དེ་རིང་ནི་ཡུལ་ཤུལ་སྐྱེ་རྒུ་མདོར་ “བཞི་གཅིག་བཞི” ས་ཡོམ་དོན་རྐྱེན་བྱུང་སྟེ། ལོ་ངོ་ཧྲིལ་བོ་གཅིག་འཁོར་བའི་ཉིན་མོར་འཁེལ་ཡོད་སྟབས། ཡུལ་ཤུལ་ཁུལ་མི་དམངས་སྲིད་གཞུང་གི་གོ་སྒྲིག་འོག དེ་རིང་ཞོགས་པའི་ཆུ་ཚོད་ ༧ དང་སྐར་མ་ ༤༥ སྟེང་སྐྱེ་རྒུ་མདོ་རུ་འདས་པོ་རྣམས་ལ་མྱ་ངན་གུས་འདུད་ཀྱི་བྱེད་སྒོ་ཆེན་པོ་ཞིག་བསྡུས་ཡོད་འདུག
མཛད་སྒོ་དེའི་ཐོག་རྒྱ་ནག་དབུས་གཞུང་གི་མཐོ་རིམ་དཔོན་རིགས་ཤིག་དང་འབྲེལ་ཡོད་སྡེ་ཚན་ཁག་ཅིག་གི་སྐུ་ཚབ། དེ་བཞིན་ཞིང་ཆེན་གཞན་པའི་སྐུ་ཚབ། མཚོ་སྔོན་ཞིང་ཆེན་གྱི་མགོ་ཁྲིད་རིམ་པ་དང་། ཡུལ་ཤུལ་ཁུལ་དམར་ཤོག་དྲུང་ཆེ་བསྟན་ཁོ་དང་ཁུལ་དཔོན་ཝང་ཡུས་ཧུའུ་བཅས་ཀྱིས་གཙོས་པའི་ལས་ཁུངས་ཁག་གི་མགོ་ཁྲིད་བཅས་མཉམ་ཞུགས་བྱས་ཡོད་འདུག
ཕྱོགས་གཞན་ཞིག་ནས་ཉེ་ཆར་ཕྱི་ཚེས་ ༡ ཉིན་ནས་བཟུང་སྐྱེ་རྒུ་མདོའི་མི་མང་གིས་རྒྱ་གཞུང་ལ་ངོ་རྒོལ་ཁྲོམ་སྐོར་གྱི་ལས་འགུལ་ཞིག་མགོ་འཛུགས་བྱས་ཡོད་ཅིང་། ཚེས་ ༤ ཉིན་གྱི་མཚན་མོར་གཞུང་གིས་ཉེན་རྟོག་པ་དང་དམག་མི་ཕོན་ཆེན་བཏང་སྟེ། ངོ་རྒོལ་བ་རྣམས་འཛིན་བཟུང་དང་གཅར་རྡུང་དྲག་པོ་བཏང་ཡོད་པ་མ་ཟད། ཉིན་དེ་ནས་བཟུང་སྐྱེ་རྒུ་མདོའི་གྲོང་ཁྱེར་དང་གྲོང་གསེབ། མཐའ་འཁོར་གྱི་དགོན་སྡེ་ཁག་ལ་དམ་དྲག་བྱེད་མགོ་བཙུགས་ཡོད་ཅིང་། ལྷག་པར་དུ་མྱ་ངན་དུས་དྲན་བསླེབ་ལ་ཉེ་སྐབས་ཏེ། ཕྱི་ཚེས་ ༡༠ ཡས་མས་ནས་མང་ཚོགས་དཀྱུས་མ་རྣམས་ཁུལ་དང་རྫོང་གི་ལས་ཁུངས་ཁག་ལ་འགྲོ་སྐྱོད་བྱེད་འཇུག་གི་མེད་པ་དང་། ཁུལ་ཐོག་གི་མི་མང་འདུས་སྡོད་བྱེད་ཡུལ་དག་ཏུ་ཡང་ཉེན་རྟོག་པ་ཇེ་མང་ལ་བཏང་སྟེ་མང་ཚོགས་ལ་འདྲི་རྩད་ཞིབ་བཤེར་བྱེད་མགོ་བཙུགས་ཡོད་འདུག
ཟླ་འདིའི་ཕྱི་ཚེས་ ༥ ཉིན་ཡུལ་ཤུལ་ཁུལ་སྲིད་གཞུང་དང་མཚོ་སྔོན་རྒྱང་སྒྲོག་བརྙན་འཕྲིན་ཁང་བཅས་ཀྱི་གོ་སྒྲིག་འོག སྐྱེ་རྒུ་མདོའི་ ༤༌༡༤ ཡི་ས་ཡོམ་ཆེན་མོ་བྱུང་ནས་ལོ་གཅིག་འཁོར་བའི་རྗེས་དྲན་དགོང་ཚོགས་ ༼བརྩེ་ཆེན་འོད་ཀྱི་མདུད་པ། ༽ ཞེས་པ་ཞིག་ཟི་ལིང་གྲོང་ཁྱེར་དུ་བསྡུས་ཡོད་ཅིང་། དགོང་ཚོགས་དེའི་སྟེང་མཚོ་སྔོན་ཞིང་ཆེན་སྲིད་གྲོས་འགན་འཛིན་པད་མ་དང་། ཡུལ་ཤུལ་ཁུལ་གྱི་དམར་ཕྱོགས་དྲུང་ཆེ་བསྟན་ཁོ་གཙོས། མཚོ་སྔོན་གྱི་འབྲེལ་ཡོད་ལས་བྱེད་དང་བོད་མདོ་དབུས་ཁམས་གསུམ་གྱི་གཞས་པ་གཞས་མ་དང་འཁྲབ་སྟོན་པ། ཟི་ལིང་དུ་ཡོད་པའི་ཡུལ་ཤུལ་ས་ཁུལ་གྱི་བོད་རིགས་མང་ཚོགས་བཅས་མི་ ༨༠༠ ལྷག་འདུ་འཛོམས་བྱུང་ཡོད་ཅིང་། དེ་རིང་མཚོ་སྔོན་བོད་སྐད་རྒྱང་སྒྲོག་དང་མཚོ་སྔོན་བོད་སྐད་བརྙན་འཕྲིན། ཟི་ཁྲོན་ཁམས་པའི་བརྙན་འཕྲིན་བཅས་སུ་འཁྲབ་སྟོན་དགོང་ཚོགས་དེ་གཏོང་རྒྱུ་ཡིན་འདུག
གསར་འགོད་པ། དོན་གོ
ངས་གོ་ཐོས་ལ་རྡ་སར་ཡོད་པའི་ཡུལ་ཤུལ་ས་ཡོམ་གདུང་གསེལ་ཚོགས་པའི་ངོས་ནས་༸རྒྱལ་བ་ཀརྨ་པ་མཆོག་གདན་ཞུས་ཐོགས་ཐེགས་ཆེན་ཆོས་གླིང་གཙུགས་ལག་ཁང་དུ་འདས་པོ་རྣམས་ཀྱི་ཆེད་མཆོད་འབུལ་གཟབ་རྒྱས་ཞིག་བྱས་ཡོད་ཚོད་འདུག
དྷ་རམ་ས་ལར། ཡུལ་ཤུལ་གདུང་སེལ་ཚོགས་ཆུང་གིས་ག་རེ་བྱེད་ཀྱིན་འདུག། གནས་ཚུལ་མཁོ་འདོན་བྱེད་རོགས
སྐྱེ་རྒུར་ས་ཡོམ་གྱིས་གནོད་ཚེ་ཕོག་ནས་ལོ་གཅིག་འཁོར་བར་མྱ་ངན་ཞུ། ས་ཡོམ་ཆེན་པོའི་གནོད་འཚེ་དེས། ཕུ་ནུ་མིང་སྲིང་མང་བོར། མི་རྒྱུ་སྲོག་གསུམ་གྱི་གྱོང་གུད་དང་སྡུག་བསྔལ་རི་བོ་བཞིན་ཆེ་ལ་རྒྱ་མཚོ་བཞིན་གཏིང་ཟབ་ན་ཡང། ཞང་ཞུང་སྒོ་ཕུགས་བར་གསུམ་གྱི་ཕུ་ནུ་མིང་སྲིང་དག་གི་འགོག་མེད་མཐུན་སྒྲིལ་གྱི་སེམས་པ། རྒྱ་མཚོའི་རྦ་རླབས་ལྟར་དགུང་ལ་འཕྱོ་བའི་མི་རིགས་ཤིག་གི་འདུ་ཤེས་འཁྲུངས་བའི་ཉི་མོ་ཡིན་ཕྱིར་སྐྱོ་བ་མཐའ་ཅན་དུ་གྱུར། སྤུན་ཟླ་ཚོ་ང་ཚོས་མི་རིགས་གཅིག་པའི་འདུ་ཤེས་འདི། དུས་ནམ་ཡང་སེམས་འདུན་དྲོན་མོའི་ཡལ་དུ་མ་འཇུག་དང་། དཀའ་བ་བརྒྱ་ཕྲག་གི་རི་ལུང་བརྒལ་ནས་མཐའ་འཇུག་གི་རྒྱལ་ཁ་ང་ཚོའི་ཡིན།
ས་ཡོམ་གྱི་གོད་ཆག་འདིའི་འོག་རྐྱེན་འདས་སུ་ཕྱིན་པའི་ཉམས་ཆུང་སྐྱབས་མེད་མགོན་མེད་རྣམས་ནི་ངོ་མར་སྙིང་རྗེའི་ཡུལ་རང་རེད། ཁོང་རྣམས་མྱུར་དུ་དལ་བའི་རྟེན་བླངས་ནས་འུ་ཅག་བོད་མི་རིགས་དང་ལྷན་དུ་དགའ་མགུར་སྤྱོད་རྒྱུ་ཡོང་བའི་སྨོན་འདུན་ཡོད། དེ་ཙམ་མ་ཟད། རྒྱ་རིགས་རྣམས་ཀྱང་དལ་རྟེན་ཡག་པོ་ཐོབ་པའི་སྨོན་འདུན་ཡོད།
ཡིན་ན་ཡང། གོང་གི་པར་རིས་དེ་མཐོང་སྐབས། གནས་ཚུལ་རྒྱུས་མེད་ཅིག་གིས་བལྟས་ན། རྒྱའི་དཔོན་རིགས་རྣམས་ལ་ཡི་རངས་སྐྱེ་སྲིད། འོན་ཀྱང་། ཉམས་མྱོང་ཡོད་མཁན་ཞིག་གིས་བལྟས་ན། དེ་རྣམས་ནི་འཛམ་གླིང་གི་མདུན་དུ་འཁྲབ་སྟོན་ཙམ་ཞིག་ལས་མ་འདས་པར་ཤེས་ཐུབ།
ཡུལ་ཤུལ་འདས་པོ་ཡོངས་ཀྱི་ཐར་པ་དང་ཐམས་ཅན་མཁྱེན་པའི་གོང་འཕང་ཐོབ་རྒྱུ་དང་གསོན་པོ་རྣམས་ཀྱི་མི་ཚེ་དོན་ལྡན་ཡོང་བའི་འཕགས་མཆོག་སྤྱན་རས་གཟིགས་ལ་གསོལ་བ་སྙིང་ནས་འདེབས།