སེར་སྦྲེངས་སྙན་སྐུལ་ཞི་བའི་གོམ་བགྲོད་ཅན་དྷི་གྷལ་ལ་འབྱོར་འདུག

མི་རིགས་ཞིག་གི་འཐབ་རྩོད་ཀྱི་ཆེད་དུ་ཚ་བའི་དུས་འདིར་གདུང་ལེན་བྱེད་མཁན་གྱི་དམར་སེར་ཞི་བའི་གོམ་བགྲོད་པ་རྣམས་གཙོ་བྱས་ལས་འགན་འདིར་ཞུགས་མཁན་གྱི་མདོ་སྨད་དབུས་སའི་རྒྱུན་སོགས་སེར་སྐྱ་ཡོངས་ལ་སྙིང་ཐག་པ་ནས་ཐུགས་རྗེ་ཆེ་ཞུ།

ལས་འགུལ་འདི་ལྟ་བུ་སྤེལ་བར་རྣམ་རྒྱུན་ཚོགས་པ་ཁ་ཤས་ཡོད་མུས་ཀྱང་ཁོ་ཚོས་མེག་ལོར་རླངས་འཁོར་བབས་ཚུགས་ནས་གཙུག་ལག་ཁང་བར་དུ་མར་མེ་ཁྲོམ་སྐོར་བྱེད་རྒྱུ་དེ་ཙམ་གལ་ཆེར་བརྩི་བ་རེད། དེ་རིང་ལས་འགུལ་དེ་ལྟ་བུ་ཞིག་སྤེལ་ནས་སང་ཉིན་རྒྱ་གར་གྱི་ཚགས་ཤོག་ཁ་ཤས་ནང་བཀོད་འདུག་ན་ཁོ་ཚོའི་དམིགས་ཡུལ་ཡང་འགྲུབ་པ་རེད། གང་ལྟར་ལས་འགུལ་གང་ཞིག་སྤེལ་ཏེ་ཚགས་ཤོག་གང་མང་ཞིག་ཏུ་བཀོད་ཐོན་བྱེད་རྒྱུ་དེ་ཙམ་རེད། དེས་ན་ཁོ་ཚོས་ལས་འགུལ་སྤེལ་སྟངས་མང་པོ་ཞིག་ཚོགས་པ་སོ་སོའི་མིང་གྲགས་དང་དཔལ་འབྱོར་མཁོ་སྒྲུབ་ཀྱི་ཆེད་དུ་རེད་དམ་ཡང་ན་དོན་ངོ་མའི་བོད་དོན་གྱི་ཆེད་དུ་རེད་ཅེས་དྲིས་ན་བཤད་དཀའ་བ ་ཞིག་ཏུ་མི་སྣང་ངམ།

༢༠༡༡་༤་༢༧ དགོང་དྲོའི་ཆུ་ཚོད་དྲུག་དང་ཕྱེད་ཀའི་ཐོག འབྲས་སྤུངས་སྒོ་མང་གྲྭ་ཚང་གི་གོ་སྒྲིག་འོག་འབྲས་སྤུངས་ཀྱི་དགེ་འདུན་པ་རྣམས་ཀྱིས་ཡ་ང་བའི་གདུག་རྩུབ་དང་དྲག་གནོན་མྱོང་བཞིན་པའི་རྔ་བ་ཀིརྟི་དགོན་པ་གཙོ་བྱས་པའི་རྔ་བའི་མི་དམངས་ལ་གདུང་སེམས་མཉམ་བསྐྱེད་དང་། ཁྲིམས་མེད་ལུགས་མེད་ཀྱིས་དམངས་ཚོགས་རྣམས་གསོད་རྡུང་མནར་གཅོད་དང་འཛིན་བཟུང་འཕྲོག་བཅོམ་བྱེད་བཞིན་པའི་རྒྱ་དམར་སྲིད་གཞུང་གི་བྱ་སྤྱོད་དེ་དག་འཕྲལ་མར་མཚམས་འཇོག་ཡོང་སླད་མར་མེ་ཁྲོམ་སྐོར་གཞི་རྒྱ་ཆེ་བ་ཞིག་གནང་ཡོད།

ཁྲོམ་སྐོར་དབུ་འཛུགས་སྐབས་སྒོ་མང་དགེ་བསྐོས་བློ་བཟང་དགེ་ལེགས་ལགས་ཀྱིས་གསུང་རྒྱུར། རྒྱ་ནག་དམར་བོའི་སྲིད་གཞུང་གིས་བོད་ནང་ལ་དྲག་གནོན་དང་འགྲོ་བ་མིའི་ཐོབ་ཐང་རྡོག་རོལ་ཏུ་གཏོང་བའི་རྣམ་པ་ཚབས་ཇེ་ཆེ་ནས་ཇེ་ཆེར་གྱུར་ཡོད་ཅིང་། ལྷག་དོན་ཉེ་སྔོན་ནས་བཟུང་རྔ་བ་ཀིརྟི་དགོན་པའི་སྟེང་ཧ་ཅང་ཡ་ང་བའི་གདུག་རྩུབ་དང་དྲག་སྤྱོད་སྤེལ་ཡོད། ད་ལྟ་ཀིརྟི་དགོན་པ་ནི་བཙོན་ཁང་ཞིག་ལས་ཀྱང་སྡུག་པའི་ཚད་དུ་ལྷུང་ཡོད། དགོན་པ་ལྕུགས་དྲས་བསྐོར་ཞིང་དེའི་མཐའ་དྲག་དམག་གིས་བསྐོར་འདུག ནང་གི་མི་ཕྱི་ལ་མི་གཏོང་ཞིང་ཕྱི་ལོགས་ཀྱི་མི་ནང་ལ་མི་གཏོང་བའི་མི་ཚད། ཟ་མ་སྐྱེལ་འདྲེན་གྱི་ལམ་བཅད་དེ་དགེ་འདུན་པ་ཚོ་ལྟོགས་གྲིར་ཐེབས་སུ་འཇུག་གི་ཡོད། སྤྱིར་བཙོན་ཁང་ཞིག་ཡིན་ན་ཡང་ཐུན་གསུམ་གྱི་ཟས་དུས་ཚོད་ལྟར་རེག་གི་ཡོད། ཅེས་དང་། ད་ལྟ་ང་ཚོའི་ངོས་ནས་གཞུང་དང་ཚོགས་པ་ཞིག་ལ་བརྟེན་པ་ཙམ་མ་ཡིན་པར། མི་རང་རང་ངོས་ནས་འགན་རེ་བླངས་ཏེ་ཐབས་ཤེས་ཅི་ཡོད་དང་ནུས་ཤུགས་གང་ཡོད་འདོན་དགོས། ང་ཚོས་རྔ་བ་མི་དམངས་ལ་སྐྱིད་སྡུག་མཉམ་མྱོང་དང་གདུང་སེམས་མཉམ་བསྐྱེད་བྱེད་ཀྱི་ཡོད་ཅིང་། དེ་དང་ཆབས་གཅིག་རྒྱ་དམར་སྲིད་གཞུང་ལ་དྲག་སྤྱོད་གདུག་རྩུབ་ཀྱི་བྱ་སྤྱོད་དེ་དག་མྱུར་དུ་མཚམས་འཇོག་བྱེད་རྒྱུའི་འབོད་པ་བྱེད་རྒྱུ་མ་ཟད། མཉམ་འབྲེལ་རྒྱལ་ཚོགས་གཙོས་པའི་འཛམ་གླིང་གི་རྒྱལ་ཁབ་ཁག་གི་སྲིད་གཞུང་དང་ཚོགས་པ་ཁག དེ་བཞིན་མི་དམངས་བཅས་ལ་རྒྱ་དམར་གཞུང་ལ་གནོན་ཤུགས་སོགས་སྤྲད་དེ་རྔ་བའི་སྟེང་བཀོལ་བཞིན་པའི་དྲག་སྤྱོད་པའི་བྱ་སྤྱོད་དེ་མྱུར་དུ་མཚམས་འཇོག་བྱེད་དུ་འཇུག་རྒྱུ་དང་། བདེན་པ་བདེན་དྲང་གི་ང་ཚོའི་ཆབ་སྲིད་ཀྱི་ལས་དོན་ལ་རྒྱབ་རོགས་དང་གནད་དོན་ལ་འགན་ལེན་གནང་རྒྱུའི་རེ་འབོད་ཞུ་བཞིན་ཡོད། ཁོང་གིས་མུ་མཐུད་ནས་གསུངས་དོན། ང་ཚོི་བོད་མི་རིགས་ཀྱི་འཐབ་རྩོད་ནི་བདེན་པ་གཞི་ལ་བཞག་པའི་འཐབ་རྩོད་ཅིག་ཡིན་ཞིང་། ཕན་ཚུན་གཉིས་སྨན་གྱི་ལམ་དུ་ཕྱོགས་པ་ཞིག་ཡིན། བདེན་པ་ནི་དུས་ནམ་ཡང་མེ་ལྕེ་བཞིན་མཆེད་ངེས་ཡིན།

དེ་རྗེས་མོན་གྷོ་ས་གནས་རང་བདེན་ཚོགས་གཙོ་མཆོག་གིས་གསུངས་དོན། ད་ལྔ་རྔ་བ་ཀིརྟི་དགོན་པ་ཆེས་ཡ་ང་བའི་གནས་སྟངས་འོག་ཡོད་ཅིང་། རང་དབང་ལུང་བར་ཡོད་པའི་ང་ཚོའི་ངོས་ནས་ལུས་ཀྱིས་མ་མྱོང་རུང་སེམས་ཀྱིས་ཁོང་ཚོ་དང་མཉམ་དུ་མྱོང་བཞིན་ཡོད། ད་ལྟ་ང་ཚོའི་ལས་འགུལ་འདི་ཙམ་གྱིས་ཆོག་པ་ཞིག་གཏན་ནས་མ་ཡིན་པར། གདན་ས་ཁག་གི་མཁན་པོ་རྣམ་པ་གཙོ་བྱས་པའི་རང་ཅག་ཡོངས་ཀྱིས་ས་གནས་གང་ས་དང་གྲོང་ཁྱེར་ཆེ་ཁག་རྣམས་སུ་ལས་འགུལ་རྒྱ་ཆེན་པོ་སྤེལ་དགོས་ཅེས་སོགས་གསུངས།

མཇུག་ཏུ་སྒོ་མང་ཕྱག་མཛོད་ཚེ་དབང་འཕྲིན་ལས་ལགས་ཀྱིས་མཇུག་མཐའི་གསུང་བཤད་གནང་སྟེ་མར་མེ་ཁྲོམ་སྐོར་དངོས་སུ་མགོ་འཛུགས་གནང་སོང་།

      མ་རམེ་ཁྲོམ་སྐོར་དང་མ་ནི་གསོག་བསྒྲུབས་བྱེད་དེ་ལོ་ངོ་ལྔ་ཅུ་ཙམ་ཕྱིན་སོང་་་་་ཨོ་་་་ད་དུང་མུ་ཐུན་རྒྱུ་ཡིན་པ་འདྲ།

ཚ་བ་བློ་བཟང་རྒྱལ་མཚན།     ནོར་གླིང་།

ཕྱི་ལོ་ ༢༠༡༡ ལོའི་ཟླ་ ༠༤ ཚེས་ ༢༦ ཕྱི་དྲོ་བདེ་སྐྱིད་གླིང་མདོ་སྨད་ས་གནས་རྒྱུན་ལས་ཀྱི་བཀོད་སྒྲིག་འོག་ཆོལ་གསུམ་མི་མང་༤༠༠ ཙམ་གྱིས་ཕྱི་དྲོ་ཆུ་ཚོད་ ༥-༦ བར་མ་ཎི་གསོག་བསྒྲུབས་ཀྱིས་སེར་སྦྲེང་མཆོད་འབུལ་ལ་རྒྱབ་སྐྱོར་གནང་འདུག
ཕྱི་ལོ་ ༢༠༡༡ ལོའི་ཟླ་ ༠༤ ཚེས་ ༢༦ ཕྱི་དྲོ་ཆུ་ཚོད་༦།༣༠ སྟེང་བཞུགས་སྒར་མེག་ལོར་ནས་གཞུང་འབྲེལ་མིན་པའི་ཚོགས་པ་ཁག་བཅུ་གཅིག་ནས་མར་མེ་ཁྲོམ་སྐོར་གཞི་རྒྱ་ཆེ་བ་ཞིག་སྤེལ་འདུག སྐབས་དེར་སྐུ་མགྲོན་གཙོ་བོ་ཨོ་སི་ཁྲོ་ལེ་ཡའི་གྲོས་ཚོགས་ཀྱི་ཚོགས་གཙོ་མཆོག་དང་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་གཙོས་སྤྱི་འཐུས་རྒྱུན་ལས་ཁག་ཅིག་དང་སེར་སྐྱ་མི་མང་སུམ་བརྒྱ་ལྷག་མཉམ་ཞུགས་གནང་འདུག
ཕྱི་ལོ་ ༢༠༡༡ ལོའི་ཟླ་ ༠༤ ཚེས་ ༢༥ ཉིན་གྱི་ཕྱི་དྲོར་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དང་། རྒྱུད་སྟོད། སྒྲོལ་མ་གླིང་བཅས་ཀྱི་བཀོད་སྒྲིག་འོག་སེར་སྐྱ་མི་མང་ཆིག་སྟོང་མ་ཟིན་ཙམ་གྱིས་ནོར་གླིང་ནས་རྒྱུད་སྟོད་བར་མར་མེ་ཁྲོམ་སྐོར་གཞི་རྒྱ་ཆེ་བ་ཞིག་གནང་འདུག་ཅིང་། སྐུ་མགྲོན་གཙོ་བོ་བཀའ་བློན་ཁྲི་ཟུར་བསོད་ནམས་སྟོབས་རྒྱལ་མཆོག་གིས་གསུང་བཤད་དང་བཅས་མར་མེ་ཁྲོམ་སྐོར་མཇུག་སྒྲིལ་ཡོད་འདུག

འདི་གར་ཁུངས་ལྡན་གནས་ཚུལ་འབྱོར་གསལ་ལྟར་ན། ཕྱི་ལོ་ ༢༠༡༡ ལོའི་ཟླ་ ༠༤ ཚེས་ ༢༦ ཉིན། མདོ་སྨད་རྨ་ཆུའི་ཁོངས་གཏོགས་ཆུ་ཁ་མའི་རྒན་པོ་སྤྱི་མི་སྐོར་ཞིག་མཉམ་འཛོམས་ཀྱིས་ལོ་རེའི་འཆར་ཅན་གྱི་རྟ་རྒྱུག་འགྲན་བསྡུར་ཞིག་ཡོད་པའི་སྐོར་ལ་གྲོས་ཁ་བྱས་ཡོད་པ་དང་། སྐབས་དེར་མི་སྐོར་ཞིག་གིས་ཁྱིམ་མཚེས་ཀིརྟི་སྡེ་དགོན་གཉིས་ཀར་བོད་བསྟན་སྲིད་ཀྱི་ཆེད་དུ་ལས་འགུལ་སྤེལ་ཏེ་ཛ་དྲག་གི་གནས་སྟངས་ཆགས་ཡོད་པས། ཁོང་ཚོར་གདུང་སེམས་མཉམ་བསྐྱེད་ཀྱི་ཆེད་དུ་སྤྲོ་སྐྱིད་ཀྱི་རྣམ་པའི་རྟ་རྒྱུག་བྱེད་རྒྱུ་མིན་པར་ཐག་བཅོད་བྱས་ཡོད་པ་དང་། ཕྱི་ཉིན་ཞོགས་པར་སྲང་ལམ་དང་རྩིག་གྱང་ངོས་སུ་ད་ལོ་སུས་རྟ་རྒྱུག་བཀོད་སྒྲིག་དང་དེར་འཛུལ་ཞུགས་བྱས་ན་ངོ་རྒོལ་ཡོད་ཅེས་སྦྱར་ཡིག་འགྲེམ་སྤེལ་བྱས་འདུག
མདོ་སྨད་དབུས་རྒྱུན་ཚོགས་གཞོན་མགོན་པོ་དོན་འགྲུབ།
གནས་ཚུལ་མཁོ་གཏོང་བ།