ལུས་ངག་ཡིད་གསུམ་འཚེ་མེད་ཞི་བའི་ལྟ་སྤྱོད་དང་མཐུན་པ་ཞིག་བྱུང་ན། གོམ་པ་གཅིག་སྤོས་ཀྱང་རླབས་ཆེན་གྲུབ་འབྲས་དང་སྤྱི་མཐུན་བསོད་ནམས་གསོག་རྒྱུར་ཏན་ཏན་ཕན་གྱི་རེད། ཅེས་ཟམ་གདོང་རིན་པོ་ཆེ་མཆོག་གིས་གསུངས།
ཀིརྟི་བྱེས་པ་གྲྭ་ཚང་དང་ངྷ་ས་མདོ་སྨད་དབུས་ས་རྒྱུན་ལས་ཐུན་མོང་གི་གོ་སྒྲིག་འོག དེ་རིང་སྔ་དྲོའི་ཆུ་ཚོད་ ༡༠ པའི་སྟེང་བཞུགས་སྒར་ངྷ་ས་ཐེག་ཆེན་ཆོས་གླིང་གཙུག་ལག་ཁང་དུ། ཀིརྟི་དགོན་པའི་དགེ་འདུན་པ་ ༡༠༠ ཙམ་གྱིས་བཞུགས་སྒར་ངྷ་རམ་ས་ལ་རྒྱ་གར་རྒྱལ་ས་ལྡི་ལི་བར་ཞི་བའི་གོམ་བགྲོད་ཀྱི་ལས་འགུལ་ཞིག་མགོ་འཛུགས་བྱས་ཡོད་ཅིང་། ལས་འགུལ་དབུ་འཛུགས་ཀྱི་མཛད་སྒོའི་སྟེང་བཙན་བྱོལ་བོད་གཞུང་གི་བཀའ་བློན་ཁྲིི་པ་ཟམ་གདོང་རིན་པོ་ཆེ་དང་བཀའ་ཟུར་ཀིརྟི་རིན་པོི་རྣམ་གཉིས་ཀྱིས་གཙོས་པའི་སྤྱི་འཐུས་བགྲེས་གཞོན་དང་རྒྱུན་ལས། ངྷ་སར་གནས་སྡོད་བོད་རིགས་སེར་སྐྱ་མང་ཚོགས་དང་ཕྱི་རྒྱལ་བ་བཅས་མི་མང་སྟོང་ཕྲག་ལྷག་འདུ་འཛོམས་བྱུང་ཡོད། མཛད་སྒོ་མ་འཚོགས་གོང་ཐེག་ཆེན་ཆོས་གླིང་གཙུག་ལག་ཁང་དུ། ༧གོང་ས་མཆོག་དབུ་བཞུགས་ཐོག་ཉེ་ཆར་མདོ་སྨད་རྔ་པ་ཁུལ་དུ་བསད་རྨས་བྱུང་བ་རྣམས་ཀྱི་ཆེད་བསྔོ་བ་སྨོན་ལམ་རྒྱས་པ་ཞིག་གསུངས་ཡོད།
སྐབས་དེར་ཀིརྟི་བྱེས་པ་གྲྭ་ཚང་གིས་ཐེངས་འདིའི་ལས་འགུལ་གྱི་དགོས་འདུན་ཁག་སྒྲོག་སྦྱོང་བྱས་པའི་ནང་། ངྷ་སར་རྟེན་གཞི་བྱས་པའི་ཀིརྟི་བྱེས་པ་གྲྭ་ཚང་དང་རྡོར་གླིང་སུ་ཁེ་ཀིརྟི་དགོན་གཉིས་ཐུན་མོང་ཐོག སངས་རྒྱས་བསྟན་པ་དང་དེ་འཛིན་ཆོས་བྱེད་ཀྱི་དགེ་འདུན་པའི་སྡེ་དང་། ལྷག་པར་དུ་རྔ་པ་ཀིརྟི་དགོན་པ་ཆགས་འཇིག་གི་མཚམས་སུ་སྐྱོབ་ཆེད། ངྷ་ས་ནས་ལྡི་ལི་བར་སེར་སྦྲེངས་སྙན་སྐུལ་སྨོན་ལམ་བྱེད་ཀྱི་ཡོད་ལ། སེར་སྦྲེངས་སྙན་སྐུལ་གྱི་སྨོན་ལམ་དང་ཆབས་ཅིག་རྒྱལ་སྤྱི་དང་རྒྱ་གཞུང་བཅས་ལ་དགོས་འདུན་དོན་ཚན་གསུམ་འབོད་སྐུལ་ཞུ་བཞིན་ཡོད། ཅེས་བཀོད་འདུག
དགོས་འདུན་དོན་མཚན་གསུམ་ལས་དང་པོ། ཞི་བདེ་དང་དྲང་བདེན་ལ་དགའ་བའི་འཛམ་གླིང་མི་མང་དང་སྲིད་གཞུང་། གྲོས་ཚོགས། གཞུང་འབྲེལ་མིན་པའི་ཚོགས་པ་དང་། ཁྱད་པར་དུ། སྟོན་པ་དང་བསྟན་པ་གཅིག་པའི་འཛམ་གླིང་ཤར་ནུབ་ཀྱི་ནང་པ་ཡོངས་ཀྱིས་རྔ་པ་ཀིརྟི་དགོན་པ་རྒྱ་ནག་གི་དྲག་གནོན་འོག་མྱུར་དུ་སྐྱོབ་ཐབས་ཀྱི་ཛ་དྲག་ལས་འགུལ་ཞིག་སྤེལ་རྒྱུར་འབོད་སྐུལ་ཞུ་བཞིན་ཡོད། གཉིས་པ། ཀུན་གཟིགས་པཎ་ཆེན་ཆུང་སྲིད་རིན་པོ་ཆེས་གཙོས་རྒྱ་ནག་གི་བཙོན་འོག་ཏུ་ཡོད་པའི་བོད་མི་ཆབ་སྲིད་བཙོན་པ་དང་། རྔ་པ་ཀིརྟི་དགོན་གྱི་གྲྭ་བློ་བཟང་བརྩོན་འགྲུས་དང་དར་རྒྱས་སོགས་རྔ་པ་ཁུལ་གྱི་བོད་མི་བཙོན་པ་རྣམས་གང་མགྱོགས་ཀློད་གྲོལ་དགོས། གསུམ་པ། རྒྱ་གཞུང་གིས་བོད་མི་ཚོར་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་། ཆོས་དད་རང་དབང་ཐོབ་ཐང་ཡོངས་སུ་སྤྲད་དེ། རིས་མེད་དགོན་སྡེ་ཁག་གི་ཆོས་ལུགས་བྱེད་སྒོ་ཁག་གུ་ཡངས་དགོས། ཞེས་བསྟན་འདུག
མཇུག་ཏུ་བཀའ་ཁྲི་ཟམ་གདོང་རིན་པོ་ཆེ་མཆོག་གིས་གསུང་བཤད་གནང་དོན། ད་ལྟ་རྔ་པ་ཀིརྟི་དགོན་དུ་དགེ་འདུན་པ་བརྒྱ་ཕྲག་མང་པོ་འཛིན་བཟུང་བཙོན་འཇུག་བྱས་ཏེ། དགོན་པ་ཆགས་འཇིག་གི་གནས་སུ་ལྷུང་ཡོད་ལ། བོད་གཞུང་དང་གཞུང་འབྲེལ་མིན་པའི་ཚོགས་པ་ཁག མང་ཚོགས་བཅས་ཀྱིས་མཉམ་འབྲེལ་རྒྱལ་ཚོགས་གཙོས་པའི་རྒྱལ་སྤྱིའི་སྤྱི་ཚོགས་སུ་འབོད་སྐུལ་རིམ་པར་ཞུས་ཡོད་ཀྱང་དེ་ཙམ་གྱི་ནུས་པ་ཐོན་མེད། གལ་སྲིད་མུ་མཐུད་འདི་ལྟར་ཕྱིན་པ་ཡིན་ན། ཀིརྟི་དགོན་པ་གཙོས་པའི་བོད་ནང་གི་དགེ་འདུན་པའི་སྡེ་རྣམས་རྩ་མེད་དུ་འགྲོ་རྒྱུའི་ཉེན་ཁ་འདུག ཅེས་དང་།
དེ་རིང་ཀིརྟི་བྱེས་པ་གྲྭ་ཚང་གི་དགེ་འདུན་པ་བརྒྱ་སྐོར་ཞིག་གིས་ངྷ་ས་ནས་ལྡི་ལི་བར་གོམ་བགྲོད་གནང་གི་ཡོད་པ་རེད། ང་ཚོའི་འཚེ་མེད་ཞི་བའི་ལས་འགུལ་ལ་ནུས་པ་ཐོན་དང་མི་ཐོན། ལམ་འགྲོ་རྒྱུག་དང་མི་རྒྱུག་ཟེར་བ་དེ། ང་ཚོའི་ལུས་ངག་ཡིད་གསུམ་གྱི་འཚེ་བ་མེད་པའི་ལྟ་སྤྱོད་ཅི་ཙམ་གྱིས་བརྟན་པོ་ཡོད་མེད་ལ་རག་ལས་ཡོད། བོད་ཀྱི་དྲང་བདེན་འཐབ་རྩོད་དེ། མངོན་གསལ་དོད་པོས་འཚེ་བ་མེད་པ་བྱས་ཏེ་ལོ་བཞི་བཅུ་ཞེ་གྲངས་ཤིག་འགྲོ་བཞིན་ཡོད་ཀྱང་། ང་ཚོའི་བསམ་བློ་ནང་གི་འཚེ་བ་སྤངས་ཐུབ་ཀྱི་ཡོད་མེད་དེ། ད་ལྟ་ཡང་ཐེ་ཚོམ་ཀྱི་གནས་སྟངས་ཤིག་ཆགས་ཡོད། ཅེས་གསུངས་བྱུང་།
བཀའ་ཁྲི་མཆོག་གིས་མུ་མཐུད་དུ་ལས་འགུལ་དེ་འཚེ་བ་མེད་པ་ཡོང་དགོས་པའི་སྐོར་གསུངས་དོན། དེ་རིང་དམིགས་བསལ་རབ་བྱུང་དགེ་འདུན་གྱི་སྡེ་ཞིག་གིས་ལས་འགུལ་སྤེལ་གྱི་ཡོད་དུས། འཚེ་བ་མེད་པའི་ལས་འགུལ་དེ་དོན་དམ་གྱི་འཚེ་བ་མེད་པ་ཞིག་ཡོང་རྒྱུར་ཐབས་ཤེས་གནང་རོགས་ཞེས་འབོད་སྐུལ་ཞུ་ཡི་ཡོད། གལ་སྲིད། དོན་དམ་གྱི་འཚེ་བ་མེད་པ་ཞིག་བྱུང་ན། ལས་འགུལ་དེར་ནུས་པ་འཐོན་རྒྱུ་ནི་ཐེ་ཚོམ་མེད་པ་ཞིག་རེད། བཙན་གནོན་དང་སྡུག་སྦྱོང་མནར་གཅོད་གཏོང་མཁན་རྒྱ་ནག་གི་དབུ་ཁྲིད་ཚོ་དང་། ཁོང་ཚོའི་བཀོད་འདོམས་འོག་ཡོད་པའི་འཚེ་བའི་བྱ་སྤྱོད་སྤེལ་མཁན་གྱི་མི་དེ་ཚོ། རང་རྒྱལ་གཞན་ཕམ་གྱི་ཉོན་མོངས་གིས་གཞན་དབང་དུ་སོང་ཡོད་སྟབས། ང་ཚོས་མི་དེ་ཚོར་ཞེ་སྡང་དང་ཁོང་ཁྲོའི་རྣམ་པ་སྤུ་ཙམ་ཡང་མེད་ཐོག སྙིང་རྗེའི་སེམས་ཀྱིས་ཁོང་ཚོའི་བྱས་ཉེས་ལ་ངོ་རྒོལ་བྱ་ཐུབ་ན། ཏན་ཏན་ནུས་པ་ཞིག་འཐོན་ཡོང་གི་རེད། ཅེས་གསུངས་བྱུང་།
ཁོང་གིས་མུ་མཐུད་དེ་གསུངས་དོན། བར་ལམ་ཞིག་ནས་ཞི་བའི་གོམ་བགྲོད་བྱེད་མཁན་ཚང་མས། ༧གོང་ས་མཆོག་གིས་སྲོལ་གཏོད་གནང་བའི་བྱང་ཆུབ་སེམས་མཆོག་གི་སྨོན་ལམ་འདོན་རྒྱུའི་ལུགས་སྲོལ་ཞིག་ཆགས་ཡོད་ལ། དེར་ཁྱེད་ཚོས་ཀྱང་ཐུགས་ཞིབ་གནང་ཡོད་རྒྱུ་རེད། བྱང་ཆུབ་སེམས་མཆོག་འདོན་བཞིན་དུ་ཁོང་ཁྲོའི་བློ་སྐྱེ་པ་ཡིན་ན། ཁ་བཤད་ལག་ལེན་མ་ཐུབ་པ་ཞིག་རེད་ལ། ལྷག་པར་དུ་ཕྱིའི་རྣམ་འགྱུར་འཚེ་བ་ཡོད་མེད་གཉིས་ཀ་བྱུང་ན། དེ་ནི་ཡ་མཚན་གང་ཡང་ཆགས་ཀྱི་མེད་དུས། ལུས་ངག་ཡིད་གསུམ་འཚེ་མེད་ཞི་བའི་ལྟ་སྤྱོད་དང་མཐུན་པ་ཞིག་དགོས་པ་རེད། དེ་ལྟར་བྱུང་ན། གོམ་པ་གཅིག་སྤོས་ཀྱང་རླབས་ཆེན་གྲུབ་འབྲས་དང་སྤྱི་མཐུན་བསོད་ནམས་གསོག་རྒྱུར་ཕན་གྱི་རེད། ཅེས་གསུངས་སོང་།
མཇུག་ཏུ་འདི་གའི་གསར་འགོད་པས་ཞི་བའི་གོམ་བགྲོད་པ་གྲྭ་བློ་བཟང་ཡེ་ཤེས་ལགས་སུ་ལས་འགུལ་དེར་མཉམ་གནང་དོན་སྐོར་བཅར་འདྲི་ཞུས་པར་ཁོང་གིས། རྔ་པ་ཀིརྟི་དགོན་པ་གཙོས་པའི་ཡུལ་དེའི་མང་ཚོགས་རྣམས་ཛ་དྲག་གི་གནས་སྟངས་འོག་ལྷུང་ཡོད་པ་དང་། འདས་པའི་ཟླ་གཅིག་གི་ནང་རྒྱ་གཞུང་གི་སྲིད་བྱུས་སྔར་ལས་ཇེ་མཁྲེགས་སུ་སོང་སྟེ། ཉེ་ཆར་ཀིརྟི་དགོན་པའི་གྲྭ་བ་ ༣༠༠ ལྷག་གློ་བུར་དུ་འཛིན་བཟུང་བྱས་ཡོད་པ་རེད། ད་ལྟ་ཁོང་ཚོ་གང་དུ་བཅུག་ཡོད་མེད་དང་ཁོང་ཚོའི་གཟུགས་པོའི་གནས་སྟངས་ཇི་འདྲ་ཡིན་མིན་གང་ཡང་ཤེས་ཀྱི་མེད། དེ་བཞིན། རྒྱ་གཞུང་གིས་ཁྱབ་བསྒྲགས་དང་དངོས་ཡོད་གནས་སྟངས་གཉིས་རྩ་བ་ནས་མཐུན་གྱི་ཡོད་པ་མ་རེད། གནས་སྟངས་དེར་བལྟས་ན། དགོན་པ་རྩ་མེད་བཟོ་རྒྱུའི་སྲིད་བྱུས་ཤིག་ལག་བསྟར་བྱེད་ཀྱི་ཡོད་པ་གསལ་པོ་རེད། ང་ཚོས་རྒྱ་གཞུང་ལ་སྲིད་ཇུས་དེ་འཕྲལ་དུ་མཚམས་འཇོག་དགོས་པའི་བརྡ་ལན་གཏོང་གི་ཡོད་ལ། ཕྱོགས་གཞན་ཞིག་ནས། རྒྱལ་སྤྱིའི་ཚོགས་སྡེ་ཁག་དང་འཛམ་གླིང་གི་ནང་པ་ཡོངས་ལ། བོད་ནང་གི་ཉེན་ཁར་ཐུག་པའི་ཆོས་སྡེ་ཆེན་པོ་དེར། རྒྱབ་སྐྱོར་གནང་རྒྱུར་འབོད་སྐུལ་ཞུ་ཆེད་ཡིན། ཞེས་དང་། གོམ་བགྲོད་ནང་ཞུགས་མཁན་རྣམས་ངྷ་ས་དང་འབྲས་ལྗོངས་ཀྱི་དགེ་འདུན་པ་ཡིན་ལ། ང་ཚོ་ལྡི་ལིར་བསླེབ་མཚམས་ཟས་བཅད་ངོ་རྒོལ་སོགས་ལས་འགུལ་རིགས་མུ་མཐུད་སྤེལ་འཆར་ཡོད། ཅེས་བརྗོད་བྱུང་།
གསར་འགོད་པ། དཔལ་ལྡན།
ད་གོམ་བགྲོད་མི་དགོས་རང་ཤི་བརྒྱ་ནས་ཕན་འབྲས་ཐོན་པར་ཁལ་པོ་རེད།
ཚ་བ་བློ་བཟང་རྒྱལ་མཚན། ནོར་གླིང་།
རེད་རེད། རྡ་སར་སྐྱིད་སྡུག་མང་པོ་ཞིག་ཡོད་ནེ་རེད། ཁོང་ཚོས་ཆོལ་ཁ་དང་ལུང་ཚན་འཚོལ་གྱིན་གླིང་ག་གཏོང་རྒྱུ་མ་གཏོགས་ཤེས་ཀྱི་མ་རེད། ད་རེམ། རེམ། རེམ།
ཀིརྟིའི་གྲྭ་མང་ལ་གུས་བརྩི་དང་སྙིང་སྟོབས་ལ་ཡི་རངས་ཡོད།
ཁེ་འདོད་དང་གྲགས་འདོད་མིན་པར་་་་ཕན་ཐོགས་པའི་བསམ་པས་ཀུན་བསླངས་པ་ཡིན་ན་རྗེས་སུ་ཡི་རང་ཡོད། དེ་མིན་ནམ་རྒྱུན་ཁེ་འདོད་ཁོ་ན་དམིགས་སུ་བཟུང་འདུག་པ་མཐོང་གི་འདུག་པས་དེ་འདྲའི་ཡིད་ཆེས་མི་འདུག་་་་་བྱ་བ་ལམ་འགྲོ་ཡོང་བའི་སྨོན་འདུག་ཞུ།
ཁྱེད་ཚོའི་སྙིང་སྟོབས་དང་བློ་སྦོབས་ལ་ཡི་རངས་བྱེད་ཀྱིན་ཡོད་ལ
ཁྱེད་ཚོའི་རྒྱལ་ཞེན་དང་དཀའ་སྡུག་གདོང་ལེན་ལ་ཡ་མཚར་གྱིན་ཡོད
ཁྱེད་ཚོའི་ལས་འགུལ་འདིས་རྔ་བ་ཀིརྟི་དགོན་པ་ཁོ་ན་སྐྱོབ་ཆེད་མིན་པར་ང་ཚོའི་རྒྱལ་ཁབ་དང་མི་རིགས་ཀྱི་ཡ་ང་བའི་གནས་སྟངས་སྐྱོ་བོ་དེ་ཆེད་ཡིན་པ་ངས་ཚོར་ཡོད།
དེ་བས་ཁྱེད་ཚོ་ནི་ང་ཚོའི་རྒྱལ་ཁབ་འདིའི་ཞི་དམག་ཁག་ཡིན།
ང་ཚོ་འདི་ལྟར་འགུལ་ན་ངོ་མ་ཧྲ་གི
རླབས་ཆེན་གྱི་ལས་འགུལ་སྤེལ་མཁན་རྣམས་ལ་སྙིང་ནས་བསྟོད་ཅིང་ཐུགས་རྗེ་ཆེ་ཞུ་བ་ཆབ་གཅིག་གངས་ལྗོངས་མུན་པའི་གླིང་དུ་སྣང་གསལ་སྒྲོན་མེ་དང་འཚུང་པའི་མི་རིགས་ཀྱི་དཔའ་བོ་ཚོར་མཉམ་དུ། གུས་པ་སྐྱོད་མ་ཐོབ་ཡང་གུས་ཀྱིས་སྙིང་སྟོབས་དང་ལྡན་པའི་མི་རིགས་ཀྱི་དཔའ་རྒོད་རྣམས་དང་རྔ་བ་སྐྱ་སེར་མི་དམངས་ཡོངས་ལ་གདུང་སེམས་མཉམ་བསྐྱེད་ཀྱི་ཐོག་ཞི་བའི་ལྟ་གྲུབ་ཁོ་ནར་བཟུང་དྲང་བདེན་གནས་ལུགས་ཀྱི་བདེན་པའི་འཐབ་རྩོད་འདི་ལ་བསྔགས་བརྗོད་ཀྱི་མེ་ཏོག་གཏོར་བཞིན་ཡོད།
བོད་ཀྱི་དཔའ་བོ་རྣམས་ལ་གདུང་སེམས་མཉམ་བསྐྱེད་དང་། ཞི་བའི་ལས་འགུལ་བ་རྣམས་ལ་རྗེས་སུ་ཡི་རང་ཡོད།
ད་ལས་འགུལ་འདི་གཞི་རིམ་མི་མང་རང་གི་སྒང་ལ་སླེབས་ཀྱི་འདུག་པས་དགའ་སྤྲོ་སྐྱེས་ཀྱིན་འདུག་ལ། གཞུང་འབྲེལ་མིན་པའི་ཚོང་པའི་ཚོགས་པ་ཚོ་ལས་འདི་ལྟར་སྐྱིད་སྡུག་ལ་ལྟ་མཁན་ཚོས་འགོ་བརྩམ་དང་ན་རླབས་ཆེན་རེད་ལ། མདོ་སྨད་དབུས་རྒྱུན་ལས་ཚོགས་གཙོ་མཆོག་གིས་གསུངས་པ་ལྟར་ན། ལས་འགུལ་འདི་དང་འབྲེལ་བའི་ཞལ་འདེབས་བསྡུ་རྒྱུ་ཡིད་ལ་དྲན་མེད་ཟེར། དེས་ན་གཙུག་ལག་ཁང་གི་མདུན་ཐང་ན་གཞོན་ནུའི་ཟས་བཅད་ངོ་རྒོལ་དེར་ཞལ་འདེབས་ག་ཚོད་ཅིག་གལ་ཆེན་པོ་གནང་གི་མི་འདུག་གམ། འདི་དག་ཞབས་འདྲེན་རེད། གཞོན་ནུ་ལྷན་ཚོགས་ལ་ཚོགས་མི་སྟོང་ནས་ཁྲི་བརྒལ་བ་ཡོད་རབ་ཟེར་གྱི་འདུག ཡིན་ནའང་། ཟས་བཅད་ངོ་རྒོལ་ལ་ཞུགས་མཁན་ཁོང་ཚོའི་ཚོགས་མི་ག་ཚོད་ཡོང་གི་ཡོད་མེད་ཟས་བཅད་ལ་བཞུགས་མཁན་རྣམ་པ་ཚོས་ནང་ཕན་ཚུན་ལ་དྲི་བ་གཏོང་དགོས་པ་རེད། དྲི་བ་བཏང་ན་ཤེས་ཐུབ་ཀྱི་རེད། སྐབས་དེར་སེམས་ལ་འབབ་རྒྱུ་ཞིག་ཡོད་པ་རེད།
མ་གཞི་ནས་གཙུག་ལག་ཁང་དང་ཕོ་བྲང་གི་མདུན་དུ་ཟས་བཅད་ངོ་རྒོལ་གནང་བ་འདིའི་རྣམ་འགྱུར་ལ་ལྟོས་ན་ཡག་པོ་འདུག་གམ། རྡ་ཞོལ་ནས་གནང་ན་འགྲིག་གི་རེད་ལ། ཀང་ར་ནས་གནང་ན་འགྲིག་གི་རེད། ཡིན་གཅིག་མིན་གཅིག་ཕོ་བྲང་གི་མདུན་དུ་གནང་དགོས་པ་དེས་སུ་ལ་དྲན་སྐུལ་བྱེད་ཀྱི་ཡོད་པ་རེད་དམ། མཁྱེན་དགོས་ངེས་ཅན་གྱིས་མཁྱེན་གྱི་རེད་དམ། འདི་ནི་གཞོན་ལྷན་གྱིས་ཁྲལ་རྒྱག་ཐུབ་འདྲ་བོ། ལས་ཁུངས་དང་ཐག་ཉེ་ས། འདོམ་བདེ་ཤོས་ཤིག་དམིགས་པ་ལས་ལས་འགུལ་དེས་རྩ་དོན་ལ་གྲུབ་འབྲས་ཐོན་རྒྱུར་དེ་ཙམ་དགོངས་བཞེས་གནང་མེད་པར་མི་ཚང་མས་ཚོད་དཔག་བྱེད་ཀྱི་ཡོད་པ་རེད། གཞོན་ལྷན་གྱིས་གུར་ཕུབས། སྦྱར་བྱང་འདྲ་བྲིས། ཞལ་འདེབས་སློང་རྒྱུ་དེ་ལས་གཞན་ལས་དོན་གང་ཡང་ཡོད་པ་མ་རེད། དེ་ཚང་མས་ཐུགས་སྣང་གནང་ན་ཡག་པོ་རེད།
རྔ་བ་སྐྱ་སེར་མི་དམངས་ཡོངས་ལ་གདུང་སེམས་མཉམ་བསྐྱེད་ཀྱི་ཐོག་ཞི་བའི་ལྟ་གྲུབ་ཁོ་ནར་བཟུང་དྲང་བདེན་གནས་ལུགས་ཀྱི་བདེན་པའི་འཐབ་རྩོད་འདི་ལ་བསྔགས་བརྗོད་ཀྱི་མེ་ཏོག་གཏོར་བཞིན་ཡོད།
འདི་ལ་གདུང་སེམས་མཉམ་བསྐྱེད་ཀྱི་གོམ་བགྲོད་པ་ཡོངས་ལ་ཐུགས་རྗེས་ཆེ།
སེར་སྦྲེངས་སྙན་སྐུལ་གྱི་སྨོན་ལམ་་ཞེས་པའི་འཚེ་མེད་ཞི་བའི་གོམ་བགྲོད་ལས་འགུལ་གཞི་རྒྱ་ཆེ་བ་འདིས་རྔ་བའི་མི་མང་ལ་གདུང་སེམས་ཉམས་བསྐྱེད་གནང་ཡོད་པས་སྔགས་ཤིང་བཀུར་པའི་ཐུགས་རྗེ་ཆེ་ཞུ། མུ་མཐུད་དུ་འཛམ་གླིང་ཤར་ནུབ་ཀུན་གྱི་བོད་རིགས་ཡོངས་ནས་ལས་འགུར་འདྲ་མིན་སྤེལ་རོགས་ཞུ།
རྔ་བའི་མི་མང་ལ་གདུང་སེམས་ཉམས་བསྐྱེད་ཡོད།
རླབས་ཆེན་གྱི་ལས་འགུལ་དེར་སྙིང་ནས་བསྟོད་ཅིང་ཐུགས་རྗེ་ཆེ་ཞུ། འཚེ་མེད་ཞི་བའི་ལས་འགུལ་དེ་འདྲ་གན་དྷེ་སོགས་ཀྱིས་ཀྱང་སྤེལ་མྱོང་ཡོད་པ་མ་རེད། དུས་ཚོད་ཀྱི་སྔ་ཕྱི་ཙམ་མ་གཏོགས་ང་ཚོ་ལའང་རང་དབང་གི་ཉི་གཞོན་འཆར་ངེས་ཤིང་། བདེན་པའི་རྒྱལ་ཁ་ལེན་པར་ངེས།