བོད་ཀྱི་སྐྱེས་ཁམས་སྲུང་སྐྱོབ།

རྒྱ་ནག་གཞུང་གིས་ ༢༠༡༡ ལོ་ནས་ ༢༠༣༠ ལོའི་བོད་མདོ་དབུས་མཐོ་སྒང་གི་སྐྱེས་ཁམས་ཁོར་ཡུག་སྲུང་སྐྱོབ་ཀྱི་འཆར་བཀོད་ཅེས་པའི་ཡིག་ཆ་ཞིག་ལ་མིང་རྟགས་བཀོད་ཡོད་འདུག

ཁ་སང་ཕྱི་ཚེས་ ༣༠ རྒྱ་ནག་གི་སྲིད་བློན་ཝུན་ཅཱ་པའོ་ཡིས་གཙོ་སྐྱོང་འོག་རྒྱ་ནག་དབུས་རྒྱལ་སྲིད་སྤྱི་ཁྱབ་ཁང་གི་རྒྱུན་ལས་ཚོགས་འདུ་པེ་ཅིན་དུ་སྐོང་ཚོགས་བྱས་པའི་སྟེང་། རྒྱ་ནག་གཞུང་གིས་ ༢༠༡༡ ལོ་ནས་ ༢༠༣༠ ལོའི་བར་གྱི་མདོ་དབུས་མཐོ་སྒང་གི་སྐྱེས་ཁམས་ཁོར་ཡུག་སྲུང་སྐྱོབ་སྐོར་གྱི་ཡིག་ཆ་ཞིག་ལ་མིང་རྟགས་བཀོད་འདུག

མ་འོངས་པའི་ལོ་ཉི་ཤུའི་རིང་གི་འཆར་བཀོད་ཡིག་ཆ་དེའི་ནང་། བོད་རང་སྐྱོང་ལྗོངས་གཙོས་པའི་མཚོ་སྔོན་དང་སི་ཁྲོན། ཀན་སུའུ། ཡུན་ནན་བཅས་བོད་ཁུལ་གྱི་ཞིང་ཆེན་ལྔ་དང་། ཞིན་ཅང་བཅས་ལྗོངས་དང་ཞིང་ཆེན་དྲུག་གི་ས་ཁུལ་ ༢༧ གྱི་མངའ་ཁོངས་སུ་ཡོད་པའི་རྫོང་ཁག་ ༡༧༩ ཙམ་བསྟན་ཡོད་པ་དང་། མ་འོངས་པར་འཆར་བཀོད་ཡིག་ཆ་དེ་རིམ་པ་ལྔར་བགོས་ཏེ་ལག་བསྟར་རྒྱུ་མ་ཟད། དེ་ཡང་གཙོ་བོ་ཕྱུགས་ལས་ས་ཁུལ་འཆར་བཀོད་བྱ་རྒྱུ་དང་། སྐྱེས་ཁམས་སྲུང་སྐྱོབ་དང་འཛུགས་བསྐྲུན་ལ་འབད་བརྩོན་བྱ་རྒྱུ། གཙང་གསུམ་མགོ་ཁུངས་དང་མདོ་ལ་རིང་མོ་སོགས་ཕྱུགས་ལས་འཚོ་གནས་ས་ཁུལ་བཅུ་ཙམ་སྤྱི་སྙིང་དུ་བཟུང་སྟེ། རྩྭ་ཐང་དང་ནགས་ཚལ། སྐྱེས་དངོས་སྣ་མང་རང་བཞིན་ཅན་ལ་སྲུང་སྐྱོབ་ཀྱི་ཐབས་ལམ་སྤྱད་དེ་རང་བྱུང་ཁོར་ཡུག་སྲུང་སྐྱོབ་ཇེ་ལེགས་སུ་གཏོང་རྒྱུ་ཡིན། ཞེས་སྐོར་བཀོད་འདུག

འདིའི་ཐད་རྒྱ་ནག་གཞུང་འབྲེལ་མདོ་དབུས་མཐོ་སྒང་གི་སྣོད་བཅུད་སྲུང་སྐྱོབ་དྲ་བའི་སྟེང་དུའང་། གོང་གསལ་ས་ཁུལ་འདི་དག་གཙོས་པའི་མདོ་དབུས་མཐོ་སྒང་གི་གནས་ཡུལ་ཁྱད་པར་ཅན་དང་རང་བྱུང་ཐོན་ཁུངས་ཕུན་སུམ་ཚོགས་པའི་ས་ཁུལ་དག་ནི། རྒྱ་ནག་གི་སྐྱེས་ཁམས་བདེ་འཇགས་སྲུང་སྐྱོབ་བྱ་ཡུལ་གྱི་བསྟི་གནས་ཆགས་ཡོད་པ་དང་།  མདོ་དབུས་མདོ་སྒང་གི་སྐྱེས་ཁམས་ཁོར་ཡུག་སྲུང་སྐྱོབ་ཇེ་བཟང་དུ་བཏང་བ་དེས་རྒྱལ་ཁབ་ཀྱི་སྐྱེས་ཁམས་བདེ་འཇགས་དང་མཐའ་མཚམས་བདེ་འཇགས། མི་རིགས་མཐུན་སྒྲིལ་བཅས་ལ་སྐུལ་ཕན་ནུས་འདོན་ཐུབ་ཚུལ་བཀོད་འདུག  

གསར་འགོད་པ། དོན་གོ