ད་ཆར་གོ་ལ་ཧྲིལ་པོ་གཅིག་གྱུར་ཆགས་ཡོད་དུས། མཐའ་གཅིག་ཏུ་འདི་ང་ཚོའི་དགྲ་རེད། དེ་ང་ཚོའི་གཉེན་རེད་ཅེས་བཤད་ཐུབ་ཐབས་ཡོད་པ་མ་རེད། ཅེས་༧གོང་ས་མཆོག་གིས་གསུངས་ཡོད།
ཀང་ར་རྫོང་རྒྱལ་སྲས་སྐུ་འཁོར་གྱིས་གདན་ཞུ་བྱས་དོན་ལྟར། ཟླ་འདིའི་ཕྱི་ཚེས་ ༦ ཉིན་༧གོང་ས་མཆོག་ཀང་ར་རྒྱལ་པོའི་འགྲེམས་སྟོན་ཁང་དེའི་དབུ་འབྱེད་མཛད་སྒོར་ཆིབས་བསྒྱུར་བསྐྱངས་ཡོད་ཅིང་། མཛད་སྒོ་དེར་ཀང་ར་རྒྱལ་པོའི་གདུང་སྲས་སྐུ་འཁོར་དང་། རྒྱ་གར་གྲོས་ཚོགས་འོག་མའི་འཐུས་མི་ལྕམ་སྐུ་ཅནྜེ་རེ་ཤི་ཀུ་མཱ་རི། དེ་བཞིན་བཙན་བྱོལ་བོད་གཞུང་གི་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་གིས་གཙོས་པའི་བཀའ་བློན་ཕྱག་རོགས་བཅས་ཕེབས་ཡོད།
མཛད་སྒོའི་སྟེང་༧གོང་ས་མཆོག་གིས་བཀའ་བསྩལ་དོན། ངོས་རང་ཀང་རའི་ས་ཁུལ་འདིར་བསླེབས་ཏེ་མི་ངོ་ ༥༠ ཕྱིན་ཡོད་ཀྱང་ཀང་རའི་ཞིབ་ཕྲའི་གནས་ཚུལ་ད་དུང་ཤེས་ཀྱི་མེད། དེ་རིང་ཁྱོད་ཚོས་ཀང་རའི་རྒྱལ་པོའི་ལོ་རྒྱུས་དངོས་རྫས་འགྲེམས་སྟོན་བྱས་པ་འདི། ངོས་ལ་གནས་ཚུལ་གསར་པ་ཤེས་རྟོགས་ཡོང་རྒྱུར་ཕན་ཐོགས་ཆེན་པོ་བྱུང་སོང་བ་མ་ཟད། མི་གཞན་ལའང་ཕན་ཐོགས་ཡོང་གི་རེད། འདས་པའི་ལོ་རྒྱུས་ལ་ཕྱིར་མིག་ལྟ་སྐབས་མཚམས་རེར་ཡར་རྒྱས་དང་སྐྱིད་པའི་དུས་སྐབས་བྱུང་ཡོད་ཀྱང་། མཚམས་རེར་ཕྱོགས་གཉིས་ལ་དམག་འཁྲུག་གིས་གནོད་འཚེ་ཆེན་པོ་བཟོས་ཡོད། ཡིན་ནའང་། གནའ་བོའི་དུས་སྐབས་ཀྱི་གཏོར་བཤིག་ལ་དེ་ཙམ་གྱི་ནུས་པ་ཡོད་པ་མ་རེད། ཅེས་དང་།
ཡང་༧གོང་ས་མཆོག་གིས་མུ་མཐུད་དོན། འགྲེམས་སྟོན་ཁང་འདིར་ཁྱོད་ཚོའི་ཕ་མེས་ཀྱི་རལ་གྲི་དང་མདའ་མདུང་། གཞུ་དང་མེ་མདའ་རྙིང་པ་སོགས་འགྲེམས་སྟོན་བྱས་འདུག མཚོན་ཆ་དེ་དག་དེང་དུས་སྤྱི་ཚོགས་ནང་བེད་སྤྱོད་དེ་ཙམ་མེད་ནའང་། དེང་སྐབས་གཏོར་བཤིག་གཏོང་རྒྱུའི་ནུས་ཤུགས་སྔོན་མ་ལས་ཆེ་རུ་ཕྱིན་ཡོད། ང་ཚོས་སྔོན་མའི་འཚེ་བའི་དམག་འཁྲུག་དེ་འགྲོ་བ་མིའི་རིགས་ཀྱི་ལོ་རྒྱུས་ཆ་ཤས་སུ་བརྩི་རྒྱུ་མེད། ད་ལྟ་དམག་འཁྲུག་གི་དུས་ཚོད་ཡོལ་ཟིན་པ་རེད། གཏོར་བཤིག་གི་ནུས་ཤུགས་ཅི་ཙམ་གྱིས་མང་ན་ཉེན་ཚབས་དེ་ལས་ཆེ་བ་ཡོད། ཅེས་གསུངས་ཡོད།
རྒྱལ་ཁབ་ཕན་ཚུན་རྟེན་འབྲེལ་དུ་གྲུབ་ཡོད་པའི་ཐད་ལ་༧གོང་ས་མཆོག་གིས་གསུངས་དོན། ད་ཆར་གོ་ལ་ཧྲིལ་པོ་གཅིག་གྱུར་ཆགས་ཡོད་དུས། མཐའ་གཅིག་ཏུ་འདི་ང་ཚོའི་དགྲ་རེད། དེ་ང་ཚོའི་གཉེན་རེད་ཅེས་བཤད་ཐུབ་ཐབས་ཡོད་པ་མ་རེད། དཔལ་འབྱོར་གྱིས་མཚོན་པའི་གནས་སྟངས་ཇི་འདྲ་ཞིག་ཡིན་རུང་། དགྲ་བོ་ཡང་རང་ཉིད་གང་ལ་བརྟེན་པའི་སྤྱི་ཚོགས་ཀྱི་ཆ་ཤས་ཤིག་ཆགས་ཡོད་སྟབས། རང་ཉིད་ཀྱི་མ་འོངས་པ་ཇི་འདྲ་ཞིག་ཡོང་མིན་རང་ཉིད་གང་ལ་བརྟེན་པའི་སྤྱི་ཚོགས་དེར་རག་ལས་ཡོད། གནས་སྟངས་འདི་དངོས་ཡོད་གནས་ཚུལ་ཞིག་ཆགས་ཡོད། དེང་སང་རྒྱ་གར་གཅིག་ཆགས་ཡོད་སྟབས། རྒྱ་གར་ལ་ཕྱིའི་བཙན་འཛུལ་བྱ་རྒྱུ་ཁག་པོ་ཡོད་པ་རེད། ང་ཚོ་བོད་ལ་ཆ་བཞག་ན་དུས་རབས་བདུན་པ་བརྒྱད་པའི་སྐབས། ཆོས་རྒྱལ་ཚོའི་དབང་བསྒྱུར་འོག་བོད་མི་ཚོ་རྡོག་རྩ་གཅིག་སྒྲིལ་བྱུང་ཡོད་སྟབས་སྟོབས་ཤུགས་ཆེན་པོ་ཡོད་ཀྱང་། ཕྱིས་སུ་རྒྱལ་པོའི་སྲིད་དབང་ཐོར་ཏེ་བོད་ཀྱི་སྟོབས་ཤུགས་ཀྱང་ཉམས་པ་རེད། ཅེས་དང་།
རྩོད་རྙོག་རིགས་ལ་འདུམ་སྒྲིག་བྱེད་སྟངས་ཐད་ཁོང་གིས། འདས་པའི་ལོ་རྒྱུས་རྣམས་མཐོང་ཐོས་སྐབས་ངོས་ལ་སྐབས་རེར་དགའ་སྤྲོ་དང་སྐབས་རེར་མ་སྐྱིད་པ་ཡོང་གི་འདུག འདས་པ་ནི་འདས་པ་རང་ཡིན་པས་དུས་ཚོད་དེར་ཕྱིར་ལོག་བྱ་རྒྱུ་མེད་དུས། ང་ཚོས་མ་འོངས་པར་གནས་སྟངས་ཐོག་བསམ་བློ་གཏོང་དགོས་པ་རེད། ངོས་ཀྱིས་ནམ་རྒྱུན་གོ་ལ་གཅིག་གྱུར་དགོས། དམག་འཁྲུག་གི་དུས་ཚོད་དེ་ཡོལ་ཟིན་པ་རེད། ཅེས་བརྗོད་ཀྱི་ཡོད། ང་ཚོས་འཆམ་མཐུན་གྱི་འཛམ་གླིང་ཞིག་བསྐྲུན་དགོས་ན། སྐབས་སྐབས་སུ་སྤྱི་ཚོགས་ནང་རྩོད་རྙོག་དང་མི་མཐུན་པའི་རིགས་འབྱུང་སྲིད་ཀྱི་རེད། གལ་སྲིད་ཕན་ཚུན་བར་མི་མཐུན་པ་སོགས་བྱུང་ནའང་། གནས་དོན་དེ་གྲོས་མོལ་གྱིས་སེལ་དགོས་རྒྱུ་གལ་ཆེན་རེད། ཅེས་གསུངས་ཡོད།
གོང་ཚེས་ ༢ ཉིན་༧གོང་ས་མཆོག་ལྡི་ལིར་འཚོགས་བཞིན་པའི་རྒྱ་གར་སྲིད་འཛིན་ཨར་ཝན་ཀ་ཊ་ར་མན་མཆོག་སྐུ་འཁྲུངས་ནས་ལོ་ངོ་ ༡༠༠ འཁོར་བའི་དུས་རྟེན་མཛད་སྒོར་ཆིབས་བསྒྱུར་བསྐྱངས་ཏེ། དེར་ཡོད་སྐུ་མགྲོན་དང་མང་ཚོགས་ ༣༠༠ ལྷག་ལ་༼རྒྱ་གར་གྱི་འཚེ་བ་མེད་པ་དང་ཆོས་ལུཊ་རིས་མེད་ཀྱི་ལེགས་བྱུང་༽ཞེས་པའི་བརྗོད་གཞིའི་ཐོག་བཀའ་སློབ་གནང་ཡོད་འདུག
གསར་འགོད་པ། དཔལ་ལྡན།
