དཔའ་བོའི་རྡོ་རིང་དང་ལོ་རྒྱུས་དེབ་ཐེར་ནང་གསེར་ཡིག་འགོད་ངེས་ཡིན།

སྐུའི་གཅེན་པོ་སྟག་འཚེར་རིན་པོ་ཆེའི་སྲས་འཇིགས་མེད་ནོར་བུ་ལགས་ཀྱིས་ཨ་རིའི་མངའ་སྡེ་ཧྤོ་ལོ་རེ་ཌའི་ནང་བོད་དོན་གོམ་བགྲོད་བྱེད་སྐབས། རླངས་འཁོར་ཞིག་གི་བརྡེགས་ཏེ་སྐུ་གྲོངས་ཡོད་པའི་ཐད་བོད་ཀྱི་གཞོན་ནུ་ལྷན་ཚོགས་ཀྱིས་མྱ་ངན་ཞུས་ཡོད།

ཟླ་འདིའི་ཕྱི་ཚེས་ ༡༤ ཉིན་གྱི་ཨ་རིའི་དགོང་དྲོའི་ཆུ་ཚོད་ ༧ དང་ཕྱེད་ཀའི་ཐོག་རྒྱལ་གཅེས་བོད་དོན་འཐབ་རྩོད་པ་སྐུའི་གཅེན་པོ་སྟག་འཚེར་རིན་པོ་ཆེ་མཆོག་གི་སྲས་འཇིགས་མེད་ནོར་བུ་ལགས་ཀྱིས་ཉེ་ཆར་ཐའེ་ཝན་ནང་གི་བོད་དོན་དྲིལ་བསྒྲགས་ཀྱི་གོམ་བགྲོད་མཇུག་སྒྲིལ་ཏེ།  ཁ་སང་ཡང་བསྐྱར་ཨ་རིའི་མངའ་སྡེ་ཧྤོ་ལོ་རེ་ཌའི་ནང་མར་ལེ་ ༣༠༠ ལྷག་གི་བོད་དོན་གོམ་བགྲོད་ཞིག་མགོ་འཛུགས་བྱས་ཏེ། ཉིན་དང་པོའི་གོམ་བགྲོད་མཇུག་སྒྲིལ་མཚམས་སུ་རླངས་འཁོར་ཞིག་གི་བརྡབ་སྐྱོན་འོག་སྐུ་གྲོངས་ཡོད་འདུག

རང་ལོ་ ༤༥ ཡིན་པའི་སྲས་འཇིགས་མེད་ནོར་བུ་ལགས་ནི། སྐུའི་གཅེན་པོ་སྟག་འཚེར་རིན་པོ་ཆེ་མཆོག་གི་སྲས་གསུམ་གྱི་ཆུང་ཤོས་ཡིན་ལ། འདས་པའི་དུས་སུ་ཁོང་ཕ་དམ་པ་དང་མཉམ་དུ་ཐེངས་མང་པོར་ཨ་རིའི་མངའ་སྡེ་ཁག་མང་པོའི་ནང་བོད་རང་བཙན་གྱི་གོམ་བགྲོད་གནང་མྱོང་ཞིང་། ༢༠༠༨ ལོའི་ཟླ་ ༩ པའི་ཚེས་ ༥ ཉིན་ཁོང་སྙུང་གཞི་ཞིག་གི་དབང་གིས་སྐུ་གཤེགས་ཡོད་ཅིང་། སྲས་འཇིགས་མེད་ནོར་བུ་ལགས་ཀྱིས་ཕ་དམ་པའི་དགོངས་གཞི་ལྟར་རླབས་ཆེན་གྱི་བྱ་བཞག་མཇུག་སྐྱོང་བའི་དམ་བཅའ་བརྟན་པོ་བཅངས་ཏེ། སྔ་ཕྱི་ཨ་རིའི་མངའ་སྡེ་ཁག་ཅིག་དང་ཁེ་ཎ་ཌའི་མངའ་སྡེ་ཁག དེ་བཞིན་འདི་ལོའི་ཕྱི་ཟླ་ ༡༢ པའི་ནང་ཐའེ་ཝན་གྱི་རྒྱལ་ས་ཐའེ་པེ་ནས་གྲོང་ཁྱེར་ཀོ་ཞོན་བར་ཉིན་གྲངས་ ༡༣ རིང་གོམ་བགྲོད་གནང་ཡོད་ལ། ཁ་སང་ཨ་རིའི་མངའ་སྡེ་ཧྤོ་ལོ་རེ་ཌའི་ནང་གི་གོམ་བགྲོད་མགོ་འཛུགས་གནང་སྟེ། ཉིན་གཅིག་ལས་ཕྱིན་མེད་པའི་མཚམས་སུ་སྟབས་མ་ལེགས་པར་རླངས་འཁོར་ཞིག་གི་བརྡབ་སྐྱོན་བྱུང་སྟེ། བོད་རང་དབང་རང་བཙན་སླར་གསོའི་ཞབས་རྗེས་མཐའ་མ་དེ་བཞག་ཡོད།

དེ་རིང་ཞོགས་པར་བོད་ཀྱི་གཞོན་ནུ་ལྷན་ཚོགས་ཀྱིས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་རྒྱལ་གཅེས་རང་བཙན་གོམ་བགྲོད་པ་ཁོང་གི་ཆེད་དུ་བསྔོ་སྨོན་མཆོད་འབུལ་ཞིག་གོ་སྒྲིག་གནང་འདུག་ལ། དེ་དང་མཉམ་དུ་དམ་པ་ཁོང་གི་ནང་མིར་ཐུགས་གསོའི་འཚམས་འཕྲིན་ཞིག་ཀྱང་ཕུལ་སོང་། སྐབས་དེར་གཞོན་ནུའི་ཚོགས་གཙོ་ཚེ་དབང་རིག་འཛིན་ལགས་ཀྱིས་རྒྱལ་གཅེས་པ་ཁོང་གི་ལོ་རྒྱུས་ངོ་སྤྲོད་དང་འབྲེལ་གསུང་བཤད་གནང་དོན། ཁ་སང་རྒྱལ་གཅེས་རང་བཙན་འཐབ་རྩོད་པ་འཇིགས་མེད་ནོར་བུ་ལགས་འདས་གྲོངས་སུ་ཕྱིན་ཡོད་ཅིང་། དེ་ནི་རང་དགར་སྐུ་སྲོག་གྲོངས་པ་ཞིག་མ་ཡིན་པར། བོད་རང་དབང་རང་བཙན་ཐད་ཞི་བའི་གོམ་བགྲོད་བྱེད་སྐབས་སྐུ་སྲོག་ཤོར་ཡོད་པ་རེད། འདི་ལ་ང་ཚོ་གཞོན་ནུའི་སྒྲིག་འཛུགས་ཀྱི་ངོས་ནས་ཁོང་དང་ཁོང་གི་ནང་མིར་གདུང་སེམས་མཉམ་སྐྱེད་བྱེད་ཀྱིན་ཡོད་ལ། ང་ཚོའི་ངོས་ནས་ཁོང་གིས་ཕ་དམ་པའི་དགོངས་གཞི་གཞིར་བཟུང་ཐོག་ཁ་ཞེ་གཉིས་མེད་ཀྱིས་བོད་རང་བཙན་གྱི་གོམ་བགྲོད་མུ་མཐུད་སྤེལ་བཞིན་པའི་སྐབས་སུ་སྐུ་སྲོག་གྲོངས་ཡོད་པ་འདིར་ཁོང་ཉིད་རྒྱལ་གཅེས་དཔའ་བོ་ཞིག་ལ་ངོས་འཛིན་བྱེད་ཀྱིན་ཡོད་ལ། ང་ཚོ་བོད་རིགས་མི་མང་ཡོངས་ཀྱི་ངོས་ནས་ཀྱང་ཁོང་ཉིད་རླབས་ཆེན་གྱི་མི་སྣ་ཞིག་ལ་བརྩི་དགོས་པ་རེད། ཅེས་བརྗོད་བྱུང་།

ཡང་ཁོང་གིས། རྒྱ་ནག་གཞུང་གིས་བཙན་བཟུང་བྱས་པའི་འདས་པའི་མི་ལོ་ ༥༠ ལྷག་གི་ནང་བོད་གངས་ཅན་གྱི་རྒྱལ་གཅེས་རང་བཙན་འཐབ་རྩོད་པ་མང་པོ་ཞིག་གིས་རྒྱུ་ནོར་དང་གཉེན་ཉེ། རང་གི་གཅེས་པའི་ཚེ་སྲོག་ཀྱང་བློས་བཏང་བའི་བཀའ་དྲིན་ལ་བརྟེན་ཏེ། འཛམ་གླིང་གི་མི་འབོར་མང་ཤོས་དང་བཙན་རྒྱལ་རིང་ལུགས་ཆེ་ཤོས་རྒྱ་ནག་གི་བཙན་གནོན་འོག་བོད་དོན་མ་ཤི་གསོན་གནས་ཐུབ་ཡོད་པར་མ་ཟད། བོད་རང་བཙན་གྱི་བདེན་མཐའ་སེལ་བའི་སྐྱ་རེངས་ཀྱང་ཇེ་གསལ་དུ་འགྲོ་བཞིན་ཡོད། རྒྱལ་གཅེས་རང་བཙན་འཐབ་རྩོད་པ་རྣམས་ཀྱི་ཚེ་སྲོག་དང་འཚོ་གནས་ནི་བོད་རྒྱལ་ཁབ་དང་མི་མང་གི་རྩ་ཆེའི་རྒྱུ་ནོར་དང་སྟོབས་ཤུགས་ཡིན། ང་ཚོའི་སེམས་པ་ཧ་ཅང་ཉེ་ཞིང་རེ་བ་ཟབ་པའི་རྒྱལ་གཅེས་བོད་རང་བཙན་འཐབ་རྩོད་པ་འཇིགས་མེད་ནོར་བུ་ལགས་བོད་རང་བཙན་གྱི་གོམ་བགྲོད་ཁྲོད་རླངས་འཁོར་གྱིས་བརྡེགས་ཏེ། རྩ་ཆེའི་སྐུ་སྲོག་ཤོར་བའི་གཏམ་ངན་ཐོས་པར་བློ་ཡུལ་ལས་འདས་པའི་སྐྱོ་གདུང་དང་ཕངས་སེམས་སྐྱེ་ཞིང་། དགུང་གྲངས་ ༤༥ སྟེང་སྐུ་སྲོག་ཤོར་བ་དེ་བོད་རང་བཙན་སླར་གསོའི་ལས་དོན་གྱི་གྱོང་གུད་ཆེན་པོ་ཞིག་དང་། ལྷག་པར་དུ་བོད་རང་འཐབ་རྩོད་ཀྱི་འགག་རྩའི་དུས་མཚམས་སུ་ཁོང་གི་སྐུ་སྲོག་ཤོར་བ་དེ་ནི་བོད་མི་རིགས་དང་བོད་རྒྱལ་ཁབ་ཀྱི་གོད་ཆག་ཆེན་པོ་ཞིག་ཆགས་ཡོད།

ང་ཚོའི་ངོས་ནས་ཁོང་གི་འདས་པའི་གོམ་བགྲོད་ཀྱི་བྱུང་རིམ་དང་ཐེངས་འདིའི་གོམ་བགྲོད་ཁྲོད་འདས་གྲོངས་སུ་ཕྱིན་པའི་ལོ་རྒྱུས་དེ་མ་འོངས་བོད་རྒྱལ་ཁབ་ཀྱི་དཔའ་བོའི་རྡོ་རིང་དང་ལོ་རྒྱུས་དེབ་ཐེར་ནང་གསེར་ཡིག་གི་རི་མོར་འགོད་ངེས་ཡིན་ལ། ང་ཚོས་ཁོང་གི་རྒྱལ་གཅེས་སྙིང་སྟོབས་ལ་སློབ་སྦྱོང་བྱས་ཏེ་ཁོང་གི་བློས་གཏོང་དེ་བོད་རང་བཙན་གྱི་སྟོབས་ཤུགས་སུ་བསྒྱུར་ངེས་ཡིན། ཞེས་འཚམས་འཕྲིན་སྒྲོག་སྦྱོང་གནང་སོང་།

གནས་ཚུལ་ཤེས་རྟོགས་བྱུང་བ་ལྟར་ན། ཐེངས་འདིའི་རྒྱལ་གཅེས་བོད་དོན་གོམ་བགྲོད་པ་འཇིགས་མེད་ནོར་བུ་ལགས་ཀྱི་འདས་རྐྱེན་ཐད་མི་མང་ཁྲོད་རྒྱ་ནག་གི་ངན་ཇུས་ཡིན་མིན་གྱི་དོགས་གཞི་ཡོང་གི་ཡོད་ནའང་། ད་ལྟའི་ཆར་ཁོང་གི་སྐུ་སྲོག་བཀྲོང་ཁན་གྱི་རླངས་འཁོར་དེ་གཏོང་མཁན་རང་ལོ་ ༣༠ ཡས་མས་ཡིན་པའི་ཨ་རི་བ་ཁེལ་ཕུ་ཨོར་ཌེར་སི་ཟེར་བ་ཞིག་ཡིན་ཞིང་། ད་དུང་རླངས་འཁོར་དེའི་ནང་རང་ལོ་ ༥ ཡིན་པའི་བྱིས་པ་ཆུང་ཆུང་གཅིག་(གནས་ཚུལ་གཞན་ཞིག་ཏུ་བྱིས་པ་གཉིས་ཡོད་རབས་ཀྱང་བཤད།)ཡོད་ཚུལ་ཙམ་ལས། གཞན་གྱི་ལྐོག་ངན་བདེན་དཔང་གང་ཡང་བརྙེད་སོན་བྱུང་མེད་པ་དང་། ཨ་རིའི་ས་གནས་དེ་གའི་འབྲེལ་ཡོད་ལས་ཁུངས་ཀྱིས་ད་ཆར་བརྟག་དཔྱད་གཏོང་བཞིན་པའི་སྒང་ཡིན་འདུག   

གསར་འགོད་པ། དོན་གོ