བོད་ཀྱི་དུས་བབ་སྤྱིའི་འདོན་ཐེངས་ ༥༡༡ པའི་སྟེང་གི་རྩོམ་སྒྲིག་པའི་གཏམ།
ཐེངས་འདིའི་བཀའ་བློན་ཁྲི་པའི་འོས་བསྡུའི་ལས་རིམ་དང་ལྷན་དུ་བརྡ་ཆད་གསར་པ་ཁ་ཤས་བྱུང་ཡོད། དེ་ནི་རྒན་པ་དང་ན་གཞོན་པ། ཤེས་ཡོན་དང་ཉམས་མྱོང་། སྐུ་དྲག་དང་ཞིང་པ་ཟེར་བ་འདི་དག་རེད། ཚིག་འདི་དག་གི་མདུན་ནས་ཉན་ན་མཚར་གྱི་སྣང་བ་བན་བུན་ཞིག་ལས་སྟེར་མི་སྲིད་ཀྱང་། ཚིག་འབྲུའི་རྒྱབ་ལ་ཞིབ་ཏུ་བལྟས་ན་ཧ་ཅང་འཇིགས་སུ་རུང་བ་ཞིག་དང་གདུག་རྩུབ་ཅན་ཞིག་ཡིན་ངེས། མང་པོ་ཞིག་གིས་ཁ་ནས་གླེང་བཞིན་པ་མིང་ཚིག་འདི་དག་ཡིན་ཡང་། དོན་ལ་གཉེར་བཞིན་པ་འབྲུ་དོན་གཞན་ཞིག་ཡིན་སྟབས། སྐབས་འདི་ནས་མིང་ཚིག་དེ་དག་གི་ཚིག་དོན་བཞིན་གོ་བ་བླངས་ཚེ་ཤིན་ཏུ་ནོར་ཉེན་ཆེ།
“ཚིག་པ་གཡག་ལ་ཟོས་ཏེ། མགོ་ལྕག་རྟ་ལ་གཞུས” ཞེས་པའི་དཔེ་ལྟར། ཁ་ནས་བྱུང་རབས་ཤིག་དང་རིག་གཞུང་ཞིག སྤྱི་དོན་ཞིག་ཨུ་ཚུགས་ཀྱིས་གླེང་སྟེ། “ང་ཚོའི་ཆོལ་ཁ” ཞེས་པ་འདི་ལ་གཞའ་བའི་ཚུལ་གྱིས་སྟོབས་ཤུགས་རྒྱས་བཞིན་ཡོད་མོད། འདི་ཆབ་སྲིད་པ་ཁོ་ནའི་བྱེད་ཐབས་ཤིག་མིན་པར། མིང་ཚིག་འདི་དག་གི་འོག་ནས་མང་པོ་ཞིག་གིས་ཉིན་མོའི་ཟས་བཀག་མཚན་མོའི་གཉིད་བཅག་སྟེ། ཆོལ་ཁའི་ཕྱོགས་འཐེན་ལ་ནུས་ཤུགས་ཡོད་དགུ་རྩལ་སྤྲུགས་བྱེད་ཀྱི་ཡོད་ཀྱང་། འདིའི་ཤུགས་ལས་ལྷ་ཕོག་ཀླུ་ཕོག་གི་ནག་ཉེས་མང་པོ་ཞིག་བཟོས་ཏེ། ནད་རོ་རྙིང་པར་ན་ཟུག་གསར་པ་སློང་བཞིན་ཡོད།
ཀླུད་ཤར་ན་ཡོད་ཀྱང་། གཏོ་ནུབ་ཏུ་འཕངས་ཞེས་པ་ལྟར། མང་ཚོགས་དཀྱུས་མ་མང་པོ་ཞིག་འདི་ལ་མགོ་འཐོམ་སྟེ། གོ་བ་ལོག་སྒྲུབ་དང་རྣམ་རྟོག་སྣ་ཚོགས་ཤར་གྱི་ཡོད་ཀྱང་། སྤྱི་ཚོགས་ལ་བརྡབ་གསིག་ཅི་ཙམ་བཏང་མིན་ལ་མ་ལྟོས་པར་འདིས་ཀྱང་མི་འགའ་ཞིག་གི་རེ་འདུན་འགྲུབ་ཀྱི་ཡོད་སྲིད། འདི་ནི་ཐེངས་འདིའི་བཀའ་བློན་ཁྲི་པའི་འོས་གཞིར་བཞེངས་མཁན་ཚོ་ལན་པ་མིན་ལ། གཞི་རིམ་མང་ཚོགས་དཀྱུས་མའི་སེམས་ནང་གི་མངོན་འདོད་དེ་བས་ཀྱང་མིན། འདི་ནི་སྤྱི་ཚོགས་ཀྱི་སྣེ་ཁྲིད་མཁན་དང་ལས་འགུལ་གྱི་སྣ་འདྲེན་མཁན། ལྷག་པར་དུ་མང་ཚོགས་ཚོས་བློས་འགེལ་སའི་མི་སྐོར་ཞིག་གི་རྨི་ལམ་ཡིན།
མིང་ཚིག་འདི་དག་གི་ནང་དོན་དང་མང་ཚོགས་བྱིངས་ཀྱི་མངོན་འདོད། བཀའ་བློན་ཁྲི་པའི་སྲིད་སྟེགས་གསུམ་ལ་བྱེ་བྲག་གིས་དཔྱད་ན། བཀའ་བློན་ཁྲི་པའི་སྲིད་སྟེགས་སྟེང་དུ་རྒན་འཁོགས་རྐྱང་པས་མཁྲེགས་འཛིན་བཅའ་ས་མེད་ལ། གཞོན་པ་རྐྱང་པས་ཧོལ་རྒྱུག་བྱེད་ས་ཡང་མེད། རྐུབ་སྟེགས་འདིའི་སྟེང་ནས་ཤེས་ཡོན་གཅིག་པུས་གསར་གཏོད་ཡོང་ཐབས་མེད་ལ། ཉམས་མྱོང་གཅིག་པུས་རྒྱུན་འཛིན་འཁྱོངས་ཐབས་ཀྱང་མེད། རྐུབ་སྟེགས་འདིའི་སྟེང་དུ་སྐུ་དྲག་རྙིང་པས་སྒེར་སྤྱོད་བྱེད་དབང་མེད་ལ། ཞིང་པ་དབུལ་བོས་བྱམས་སེམས་སྤྱོད་དབང་མེད། དམངས་གཙོའི་སྒྲོམ་གཞིས་བཅིན་པའི་སྲིད་སྟེགས་འདི་ནི་འུ་ཅག་ཐུན་མོང་ལ་དབང་ཞིང་། འུ་ཅག་ཐུན་མོང་ལ་ལས་དོན་བསྒྲུབ་ས་ཡིན།
གསལ་བོར་ཤེས་དགོས་པ་ཞིག་ནི། བཙན་བྱོལ་བོད་མིའི་བཀའ་བློན་ཁྲི་པའི་འོས་བསྡུའི་འགྲན་རྩོད་འདིའི་ཁྲོད་དུ། རྒན་གཞོན་དང་གསར་རྙིང་གི་འཐབ་རྩོད་ཡས་ནས་མེད་པ་ཞིག་ཀྱང་མིན་ཏེ། གཞོན་སྐྱེས་ཤེས་ཡོན་ཅན་ལ་རྒྱབ་སྐྱོར་བྱེད་མཁན་ཕལ་ཆེ་བ་ན་གཞོན་ཡིན་ལ། རྒན་པ་ཉམས་མྱོང་ཅན་ལ་དཔུང་སྒྲིག་མཁན་མང་ཆེ་བ་རྒན་པ་རེད། སྤྱིར་ན་གཞོན་སུ་ཞིག་ཡིན་རུང་གསར་བྱུང་དང་གསར་གཏོད། མཆོངས་སྐྱོད། འཕོ་འགྱུར་སོགས་ལ་དགའ་བ་ནི་ཆོས་ཉིད་ཡིན་ལ། རྒན་པ་གང་ཞིག་ཡིན་རུང་གཏན་འཇགས་དང་རྒྱུན་གནས། བབ་བརླིང་། ཕུགས་ཕེར་སོགས་ལ་དུང་བ་ཡང་རང་གཤིས་ཉིད་དོ།།
