ཁྱོད་ཚོའི་རྣམ་འགྱུར་ལ་ཐུག་ཡོད།

ཕྱི་ཚེས་ ༡༡ ཉིན་ཕ་ཡུལ་རྨེའུ་རུ་མའི་རུ་ཆེན་གཉིས་པའི་རྔ་བ་ཚང་གི་རྔ་པ་ཀིརྟིའི་དགོན་གྱི་ གྲྭ་བློ་བཟང་དར་རྒྱས། རང་ལོ་ ༣༡ ཡིན་པ་ཁོང་དགོན་པའི་ནང་ནས་འཛིན་བཟུང་གིས་བཀག་ཉར་བྱས་ཡོད་པ་དང་། རྗེས་སུ་གང་དུ་ཡོད་མེད་སོགས་ཀྱི་གནས་ཚུལ་གསལ་བོ་ཤེས་རྟོགས་བྱུང་མི་འདུག       

ཕྱི་ཚེས་ ༡༢ ཉིན་མི་མང་དང་དམག་དཔུང་གདོང་ཐུག་སྐབས་མི་མང་ལ་རྡུང་རྡེག་དང་སྦྱོང་བརྡར་སྤྲད་པའི་ཁྱིས་རྨུག་བཅུག་པའི་གནས་ཚུལ་བྱུང་ཡོད་པ་མ་ཟད། སྐབས་དེར་ཁྱིས་རྨུག་པའི་ལོ་ན་ ༦༠ ཡོལ་བའི་ཨ་མ་རྒན་མོ་གཉིས་ལ་རྨས་སྐྱོན་ཚབས་ཆེན་ཕོག་པར་བརྟེན་ད་ཆ་རྫོང་སྨན་ཁང་དུ་ཉལ་ཡོད་འདུག

ཕྱི་ཚེས་ ༡༣ ཉིན་རྒྱ་གཞུང་གི་མི་སྣས། དགོན་པའི་ནང་ཡོད་པའི་ལས་དོན་རུ་ཁག་གིས་ལས་ཀ་མཇུག་མ་རྫོགས་བར་དུ་གནད་དོན་ག་རེ་ལ་ཐུག་ན་ཡང་། གྲྭ་པ་གཅིག་ཀྱང་ཕྱི་ལ་ཐོན་མི་ཆོག་ཚུལ་དང་། ལས་མཇུག་མགྱོགས་པོར་རྫོགས་མིན་གྲྭ་པ་ཚོས་སློབ་གསོ་དང་ལེན་བྱེད་མིན་ལ་རག་ལས་ཚུལ་བརྗོད་ཡོད་འདུག

ཕྱི་ཚེས་ ༡༤ ཉིན་རྔ་པ་རང་སྐྱོང་ཁུལ་གྱི་འཐབ་ཕྱོགས་གཅིག་གྱུར་ཁང་གི་མགོ་ཁྲིད་དང་དགེ་འདུན་པ་ཉུང་ཤས་ལྷན་དུ་ཚོགས་འདུ་ཚོགས་ཡོད་པ་དང་། སྐབས་དེར་དགེ་འདུན་པ་རྣམས་ཀྱིས་ས་གནས་ས་ཐོག་གི་དངོས་ཡོད་ཀྱི་དཀའ་ངལ་ག་རེ་ཡིན་མིན་འགྲེལ་བརྗོད་དང་། ལྷག་པར་དུ་རྔ་པ་ཀིརྟིའི་དགོན་གྱི་སློབ་གྲྭའི་སྒོ་བརྒྱབ་པ་སོགས་ཀྱི་གནད་དོན་མང་པོ་ཞིག་གླེང་ཡང་ཚུར་ལན་འདེབས་གང་ཡང་བྱས་མེད་འདུག

ཕྱི་ཚེས་ ༡༥ ཉིན་སྔར་བཞིན་རྔ་པ་རྫོང་དང་ལྷག་པར་ཀིརྟི་དགོན་པར་དམ་དྲག་ཤུགས་ཆེན་བྱེད་མུས་ཡིན་པར་མ་ཟད། ཉིན་དེར་དགེ་འདུན་པ་ཁག་ཅིག་འཛིན་བཟུང་གིས་བཀག་ཉར་བྱས་ཚུལ་འདུག་ཀྱང་། ཁོང་གི་མིང་དང་ ས་གནས་སོགས་ཞིབ་ཕྲའི་གནས་ཚུལ་ཤེས་རྟོགས་མ་བྱུང་།

བཞུགས་སྒར་ཀིརྟིའི་བྱེས་པ་གྲྭ་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས་གནས་ཚུལ་བཏང་འབྱོར་བྱུང་།