ཀིག་ཁི་ཙི་ཡིས་བརྩམས། ཚེ་རིང་རྒྱལ་གྱིས་བསྒྱུར།
འདི་ནི་གླེང་གཞི་ལས་སླ་བོ་ཞིག་མ་རེད། ཡིན་ནའང་། ང་ཚོས་གཟབ་ནན་གྱི་སྒོ་ནས་གླེང་གཞི་འདིར་ངེས་པར་དུ་གྲོས་བསྡུར་བྱ་དགོས། ཨི་ཇིབ་མང་ཚོགས་ཀྱི་ཞི་བའི་གསར་བརྗེ་༼ འདིར་བརྗོད་པའི་ཞི་བའི་གོ་དོན་ནི་དྲག་པོར་བསྟུན་ཐབས་མི་བྱེད་པའི་ཞི་བར་གོ་དགོས།༽ཡི་མཐོ་རླབས་འོག ལོ་ངོ་སུམ་ཅུའི་རིང་ལ་སྲིད་གཞུང་སྒེར་གཅོད་བྱེད་མཁན་གྱི་དབང་འཛིན་པ་མུའུ་བྷ་རཱག་དངོས་སུ་སྲིད་སྟེགས་ལས་ཕབ་པ་རེད། ནཱེལ་གཙང་པོའི་རྒྱུད་དུ་ད་དུང་ཨི་ཇིབ་ཀྱི་ཡོན་ཧྲི་ཁའེ་དང་། ཨི་ཇིབ་ཀྱི་ཀྲང་ཞཱོན་ཡང་སྐྱེ་སྲིད། གང་ལྟར། ཨི་ཇིབ་སྤྱི་ཚོགས་ཀྱི་དམངས་གཙོའི་འཕེལ་རིམ་དེ་གཟི་བརྗིད་ལྡན་པའི་ངང་རྒྱལ་ཁའི་ཕྱོགས་སུ་གོམ་སྟབས་ཆེན་པོ་ཞིག་སྤོས་ཡོད།
དེ་བཞིན་ཨི་ཇིབ་དང་མཚུངས་པར་སྒེར་གཅོད་རུལ་སུངས་སུ་གྱུར་བའི་ད་ལྟའི་རྒྱ་ནག་ལ་མཚོན་ནའང་རྒྱལ་ཁབ་དང་མི་རིགས། ཐ་ན་ང་ཚོ་མི་རེ་ངོ་རེ་ཡི་ལས་དབང་མཐའ་དག་དམངས་གཙོ་འཕེལ་འགྱུར་དང་གཞི་གཅིག་ཏུ་དམ་པོར་འབྲེལ་ཡོད། དེར་བརྟེན། ད་ནི་རྒྱ་ནག་མང་ཚོགས་ཀྱིས་ཅི་ཞིག་བྱ་དགོས་མིན་ཐད་ལ་གླེང་སློང་ཡང་མི་ཉུང་བ་ཞིག་འཐོན་བཞིན་འདུག འོན་ཀྱང་གླེང་སློང་དེ་དག་གི་ཁྲོད་དུ་གནད་གཙོ་བོ་ཞིག་གླེང་རྒྱུ་བརྗེད་འདུག རྒྱ་ནག་གི་དམིགས་བསལ་ཁྱད་ཆོས་ལྡན་པའི་གནད་འགག་ཅིག་སྟེ། རྒྱ་ནག་སྐམ་ས་ཆེན་པོའི་མི་མང་གི་ཞི་བའི་གསར་བརྗེ་ཡི་གོམ་སྟབས་དང་པོ་སྤོ་ཆེད། ཐོག་མར་དམངས་གཙོ་དང་དམངས་ཀྱི་བསམ་འདུན་བརྩོན་ལེན་བྱེད་མཁན་གྱི་དཔུང་ཚོགས་དེ་ངེས་པར་གཙང་མ་དང་གསལ་བོ་ཆགས་དགོས་པ་དེ་རེད།
མང་ཚོགས་ཀྱིས་ངེས་པར་དུ་རྟོགས་དགོས་པ་ཞིག་ནི། གཅིག་དགུ་གྱ་བརྒྱད་ལོའི་༼ དྲུག་བཞིའི་ཡར་ལངས་ཆེན་མོ ༽ཡི་སྐབས་སུ་ཉེས་མེད་མང་ཚོགས་རྣམས་མེ་མདས་གཙང་འཕྱག་བྱེད་ཕོད་མཁན་གྱི་ཚོགས་པ་དེས་སྔ་མོ་ནས་རང་ཉིད་མི་དམངས་ཀྱི་དགྲ་བོར་ཚད་འཛིན་བྱས་ཡོད། དེ་བཞིན་མི་དམངས་ཀྱིས་ཀྱང་རང་སྟེང་ནས་ངོ་ལོག་དང་འབོད་སྐུལ་བྱས་མེད་པ་མ་ཡིན་པར། ངོ་ལོག་དང་འབོད་སྐུལ་མཐའ་དག་མི་མང་གི་དགྲོ་བོས་དྲག་གནོན་བྱས་ཤིང་། དྲག་གནོན་འོག་མི་དམངས་ཧ་ལམ་སྦྲིད་འཐོམ་དུ་གྱུར་བ་རེད། མང་ཚོགས་ཀྱིས་ད་དུང་ཤེས་དགོས་པ་ཞིག་ལ། ད་ལྟ་མི་དམངས་ཧ་ལམ་སྦྲིད་འཐོམ་དུ་གྱུར་ཟིན་པ་དེ་ནི། སྒེར་གཅོད་ཤོག་ཁག་གིས་ཕྱོགས་ཡོངས་ནས་དྲག་གནོད་བྱས་པ་ཁོ་ནས་རྐྱེན་གྱིས་མ་ཡིན་པར། དེ་ལས་གཞན་པའི་རྒྱུ་རྐྱེན་གཙོ་བོ་ཞིག་ནི་མི་དམངས་ཀྱི་དགྲ་བོར་ཁ་ཕྱོགས་ཏེ། “ང་ཚོར་དགྲ་བོ་མེད” ཅེས་རྗོད་མཁན་གྱི་ཕ་ཝང་ལྟ་བུའི་རང་དབང་ཤོག་པ་ཚོས་ཁྱི་སྤྱང་ངན་འབྲེལ་གྱི་ཟློས་གར་འཁྲབ་པར་མང་ཚོགས་སྦྲིད་འཐོམ་དང་མགོ་སྐོར་ཐེབས་པ་རེད།
དགའ་འོས་པ་ཞིག་ལ་ཋུ་ནེ་ཤི་ཡ་དང་ཨི་ཇིབ་ཀྱི་གསར་བརྗེ་དེས་རྒྱ་ནག་གི་དམངས་གཙོ་དང་དམངས་ཀྱི་བསམ་འདུན་བརྩོན་ལེན་བྱེད་མཁན་དཔུང་ཚོགས་དབྱེ་འབྱེད་གཙང་བཤེར་ཡོང་བའི་ཐད་རོགས་འདེགས་ཀྱི་ཤུགས་རྐྱེན་ཐེབས་ཡོད། ཐ་ན་དམངས་གཙོ་དང་སྒེར་གཅོད། ཡར་རྒྱས་དང་ངོ་ལོག གསར་བརྗེ་དང་གསར་བརྗེ་མ་ཡིན་པ་བཅས་ཀྱི་རྙོག་མའི་སྤུ་རིས་ཁ་ཁར་ཕྱེས་ཏེ། ས་སྒང་རིལ་མོ་འདིར་དམངས་གཙོའི་མཐོ་རླབས་འཕྱུར་བཞིན་པའི་ཛ་དྲག་གི་དུས་སྐབས་འདིར། ཕ་ཝང་ལྟ་བུའི་རང་དབང་ཤོག་པ་ཚོས་སྔར་བཞིན་ཆབ་སྲིད་ཀྱི་མུ་ཅོར་སྒྲོག་བཞིན། ༠༨ ལོའི་རྩ་འཛིན་ལ་མིང་རྟགས་འགོད་དགོས་པའི་སྟོང་གཏམ་འུད་སྒྲོག་བྱེད་བཞིན་ཡོད། ཡིན་ནའང་། གསར་བརྗེ་ཡིས་ཕན་ཚུན་བར་དམར་འཛིང་བསླང་ངེས་ཚུལ་དང་། ཕྱོགས་ཡོངས་ནས་བཅོས་བསྒྱུར་བྱེད་པ་ནི་དམངས་གཙོའི་བགྲོད་ལམ་ལེགས་ཤོས་ཡིན་ཚུལ། རྗེས་དཔག་རང་བཞིན་གྱི་མཉམ་འབྲེལ་མི་བྱེད་པའི་ཞི་བའི་ཐབས་ལམ་ནི་དམངས་གཙོའི་མངོན་འདོད་མཚོན་ཐབས་ཉག་གཅིག་ཡིན་སྐོར་སོགས་ཀྱི་ཆབ་སྲིད་སྦྲིད་སྨན་དེ་དག་ལ། ད་ལྟ་ཁོ་ཚོས་མུ་མཐུད་དུ་རྒྱལ་མཆོག་དམངས་བཟང་གི་ཤིན་ལྐོག་གཡོགས་ཏེ་སྔར་བཞིན་རྒྱ་བསྐྱེད་གཏོང་ཐབས་བྲལ་བར་གྱུར་ཡོད།
མང་ཚོགས་ཀྱིས་ངེས་པར་དུ་ཉམས་འཇོག་བྱ་དགོས་པ་ཞིག་ནི། ཆབ་སྲིད་སྦྲིད་སྨན་དེའི་རིགས་རྒྱ་ཁྱབ་ཏུ་སྤེལ་བར་བརྩོན་མཁན་གྱི་ཕ་ཝང་ལྟ་བུའི་རང་དབང་ཤོག་པ་དེ་དག་གིས་རྒྱ་ནག་སྐམ་སའི་མི་མང་ལས་འགུལ་ལོ་ངོ་སུམ་ཅུའི་རིང་ལོག་ལམ་གྱི་འདམ་རྫབ་ཁྲོད་བརྡབས་པ་རེད། ད་ལྟ་ཋུ་ནེ་ཤི་ཡ་དང་ཨི་ཇིབ་ཀྱི་གསར་བརྗེ་མཐོ་རླབས་ཀྱིས་ཁོ་ཚོའི་སྟོང་གཏམ་གྱི་སྨྲ་ལྕེ་ལྐུགས་པར་བྱས་ཤིང་མུ་ཅོར་གྱི་མགྲིན་པ་འགག་ཏུ་བཅུག་ཡོད། ཡིན་ནའང་། མ་འོངས་པར་རྒྱ་ནག་མང་ཚོགས་ཀྱིས་གསར་བརྗེ་ལ་བརྟེན་ཏེ་ཆབ་སྲིད་བཅོས་བསྒྱུར་དང་སྒེར་གཅོད་ལམ་ལུགས་རྩ་མེད་བྱེད་པའི་གྲ་སྒྲིག་གི་དུས་ཤིག་ཤར་ཚེ། སྒེར་གཅོད་དབང་སྒྱུར་ལམ་ལུགས་ཀྱི་མདའ་ཡབ་འོག་འཚང་ཞོར། དམངས་གཙོ་དང་དམངས་ཀྱི་བསམ་འདུན་བརྩོན་ལེན་མཁན་དུ་རྫུ་བའི་ཕ་ཝང་ལྟ་བུའི་རང་དབང་ཤོག་པ་དེ་ཚོས་སྔར་ལས་ལྷག་པར་མང་ཚོགས་ལ་མགོ་བདེ་དྲན་འཕྲུལ་དང་གཡོ་སྒྱུ་ཁྲམ་གསུམ་འཁྲབ་སྲིད།
དམངས་གཙོའི་སྲོག་རླུང་དང་ཞི་བའི་གསར་རྗེ་ཡི་མཐོ་རླབས་འཕྱུར་བཞིན་པའི་ཕྱི་ལོ་ ༢༠༡༡ ལོར། ད་ལྟའི་རྒྱ་ནག་མང་ཚོགས་ད་དུང་སྦྲིད་འཐོམ་ངང་དབང་སྒྱུར་བའི་བརྙས་བཅོས་དང་མནར་གཅོད་མྱོང་བཞིན་མུ་མཐུད་བསྡོད་དགོས་ལ། ཡང་མིན་ན་རང་སྲོག་འབེན་བཙུགས་ཀྱིས་འཐབ་རྩོད་ཐེངས་གཅིག་བྱ་དགོས། རང་སྲོག་འབེན་བཙུགས་ཀྱི་གསར་བརྗེ་ལ་ཕྱི་བཤོལ་ཡོད་མི་སྲིད་ལ། ཕྱི་བཤོལ་མེད་པའི་དཔུང་ཚོགས་ཀྱིས་ངེས་པར་དུ་ཐོག་མར་དགྲ་གཉེན་དབྱེ་འབྱེད་གཙང་མ་ཞིག་བཟོ་དགོས་པ་དེ་རེད།
