ང་ཚོའི་འཐབ་རྩོད་དེ་གཞུང་མང་གཉིས་ཀྱི་འཐབ་རྩོད་ཡིན།

ང་ཚོ་བོད་གཞུང་མང་གཉིས་ཀ་སྐྱབས་བཅོལ་དུ་ཡོང་དོན་བོད་མི་རིགས་ཀྱི་བདེན་པའི་འཐབ་རྩོད་ཆེད་ཡིན་སྟབས། བོད་དོན་འཐབ་རྩོད་ཀྱི་ལས་འགུལ་གང་ཡིན་ཡང་། མི་མང་ཁོ་ན་མིན་པར་གཞུང་ཞབས་ལས་བྱེད་ཚང་མ་མཉམ་ཞུགས་ཀྱིས་འཐབ་རྩོད་ཀྱི་འགན་ལེན་དགོས་ཟེར།  

ཁ་སང་ཕྱི་ཚེས་༢༢ཉིན་གྱི་ཕྱི་དྲོའི་ཆུ་ཚོད་༦པའི་སྟེང་བོད་ཀྱི་གཞོན་ནུ་ལྷན་ཚོགས་དབུས་སྤྱི་ཁྱབ་རྒྱུན་ལས་ཁང་གིས་ཉེ་བའི་དུས་ནས་བཟུང་རྒྱ་ནག་གཞུང་གིས་མུ་མཐུད་རྔ་པ་ཀིརྟི་དགོན་པར་དྲག་གནོན་བྱས་ཏེ་དགེ་འདུན་པ་༣༠༠འཛིན་བཟུང་བཙན་ཁྲིད་དང་། དགོན་པ་སྲུང་སྐྱོབ་བྱེད་མཁན་གྱི་མི་སྐྱ་རྒན་རྒོན་༢འདས་གྲོངས་སུ་བཏང་པའི་ཛ་དྲག་གི་གནས་སྟངས་ལ་གདུང་སེམས་མཉམ་སྐྱེད་ཆེད། བཞུགས་སྒར་རླངས་འཁོར་ས་ཚིགས་ནས་ཐེག་ཆེན་ཆོས་གླིང་གཙུག་ལག་ཁང་བར་མར་མེ་ཁྲོམ་བསྐོར་གྱི་ལས་འགུལ་ཞིག་སྤེལ་ཡོད་ཅིང་།ལས་འགུལ་དེའི་སྟེང་བཞུགས་སྒར་ཀིརྟི་བྱེས་པ་གྲྭ་ཚང་གི་དགེ་འདུན་པ་གཙོས།གཞུགས་སྒར་ཁུལ་གྱི་དགེ་འདུན་པ་དང་བཙུན་མ། བཞུགས་སྒར་མི་མང་བཅས་མི་༣༠༠ལྷག་འདུ་འཛོམས་བྱུང་ཡོད།