འཇར་མན་བོད་དོན་རྒྱབ་སྐྱོར་ཚོགས་པའི་གོ་སྒྲིག་འོག ཟླ་འདིའི་ཕྱི་ཚེས་ ༢༥ ཉིན་འཇར་མན་གྲོང་ཁྱེར་བྷར་ལིན་དུ་བོད་ཀྱི་ཁོར་ཡུག་སྐོར་ལ་༼འཛམ་གླིང་སྣེ་གསུམ་པ༽ཞེས་པའི་བགྲོ་གླེང་ཚོགས་འདུ་ཞིག་ཚོགས་ཡོད་ཅིང་། ཚོགས་འདུ་དེར་འཇར་མན་དང་ཧྥ་རན་སི། སུད་སི་བཅས་ནས་ཁོར་ཡུག་ཉམས་ཞིབ་པ་དང་བོད་དོན་རྒྱབ་སྐྱོར་བ་སོགས་ཁྱོན་མི་གྲངས་ ༡༠༠ ཙམ་འདུ་འཛོམས་བྱུང་ཡོད།
ཉིན་དེར་བོད་གཞུང་ཕྱི་དྲིལ་ཁོར་ཡུག་ཚན་པའི་འགན་འཛིན་བསྟན་འཛིན་ནོར་བུ་ལགས་ཀྱིས། བཞུགས་སྒར་ངྷ་རམ་ས་ལ་ནས་དྲ་ལམ་བརྒྱུད་ཚོགས་འདུ་དེར་ཐད་ཀར་མཉམ་ཞུགས་བྱས་ཡོད་འདུག་ལ། སྐབས་དེར་ཁོང་གིས་རྒྱ་གཞུང་གིས་བོད་ཀྱི་ཁོར་ཡུག་ཉམས་ཆག་གཏོང་རྒྱུའི་སྲིད་བྱུས་རིམ་པར་སྤེལ་སྟབས། ད་ཆར་བོད་ཀྱི་ཁོར་ཡུག་གནས་སྟངས་ཉིན་རེ་བཞིན་ཛ་དྲག་ཏུ་འགྲོ་བཞིན་ཡོད་ལ། བོད་ནང་གི་བོད་མི་ཚོས་བོད་ཀྱི་ཁོར་ཡུག་གཏོར་བཤིག་ལས་གཞིར་ངོ་རྒོལ་བྱས་པར། རྒྱ་གཞུང་གིས་ཆབ་སྲིད་ཀྱི་ཉེས་མིང་སྣ་ཚོགས་བཏགས་ཏེ་དྲག་གནོན་བྱེད་བཞིན་ཡོད་སྐོར་བརྗོད་ཡོད།
དེ་བཞིན་བོད་ཀྱི་ཁོར་ཡུག་ཉམས་ཞིབ་པ་སྐུ་ཞབས་གྷབ་རིལ་ལ་ཧྥི་ཊེ་ Gabriel Lafitte ལགས་ཀྱིས། བོད་ཀྱི་འབྲོག་པ་རྣམས་བཙན་ཤེད་ཀྱིས་ས་ཆ་གཅིག་ཏུ་གཏན་སྡོད་བྱེད་བཅུག་པའི་རྐྱེན་གྱིས། འབྲོག་པའི་འཚོ་བར་གནོད་སྐྱོན་ཚབས་ཆེན་འབྱུང་བཞིན་ཡོད་སྐོར་དང་། སྐུ་ཞབས་ཁ་ལའོ་ཌེ་ཨར་ཧྥི་ Claude Arpi ལགས་ཀྱིས། བོད་ཀྱི་ཆུའི་ཐོན་ཁུངས་ཐོག་རྒྱ་གཞུང་གིས་འཛིན་པའི་སྲིད་བྱུས་དེས། བོད་ཀྱི་ཆུ་ཆེན་དག་ལ་རྟེན་པའི་ཨེ་ཤ་ཡའི་རྒྱལ་ཁབ་ཚོར་ཉེན་འཚབ་ཆེན་པོ་འཕྲད་བཞིན་ཡོད་སྐོར་བཅས་ཀྱི་གཏམ་བཤད་གནང་འདུག
གསར་འགོད་པ། དཔལ་ལྡན།
བོད་རིགས་གནས་ཡུལ་གང་སར་འཁོར་ཡུག་སྲུང་སྐྱོབ་སྐོར་ལ་བགྲོ་གླེང་ཡང་ཡང་གནང་ཐུབ་ན་ཕན་ངེས་འདུག