ཟླ་འདིའི་ཕྱི་ཚེས་ ༣ ཉིན་ནུབ་བྱང་མི་རིགས་སློབ་ཆེན་གྱི་རྒན་དཔལ་མོ་ལགས་ཀྱིས་སྣེ་ཁྲིད་དང་བོད་སྐད་ཡིག་སློབ་གླིང་གི་དངོས་གཞིའི་སློབ་མ་བུ་མོ་ ༦ གི་གོ་སྒྲིག་འོག སློབ་རའི་ནང་དུ་གཟའ་ཉི་མའི་དཔེ་ཀློག་ཅེས་པའི་བྱ་འགུལ་ཞིག་སྤེལ་ཡོད་འདུག བྱ་འགུལ་དེ་ནི། སློབ་མ་ཚོར་དཔེ་ཀློག་གི་འདུན་པ་ཆེ་ཡང་ཆ་རྐྱེན་སྐྱོ་བའི་དབང་གིས་དཔེ་ཆར་ལྟ་ཀློག་ཐུབ་ཀྱི་མེད་པ་དང་། བོད་རིགས་སློབ་མ་ཚོར་དཔེ་ཀློག་གི་གོམས་གཤིས་འཇགས་རྒྱུ། སློབ་རའི་རིག་གནས་མཁའ་དབུགས་ཇེ་ལེགས་སུ་གཏོང་ཆེད་བཅས་ཡིན་འདུག
ཐེངས་འདིའི་དཔེ་ཀློག་བྱ་འགུལ་ཁྲོད་བོད་ཡིག་གཙོ་བྱས་པའི་དཔེ་དེབ་ ༢༥༠ ལྷག་གོ་སྒྲིག་ཞུས་ཡོད་འདུག་ལ། བོད་རིགས་སློབ་མ་གཙོ་བྱས་པའི་སློབ་གྲྭའི་དགེ་སློབ་ཡོངས་ལ་སོ་སོས་བལྟས་ཟིན་པའི་དཔེ་ཆ་བཙོང་ས་དང་། ལྟ་འདོད་པའི་དཔེ་ཆ་གཡར་ས་བཅས་ཀྱི་མཐུན་རྐྱེན་བཟང་པོ་ཞིག་བསྐྲུན་ཡོད་འདུག དཔེ་ཆ་དེ་དག་སློབ་མའི་དགོས་མཁོ་ལྟར་ཟི་ལིང་གྲོང་ཁྱེར་གྱི་དཔེ་མཛོད་ཁང་སྐོར་ཞིག་ནས་མཐུན་རྐྱེན་སྦྱར་ཡོད་ཅིང་། བྱ་འགུལ་འདིར་སློབ་གྲྭའི་དགེ་སློབ་ཡོངས་ཀྱི་དགའ་བསུ་དང་གདེང་འཇོག་ཆེན་པོ་ཐོབ་ཡོད་སྟབས། མ་འོངས་པར་ཟླ་རེའི་ཟླ་མགོ་དང་། ཡང་ན་གཟའ་ཉི་མ་ནམ་ཡིན་ལ་དཔེ་དེབ་འགྲེམས་སྟོན་བྱ་འཆར་ཡོད་འདུག་ལ། དཔེ་ཆའི་རྣམ་གྲངས་ཀྱང་སྔར་ལས་ཇེ་མང་དུ་གཏོང་འཆར་ཡོད་འདུག
གསར་འགོད་པ། དོན་གོ
༈ ལྷག་བསམ་དུང་ལྟར་དཀར་བའི་རྒན་དཔལ་མོ་ལགས། ད་ཆ་ཡུལ་གྲུ་གཞན་དུ་དར་འགོ་ཟིན་ནའང་། རང་རེ་གངས་ལྗོངས་ཀྱི་ཞིང་དུ་བསམ་ངན་འགས་རྐྱེན་གྱིས་བོད་ཀྱི་རིག་གཞུང་འདི་ཉིད་མུན་ནག་གི་གྲོང་ཁྱེར་ནང་བཅུག་པའི་སྐབས། མུན་སེལ་གྱི་སྒྲོན་མེའི་ཆ་རྐྱེན་བསྐྲུན་པར་ངེད་ཤ་ཁྲག་གཅིག་པའི་བོད་རིགས་ཡོངས་ནས་ཁྱེད་ལ་དགའ་བསུའི་མེ་ཏོག་མངོན་པར་འཐོར་ཞིང་ཁྱེད་ཀྱིས་དགོངས་བཞེད་ཟབ་མོ་འདི་ཀུན་གེགས་མེད་དུ་འགྲུབ་པའི་སྨོན་འདུན་ཡང་གྲངས་མེད་ཞུ། བཀྲ་ཤིས་བདེ་ལེགས།