འཐབ་རྩོད་ཀྱི་ངོ་བོ་འཚོལ་བ།

བོད་ཀྱི་དུས་བབ་སྤྱིའི་འདོན་ཐེངས་ ༥༡༢ པའི་སྟེང་གི་རྩོམ་སྒྲིག་པའི་གཏམ།

ལྷོ་སུའུ་ཌན་ལ་རང་བཙན་ཐོབ་སོང་། ཨི་ཇིབ་ལ་རང་དབང་ཐོབ་ཐལ། བོད་རྒྱ་ཆེའི་མི་མང་སྔར་བཞིན་གཞན་དབང་འོག་ལྷག་ཡོད། འཛམ་གླིང་ཐོག་འཐབ་རྩོད་འཁྲུག་ལོང་གི་རྣམ་གྲངས་མང་ལ་ནང་དོན་ཡང་སྣ་ཚོགས་ཤིག་ཡིན་མོད། མདོར་བསྒྲིལ་ན་རང་དབང་འཐབ་རྩོད་དང་རང་བཙན་འཐབ་རྩོད། གོ་ས་འཐབ་རྩོད་དང་ས་ཁོངས་འཐབ་རྩོད། མི་རིགས་འཐབ་རྩོད་དང་ཆོས་ལུགས་འཐབ་རྩོད་བཅས་རིགས་དྲུག་ཏུ་འདུ་ཞིང་། རྩོད་སྟངས་ཀྱང་ཞི་བ་དང་དྲག་པོ་གཉིས་སུ་བཀར་ཆོག

བོད་པ་ཚོས་ཡང་སྙིང་ཅི་ཞིག་རྩོད་ཀྱི་ཡོད། སྐོར་ཞིག་གིས་རང་དབང་རྩོད་ཀྱི་ཡོད་རབས་བཤད་ལ། འགའ་ཞིག་གིས་རང་བཙན་རྩོད་རྒྱུ་ཡིན་རབས་གླེང་། དེ་བས་མང་པོ་ཞིག་གིས་རང་གི་རྩོད་གཞི་ལ་ངོས་ཟིན་མེད་པ་དང་། ལངས་ཕྱོགས་ལ་གསལ་ཁ་མེད་པར་མགོ་འཐོམ་ནས་ཡོད། རྩོད་ཡུལ་གཅིག་ལ་རྩོད་ཕྱོགས་གཉིས་དང་། མི་རིགས་གཅིག་ལ་རྩོད་བྱ་གཉིས་སུ་གྱེས་ཡོད་པ་འདི། གདམ་ཀ་མང་བའི་དམངས་གཙོའི་ཐུན་མིན་གྱི་ཁྱད་ཆོས་ཤིག་ཏུ་བགྲང་ཆོག་མོད། གཅིག་བྱས་ན་དམངས་གཙོའི་ལེགས་བྱང་མེད་པའི་མི་རིགས་འདིའི་རང་མགོ་རང་གིས་རྡུང་བྱེད་ཀྱི་ཐོ་བ་དེ་ཡིན་ཡང་སྲིད།

ལྷོ་སུའུ་ཌན་ལ་རང་བཙན་ཐོབ་སོང་། ཨི་ཇིབ་ལ་རང་དབང་ཐོབ་ཐལ། བོད་རྒྱ་ཆེའི་མི་མང་སྔར་བཞིན་གཞན་དབང་འོག་ལྷག་ཡོད། འདས་པའི་མི་ལོ་ལྔ་བཅུའི་རིང་ང་ཚོས་འཐབ་རྩོད་བྱས་རབས་བཤད་ཀྱང། སྐབས་རེར་རྒྱ་ནག་ལ་ཁ་གཏད་གཅོག་གི་ཡོད་པ་དྲ་ཡང་། མཚམས་རེར་རྒྱ་ནག་གི་ཁ་ངོ་འཚོ་བཞིན་ཡོད་པར་ཡང་མཐོང་། སྐབས་རེར་གཞིས་བྱེས་གཉིས་ཀྱི་སྤྱི་དོན་སྒྲུབ་ཀྱི་ཡོད་པར་སྣང་ཡང་། མཚམས་རེར་གཞིས་བྱེས་གཉིས་སུ་རང་ས་སྲུང་གི་ཡོད་པར་ཡང་མཐོང་། ཡང་སྙིང་ང་ཚོས་ཅི་ཞིག་རྩོད་ཀྱི་ཡོད་པ་དང་ཇི་ལྟར་རྩོད་རྒྱུ་ཡིན་ནམ།

ཟམ་གདོང་བླ་མས་བོད་པའི་འཐབ་རྩོད་ལ་འགྲེལ་བཤད་འདི་འདྲ་ཞིག་བསྐྱོན་ཡོད། བོད་པའི་འཐབ་རྩོད་དེ་ཆབ་སྲིད་ཀྱི་འཐབ་རྩོད་མིན་ལ་མི་རིགས་ཀྱི་འཐབ་རྩོད་ཀྱང་མིན། བོད་པའི་འཐབ་རྩོད་ནི་དྲང་བདེན་དང་དྲང་བདེན་མ་ཡིན་པའི་བར་གྱི་འཐབ་རྩོད་ཅིག་དང་། བོད་པའི་འཐབ་རྩོད་ནི་བདེན་པ་དང་རྫུན་པའི་བར་གྱི་འཐབ་རྩོད་ཅིག་ཡིན་ཟེར། འགྲེལ་བརྗོད་འདི་ལ་མཁས་པ་ཚོར་དཔྱད་བརྗོད་ཀྱི་རིན་ཐང་ལྡན་སྲིད་ཀྱང་། གཅིག་བྱས་ན་ཤེས་ཡོན་གྱི་གཞི་རྐང་བརྟན་པོ་མེད་པའི་མི་རིགས་འདི་ལ་མགོ་ཉོག་བཟོ་བྱེད་ཀྱི་ཐག་ལད་དེ་ཡིན་ཡང་སྲིད།

ལྷོ་སུའུ་ཌན་ལ་རང་བཙན་ཐོབ་སོང་། ཨི་ཇིབ་ལ་རང་དབང་ཐོབ་ཐལ། བོད་རྒྱ་ཆེའི་མི་མང་སྔར་བཞིན་གཞན་དབང་འོག་ལྷག་ཡོད། འདས་པའི་མི་ལོ་ལྔ་བཅུ་འགོར་སོང་། བཙན་བྱོལ་བོད་གཞུང་སྔར་བཞིན་དལ་ཅག་གེར། རྒྱ་ནག་དམར་གཞུང་སྔར་བཞིན་བརྟན་ལྷིང་ངེར། རང་དབང་དང་རང་བཙན་རྩོད་མཁན་སུ་ལ་ཡང་གྲུབ་འབྲས་དང་མདུན་སྐྱོད་གོམ་གང་མེད་པར་ཕྱི་བཤོལ་ནས་ཡང་བཤོལ་བྱས་ཡོད།

བོད་པའི་འཐབ་རྩོད་དེ་ལྷོ་སུའུ་ཌན་དང་ཨི་ཇིབ་ཀྱི་འཐབ་རྩོད་དང་བསྡུར་ན། ཕྱི་ལྟར་དུ་བར་ཐག་རིང་ཡང་ནང་ལྟར་དུ་འདྲ་ས་མང་ལ། བོད་པར་ལྷོ་སུའུ་ཌན་ལྟར་རང་ཐག་རང་གཅོད་དང་ཨི་ཇིབ་བཞིན་རང་བཙན་གཙང་མའི་འོས་བབ་ཡོད། ང་ཚོས་འཐབ་རྩོད་ཀྱི་དམིགས་ཡུལ་གསལ་བོ་བཟོས་ཤིང་། འཐབ་གྲོགས་ཚོར་རྡོག་རྩ་གཅིག་སྒྲིལ་བྱུང་ན། ད་གཟོད་ལྷོ་སུའུ་ཌན་བཞིན་རང་བཙན་ལ་རེ་བ་ཆེ་ཞིང་། ཨི་ཇིབ་བཞིན་རང་དབང་ལ་བར་ཐག་ཉེ།