དབུས་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག ཁ་སང་ཕྱི་ཚེས་ ༡༧ ཉིན་གྱི་ཞོགས་པའི་ཆུ་ཚོད་ ༡༠ པའི་སྟེང་། ངྷ་ས་མེག་གྷན་གཙུག་ལག་ཁང་གི་མདུན་ཐང་དུ་བོད་རིགས་དགེ་འདུན་པ་ ༡༥ ཙམ་གྱིས་ཟས་བཅད་ངོ་རྒོལ་གྱི་ལས་འགུལ་ཞིག་སྤེལ་མགོ་བཙུགས་སོང་ལ། སྐབས་དེར་མང་ཚོགས་ནང་ལས་འགུལ་ལ་རྒྱབ་སྐྱོར་གྱི་མཚན་རྟགས་སོགས་བསྡུ་རུབ་བྱས་ཡོད། ཟས་བཅད་ངོ་རྒོལ་གྱི་ལས་འགུལ་དེ་ནི། ཉེ་ཆར་རྒྱ་གཞུང་གིས་མདོ་སྨད་རྔ་པ་ཁུལ་དུ་དམ་དྲག་ཤུགས་ཆེན་བྱས་ཏེ། འདི་ལོའི་ཕྱི་ཟླ་ ༣ ཚེས་ ༡༦ ཉིན་ནས་ཕྱི་ཟླ་ ༤ ཚེས་ ༡༢ ཉིན་བར་ཉིན་གྲངས་ ༢༦ རིང་། ཀིརྟི་དགོན་གྱི་དགེ་འདུན་པ་ ༡༧ དང་། མི་སྐྱ་ ༡༧ བཅས་ཁྱོན་མི་ ༣༤ ཙམ་འཛིན་བཟུང་བྱས་པར་ངོ་རྒོལ་བྱས་པ་ཞིག་ཡིན་འདུག
ཉིན་དེར་གཞོན་ལྷན་ཚོགས་གཙོ་ཚེ་དབང་རིག་འཛིན་ལགས་ཀྱིས་གཞོན་ལྷན་གྱི་དགོན་འདུན་ཁག་སྒྲོག་སྦྱང་བྱས་པའི་ནང་། ཕྱི་ཟླ་ ༤ ཚེས་ ༡༧ ཉིན་ནས་དབུས་བོད་ཀྱི་གཞོན་ལྷན་ནུ་ལྷན་ཚོགས་ཀྱིས་བཞུགས་སྒར་ངྷ་སར་ཟས་བཅད་ངོ་རྒོལ་གྱི་ལས་འགུལ་བསྟུད་མར་སྤེལ་རྒྱུ་ཡིན་པ་མ་ཟད། གཞོན་ནུའི་ཡན་ལག་ས་གནས་ཁག་ཏུ་ཡང་གཅིག་མཚུངས་ཐོག་ལས་འགུལ་སྤེལ་རྒྱུ་ཡིན། དེ་མིན་རྒྱལ་སྤྱིའི་སྲིད་གཞུང་ཁག་དང་འབྲེལ་ཡོད་སྡེ་ཁག་བཅས་སུ་སྙན་ཞུ་འབུལ་རྒྱུ་ཡིན།
རྒྱ་གཞུང་གིས་བཙན་ཤེད་ཀྱིས་ཀིརྟི་དགོན་དུ་རྒྱལ་གཅེས་ཆོས་གཅེས་ཀྱི་སློབ་གསོ་ཟེར་བའི་ལས་འགུལ་སྤེལ་བཞིན་ཡོད་ཚུལ་བརྗོད་དེ། དགོན་པ་དམག་གིས་བསྐོར་བའི་ཛ་དྲག་གནས་སྟངས་འཕྲལ་མར་ཕྱིར་འཐེན་བྱས་ཏེ། དགེ་འདུན་པ་ཚོར་འགྲོ་སྡོད་རང་དབང་དང་ཆོས་ལུགས་ཀྱི་བྱེད་སྒོ་ཁག་ངེས་པར་དུ་སླར་གསོ་བྱ་དགོས། ཞེས་བཀོད་ཡོད་འདུག
གསར་འགོད་པ། དཔལ་ལྡན།
བཀུར་བར་འོས་པའི་ཆོགས་གཙོ་མཆོག་དངོས་གནས་ཡག་པོ་འདུག གཡོ་འགུལ་མེད་པ་དང་གཞི་རྒྱ་ཆེ་བའི་ལས་འགུལ་ཚ་ཐག་ཆོད་ཅིག་སྤེལ་དང། ང་ཚོས་མུ་མཐུད་ནས་མཐུན་སྒྲིལ་དཔུང་བ་མཉམ་གཤིབ་བྱས་ཏེ་ཁྱེད་ཚོ་གཞུང་འབྲེལ་མ་ཡིན་པའི་ཚོགས་པ་ཁག་ལ་རྒྱབ་སྐྱོར་དང་གདུང་སེམས་མཉམ་བསྐྱེད་ཡོད།
ལས་འགུལ་འདི་ནི་སྔོན་ཆད་ཀྱི་ཟས་བཅད་ངོ་རྒོལ་དག་མི་འདྲ་བ་ཞིག་བྱུང་ནས། བོད་ནང་གི་མནར་གཅོད་མཚམས་འཇོག་བྱེད་རྒྱུར་རྒྱ་ནག་སྲིད་གཞུང་གིས་ཁས་ལེན་མ་བྱས་པར་དུ། གཞོན་ནུ་ཚོགས་པ་གཙོ་བའི་ཆབ་སྲིད་ཀྱི་ཚོགས་པ་ཁག་གིས་བོད་མི་དག་གསོན་པོར་ཕྱི་ན་ཡོད་པ་དང་། ཡོད་པ་དེ་ཡང་དོན་མེད་དུ་བསྡད་མེད་པ་ངེས་སུ་རྒྱ་ནག་པོའི་གཞུང་ལ་བརྡ་ལན་གསལ་དག་ཆོད་ཅིག་སྤྲོད་ཐུབ་པར་རེ་སྐུལ་ནན་ཏན་ཞུ་རྒྱུ་ཡིན། ས་གནས་ཁྱབ་ཆེ་བར་གཏོང་བ་དང་། ལས་འགུལ་གྱི་ངོ་བོ་ཡང་ཚད་ཆེ་མཐོར་གཏོང་ཐུབ་པར་རེ་སྐུལ་སེམས་གཏིང་ནས་ཞུ་བཞིན་ཡོད།