ཁ་སང་ཕྱི་ཚེས་ ༣ ཉིན་གྱི་ཉིན་གུང་ཆུ་ཚོད་ ༢ སྟེང་བོད་མིའི་བདེན་དོན་འཐབ་རྩོད་པ་མདོ་སྨད་བླ་བྲང་དགོན་པའི་གྲྭ་པ་འཇམ་དབྱངས་སྦྱིན་པ་ལགས་རང་ཁྱིམ་ནས་འདས་གྲོངས་སུ་སོང་ཡོད་འདུག
གྲྭ་འཇམ་དབྱངས་སྦྱིན་པ་ལགས་ནི། ༢༠༠༨ ལོའི་ས་བྱི་ཞི་རྒོལ་ཆེན་མོའི་རྗེས་རྒྱལ་སྤྱིའི་གསར་འགོད་པ་ཁག་ཅིག་བླ་བྲང་དགོན་པར་འབྱོར་སྐབས། རྒྱ་ནག་གཞུང་གི་དམ་དྲག་དང་གདུག་རྩུབ་ལ་མ་འཛེམས་པར། བོད་ནང་གི་བོད་མིར་འགྲོ་བ་མིའི་ཐོབ་ཐང་མེད་པ་དང་། ཆོས་ལུགས་དད་མོས་རང་དབང་མེད་སྐོར་གསལ་བཤད་དང་སྐད་འབོད་གནང་མཁན་གྲས་ཡིན་འདུག ལོ་དེའི་ཕྱི་ཟླ་ ༤ ཚེས་ ༩ ཉིན་རྒྱ་ནག་གི་ཉེན་རྟོག་པ་བླ་བྲང་དགོན་པའི་གྲྭ་ཤག་ཁག་ཏུ་འཛུལ་ཏེ། ཁོང་ལ་ཉེས་རྡུང་དྲག་པོ་བཏང་སྟེ་རྐང་ལག་ལ་རྨས་སྐྱོན་ཚབས་ཆེན་བཟོས་ཡོད་པར་མ་ཟད། བཙན་ཁྲིད་ཀྱིས་ཉིན་བཅུ་གྲངས་རིང་ཚ་འདྲིའི་བཀག་ཉར་བྱས་ཡོད་ཅིང་། དེའི་རྗེས་ནང་མིར་རྩིས་སྤྲོད་བྱས་ཡོད་ཀྱང་། ཁོང་གི་ཕ་མ་རྒན་འཁོགས་གཉིས་གཙོས་པའི་ནང་མི་ཚོས་དུས་དེ་ནས་བཟུང་ལོ་ངོ་གསུམ་མ་ཟིན་ཙམ་རིང་སྨན་བཅོས་གང་ཡོང་བྱས་ཀྱང་། ལུས་པོར་རྨས་སྐྱོན་ཚབས་ཆེན་ཕོག་ཡོད་སྟབས་རིམ་གྱིས་ནད་གཅོང་དུ་གྱུར་ཏེ། ཁ་སང་ཕྱི་ཚེས་ ༣ ཉིན་རང་ཁྱིམ་ནས་འདས་གྲོངས་སུ་སོང་ཡོད་འདུག
གྲྭ་འཇམ་དབྱངས་སྦྱིན་པ་ལགས་ནི། ཨ་མདོ་བླ་བྲང་བསང་ཁོག་ཅེས་པའི་འབྲོག་སྡེ་ཞིག་ནས་སྐྱེས་ཤིང་། ད་ལྟ་རང་ལོ་ ༣༧ དུ་སོན་ཡོད། ཁོང་གི་ཕ་མིང་ལ་བློ་བཟང་དང་མ་མིང་ལ་ཚེ་ལོ་ཞུ་གི་ཡོད་པ་དང་། ཁྱིམ་དུ་ཁྱོན་ཕྲུ་གུ་བཞི་ཡོད་པ་རེད། དམ་པ་ཁོང་ཕྱི་ལོ་ ༡༩༩༣ ལོར་རྒྱ་གར་དུ་ཡོང་སྟེ་སུ་ཇ་བོད་ཁྱིམ་དུ་སློབ་གཉེར་གནང་ཞིང་། ཕྱི་ལོ་ ༡༩༩༦ ལོར་བོད་དུ་ཕྱིར་ལོག་བྱས་རྗེས་བླ་བྲང་བཀྲ་ཤིས་འཁྱིལ་དགོན་པའི་སྨན་པ་གྲྭ་ཚང་ཁོངས་ཀྱི་ཆོས་མགོར་བཞུགས་སྐབས་དབྱིན་སྐད་ཕྲན་བུ་ཤེས་པར་བརྟེན། དགོན་པའི་ནང་ཕྱི་ཕྱོགས་ནས་གནས་སྐོར་བ་སོགས་ཡོང་སྐབས་སྣེ་ཤན་པའི་ལས་སྣེའང་ཞུ་མྱོང་ཡོད་འདུག
རྒྱལ་གཅེས་དཔའ་བོ་དམ་པ་དེའི་དོན། ཨོ་མ་ཎི་པདྨེ་ཧྰུ། ཨོ་མ་ཎི་པདྨེ་ཧྰུ། ཨོ་མ་ཎི་པདྨེ་ཧྰུ།
རྒྱལ་གཅེས་དཔའ་བོ་རེ་རེ་སྡུག་རྩུབ་གྱི་ལམ་ནས་འདི་ལྟར་རྐྱེན་ལམ་དུ་འགྲོ་དུས་ང་ཚོས་མྱ་ངན་གུས་འདུད་རེ་དང་སྨྲེ་ངག་སབ་སོབ་རེ་འདོན་རྒྱུ་ལས་ཅང་བྱེད་རྒྱུ་མི་འདུག ང་ཚོའི་མི་བུ་གལ་ཆེན་རེ་རེའང་མུ་མཐུད་དུ་འདི་ལྟར་འགྲོ་ས་རེད། ང་ཚོས་ཀྱང་མུ་མཐུད་དུ་མྱ་ངན་རེ་བྱས་ཏེ་སྡོད་རྒྱུ་ཡིན་པ་འདྲ། འདི་ནི་ང་ཚོའི་རང་དབང་རྩོད་སྟངས་ཤིག་ཡིན་པ་འདྲ་ལ་ལུགས་སྲོལ་ལྟ་བུ་ཞིག་ཀྱང་ཡིན་པ་འདྲ།
ངོ་མ་སྐྱོ་བོ་རེད། ཉེ་སྔོན་བསང་ཁོག་གི་གྲྭ་སངས་རྒྱས་འདི་ལྟར་རྒྱ་ནག་གིས་མནར་གཅོད་རྐྱེན་གྱིས་འདས་སོང་ལ། ད་འཇམ་དབྱངས་སྦྱིན་པ་ཡང་འདས་སོང་།
ཨོ་མ་ཎི་པདྨེ་ཧྰུ། འདི་ལྟ་བའི་རྒྱལ་གཅེས་དཔའ་བོ་ཚོ་འདས་གྲོང་སུ་སོང་ན་ང་ཚོའི་གྱོང་ཀུད་ཆེན་པོ་རེད།
རྒྱ་དམར་གི་བསམ་ཐོག་ལ་འགྲོ་ཁུ་ཡོད་པ་རེད། གནས་ཚུལ་འདི་ལྟ་བུའི་རིགས་ལ་དོ་སྣང་བྱས་ན་ཡག་པོ་འདུག་གྲྭ་གྲོགས་ཚོ།
ཁོང་རང་གི་གཅེས་པའི་ལུས་སྲོག་ལ་མི་འཛེམ་པར་ང་ཚོ་བོད་མི་ས་ཡ་དྲུག་ཆེད་རླབ་ཆེན་གྱི་མཛད་རྗེས་བཞག་ཐུབ་ན་ང་ཚོའི་གནས་ཚུལ་འདི་ལྟ་བའི་སྐབས་སུ་གདུངས་སེམས་མཉམ་སྐྱེད་ཀྱི་ཚིགས་ཁ་ཤེས་ཀྱི་ཞལ་འདེབས་རེ་བྱས་ན་ལེགས་སྙམས།
༈ རིང་ནས་སྙིང་ལ་བརྣག་པའི་འདོད་པའི་དོན། །ཡོངས་རྫོགས་བོད་ལྗོངས་རང་བཙན་གཙང་མའི་དཔལ། །སྤྱོད་པའི་ཡང་སྲིད་ཞིང་འདིར་མྱུར་བྱོན་ནས། །བདེ་སྐྱིད་ངོམ་མེད་རྟག་ཏུ་སྦྱིན་གྱུར་ཅིག།།