༧གོང་ས་མཆོག་གི་གསུང་འཕྲིན་ཐོག་གྲོས་ཚོགས་དང་འཛིན་སྐྱོང་གཉིས་ཀའི་ལས་དོན་བྱེད་ཕྱོགས་དང་བསམ་བློ་གཏོང་ཕྱོགས། ལྟ་གྲུབ་འཛིན་ཕྱོགས། བགྲོ་གླེང་བྱེད་སྟངས་ཚང་མ་ད་དུང་ཕྲན་བུ་ཚད་མཐོ་བ་དང་། སྤུས་དག་པ་ཞིག་ཡོང་ན་བསམ་པའི་རེ་བ་ཤུགས་ཆེན་པོ་ཡོང་གི་འདུག དེ་འདྲའི་རེ་བ་ཡོད་པའི་ཚོར་སྣང་དེ་གྲོས་ཚོགས་དང་རྒྱ་ཆེའི་མང་ཚོགས་གཉིས་ཀར་སྙན་གསང་ཞུ་བཞིན་ཡོད། ཟེར།
ཁ་སང་ཕྱི་ཚེས་ ༢༤ ཉིན་གྱི་སྐབས་བཅུ་བཞི་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་གཅིག་པའི་ཉིན་བཅུ་བའི་ཐོག བཀའ་ཁྲི་ཟམ་གདོང་རིན་པོ་ཆེ་མཆོག་གིས་བཀའ་ཤག་སྐབས་བཅུ་གཉིས་དང་བཅུ་གསུམ་པའི་བཀའ་ཤག་གི་གསལ་བཤད་མཐའ་མ་དེ་གནང་སོང་། སྐབས་དེར་བཀའ་ཁྲི་མཆོག་གིས་གསུངས་དོན། ཆེས་མཆོག་ཏུ་གུར་བར་འོས་པའི་ཚོགས་གཙོ་མཆོག ཕྱི་ལོ་ ༢༠༠༡ ལོའི་ཕྱི་ཟླ་ ༩ པའི་ཚེས་ ༢༤ ཉིན་བཀའ་ཤག་གིས་གྲོས་ཚོགས་ཀྱི་དཀྱིལ་འཁོར་འདིའི་ནང་སྐབས་བཅུ་གཉིས་པའི་གསལ་བཤད་ཐོག་མ་དེ་ཞུས་པ་ཡིན། སྐབས་དེར་ཆབ་སྲིད་དང་འཛིན་སྐྱོང་། བློན་ཆེན་ལས་ཁུངས་ཁག་གི་ལས་གཞི་བཅས་ཀྱི་ཐོག་དོན་ཚན་ ༥༥ ཡོད་པའི་བསམ་ཚུལ་རགས་བསྡུས་ཤིག་ཞུས་ཡོད། སྐབས་དེར་སྤྱི་འཐུས་ལྷན་ཚོགས་ཀྱིས་ཐུགས་དགྱེས་ཉམས་ཆེན་པོས་རྒྱབ་སྐྱོར་གནང་སོང་། འདས་པའི་ལོ་བཅུ་ལ་ཉེ་བའི་རིང་ཕྱིར་མིག་བལྟས་པ་ཡིན་ན། སྐབས་དེར་སྙན་གསང་ཞུས་པའི་བསམ་ཚུལ་དེ་དག་ལག་བསྟར་ཆེད་འབད་བརྩོན་མ་ཞུས་པར་ལྷག་པ་གཅིག་ཀྱང་བྱུང་མེད། འོན་ཀྱང་གྲུབ་འབྲས་ཐོན་པ་ཉུང་ཉུང་རེད། ཅེས་དང་།
བཀའ་ཁྲི་མཆོག་གིས་འདས་པའི་འདས་པའི་ལས་ཡུན་གཉིས་རིང་བཀའ་ཤག་གིས་སྤྱི་འཐུས་གྲོས་ཚོགས་ལ་འགན་འཁུར་ཕྱོགས་ཐད་གསུངས་དོན། སྔོན་མ་ང་རང་གྲོས་ཚོགས་ནང་ལོ་བཅུ་ལ་བསྡད་པ་རེད། སྐབས་དེའི་བསམ་ཚུལ་དག་ཁ་ཚུར་ལོག་པའི་བསམ་ཚུལ་ཞིག་རེད། འདས་པའི་ལོ་བཅུའི་རིང་གི་ཉམས་མྱོང་དང་བསམ་ཚུལ་དེ་ཁ་ཕར་ལོག་པའི་བསམ་ཚུལ་རེད། དེ་གཉིས་ལ་ཁྱད་པར་ཆེན་པོ་ཕྱིན་པའི་ཚོར་སྣང་བྱུང་སོང་། གྲོས་ཚོགས་ནང་ཡོད་སྐབས་བཙན་བྱོལ་བོད་མིའི་བཅའ་ཁྲིམས་གཞིར་བཟུང་འཛིན་སྐྱོང་གིས་གྲོས་ཚོགས་ལ་འགན་འཁུར་དགོས་པ་དང་རྩིས་རྒྱག་དགོས་པ། དྲི་བར་ལན་འདེབས་སོགས་ཚད་དང་ལྡན་པ་ཞིག་དགོས་པ་དང་། གྲོས་ཚོགས་དེ་དམངས་གཙོའི་སྒྲིག་འཛུགས་ཀྱི་དབང་འཛིན་མཐར་ཐུག་དེ་ཡིན་སྟབས། འཛིན་སྐྱོང་གིས་གཙོས་པའི་དམངས་གཙོའི་སྒྲིག་འཛུགས་ཚང་མར་ལམ་སྟོན་དང་གྲོས་འདེབས། རྒྱབ་སྐྱོར་དང་གཞོགས་འདེགས། ཡོ་བསྲང་སྟངས་འཛིན་ནུས་པ་ལྡན་པ་ཞིག་གནང་དགོས་པ་རེད། ཅེས་དང་།
མུ་མཐུད་དུ་གསུངས་དོན། ལྟ་གྲུབ་ཀྱི་ཆ་ནས་དཔལ་འབྱོར་གྱི་གནས་བབ་ཡོངས་སུ་རྫོགས་པའི་སྟངས་འཛིན་དེ་གྲོས་ཚོགས་ཀྱི་ཕྱག་ཏུ་ངེས་པར་ཡོད་དགོས་པའི་ཚོར་སྣང་ཞིག་ཡོད། སྐབས་བཅུ་གཉིས་པའི་བཀའ་བློན་ཁྲི་པའི་ལས་འཁུར་ཞུས་སྐབས། སྐབས་བཅུ་གཅིག་པ་ཕན་ཆད་ཀྱི་བཀའ་ཤག་དང་མི་འདྲ་བར་མང་ཚོགས་ཀྱིས་ཐད་ཀར་བཀའ་ལུང་ཡོད་པའི་བཀའ་བློན་ཁྲི་པ་དང་བཀའ་ཤག་ཅིག་ཆགས་པ་རེད། འོན་ཀྱང་དེ་འདྲ་ཡིན་མིན་ལ་མ་ལྟོས་པར། གྲོས་ཚོགས་ལ་འགན་འཁུར་ཞུ་ཕྱོགས་སྔོན་མ་བསམ་ཚུལ་ཡོད་པ་ལྟར། ཚད་ལྡན་གྱི་ལམ་སྲོལ་གཏོད་རྒྱུའི་རེ་བ་བརྒྱབ་སྟེ་ ༢༠༠༡ ལོའི་གསལ་བཤད་ཐོག་མའི་ནང་། གྲོས་ཚོགས་ལ་འགན་འཁུར་རྒྱུ་ཡིན། དྲི་བར་ལན་འདེབས་ཞུ་རྒྱུ་ཡིན། དེ་དག་ལ་འགྱུར་བ་གཅིག་ཀྱང་མེད་ཅེས་གསལ་བོར་ཞུས་པ་ཡིན། གྲོས་ཚོགས་ཚོགས་དུས་རེ་རེར་འཐུས་མི་མི་རེ་ངོ་རེ་ལ་ཆབ་སྲིད་དང་འཛིན་སྐྱོང་། འདས་པའི་ཟླ་སྒྲིལ་གྱི་གནས་སྟངས། འབྱུང་འགྱུར་གྱི་བྱེད་འཆར་ཚང་མར་བཀའ་ཤག་གིས་གྲོས་ཚོགས་ལ་གསལ་བཤད་ཞུ་རྒྱུར་འབད་བརྩོན་ཞུས་པ་ཡིན། ཡིན་ནའང་། བསམ་བློའི་ནང་མངོན་འདོད་ཡོད་པ་ལྟར་འཛིན་སྐྱོང་དང་གྲོས་ཚོགས་ཀྱི་འབྲེལ་བ་དེ་སྔར་ལས་ལྷག་པའི་ཚད་མཐོ་བོ་ཞིག་དང་། ཕྱོགས་གཉིས་ཀར་རེ་བ་ཡོད་པའི་གྲུབ་འབྲས་ཤིག་འཐོན་མ་སོང་བསམ་ཡོད།
བཀའ་ཤག་གི་འདོད་པ་མ་ཁེངས་པ་དང་བློ་ཕམ་རིགས་གསུངས་དོན། བཀའ་ཤག་གི་གསལ་བཤད་ཁག་གི་ཐོག་ལ་གྲོས་ཚོགས་ནས་སྒྲུབ་ཕྱོགས་ཀྱི་ལམ་སྟོན་དང་གྲོས་འདེབས། ཡང་ན། སྐྱོན་བརྗོད་དང་ཡོ་བསྲང་འཐོབ་པའི་ཚབ་ལ་གྲོས་ཚོགས་ཀྱི་རྩ་ཆེའི་དུས་ཚོད་ཆུད་ཟོས་སུ་གཏོང་བའི་གཞི་རྩ་མ་གཏོགས། དགོས་པ་ཆེན་པོ་མེད་པའི་ཚོར་སྣང་ཞིག་བཀའ་ཤག་གི་བཀའ་བློན་ཚང་མར་བྱུང་སོང་། དེར་བརྟེན། སྐབས་བཅུ་བཞི་བའི་གྲོས་ཚོགས་ཚོགས་དུས་གཉིས་པའི་བར་གསལ་བཤད་རིམ་པར་ཞུས་ཡོད་ཀྱང་། གསུམ་པ་ནས་ད་བར་བཀའ་ཤག་གི་གསལ་བཤད་ཞུ་རྒྱུ་མཚམས་བཞག་པ་ཡིན། གསལ་བཤད་མ་ཞུས་པ་དེར་གྲོས་ཚོགས་ཀྱིས་ཅིག་ཆད་སོང་སྙམ་པའི་ཚོར་སྣང་ཡོད་པ་ཡང་མཐོང་མ་སོང་། ད་རེབ་སྐབས་བཅུ་གསུམ་པའི་བཀའ་ཤག་དང་སྐབས་བཅུ་བཞི་པའི་གྲོས་ཚོགས་གཉིས་ཀྱི་ལས་དོན་རྫོགས་ལ་ཉེ་སྟབས། བཀའ་ཤག་སྐབས་བཅུ་གསུམ་པའི་གསལ་བཤད་མཐའ་མ་དེ་ཞུ་རྒྱུའི་གོ་སྐབས་བླངས་པ་ཡིན། ཅེས་དང་།
བཀའ་ཤག་གིས་འབད་བརྩོན་ཇི་ལྟར་བྱས་ཀྱང་། སྤྱི་འཐུས་ཚང་མས་འཛིན་སྐྱོང་ཐོག་ཡིད་ཆེས་དང་འགན་འཁུར་ཆ་ཚང་ཞིག་འདོན་ཐུབ་མ་སོང་བསམ་པའི་བློ་ཕམ་ཕྲན་བུ་བཀའ་བློན་ཚང་མར་ཡོད། མཚམས་དང་སྐབས་རེ་ཟུང་ལ་སྤྱི་འཐུས་རེ་ཟུང་གིས་ཆོས་ལ་མི་རྟོན་གང་ཟག་ལ་རྟོན་གྱི་ཡོད་པའི་མཐོང་སྣང་དེ་འདྲ་ཡང་བྱུང་། ཡིན་ནའང་སྤྱི་འཐུས་མང་ཆེ་བས་མངོན་པར་གསལ་བ་དང་། མངོན་པར་མི་གསལ་བ་ཅི་རིགས་ཀྱི་ལམ་ནས་མཐུན་འགྱུར་དང་རྒྱབ་སྐྱོར་གནང་བ་ལ་བརྟེན་ཏེ། གྲོས་ཚོགས་ཀྱི་བཀའ་འཁྲོལ་དང་མཐུན་འགྱུར་དགོས་སའི་ལས་དོན་ཡོངས་རྫོགས་ལ་བཀའ་འཁྲོལ་དང་མཐུན་འགྱུར་ཐོབ་པ་བྱུང་སོང་། འདས་པའི་ལོ་བཅུའི་རིང་འཛིན་སྐྱོང་གི་བསམ་བློའི་ནང་བྱེད་འདོད་དང་བྱ་འཆར་ཡོད་པའི་ལས་དོན་སྣ་གཅིག་ཀྱང་གྲོས་ཚོགས་ཀྱི་བཀའ་འཁྲོལ་མ་ཐོབ་པར་ལག་བསྟར་བྱ་མ་ཐུབ་པ་གཅིག་ཀྱང་མེད། དེ་གྲོས་ཚོགས་དང་འཛིན་སྐྱོང་གཉིས་ཀའི་གཟི་བརྗིད་དང་བཟང་ཕྱོགས་ཀྱི་གྲུབ་འབྲས་ཤིག་ཡིན་པར་ངོས་འཛིན་ཞུ་བཞིན་ཡོད། ཅེས་གསུངས་སོང་།
ཁོང་གིས་༧གོང་ས་མཆོག་གི་གསུང་འཕྲིན་དང་འབྲེལ་ཏེ། སྤྱི་འཐུས་ཚོའི་གནས་ཚད་སྐོར་གསུངས་དོན།༸གོང་ས་མཆོག་གིས་བོད་མི་རིགས་ཀྱི་འཕྲལ་ཕུགས་ཀྱི་ཁེ་ཕན་ལ་དགོངས་པ་རྒྱ་ཆེན་བཞེས་ཏེ། བོད་མིའི་ཆབ་སྲིད་དམངས་གཙོའི་ལམ་སྲོལ་ཐོག་བསྒྱུར་རྒྱུའི་ཆེད་འདས་པའི་ལོ་ལྔ་བཅུ་བརྒལ་བའི་རིང་ཐུགས་འདུན་དང་སྐུ་ངལ་བསྐྱོན་པའི་ཐད། ད་ཆར་ཆབ་སྲིད་དང་འཛིན་སྐྱོང་གི་འགན་དབང་ཡོངས་རྫོགས་མང་ཚོགས་ཀྱིས་འོས་འདེམས་བྱས་པའི་མགོ་ཁྲིད་ཚོར་རྩིས་སྤྲོད་གནང་རྒྱུའི་བཀའ་ནན་ཕེབས་བཞིན་པ་དང་། གྲོས་ཚོགས་ནང་བཀའ་བསྡུར་གནང་བཞིན་པའི་སྐབས་རེད། གྲོས་ཚོགས་དང་འཛིན་སྐྱོང་གཉིས་ཀའི་ལས་དོན་བྱེད་ཕྱོགས་དང་བསམ་བློ་གཏོང་ཕྱོགས། ལྟ་གྲུབ་འཛིན་ཕྱོགས། བགྲོ་གླེང་བྱེད་སྟངས་ཚང་མ་ད་དུང་ཕྲན་བུ་ཚད་མཐོ་བ་དང་སྤུས་དག་པ་ཞིག་ཡོང་ན་བསམ་པའི་རེ་བ་ཤུགས་ཆེན་པོ་ཡོང་གི་འདུག དེ་འདྲའི་རེ་བ་ཡོད་པའི་ཚོར་སྣང་དེ་གྲོས་ཚོགས་དང་རྒྱ་ཆེའི་མང་ཚོགས་གཉིས་ཀར་སྙན་གསང་ཞུ་བཞིན་ཡོད།
མཐའ་དོན། བཀའ་ཤག་སྐབས་བཅུ་གཉིས་དང་བཅུ་གསུམ་ཀྱི་དུས་ཡུན་རིང་འབུར་དུ་ཐོན་པའི་གྲུབ་འབྲས་འདི་ཡིན་ཟེར་བ་ཞུ་རྒྱུ་གཅིག་ཀྱང་མེད། འོན་ཀྱང་རྙོག་དྲ་ཆེན་པོ་དེ་འདྲ་ཡང་བྱུང་མེད་ལ། བཀའ་ཤག་ལས་ཡུན་གཉིས་ཀྱི་རིང་ལེགས་འགྲུབ་བྱུང་ཡོད་མེད་ལ་མ་ལྟོས་པར་སྲིད་ཇུས་དང་ལས་རིམ་གཏན་འབེབས་བྱས་པ། ལག་བསྟར་བྱས་པ་ཚང་མ་༸གོང་ས་མཆོག་གི་བཀའ་དགོངས་དང་མ་འགལ་བ་ཞིག་དང་། གནས་སྐབས་གྲུབ་འབྲས་ཐོན་མིན་ལ་མ་ལྟོས་པར་ཕུགས་རྒྱང་རིང་པའི་ཐོག་ནས་བོད་མི་རིགས་ལ་ཁེ་ཕན་ཡོད་པ་ཤ་སྟག་ཡིན་བསམ་པའི་ཡིད་ཆེས་ཡོད། དེར་བརྟེན། བློ་ཕམ་སྐྱེ་དགོས་པ་དང་འདི་འགྲིག་མ་སོང་བསམ་པའི་སེམས་ཁྲལ་དང་འགྱོད་པ་སྐྱེ་དགོས་པ་གཅིག་ཀྱང་མེད། ད་ལྟ་ལས་དོན་མཚམས་འཇོག་སྐབས་དགའ་སྤོབས་ངང་མཚམས་འཇོག་པའི་གནས་བབ་ཡོད། ཅེས་གསུངས་སོང་།
གསར་འགོད་པ། དོན་གོ
སེར་སྨད་བློ་དགའ་ལགས། རྒྱལ་ཁབ་ཀྱི་ཆབ་སྲིད་གླེང་སྟེག་སྟེང་གོ་ས་ཅི་ཡིན་ལ་མ་ལྟོས་པར། ཕན་ཚུན་སྐྱོན་བརྗོད་དང་བགྲོ་གླེང་བྱེད་པ་ནི་ཡར་རྒྱས་ཀྱི་ཐབས་ལམ་ཞིག་ཡིན་པས། འདས་པའི་བྱུང་བ་ལ་དེ་ལྟར་འཁང་ར་དང་འཁོན་འཛིན་བྱེད་མི་རིགས་སྙམ།
((གཞི་མེད་སྒེར་འཁོན་རྩ་འཛུགས))
གཞི་མེད་སྒེར་འཁོན་རྩ་འཛུགས་རྩ་གཏོར་གཏོང་མ་ཐུབ་པའི་དུས་ཡུན་ཐུང་ཐུང་ནང་། འཇིགས་བྲལ་ཅན་གྱིས། རྒྱལ་བའི་གསུང་འཕྲིན་གྱི་དར་ཆའི་འོག་ནས་རྒོལ་གཤོམ་བྱེད་བཞིན་པ་ནི། བཀའ་ཁྲི་མཆོག་ལ་ཆོ་མེད་ཟུར་ཟ་དང་གཞི་མེད་སྡང་ཟུག་སྟོན་སྟོན་པ་འདི་དག་རེད་ལ། ཤོག་ཁག་དེས་སྒུགས་ལོང་ཁོམ་ལོང་མེད་པར། རྐང་བརྡབ་ལག་བརྡབ་ཀྱིས། དགའ་ལྡན་ཕོ་བྲང་ཞེས་པའི་མིང་བྱང་ག་དུས་འགྱུར་བ་གཏོང་གི་རེད་ཟེར་བའི་ཚ་གི་ཚི་གི་བྱེད་མུས་པ་འདི་དག་གནད་དོན་གཅིག་རེད། དྲ་འགྲོགས་གྲོགས་པོ་རྣམ་པ། ང་ཚོས་འདི་གཅིག་པུའི་ཐོག་ནས་མཐོང་ཐུབ་པ་ནི། ཕ་རོལ་པོའི་རེ་སྒུགས་ཁྲོད་ཀྱི་དམིགས་ཡུལ་གཙོ་བོ་དང་གྲོས་ཚོགས་ལ་མ་བསྟན་པའི་ཡིག་ཆ། ཞེས་པའི་བཀའ་སྤྱིའི་བདེ་འཇགས་གླེང་ཁ་སྒུལ་སྐྱོད་ཀྱི་མི་རྒྱུ་དུས་གསུམ་གྱི་བརྡབ་གསིག་ཆག་སྒོ་དེ་དྲན་གསོ་བྱེད་ཀྱིན་པ་དེ་དག་ཡིན། མ་རེད་པས་་་་ཨ། བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་པ་ཡང་ཁོང་ཚོས་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་
ཁྱེད་ནི་བོད་གངས་ཅན་པ་ཉམས་ཐག་པའི་སྐབས་སུ་། གངས་ཅན་པ་སེར་སྐྱ་ཀུན་གྱི་ནང་ནས་། ཆོས་དང་སྲིད་གཉིས་ག་ལ་མཁས་པའི་མཁས་དབང་དང་། གནའ་དེང་གཉིས་ལ་མཁས་པའི་མཁས་དབང་། དྲང་ཚུགས་ལྡན་ཞིང་བློ་སྟོབས་ཆེ་ལ་ཐབས་བྱུས་མཁས་པའི་སྤྱི་དོན་ཁོ་ན་སྒྲུབ་མཁན་གྱི་དཔའ་བོ་བླ་ན་མེད་པ་དེ་ཁྱེད་ཡིན་།།
ངས་དུས་ནམ་ཡིན་ལ་ཁྱེད་ལ་རྗེས་ཡི་རང་དང་བསྔགས་བརྗོད་ནི་ངའི་མི་ཚེ་མ་རྫོགས་བར་དུ་བྱེད་ངེས་ཡིན་། ཁྱེད་སྐུ་ཚེ་རིང་།།
བློ་གྲོས་ཀྱི་སྐྱེད་ཚལ་ཡངས་མོ་ན༎
བཟང་པོ་ཡི་ཡོན་ཏན་རྟ་ལྗངས་ཤར༎
བསྟན་སྲིད་ཀྱི་ཞབས་འདེགས་འོད་སྟོང་གིས༎
འཛིན་མ་ཡི་ཁྱོན་འདིའི་མུན་པ་གསལ༎
རྒྱུ་སྐར་ཁྲོད་ན་མཚན་མོའི་ནོར་བུ་གསལ༎
རི་དྭགས་དཀྱིལ་ན་གདོང་ལྔའི་གད་རྒྱངས་བརྗིད༎
མེ་ཏོག་དབུས་ན་ཆུ་སྐྱེས་འདབ་མ་ཡངས༎
མི་རྗེའི་མདུན་ན་ཟམ་གདོང་བླ་མ་རྒྱལ༎
ཅེས་བཀྲིན་རྗེས་དྲན་དང་གུས་བཀུར་གྱིས་མཛེས་པར་བརྒྱན་ཏེ་བསྟོད་པའི་མེ་ཏོག་ཕུལ༎
ལོ་བཅུའི་བཀའ་ཁྲི་ནི།
བློ་གྲོས་བཟང་བས་ལོ་བཅུ་བསྐྱངས། །
བཟང་པོའི་ས་མཐའ་མཐའ་རུ་བསྐྱལད། །
བསྟན་སྲིད་སྐྱོང་ལ་ཁྱེད་འདྲ་ཉུང་། །
འཛིན་མའི་ཁྱོན་དུ་སྙན་གྲགས་རྒྱས། །
སྐུ་ཚེ་ཡུན་བརྟན་མཛད་འཕྲིན་དར་རྒྱས་ཤོག །
མི་རྗེ་བཀའ་ཁྲི་ཁྱེད་ཀྱི་མཛད་རྗེས་ཁྲོད་སྔ་བར་ཕྱི་གསུམ་དུ་བོད་ཀྱི་ཆབ་དཔལ་རིག་གསུམ་དང་ལས་དོན་ཆེ་འབྲིང་ཆུང་གསུམ་ཚང་མར་བཀའ་དྲིན་རྗེས་དྲན་ནམ་བྱེད་རྒྱུ་ཡིན། ཁྱེད་ནི་ཆེས་ཉག་ཕྲ་བའི་བོད་ཀྱི་ལས་དབང་འདིར་ཀོ་བ་སྲབ་སའི་བུག་མ་བཅུག་པ་དང་སྐུད་པ་ཕྲ་སའི་ཆད་མི་བཅུག་པའི་རླབས་ཆེན་གྱི་སྐྱེས་བུ་དམ་པ་ཞིག་ཏུ་ངོས་འཛིན་ཞུ་བཞིན་ཡོད། ཁྱེད་སྐུ་ཁམས་བཟང་བ་དང་སྐུ་ཚེ་ཡུན་ནས་ཡུན་དུ་བརྟན་པའི་རེ་སྨོན་བྱེད་ཀྱི་ཡིན།
བློ་གྲོས་བུམ་བཟང་བསླབ་གསུམ་ནོར་གྱིས་སྤུད། །
བཟང་པོའི་ཐབས་ཇུས་གོ་ལའི་ཁྱོན་ན་བརྗིད། །
བསྟན་སྲིད་སྐྱོང་བའི་མཁས་མཛངས་བླ་ན་མཐོ། །
འཛིན་མའི་ཁྱོན་དུ་ལྷན་མཆོག་ནམ་ཡང་བརྟན། །
ཁྱེད་ནི་ངོ་མ་དོན་གྱི་བདག་པོ་འདྲ་བོ་ཞིག་ཡིན། རྒྱབ་སྐྱོར་དང་དགའ་བསུ་མུ་མཐུད་དུ་ཞུ་བཞུན་ཡོད།
ཆེས་བཀུར་བར་འོས་པའི་བཀའ་ཁྲི་མཁས་དབང་ཟམ་གདོང་མཆོག་རྒྱལ་འགྱུར་ཅིག ཁྱེད་རང་མེད་ན༌༌༌༌༌༌༌༌༌༌༌༌༌༌༌