བོད་ཀྱི་དུས་བབ་སྤྱིའི་འདོན་ཐེངས་ ༥༡༠ པའི་སྟེང་གི་རྩོམ་སྒྲིག་པའི་གཏམ།
རྒྱ་གར་ཉེན་རྟོག་པ་ཚོས་དཔལ་རྒྱལ་བ་ཀརྨ་པའི་བླ་བྲང་ནས་དངུལ་ཕོན་ཆེན་ཞིག་ཕྱིར་བཏོན་ཏེ། ཉེས་དོན་གལ་ཆེན་ཞིག་གི་ཚང་བརྟོལ་བ་ལྟར། ཧ་ཅང་ཛ་དྲག་དང་འཇིགས་རུང་གི་རྣམ་པའི་ཐོག་ནས་ཀརྨ་བླ་བྲང་གི་ཁང་མིག་རེ་རེ་བཞིན་སྔོག་བཤེར་དང་། མི་སྣ་རེ་རེ་བཞིན་འདྲི་རྩད་ཞིབ་བཤེར་ནན་མོ་བྱས་སོང་བ་མ་ཟད། རྒྱུད་སྟོད་དགོན་པ་ཡོངས་སྐོར་སྲུང་དམ་པོ་བྱས་ཏེ། ཡུན་རིང་ཡིད་ལ་བརྣག་པའི་དོན་ཆེན་ཞིག་འགྲུབ་སོང་བ་མིན་ན། དེའི་རྒྱབ་ཏུ་གོང་རིམ་གྱི་བཙན་བཀའ་ཞིག་གིས་འདེད་ཀྱི་ཡོད་པའི་ཚོར་སྣང་ཞིག་སུ་ལའང་སྟེར་སྲིད།
རྒྱ་གར་གསར་ལམ་ཁག་གིས་ཀྱང་གཅིག་མགོར་གཉིས་འདོགས་དང་། བཅུ་མགོར་བརྒྱ་འདོགས་ཀྱིས་གསང་རྒྱ་དམ་པོ་ཞིག་གི་ཀློང་རྡོལ་བ་ལྟར། ཧ་ལས་ཤིང་ཧོན་འཐོར་མདོག་གིས་ས་སྒྲོག་གནམ་སྒྲོག་བྱས་སོང་། སྤྱིར་དམངས་གཙོའི་གཞུང་དང་ཁྲིམས་ཀྱི་དབང་སྒྱུར། སྨྲ་བརྗོད་རང་དབང་བཅས་ལ་ཐུན་མིན་གྱི་ཁྱད་ཆོས་རེ་ཡོད་ངེས་མོད། གནད་དོན་འདིའི་ཐད་ནས་བལྟས་ན། དམངས་གཙོ་རང་དབང་ཟེར་གཞིན་དམངས་དོན་མ་རྟོགས་ཤིང་། ཁྲིམས་ཀྱི་དབང་སྒྱུར་ཟེར་བཞིན་ཡུལ་སྲོལ་མ་བརྩིས་པ། སྨྲ་བརྗོད་རང་དབང་ཟེར་བཞིན་འགན་འཁྲི་མ་ཁྱེར་བའི་རྣམ་པ་དང་ནང་དོན་གཉིས་ཀ་མངོན་ཡོད།
ཐེངས་འདིའི་དོན་རྐྱེན་དེ་ནི་ཀརྨ་བླ་བྲང་ཙམ་དུ་མ་ཟད་བོད་སྤྱི་བར་གྱོང་གུད་ཆེན་པོ་ཞིག་ཡིན་ལ། ཡང་སྒོས་ཕུགས་རྒྱང་རིང་པོའི་བོད་པའི་རྩ་དོན་ཐོག་གི་བར་ཆད་ཆེན་པོ་ཞིག་ཀྱང་ཡིན་སྲིད། ང་ཚོ་གཞིས་བྱེས་བོད་མི་ཡོངས་ཀྱིས་ཀརྨ་པ་མཆོག་ལ་སྡུག་གི་ཁུར་པོ་མཉམ་འཁུར་དང་། སྐྱིད་ཀྱི་རྟ་བོར་མཉམ་ཞོན་ལོས་ཀྱང་བྱེད། ཁོང་རྒྱ་ནག་གི་རུམ་ནས་བྲོས་ཏེ་བཙན་བྱོལ་བོད་གཞུང་གི་པང་དུ་ཕེབས་པ་རེད། ༧གོང་ས་མཆོག་ལ་དབུ་འོག་དཔུང་འདེགས་དང་། ཡུལ་གྱར་བོད་མིར་སྐྱིད་སྡུག་མཉམ་མྱོང་བྱེད་དུ་ཡོང་བ་རེད། ཁོང་ནི་བོད་གཞིས་བྱེས་གཞུང་དམངས་ཡོངས་ཀྱི་རེ་བའི་མིག་གིས་ལྟ་ས་དང་། དམར་ཆུང་སྙིང་གི་ཉན་ས་གཅིག་པུ་དེ་ཡིན།
དཔལ་རྒྱལ་བ་ཀརྨ་པ་བཙན་བྱོལ་དུ་ཕེབས་པ་དེས་རྒྱ་ནག་ལ་བསམ་གཞིག་གསར་པ་ཞིག་བསླངས་ཡོད་ལ། རྒྱལ་སྤྱིའི་མང་ཚོགས་ལ་མིག་དཔེ་གསལ་བོ་ཞིག་བསྟན་ཡོད། འོན་ཀྱང་། སྤྱིར་བོད་པར་བསོད་བདེ་དམན་པས་གཞིས་བྱེས་གཉིས་སུ་གྱེས་དགོས་བྱུང་བའི་ཁར། ཀརྨ་པ་མཆོག་ལ་ལྷག་ཏུ་བགེགས་བར་ཆད་ཆེ་བས་རང་དབང་ལུང་པ་ནས་ཀྱང་གཞན་དབང་སྟབས་བསྟུན་འོག་བཞུགས་དགོས་བྱུང་ཡོད། ཁོང་ལ་ད་བར་ང་ཚོས་རང་དབང་གུ་ཡངས་ཀྱི་ཁོར་ཡུག་ཅིག་བསྐྲུན་ཐུབ་མེད་ལ། ཞི་བདེ་བག་ཕེབས་ཀྱི་དུས་ཚོད་ཅིག་དེ་བས་ཀྱང་སྤྲད་མྱོང་མེད་ལ། ཕྱི་ནང་གསེང་གསུམ་ནས་སྐུ་ཚེགས་དང་སེམས་ཚེགས་བཟོས་པ་ཉུང་ཉུང་མིན།
ཀརྨ་བླ་བྲང་ལ་དངུལ་གྱི་དོན་རྐྱེན་བྱུང་མ་ཐག རྒྱ་གར་ཉེན་རྟོག་པ་ཚོས་དོགས་པ་སྣ་ཚོགས་དང་། གསར་ལམ་ཁག་གིས་སྒྲོ་འདོགས་འདྲ་མིན་བྱེད་སྐབས། བོད་མི་ཚོས་ཀྱང་གདུང་སེམས་མཉམ་སྐྱེད་རྡོག་རྩ་གཅིག་སྒྲིལ་བྱས་པ་འདི་ནི། དཀའ་སྡུག་གི་དུས་སུ་མཛུབ་མོ་ལྔ་བཅིངས་ཁུ་ཚུར་ཡིན་པའི་བཟང་ཕྱོགས་ཀྱི་རྣམ་འགྱུར་ཞིག་ཡིན་ཡང་། ཐེངས་འདིར་ང་ཚོའི་ཕྱོགས་སུ་ཡང་ཞན་དང་དང་འཐུས་ཤོར། ནོར་འཁྲུལ་མང་པོ་ཞི་ལྷག་ཡོད་པ་ངོས་ཟིན་དགོས། རྒྱ་གར་ཉེན་རྟོག་པས་ཀརྨ་བླ་བྲང་དུ་ཧིན་སྒོར་འབུམ་བརྒྱ་ཤོག་ཅིག་ཡོད་པ་དང་། རྒྱལ་ཁབ་འདྲ་མིན་གྱི་དངུལ་ལོ་ཡོད་པར་དོགས་འཆར་འདྲ་མིན་བྱེད་པ་དེ་ནི། བོད་པའི་བླ་སྤྲུལ་སྒྲིག་འཛུགས་ཀྱི་འགྲོ་སྟངས་མ་ཤེས་པ་དང་། མཆོད་ཡོན་བླ་སློབ་ཀྱི་ལམ་སྲོལ་ལ་རྒྱུས་མངའ་མེད་པས་ཡིན་སྲིད་ཀྱང་། དོན་རྐྱེན་འདི་བརྒྱུད་དེ་བོད་མི་ཚོར་ཉེན་བརྡ་ཞིག་དང་མཉམ་དུ་གསལ་འདེབས་ཤིག་ཀྱང་བྱས་ཡོད།
