རྒྱལ་སྤྱིའི་གསར་འགོད་པར་དཀའ་སྡུག་བརྗོད་མཁན་ཞིག་འདས་གྲོངས།

ས་བྱི་ཞི་རྒོ་ཆེན་མོའི་སྐབས་བླ་བྲང་དགོན་པའི་ནང་རྒྱལ་སྤྱིའི་གསར་འགོད་པར་བོད་ནང་གི་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་། ཆོས་ལུགས་དད་མོས་བཅས་ཀྱི་སྐོར་བརྗོད་མཁན་གྲྭ་སངས་རྒྱས་རྒྱ་མཚོ་ལགས་ན་ཚའི་དབང་གིས་འདས་གྲོངས་སུ་ཕྱིན་འདུག

༢༠༠༨ ལོའི་ས་བྱི་ཞི་རྒོལ་ཆེན་མོའི་སྐབས་རྒྱལ་སྤྱིའི་གསར་འགོད་པ་མདོ་སྨད་བླ་བྲང་ཁུལ་དུ་བསྐྱོད་སྐབས་བོད་ནང་གི་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་། ཆོས་ལུགས་དད་མོས་རང་དབང་མེད་པའི་སྐོར་གྱི་གནས་ཚུལ་རྗོད་མཁན་གྲྭ་སངས་རྒྱས་རྒྱ་མཚོ་འམ། མིང་གཞན་ལ་སངས་རྒྱས་གྲུབ་ཆེན་འབོད་པ་ཁོང་སྐབས་དེ་ནས་རྒྱ་ནག་གི་གནོན་ཤུགས་འདུག་ཐབས་མེད་པར་བྲོས་བྱོལ་གྱི་བྱས་ཡོད་པ་དང་། དཀའ་སྡུག་གི་ལོ་ཟླ་དེའི་ནང་ལུས་ལ་ན་ཚ་བྱུང་ཡོད་ཀྱང་། རྒྱ་ནག་གིས་གནོན་ཤུགས་འོག་ཚད་ལྡན་གྱི་སྨན་ཁང་དུ་སྨན་བཅོས་བྱས་མ་ཐུབ་པའི་དབང་གིས་ཟླ་འདིའི་ཕྱིལ་ཚེས་ ༢༦ ཉིན་གྱི་ཞོགས་པར་རང་ཁྱིམ་ནས་འདས་གྲོངས་སུ་གྱུར་ཡོད་འདུག 

འདིའི་ཐད་དེ་རིང་ཕྱི་དྲོ་བོད་ཀྱི་དགུ་བཅུ་ལས་འགུལ་ཚོགས་པས་དམ་པ་ཁོང་གི་སྤུན་མཆེད་ཐུབ་བསྟན་རྒྱལ་མཚན་ལགས་གདན་ཞུ་གནང་སྟེ་གསར་འགོད་གསལ་བསྒྲགས་ཤིག་སྤེལ་སོང་། སྐབས་དེར་དམ་པ་ཁོང་གི་འདས་པའི་བོད་དོན་འཐབ་རྩོད་ཀྱི་ལོ་རྒྱུས་དང་སྐབས་དེའི་རྒྱལ་སྤྱིའི་གསར་འགོད་པར་གནས་ཚུལ་སྙན་སྒྲོན་ཞུས་པའི་བརྙན་རིས་སོགས་གཟིགས་འབུལ་གནང་བྱུང་བར་མ་ཟད། བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ངོས་ནས་ཁོང་ཉིད་རྒྱལ་གཅེས་དཔའ་བོ་ཞིག་དང་དུས་གཏན་ཏུ་མི་མང་གི་སྙིང་དབུས་སུ་བཞེངས་པའི་གཞོམ་གཞིག་བྲལ་བའི་ལོ་རྒྱུས་ཀྱི་རྡོ་རིང་ཞིག་ཏུ་ངོས་འཛིན་བྱེད་ཀྱིན་པར་མ་ཟད། ཁོ་དང་ཁོ་ལྟ་བུའི་རྒྱལ་གཅེས་དཔའ་བོ་དཔའ་མོ་བྲོས་བྱོལ་དང་ཉེན་ཡོལ་གྱི་དཀའ་སྡུག་ཁྲོད་འཚོ་བ་རོལ་མཁན་ཡོངས་ཀྱི་ཞུམ་པ་མེད་པའི་སྙིང་སྟོབས་ལ་རྒྱབ་སྐྱོར་ཡི་རངས་བྱ་རྒྱུ་ཡིན་ཞེས་བརྗོད་བྱུང་ལ། ལོ་གསར་བའི་སྐབས་འདིར་བཙོན་ཁང་དུ་ཡོད་པའི་རྒྱལ་གཅེས་དཔའ་བོ་རྣམས་དང་ཁོང་རྣམ་པའི་ནང་མི་ཡོངས་ལ་ལྷག་བསམ་དང་སེམས་ཤུགས་མི་མཐུད་གནས་དགོས་པའི་རེ་བ་དང་འབོད་སྐུལ་ཡང་གནང་བྱུང་།

རང་ལོ་ ༤༣ ཡིན་པའི་གྲྭ་སངས་རྒྱས་རྒྱ་མཚོ་ལགས་ནི། ༡༩༦༩ ལོར་བོད་མདོ་སྨད་བླ་བྲང་བཀྲ་ཤིས་འཁྱིལ་གྱི་ཉེ་འདབས་བསང་ཁོག་ཚོ་བདུན་ཞེས་པའི་འབྲོག་ཁྱིམ་ཞིག་ཏུ་ཕ་མགོ་བྷེ་དང་མ་བསོད་ལོ་གཉིས་ཀྱི་ཁྱིམ་དུ་སྐྱེས་ཤིང་།རང་ལོ་ ༡༦ སྟེང་བླ་བྲང་བཀྲ་ཤིས་འཁྱིལ་ནས་རབ་ཏུ་བྱུང། རང་ལོ་ ༢༣ སྟེ་ཕྱི་ལོ་ ༡༩༩༡ ལོར་རྒྱ་གར་དུ་ཕེབས་ནས་འབྲས་སྤུངས་སྒོ་མང་གྲྭ་ཚང་དུ་སློབ་གཉེར་གནང་ཡོད། ༡༩༩༤ ལོར་ཕྱིར་བོད་དུ་ལོག་ཏེ་བླ་བྲང་དགོན་པའི་ནང་སློབ་གཉེར་རྒྱུན་འཁྱོངས་བྱས་ཏེ། དཔེ་ཆ་བའི་མཚན་སྙན་མཐོ་བོར་བསླེབས་ཡོད་ཀྱང་། ༢༠༠༨ ལོར་བླ་བྲང་ས་ཁུལ་གྱི་ངོ་རྒོལ་བའི་དབུ་ཁྲིད་མི་སྣའི་གྲས་དང་རྒྱལ་སྤྱིའི་གསར་འགོད་པ་ལྷ་ས་དང་བླ་བྲང་སོགས་སུ་རྟོག་དཔྱོད་དུ་ཕེབས་སྐབས་རྒྱ་ནག་གི་དམ་དྲག་བྱེད་མིན་ལ་མ་ལྟོས་པར་ “བོད་མིར་འགྲོ་བ་མིའི་ཐོབ་ཐང་དགོས། སྨྲ་བརྗོད་རང་དབང་དགོས། ཆོས་ལུགས་དད་མོས་རང་དབང་དགོས” སོགས་ཀྱི་སྐད་འབོད་བྱས་ཡོད་པ་དང་། རྗེས་སུ་ཨེ་ཤ་ཡ་རང་དབང་རླུང་འཕྲིན་སོགས་ལ་བོད་ནང་གི་དངོས་ཡོད་གནས་སྟངས་འགྲེལ་བརྗོད་བྱས་སྟབས། རྒྱ་གཞུང་གིས་འཛིན་བཟུང་བཀའ་རྒྱ་བཏང་ཡོད་ཅིང་། སྐབས་དེར་ཁོང་གི་གཉེན་ཉེ་དང་གྲོགས་པོ་དག་གི་རེ་འདུན་ལྟར་རི་མགོར་བྲོས་བྱོལ་དུ་ཕྱིན་སྟེ་སྡོད་གནས་དང་ཟ་འཐུང་། འཕྲོད་བསྟེན་སོགས་ཀྱི་དབང་གིས་ཁོང་ལ་གྲང་ཤེད་ཀྱི་ན་ཚ་ཞིག་བྱུང་སྟེ་ཉལ་སར་ལྷུང་ཡོད་འདུག

འོན་ཀྱང་། རྒྱ་ནག་གཞུང་གི་གནོན་ཤུགས་འོག་ཚད་ལྡན་གྱི་སྨན་ཁང་ཞིག་ལ་བསྟེན་རྒྱུའི་གོ་སྐབས་མ་བྱུང་། རིམ་གྱིས་ནད་གཞི་ཇེ་སྡུག་ཏུ་ཕྱིན་ཡོད་པ་དང་། ཕྱིས་སུ་གསང་སྟབས་ཀྱིས་ཀན་ལྷོ་ཁུལ་བོད་སྨན་ཁང་དང་ཟི་ལིང་བོད་སྨན་ཁང་།ཀ་ཆུའི་སྨན་ཁང་སོགས་སུ་སོང་སྟེ་གཤགས་བཅོས་སོགས་བྱས་ཀྱང་མ་ཕན་པར་མཐར་འདས་གྲོངས་སུ་སོང་ཡོད།   

རྒྱལ་གཅེས་དཔའ་བོ་སངས་རྒྱས་རྒྱ་མཚོ་ལགས་ཀྱི་འདས་གྲོངས་སུ་ཕྱིན་པའི་ཐད་བོད་ཀྱི་དགུ་བཅུ་གསུམ་ལས་འགུལ་ཚོགས་པས་ཁོང་དང་ཁོང་གི་ནང་མིར་གདུང་སེམས་མཉམ་སྐྱེད་མཚོན་ཕྱིར་བསྔོ་སྨོན་མཆོད་འབུལ་གནང་ཡོད་པར་མ་ཟད། དེ་རིང་དགོང་དྲོ་མེག་ལོར་རླངས་འཁོར་ས་ཚིགས་ནས་ཐེག་ཆེན་ཆོས་གླིང་གཙུག་ལག་ཁང་བར་མར་མེ་ཁྲོམ་སྐོར་ཞིག་ཀྱང་གོ་སྒྲིག་གནང་འཆར་ཡོད་འདུག

གསར་འགོད་པ། དོན་གོ