ཁ་ཌ་ཧྥེ་སྒེར་གཅོད་གཞུང་གི་དྲག་དམག་དང་ཁ་གཏད་མི་མང་བར་བྱུང་བའི་འཁྲུག་འཛིང་དོན་རྐྱེན་ཁྲོད། སྙན་གྲགས་ཅན་གྱི་རྒྱལ་སྤྱིའི་གསར་འགོད་པ་གཉིས་རྐྱེན་འདས་དང་གཞན་གཉིས་ལ་རྨས་སྐྱོན་ཚབ་ཆེན་ཕོགས་ཡོད་འདུག
ཕྱི་ཚེས་ ༢༠ ཉིན་ལི་བྷི་ཡའི་ནུབ་ཕྱོགས་གྲོང་ཁྱེར་མའེ་སའོ་ར་ཊའི་(Misurata) ནང་། ཁ་ཌ་ཧྥེ་དྲག་དམག་དང་ཁ་གཏད་མང་ཚོགས་པར་དྲག་པོའི་འཐབ་འཛིང་བྱས་ཏེ་ཁྲི་རེ་ཕའོ་ལི་(Tripoli Street) སྲང་ལམ་དུ་སྒྱོགས་མདེལ་འགས་གཏོར་གྱི་ཛ་དྲག་དོན་རྐྱེན་བྱུང་བའི་ཁྲོད། སྙན་གྲགས་ཅན་གྱི་བརྙན་ལེན་གསར་འགོད་པ་ཧེ་ཐིར་རེན་ཁྲོན་(Tim Hetherington) ལགས་ལ་སྒྱོགས་མདེལ་ཕོགས་ཏེ་གློ་བུར་རྐྱེན་འདས་སུ་བཏང་ཡོད་པ་དང་། ཧོན་ཌི་རའོ་སི་ (Chris Hondros) ལགས་སྨན་ཁང་དུ་ཁྱེར་ཏེ་ཛ་དྲག་མྱུར་སྐྱོབ་བྱས་ཡོན་ནའང་།མགོ་བོར་རྨས་སྐྱོན་དྲག་པོ་ཕོགས་ཡོད་སྟབས་མྱུར་སྐྱོབ་མ་ཐུབ་པར་ཆུ་ཚོད་འགའི་རྗེས་སུ་འདས་གྲོངས་སོང་ཡོད་འདུག དེ་མིན་གསར་འགོད་པ་རྒེ་མའེ་ཌེན(Gai Mading) ལགས་ལ་ཛ་དྲག་མྱུར་སྐྱོབ་བྱས་ཏེ་ད་ལྟ་སྲོག་ཉེན་ལས་ཐར་ཡོད་པ་དང་། གསར་འགོད་པ་མར་ཁེད་བྷོ་རོན་(Markle Brown) ལགས་ལའང་རྨས་སྐྱོན་ཕོགས་ཏེ་སྨན་བཅོས་བྱ་དགོས་བྱུང་ཡོད་འདུག
སྙན་གྲགས་ཅན་གྱི་གློག་བརྙན་འཁྲབ་ཁྲིད་པ་དང་པར་ལེན་གསར་འགོད་པ་ཧེ་ཐིར་རེན་ཁྲོན་ལགས་ནི། དབྱིན་ཡུལ་ནས་སྐྱེས་ཤིང་ད་ལྟ་ལོ་ ༤༠ ཡིན་པ་དང་། ཁོང་ནི་༼ཁེངས་སྙོམས་དྲང་གནས༽ཞེས་པའི་ཨ་རིའི་དུས་དེབ་ཁང་གི་པར་ལེན་གསར་འགོད་ཡིན་ལ། འདས་པའི་ལོ་བཅུ་ལྷག་གི་རིང་ཉེན་ཁ་ཆེ་བའི་གཡུལ་སར་བསྐྱོད་དེ་པར་ལེན་གསར་འགོད་ཀྱི་ཕྱག་ལས་གནང་ཡོད། ཁོང་གིས་བླངས་པའི་ཨབ་གྷ་ནི་སི་ཐན་དུ་གནས་སྡོད་ཨ་རིའི་དམག་མིའི་པར་རིས་ཤིག་ལ་སྐབས་༥༡པའི་འཛམ་གླིང་གསར་འགོད་པར་རིས་འགྲན་སྡུར་ཁྲོད་༼༢༠༠༧ལོའི་ཆེས་ལེགས་པའི་གསར་འགྱུར་བརྙན་པར༽གྱི་གཟེངས་རྟགས་ཐོབ་མྱོང་པར་མ་ཟད། ཕྱི་ལོ་༢༠༡༠ལོར་བཟོ་སྐྲུན་བྱས་པའི་ཨབ་གྷ་ནི་སི་ཐན་དུ་བཅའ་སྡོད་ཨ་རིའི་དམག་མིའི་སྐོར་གྱི་དངོས་བྱུང་གློག་བརྙན་(Restrepo)ཡི་འཁྲབ་ཁྲིད་པའི་གྲས་ཀྱི་གཅིག་ཀྱང་ཁོང་ཡིན་པ་དང་། གློག་བརྙན་དེ་ཨའོ་སི་ཁ་རྒྱལ་སྤྱིའི་གློག་བརྙན་བྱ་དགའི་རྣམ་གྲངས་ཁྲོད་མིང་འདོན་བྱུང་ཡོད་པ་རེད།ཁོང་ཉིད་འདས་གྲོངས་སུ་གྱུར་པའི་ཡུལ་སྐྱོ་བའི་གནས་ཚུལ་བྱུང་རྗེས་ཁོང་གི་ནང་མིས་གསར་ལམ་ཁག་ཏུ་བརྗོད་དོན། ཧེ་ཐིར་རེན་ཁྲོན་ལགས་ཀྱིས་ལི་བྷི་ཡར་མུ་མཐུད་དུ་རང་ཉིད་ཀྱི་གསར་འགོད་ཕྱག་ལས་རྒྱུན་སྐྱོང་གནང་སྟེ། དམག་འཐབ་དང་ཟིང་འཁྲུག་ཁྲོད་ཀྱི་མི་ཆོས་རིང་ལུགས་ཀྱི་གནད་དོན་ལ་གཙིགས་འཛིན་གནང་ཡོད།ཅེས་བརྗོད་ཡོད་པ་རེད། 
སྙན་གྲགས་ཅན་གྱི་པར་ལེན་གསར་འགོད་པ་ཧོན་ཌི་རོ་སི་ལགས་ནི་ད་ལྟ་ལོ་༤༡ཡིན་ལ། ཁོང་ནི་ཨ་རིའི་བྷེ་ཁྲི་(Getty)བརྙན་པར་ཁང་གི་པར་ལེན་གསར་འགོད་པ་ཡིན་ཞིང་། ཕྱི་ལོ་ ༡༩༩༣ ལོར་བྱང་ཁེ་རོ་ལེ་ན་ (North Carolina) མངའ་སྡེ་ནང་དབྱིན་ཇིའི་རྩོམ་རིག་ཐོག་སློབ་སྦྱོང་གནང་ཡོད་པ་དང་། དེ་རྗེས་ཨོ་ཧེ་ཝོ་གཙུག་ལག་སློབ་ཆེན་ (Ohio University) དུ་ཆེད་ལས་པར་ལེན་ལས་རིགས་ཐོག་སློབ་གཉེར་མཐར་ཕྱིན་རྗེས། ཉུག་ཡོག་ཏུ་ཡོད་པའི་རྒྱལ་སྤྱིའི་གསར་འགྱུར་ལས་རིགས་ཐད་ཕྱག་ལས་གནང་མགོ་བརྩམས་ཏེ་ཁི་སི་བའོ་(Kosovo)དང་།ཨན་གྷོ་ལ(Angola)། ལེ་བྷ་ནོན(Lebanon)།ཨབ་གྷ་ནི་སི་ཐན(Afghanistan)།ཀ་ཤི་མིར(Kashmir)།ཨི་རག་(Iraq)སོགས་འཁྲུག་ཟིང་ཆེ་བའི་ཡུལ་ལུང་ཁག་ཏུ་བསྐྱོད་དེ་གསར་འགོད་ཀྱི་ཕྱག་ལས་གནང་ཡོད། ཕྱི་ལོ་ ༡༩༩༩ ལོར་ཁོང་ལ་ USAID ཞེས་པའི་ཆེད་ལས་པར་ལེན་པའི་གཟེངས་རྟགས་ཐོབ་ཡོད་པ་དང་། ༢༠༠༤ ལོར་ལི་བྷི་ཡ་རྒྱལ་ཁབ་ནང་རྩེད་རིགས་པར་ལེན་པ་ལེགས་ཤེས་སུ་འདམས་ཐོན་བྱུང་ཡོད། གཞན་ཡང་། ཁོང་ལ་རེ་བྷིར་ཁྲི་ཁེ་ཞེས་པའི་གཡུལ་སའི་པར་ལེན་གསར་འགོད་པའི་ཆེས་མཐོའི་གསེར་གྱི་གཟེངས་རྟགས་དང་། ཉིག་ཡོག་ཏུ་རྟེན་གཞི་བྱས་པའི་རྒྱལ་སྤྱིའི་གསར་འགོད་མཐུན་ཚོགས་ཀྱི་ཇོན་ཧྥེ་བྷིར་(John Faber)ཞེས་པའི་རྟགས་མའང་ཐོབ་ཡོད་པ་རེད། ལི་བྷི་ཡ་མི་མང་གི་དམངས་གཙོ་གསར་རྗེའི་ལས་འགུལ་ལ་ཁ་ཌ་ཧྥེ་སྒེར་གཅོད་གཞུང་གིས་དྲག་གནོན་བྱས་ཏེ། འདས་པའི་ཟླ་གཉིས་ལྷག་གི་རིང་ཁ་ཌ་ཧྥེ་དྲག་དམག་དང་ཁ་གཏད་ཤོག་ཁག་བར་དྲག་པོའི་འཁྲུག་ཟིང་བྱུང་བའི་དོན་རྐྱེན་ཁྲོད། ཧེ་ཐིར་རེན་ཁྲོན་དང་ཧོན་ཌི་རོ་སི་རྣམ་གཉིས་ནི་གཡུལ་སར་འདས་གྲོངས་སུ་གྱུར་པའི་གསར་འགོད་པ་ཨང་གཉིས་པ་དང་གསུམ་པ་དེ་ཆགས་ཡོད་པ་རེད། འགས་གཏོར་དོན་རྐྱེན་ཁྲོད་རྒྱལ་སྤྱིའི་གསར་འགོད་པ་གཉིས་འདས་གྲོངས་སུ་སོང་བའི་གནས་ཚུལ་དེ་བྱུང་མ་ཐག ཨ་རིའི་ཕོ་བྲང་དཀར་པོས་ལི་བྷི་ཡའི་མཐོ་རིམ་དཔོན་རིགས་གཙོས་པའི་དང་འཛམ་གླིང་གི་རྒྱལ་ཁབ་ཁག་གིས་༼སྨྲ་བརྗོད་རང་དབང་མེད་པའི་ཉམས་ཆུང་མི་མང་དང་ཚོགས་སྡེ་ཁག་གི་མགྲིན་ཚབ་གནང་སྟེ་སྐད་ཆ་བཤད་མཁན་གྱི་གསར་འགོད་པ་རྣམས་ཀྱི་ཚེ་སྲོག་ལ་སྲུང་སྐྱོབ་གནང་དགོས༽ཅེས་འབོད་སྐུལ་གནང་ཡོད་པ་རེད།
ཕྱི་ཟླ་༤པའི་ཚེས་༢༠ཉིན་ཧེ་ཐིར་རེན་ཁྲོན་(དཀྱིལ) ལགས་ཉེན་ཁ་ཆེ་བའི་གཡུལ་སར་བསྐྱོད་དེ་གསར་འགོད་ཕྱག་ལས་གནང་བཞིན་པ། (འདི་ནི་ཁོང་མ་གྲོངས་པའི་ཆུ་ཚོད་འགའི་སྔོན་གྱི་འདྲ་པར་རེད།)
ཕྱི་ཟླ་ ༤ ཚེས་ ༡༨ ཉིན་ཧོན་ཌི་རོ་སི་ལགས་ལི་བྷི་ཡར་གསར་འགོད་ཕྱག་ལས་གནང་བཞིན་པ།
ཕྱི་ཟླ་༣ཚེས་༢༥ཉིན་ཧེ་ཐིར་རེན་ཁྲོན་(དཀྱིལ) ལགས་ལི་བྷི་ཡ་བྷེན་གྷ་རྫེ་ (Benghazi)ས་ཁུལ་དུ་ཡར་ལངས་མི་མང་ཁྲོད་གསར་འགོད་ཕྱག་ལས་གནང་བཞིན་པ།
ཉེ་སྔོན་ལི་བྷི་ཡའི་ནུབ་ཕྱོགས་གྲོང་ཁྱེར་ཁྲི་རེ་ཕའོ་ལིར་གསར་འགོད་ཕྱག་ལས་གནང་བཞིན་པ།
གསར་འགོད་པ།ཚེ་རིང་རྒྱལ།
ཨོཾ་མ་ཎི་པདྨེ་ཧཱུྃ། གསར་འགོད་པ་ཚེ་སྲོག་ཤོར་བ་ནི། སྔར་གྱི་རྒྱལ་ཕྲན་གཉིས་བར་གྱི་བྱ་མ་རྟའི་ཚེ་སྲོག་ཤོར་བ་དང་མཚུངས་པས། ཤིན་ཏུ་བློ་ཕམ་པོ་རེད། དལ་འགྲོར་མྱུར་དུ་སྐྱེ་བར་ཤོག །ཨོཾ་མ་ཎི་པདྨེ་ཧཱུྃ།
གཏམ་བཤད་མང་ན་གྲོགས་དང་འཁོན། །འགྲོ་འདུག་མང་ན་བྱུར་དང་འཕྲད། །བཟའ་རྒྱུ་མང་ན་རང་ལྟོ་ན། ཞེས་པ་དེ་རེད། སྙིང་རྗེ། བདེ་ཆེན་དག་པའི་ཞིང་དུ་སྐྱེ་བར་ཤོག
།ལ་ལ་རང་དབང་ཡོད་ནས་ཤི།
།ལ་ལ་རང་དབང་མེད་ནས་ཤི།
།བདེ་བའི་དུས་སྐབས་ཆེས་ཉུང་བ།
།འདི་ནི་འཇིག་རྟེན་འཁོར་བའི་གཤིས། སྙིང་རྗེ། ཨོཾ་མ་ཎི་པདྨེ་ཧཱུྃ་ཧྲཱིཿ
ཨོཾ་མ་ཎི་པདྨེ་ཧཱུྃ་ཧྲཱིཿ
ཨོཾ་མ་ཎི་པདྨེ་ཧཱུྃ་ཧྲཱིཿ
ཨོཾ་མ་ཎི་པདྨེ་ཧཱུྃ་ཧྲཱིཿ
ཨོཾ་མ་ཎི་པདྨེ་ཧཱུྃ་ཧྲཱིཿ
ཨོཾ་མ་ཎི་པདྨེ་ཧཱུྃ་ཧྲཱིཿ
ཨོཾ་མ་ཎི་པདྨེ་ཧཱུྃ་ཧྲཱིཿ