བཙུན་མ་ཞིག་འཛིན་བཟུང་།

ནས་ཚུལ་འབྱོར་གསལ་ལྟར་ན། ཁམས་ཏྲེ་ཧོར་བྲག་མགོའི་རྦ་དག་བཙུན་དགོན་ཕུན་ཚོགས་ཆོས་གླིང་གི་བཙུན་མ་བྱམས་པ་མཚོས་ཟླ་འདིའི་ཚེས་ ༡༦ ཉིན་གྱི་ཉིན་རྒྱབ་ཆུ་ཚོད་གཉིས་པ་ཙམ་ལ་ཁམས་སྡེ་དགེ་རྫོང་གི་ཁྲོམ་གཞུང་ཟམ་ཆེན་ཁར། བོད་ལ་རང་དབང་དགོས་པ་སོགས་ཀྱི་སྐད་འབོད་དང་ཡིག་ཆ་འགྲེམས་སྤེལ་བྱས་པར་བརྟེན་རྒྱ་གཞུང་གི་ཉེན་རྟོག་པས་རྡུང་རྡེག་མནར་གཅོད་བཏང་སྟེ་འཇུ་བཟུང་བྱས་ཡོད་འདུག

མོ་ཉིད་བྲག་མགོ་ནས་ཐོན་ཁར་ཡིག་ཆ་ཞིག་བཞག་ཡོད་པའི་ནང་དུ་རང་ཉིད་གལ་ཆེའི་ལས་དོན་ཞིག་གི་ཆེད་དུ་ས་ཆ་གཞན་དུ་འགྲོ་རྒྱུ་ཡིན་ཚུལ་འཁོད་ཡོད་པ་དང་། ཕྱི་ལོ་ ༢༠༠༨ ཟླ་བ་ ༦ ཚེས་ ༨ ཉིན་བྲག་མགོ་རྦ་དག་བཙུན་དགོན་གྱི་བཙུན་མ་བརྒྱ་ཕྲག་འགས་རྒྱ་གཞུང་ལ་ངོ་རྒོལ་གྱི་ལས་འགུལ་སྤེལ་སྐབས། རྒྱ་གཞུང་ངོས་ནས་ཕྱིས་སུ་བཙུན་དགོན་འདིའི་ནང་གི་བཙུན་མ་སུ་ཞིག་གིས་ཀྱང་དེ་འདྲའི་ལས་འགུལ་རིགས་སྤེལ་ཚེ་དགོན་པ་འདི་སྒོ་ཕྱེ་མི་ཆོག་པ་བཟོ་རྒྱུ་ཡིན་ཞེས་ནན་བརྗོད་ཀྱིས་བཀའ་ཡིག་སྤྲད་ཡོད་སྟབས། ད་རེབ་བཙུན་མ་བྱམས་པ་མཚོ་རང་ཉིད་དགོན་པའི་སྐྱིད་སྡུག་ཏུ་མེད་ཚུལ་བརྗོད་དེ། ས་ཆ་གཞན་དུ་སོང་སྟེ་རང་དབང་སྐད་འབོད་ཀྱི་ལས་འགུལ་དེ་སྤེལ་དགོས་བྱུང་བ་ཞིག་ཡིན་འདུག

ཁོང་མོ་བྲག་མགོ་ནས་ཐོན་ཏེ་ཉིན་འགའ་ཤས་ཀྱི་རྗེས་སུ་མ་གཏོགས་ནང་མི་རྣམས་ཀྱིས་གར་ཡོད་ཤེས་རྟོགས་བྱུང་མེད་ན་ཡང་། མོ་ཉིད་འཇུ་བཟུང་བྱེད་སྐབས་རང་ཉིད་བྲག་མགོ་རྫོང་ཆུ་དབར་གྲོང་ནས་ཡིན་ཚུལ་དང་། རང་གིི་མིང་དང་བཅས་པ་སྦ་གསང་མེད་པར་ཉེན་རྟོག་པར་བཤད་ཡོད་སྟབས། ཡུལ་དེའི་ཉེན་རྟོག་པས་མོའི་ནང་མི་ལ་འབྲེལ་བ་བྱས་ཏེ། ནང་མི་འགའ་ཁམས་སྡེ་དགེ་རུ་ཐུག་ཕྲད་དུ་སོང་ཡོད་ཀྱང་། ཡུལ་དེའི་ཉེན་རྟོག་པས་གཉེན་ཉེ་རྣམས་ལ་ཐུག་ཕྲད་བྱེད་མ་བཅུག་པ་མ་ཟད། མོས་ནག་ཉེས་ཚབ་ཆེན་བསགས་ཡོད་ཚུལ་སོགས་ཀྱིས་སྡིགས་ར་བསྐུལ་ཏེ། ཁོང་ཚོ་ཕྱིར་ལོག་བྱས་འདུག བཙུན་མ་བྱམས་པ་མཚོ་ནི་རང་ལོ་ ༢༨ ཡིན་པ་དང་། ད་ལྟ་བཙོན་ཁང་གང་དུ་ཡོད་མེད་དང་ཤི་གསོན་ཅི་ཡིན་སོགས་ཀྱི་གསལ་པོ་ཤེས་རྟོགས་ཐུབ་མི་འདུག

མོན་གྷོ་ས་གནས་གངས་ལྗོངས་རང་བདེན་རྩོད་ལེན་ཐུན་ཚོགས་ནས་བཏང་འབྱོར་བྱུང་།