འཐུས་ཤོར་བའི་ངོ་གདོང་།

བོད་ཀྱི་དུས་བབ་སྤྱིའི་འདོན་ཐེངས་ ༥༠༨ པའི་སྟེང་གི་རྩོམ་སྒྲིག་པའི་གཏམ།

༸གོང་ས་མཆོག་གིས་ཕྱག་གཉིས་ཐལ་མོ་སྦྱར་ཏེ་ཁེ་ན་ཌའི་གཞུང་ལ་ཞུ་བ་ཕུལ། ཁེ་ན་ཌའི་གཞུང་གིས་རྒྱ་ནག་གི་གནོན་ཤུགས་ལ་མ་ལྟོས་པར་༧ཁོང་གི་གཞེན་སྐུལ་དེ་དང་དུ་བླངས་པ་མ་ཟད། བཙན་བྱོལ་བོད་མི་ ༡༠༠༠ ཁེ་ན་ཌར་ལེན་རྒྱུ་ཡིན་ཚུལ་ཉེ་ཆར་གཞུང་འབྲེལ་གྱིས་ཁྱབ་བསྒྲགས་བྱས་སོང་། བཙན་བྱོལ་ནང་གི་དཀའ་ངལ་ཅན་མང་པོ་ཞིག་གིས་ཡུན་རིང་ཡིད་ལ་བརྣག་པའི་འདོད་དོན་ལ་བར་ཐག་ཇེ་ཉེར་སོང་། འོན་ཀྱང་བཙན་བྱོལ་བོད་གཞུང་གིས་ཁོང་ཚོར་ཁེ་ན་ཌའི་གཞུང་གིས་ཚུར་འབྲེལ་བ་བྱས་མ་སོང་སྟབས། དོན་དག་དེ་གཞུང་འབྲེལ་ཆགས་མེད་ཟེར། ངོ་མ་ཧང་སང་དགོས་པའི་སྐད་ཆ་རེད།

སྐུ་མདུན་མི་བཞུགས་པའི་དུས་དེར་བོད་དོན་ཡང་མཇུག་སྒྲིལ་བ་རེད་ཟེར་མཁན་ཚོར་ཡང་ཁག་མི་འདུག འདི་བོད་པ་ཚོར་ཧ་ཅང་རྒྱུས་ཡོད་པའི་སྐད་ཆ་རེད། དེ་ཚོས་ང་རང་ཚོའི་གཤིས་ཀ་ལ་འཇགས་བསྡད་པའི་སྲོལ་རྒྱུན་གྱི་ན་ཚ་འདིའི་རིགས་ཤེས་ཡོད་པ་ཡིན་སྲིད། སྐུ་མདུན་སྐུ་དངོས་སུ་བཞུགས་པའི་སྐབས་སུ་ཡང་ང་ཚོའི་ལས་ཀ་བྱེད་སྟངས་འདི་འདྲ་ཞིག་རེད། བོད་ཀྱི་ལོ་རྒྱུས་ལ་ཞིབ་འཇུག་བྱེད་མཁན་ཚང་མས་མདོ་དོན་༼འཐུས་ཤོར་༽ཞེས་པ་དེ་རྒྱུ་རྐྱེན་མཐའ་དག་གི་དང་པོར་འཇོག་གི་ཡོད་པ་འདྲ། སྐུ་མདུན་གྱིས་ཀྱང་༼འཐུས་ཤོར་༽གྱི་ཕྱོགས་ནས་བོད་པ་ཚོར་བཀའ་སློབ་དང་བཀའ་བཀྱོན་མང་པོ་གཏོང་མྱོང་བ་རེད། འདི་ལ་ཕལ་ཆེར་བཅོས་སུ་མེད་ཀྱང་སྲིད།

ཐེངས་འདིར་བོད་མི་ ༡༠༠༠ ཁེ་ན་ཌར་ལེན་རྒྱུའི་ལས་གཞི་འདིའི་ཐད་ནས་ཀྱང་། བཙན་བྱོལ་བོད་གཞུང་གིས་སླར་ཡང་༼འཐུས་ཤོར་བ།༽ཞིག་གི་རྣམ་འགྱུར་དེ་སྟོན་གི་འདུག ད་ནི་ཁེ་ན་ཌའི་གཞུང་གིས་ཁ་བཏགས་ཤིག་ཁྱེར་ནས་གངས་སྐྱིད་ལ་ཡོང་དགོས་པ་མིན་འགྲོ། དེ་མ་གཏོགས་ཁེ་ན་ཌའི་གཞུང་གིས་གསལ་བསྒྲགས་གནང་མ་ཐག བཙན་བྱོལ་བོད་གཞུང་གིས་ཁ་བཏགས་ཤིག་ཁྱེར་ནས་ཕར་ཐུགས་རྗེ་ཆེ་ཞུ་བ་དང་མཉམ་དུ། ལས་གཞི་འདིའི་མགོ་རྔ་ཚང་མར་བཙན་བྱོལ་བོད་གཞུང་གིས་རོགས་རམ་གང་འདྲ་ཞིག་ཞུ་ཐུབ་མིན་ཕར་ཞུ་དགོས་པ་ལོས་ཡིན། རེད་དེ། བཙན་བྱོལ་བོད་གཞུང་གིས་ཁེ་ན་ཌའི་གཞུང་ལ་ཕར་འབྲེལ་བ་མ་བྱས་པར། ཁེ་ན་ཌའི་གཞུང་གིས་ཚུར་འབྲེལ་བ་བྱ་དགོས་པའི་ལྟ་ཚུལ་ཞིག་བཟུང་བསྡད་འདུག ཚུར་འབྲེལ་བ་མ་བྱས་བར་དུ་ལས་གཞི་འདི་གཞུང་འབྲེལ་ཆགས་གི་མ་རེད་ཅེས་བཤད་འདུག

སྤྱིར་ལས་གཞི་ཆེན་པོ་འདི་རིགས་ངེས་པར་དུ་མཐོ་རིམ་གཞུང་འབྲེལ་ཐོག་གནང་དགོས་པ་སྨོས་མ་དགོས་ཀྱང་། ཐེངས་འདིའི་བཙན་བྱོལ་བོད་གཞུང་གི་གནང་སྟངས་དེར་འོས་མེད་ཀྱི་སྦམ་མདོག་ཅིག་མཐོང་གི་འདུག་ལ། འགེབ་ཐབས་མེད་པའི་འཐུས་ཤོར་བའི་ངོ་གདོང་ཞིག་ཀྱང་མངོན་གྱི་འདུག གཞུང་གིས་དམངས་ལ་བརྩེ་ཞིང་དམངས་ཀྱིས་གཞུང་ལ་བཀུར་ཏེ་གཞུང་དམངས་བློ་ཐག་ཉེ་ན། ངྷ་རམ་ས་ལའི་གཞུང་ནི་བོད་མི་སྤྱི་བོ་གནམ་བསྟན་ཡོངས་ཀྱི་གཞུང་ལོས་ཀྱང་ཡིན། ཆེ་ཚུགས་དང་སྦམ་མདོག་བསྟན་ཏེ་རང་སར་འགྱེ་བསྡད་ན། རྒྱལ་ཁབ་གཞན་དང་མི་རིགས་གཞན་ལྟ་ཅི་སྨོས། སྐྱབས་བཅོལ་བོད་པ་ཚང་མས་ཀྱང་བརྩི་བཀུར་འཐོབ་དཀའ་ལ། ལྷག་པར་དུ་༧གོང་ས་མཆོག་སྐུ་མ་བཞུགས་པའི་ཉིན་མོ་གཞིས་བཞུགས་རྒྱ་ཆེའི་མི་མང་གིས་དེ་བས་ཀྱང་ངོ། ངས་བསམ་ན་ཆེས་མ་མཐར་ཡང་། ཐེངས་འདིའི་བཤད་སྤྱོད་དེས་ང་ཚོས་གཞུང་འབྲེལ་གྱི་བཟང་སྤྱོད་ཅིག་བརླགས་ཚར་འདུག་སྙམ།