ཕྱི་ཚེས་ ༡༠ ཉིན་གྱི་སྔ་དྲོའི་ཆུ་ཚོད་ ༡༠ ཐོག་ཝི་སི་ཀོན་སིན་མངའ་སྡེར་གནས་འཁོད་བོད་མི་རྣམས་སློབ་གྲྭའི་དཔེ་མཛོད་ཐང་ཆེན་དུ་འཛོམས་ཏེ། བོད་མིའི་རང་དབང་སྒེར་ལངས་ཐེངས་ང་གཉིས་པ་སྲུང་གཙི་བྱས་ཡོད་འདུག ཞོགས་པ་དེར་གྲང་རླུང་འུར་འུར་དུ་ལྡིང་པའི་འགྲོས་དང་བསྟུན་ཏེ་བོདཀྱི་རྒྱལ་དར་ལྷབ་ལྷུབ་ཏུ་སྐྱོད་ཅིང་། ཝི་སིན་ཀོན་སིན་བོད་མི་སྤྱི་མཐུན་ཚོགས་པའི་ཚོགས་གཙོ་མཆོག་གིས་༧ གོང་ས་མཆོག་གི་ཡོངས་ཁྱབ་གསུང་བཤད་བོད་ཡིག་ཐོག་ལྗགས་ཀློག་དང་། ན་གཞོན་སློབ་ཕྲུག་ཅིག་གིས་དབྱིན་ཡིག་ཐོག་ཀློག་འདོན་བྱས་ཡོད། ཝི་སི་ཀོན་སིན་མངའ་སྡེ་བློན་ཆེན་སི་ཀོ་ཊི་ཝོལ་ཁེར་དང་། མལ་ཌི་སིན་གྲོང་ཁྱེར་སྤྱི་དཔོན་ཌལ་ཝི་ཌི་ཞལ་ལེ་ཝི་ཁི་རྣམ་གཉིས་ཀྱིས་ཡོངས་ཁྱབ་བསྒྲགས་གཏམ་ཞིག་སྤེལ་ཏེ། ཨ་རིའི་གྲོས་ཚོགས་ཀྱིས་བོད་ནི་བཙན་བཟུང་བྱས་པའི་རྒྱལ་ཁབ་ཅིག་ཡིན་པ་དང་ ༧གོང་ས་ཏཱ་ལའི་བླ་མ་དང་ཁོང་གི་དབུ་འཁྲིད་པའི་གཞུང་ནི་བོད་མིའི་སྐུ་ཚབ་ངོ་མ་ཡིན་པ། བོད་ནང་རྒྱ་གཞུང་གིས་སྡུག་སྦྱོང་མནར་གཅོད་དང་འགྲོ་བ་མིའི་ཐོབ་ཐང་རྡོག་རོལ་གཏོང་གི་ཡོད་པ་ནི། འཛམ་གླིང་མི་དམངས་ཀྱིས་སེམས་ཁུར་བྱ་ཡུལ་ཞིག་ཡིན་སྟབས། དེ་རིང་འཛམ་གླིང་གང་སར་བོད་མི་ཚོས་རང་དབང་སྒེར་ལངས་ཀྱི་ཉིན་མོར་དྲན་གསོ་བྱེད་ཀྱི་ཡོད་པ་ལྟར། འདི་ག་ས་གནས་ཝི་སིན་ཀོན་སིན་ནས་ཀྱང་དེ་རིང་ནི་བོད་ཀྱི་ཉིན་མོར་ངོས་འཛིན་སྲུང་གཙི་བྱ་རྒྱུ་ཡིན། ཞེས་གསལ་བསྒྲགས་གནང་ཡོད་འདུག
གཞན་ཡང་ཨ་རིའི་གྲོས་ཚོགས་འཐུས་མི་ལྕམ་ཊམ་མེ་སྦོ་ཌི་ཝིན་གྱིས་ཕྱི་ཟླ་ ༣ ཚེས་ ༡༠ འདི་བོད་མི་ཚོར་མཚོན་ན་བཟོད་མི་ཐུབ་པའི་ན་ཟུག་ཅིག་རེད། ཡིན་ནའང་རང་དབང་སྒེར་ལངས་ཀྱི་དུས་དྲན་འདི་རྒྱ་ནག་གིས་བོད་ས་བཙན་བཟུང་དང་སྡུག་གཅོད་མནར་གཅོད། གཏམ་བརྗོད་རང་དབང་འཕྲོག་ལེན་བྱེད་བཞིན་ཡོད་པར་དྲན་གསོ་གཏོང་བའི་དུས་ཆེན་ཞིག་ཆགས་ཡོད་པ་དང། བོད་རྒྱའི་དཀའ་ངལ་སེལ་བར་ངོས་ནས་ ༧ གོང་ས་མཆོག་གི་དབུ་མའི་ལམ་ལ་རྒྱབ་སྐྱོར་བྱེད་ཀྱི་ཡོད་ཅེས་པའི་གསུང་འཕྲིན་གནང་ཡོད་འདུག
