་བླ་མ་བགྲེས་ཡོལ་དུ་ཕེབས་པ་དང་ཡང་ན་དགོངས་པ་རྫོགས་རྗེས་སུའང་ཡལ་འགྲོ་བ་ཞིག་མ་རེད།  དེར་བརྟེན་ངའི་བསམ་པར་ཏྰ་ལའི་བླ་མ་བགྲེས་ཡོལ་དུ་ཕྱིན་ནའང་རྒྱལ་སྤྱིའི་སྤྱི་ཚོགས་ཀྱིས་བོད་དོན་ལས་འགུལ་ལ་རྒྱབ་སྐྱོར་བྱེད་བཞིན་པར་ཤུགས་རྐྱེན་ཆེན་པོ་ཐེབས་མི་སྲིད་པ་རེད། 

དེ་ན་ཏྰ་ལའི་བླ་མ་བགྲེས་ཡོལ་དུ་ཕེབས་ཚེ་རྒྱུན་རིང་ཞིང་གྲུབ་འབྲས་མི་བཟང་བའི་བོད་རྒྱའི་འབྲེལ་མོལ་ལ་དོན་སྙིང་ཅི་ཞིག་ཡོད་དམ།  ངས་བལྟས་ན་རྒྱ་ཕྱོགས་ཀྱིས་ཏྰ་ལའི་བླ་མ་༼སྐུ་སྒེར་གྱི་གནད་དོན༽་རེད་ཟེར་ཏེ་རྒྱུན་འཁྱོངས་བྱེད་བཞིན་པར་རྒྱུ་མཚན་མེད་འགྲོ་བ་དང་། ཏྰ་ལའི་བླ་མ་བགྲེས་ཡོལ་ཕྱིན་ཚེ་༼སྒེར་གྱི་གོ་གནས༽ཀྱི་གནད་དོན་དེ་མེད་པ་དང་།  ཏྰ་ལའི་བླ་མའི་གོ་གནས་ཟེར་ཏེ་རྒྱ་ཕྱོགས་ཀྱིས་མཁྲེགས་འཛིན་བྱེད་བཞིན་པའི་བརྗོད་གཞི་དེ་གནས་མི་ཐུབ་ལ།  བོད་རྒྱའི་འབྲེལ་མོལ་མཚམས་མ་ཆད་པར་མུ་མཐུད་སོང་ཚེ་ངེས་བར་ཏུ་དངོས་ཡོད་ཀྱི་གནད་དོན་ལ་གདོང་གཏོད་དགོས་པ་ལས་༼ཏྰ་ལའི་བླ་མ་སྒེར་གྱི་གོ་གནས་༽ཟེར་ཏེ་ཁ་གཡར་ས་མེད་པ་ཆགས་འགྲོ་བ་རེད། 

ཏྰ་ལའི་བླ་མའི་མཚན་སྙན་ཉི་འོད་བཞིན་འཛམ་གླིང་དུ་ཁྱབ་བཞིན་ཡོད་ནའང་ཏྰ་ལའི་བླ་མ་ནི་བསྟན་འཛིན་རྒྱ་མཚོ་ཡིན་པའི་མ་ཁྱབ་སྟེ། ཏྰ་ལའི་བླ་མ་ནི་སྤྲུལ་སྐུའི་ལམ་ལུགས་རྒྱུན་འཛིན་བྱེད་དེ་འོང་བའི་དམིགས་བསལ་ཁྱད་ཆོས་ལྡན་པའི་སྒྲིག་སྲོལ་ཞིག་ཡིན།  གཞུང་ལུགས་སྟེང་ནས་བརྗོད་ན་ཏྰ་ལའི་བླ་མ་ལ་ཚད་འཛིན་མེད་པའི་ཆབ་སྲིད་ཀྱི་དབང་ཆ་ཡོད་པ་མ་ཟད་དེའང་སྐུ་ཚེ་ཧྲིལ་བོའི་ལམ་ལུགས་ཅན་ཞིག་རེད།  གལ་སྲིད་ཏྰ་ལའི་བླ་མ་གཟི་བརྗིད་ལྡན་པའི་ངང་ནས་བགྲེས་ཡོལ་དུ་ཕེབས་ཚེ་ཁོང་ནི་བོད་ཀྱི་ལོ་རྒྱུས་སྟེང་སྐུ་ཚེ་ཧྲིལ་བོ་དབང་ཆ་ལོངས་སུ་མི་སྤྱད་པའི་ཆབ་སྲིད་ཀྱི་དབུ་ཁྲིད་དང་པོ་དེ་རེད་ལ།  ཐོག་མའི་དཔེ་སྟོན་འདི་གཏན་འཁེལ་ཆགས་ཚེ་མ་འོངས་པའི་ཏྰ་ལའི་བླ་མ་ཚོའི་ཆབ་སྲིད་དབང་ཆ་ལ་ཚད་འཛིན་ངེས་ཅན་ཐེབས་ངེས་པ་རེད།

བོད་ཀྱི་ཆབ་སྲིད་ལམ་ལུགས་ཐད་ཀྱི་ཐེངས་གཉིས་བའི་འགྱུར་མཚམས།

ཁོང་རིགས་བགྲེས་ཡོལ་དུ་ཕེབས་རྒྱུ་དེའི་ད་དུང་བོད་ཀྱི་ཆབ་སྲིད་ལམ་ལུགས་ལ་ཐེངས་གཉིས་བའི་འགྱུར་མཚམས་འགྲུབ་སོང་བ་མཚོན་ལ།  ཐེངས་དང་པོའི་འགྱུར་མཚམས་ནི་༼སྐུ་དྲག་ཆབ་སྲིད་༽ནས་༼དམངས་དཀྱུས་མའི་ཆབ་སྲིད་༽ལ་གྱུར་ཏེ་བོད་ཀྱི་ལོ་རྒྱུས་སྟེང་སྐུ་དྲག་གིས་ཆབ་སྲིད་དབང་སྒྱུར་བྱེད་བཞིན་པ་མཇུག་སྒྲིལ་བ་རེད།  ༢༠༠༨ལོར་ངས་ཟམ་གདོང་རིན་པོ་ཆེ་ལ་བཅར་འདྲི་སྐབས་ཁོང་གིས་བརྗོད་དོན།  ཁོ་རང་ཐེངས་དང་པོར་བཀའ་ཁྲི་ཐོབ་རྗེས་ཏྰ་ལའི་བླ་མའི་སྐུ་རྩེད་དང་སྦྲགས་༼ཁོང་གིས་རེ་བ་ནི་བོད་མི་ཚོས་དེང་རབས་ཀྱི་སློབ་གསོ་ཐོབ་མྱོང་བའི་གཞོན་སྐྱེས་ཤིག་གིིས་བཀའ་བློན་ཁྲི་བའི་འགན་དེ་འཁུར་ན་བསམ་ཡོད་མོད། མ་བསམ་ས་ནས་མང་ཚོགས་ཀྱིས་གྲྭ་བ་ཞིག་བདམས་བྱུང་།  སྔོན་མ་ཡིན་ན་གྲྭ་རྒན་གཅིག་གིས་འགོ་ཁྲིད་ཀྱི་ཡོད་ལ།  ད་ལྟ་གྲྭ་རྒན་གཉིས་ཀྱིས་འགོ་ཁྲིད་དགོས་བ་རེད་ཅེས་གསུངས་སོ་ཟེར།  ༽

ཏྰ་ལའི་བླ་མ་བགྲེས་ཡོལ་དུ་ཕེབས་པ་དང་ཟམ་གདོང་རིན་པོ་ཆེའི་ལས་ཡུན་རྫོགས་པ་དེས་གྲྭ་རྒན་གཉིས་མཉམ་གཅིག་ཏུ་བཙན་བྱོལ་བོད་གཞུང་གི་ཆེས་མཐོའི་འགོ་ཁྲིད་ནས་ཕྱིར་ཐོན་པ་མཚོན་ལ།  ལོ་བཅུའི་སྔོན་ཏྰ་ལའི་བླ་མའི་ཐུགས་རེ་གནང་བ་ལྟར་བཀའ་ཁྲི་རྗེས་མ་དེ་དེང་རབས་ཀྱི་སློབ་གསོ་ཐོབ་མྱོང་བའི་མི་རབས་གསར་བའི་འགན་ཁུར་བ་དང་།  དེ་ནི་ཐེངས་གཉིས་བའི་འགྱུར་མཚམས་འགྲུབ་པ་མ་ཟད་ཆོས་སྲིད་ཟུང་འབྲེལ་གོམ་གང་མདུན་སྤོས་ཀྱིས་སོ་སོར་འབྱེད་པ་དང་བོད་ཀྱི་མ་འོངས་བར་དོན་སྙིང་ངེས་ཅན་ཞིག་ལྡན་པ་ནི་བརྗོད་མི་དགོས་བ་ཞིག་རེད།  གཅིག་བྱས་ན་མ་འོངས་བའི་ཏྰ་ལའི་བླ་མ་ཚོ་དབྱིན་ཇིའི་རྒྱལ་ཁང་བཞིན་མི་རིགས་ཀྱི་མཚོན་རྟགས་སུ་གྱུར་བ་ལྟར་ཆབ་སྲིད་ཀྱི་དབང་ཆ་ངོ་མ་མེད།

དོན་དངོས་སུ་ཏྰ་ལའི་བླ་མས་ཐུགས་རེ་ལྟར་གཟི་བརྗིད་ལྡན་པའི་ངང་བགྲེས་ཡོལ་ཕེབས་ཐུབ་ནའང་ཁོང་གིས་འཇིག་རྟེན་གྱི་བྱ་བར་ཐུགས་ཁུར་མི་གནང་བར་ངྷ་རམ་ས་ལའི་ཕོ་བྲང་དུ་བསྐྱར་ཏུ་ཁོང་ཉིད་དགའ་མོས་ཆེ་བའི་ལྡུམ་ར་བདག་གཉེར་སྐྱོང་རྒྱུ་མཚོན་གྱིན་མེད།  བགྲེས་ཡོལ་ཟེར་བའང་ཏྰ་ལའི་བླ་མས་བཙན་བྱོལ་བོད་གཞུང་གི་ལས་དོན་ཐག་གཅོད་ཐད་ལ་དགོངས་འཆར་ཅི་ཡང་མི་གནང་རྒྱུ་དེ་རེད།  ཆབ་སྲིད་ཀྱི་འགན་འཁྲི་ལས་གཞན་ཆོས་ལུགས་ཀྱི་དབུ་ཁྲིད་ཞིག་ཡིན་པའི་ཆ་ནས་ཏྰ་ལའི་བླ་མར་ད་དུང་ཆོས་འཆད་སྤེལ་གྱི་འགན་འཁྲི་ཡོད་ལ།  ནོ་སྤེལ་ཞི་བདེ་གཟེངས་རྟགས་བཞེས་མཁན་ཞིག་ཡིན་པའི་ཆ་ནས་འགྲོ་བ་མིའི་རིགསལ་ཞི་བདེ་སྐྲུན་ཆེད་འགན་ཁུར་དགོས་བ་དང་།  གལ་སྲིད་ཁོང་རིགས་བགྲེས་ཡོལ་ཕེབས་ཚེ་ཆོས་འཆད་སྤེལ་གྱི་མཛད་རིམ་ཇེ་མང་དུ་འགྲོ་སྲིད་པ་རེད། 

ཏྰ་ལའི་བླ་མས་ཐེངས་མང་པོར་བགྲེས་ཡོལ་ཕེབས་རྒྱུ་གསུངས་ནའང་གྲོས་ཚོགས་ཀྱིས་དགག་བྱ་གནང་བ་དང་།  བཙན་བྱོལ་བོད་གཞུང་འཛིན་སྐྱོང་སྐབས་བཅུ་བཞི་བ་དང་གྲོས་ཚོགས་སྐབས་བཅོ་ལྔ་བའི་ཏྰ་ལའི་བླ་མ་ལ་མུ་མཐུད་ཆབ་སྲིད་ཀྱི་འགན་དབང་བཞེས་དགོས་བའི་གསོལ་འདེབས་གནང་རྒྱུ་ཡིན་མིན་ད་དུང་ཤེས་དཀའ་ཡང་། ཏྰ་ལའི་བླ་མས་ཊོ་རིན་ཊོན་ནས་གསུངས་བ་བཞིན་ཟླ་བ་ཁ་ཤས་རྗེས་འབྲས་བུ་བསླེབ་རྒྱུ་རེད་དོ།།