གངས་སྙིལ་དོན་རྐྱེན།

རྒྱ་ནག་གཞུང་འབྲེལ་ཞིན་ཧྭ་གསར་ལམ་དུ་གནས་ཚུལ་སྤེལ་བ་ལྟར་ན། ཉེ་ཆར་བོད་རང་སྐྱོང་ལྗོངས་ཀོང་པོ་ཉིང་ཁྲི་རྫོང་གི་སྤོ་མེས་ཞང་དང་པད་མ་བཀོད་ཞང་བར་གྱི་རི་རྒྱུད་དུ་གངས་ཆེན་བབས་ཏེ། ས་གནས་ཡུལ་མི་དང་འགྲུལ་བཞུད་པ་མང་པོ་ཞིག་གངས་སྙིལ་ཀྱིས་མནན་ཡོད་འདུག དེའི་རྗེས་ས་གནས་ཉེན་སྐྱོབ་རུ་ཁག་བསླེབས་ཏེ་མི་ ༡༣༨ སྐྱོབ་ཐུབ་ཡོད་པ་དང་། ད་དུང་མི་ ༡༠ ཙམ་གངས་སྙིལ་འོག་ལྷག་སྟེ་ད་བར་ཉིན་གྲངས་གསུམ་ལྷག་འགྲོ་བཞིན་ཡོད་འདུག

དོན་རྐྱེན་འདིའི་ཐད་ས་གནས་ཉེན་སྐྱོབ་རུ་ཁག་གི་མགོ་གཙོ་ཝུ་ཧྲིན་པེན་གྱིས་བརྗོད་ན། ཐེངས་འདིའི་གངས་སྙིལ་གནོད་འཚེ་འོག་ཚུད་པའི་མི་མང་ཆེ་བ་ས་གནས་ཡུལ་མི་ཡིན་ཚུལ་དང་། དེའི་ཁྲོད་པད་མ་བཀོད་ཞང་དུ་གཞུང་ལམ་གསར་རྒྱག་བྱེད་མཁན་གྱི་ལས་བཟོ་བ་ཞིག་ཀྱང་ཚུད་ཡོད་ཚུལ་དང་། གངས་སྙིལ་འོག་བསྐྱབས་པའི་རྨས་མ་རྣམས་སྨན་ཁང་དུ་བསྐྱལ་ཡོད་ཅིང་། ད་ལྟ་རྨས་སྐྱོན་ཅུང་ཚབས་ཆེ་ཡང་སྲོག་ཉེན་མེད་སྐོར་བརྗོད་འདུག  

ཉིན་འདི་འགར་བོད་ནང་གི་ས་ཆ་མང་ཆེ་བར་གངས་ཆེན་བབས་ཡོད་ཅིང་། བོད་རང་སྐྱོང་ལྗོངས་མངའ་ཁུལ་གྱི་ས་ཆ་མང་པོ་ཞིག་གི་གཞུང་ལམ་འགག་ཏེ། རླངས་འཁོར་འགྲོ་སྐྱོད་ལ་དཀའ་ངལ་ཆེན་པོ་འཕྲད་བཞིན་ཡོད་པ་མ་ཟད། སི་ཁྲོན་དང་ལྷ་ས་བར་གྱི་གཞུང་ལམ་ཡང་འགག་ཡོད་འདུག

གསར་འགོད་པ། དོན་གོ