དབའ་བོའི་ཉིན་མོ་རེད་ཟེར།

དེས་ན་ང་རང་གིས་ནམ་ཡང་ཕྱོགས་ཞེན་བྱེད་ཀྱི་མེད་ལ། ཉེ་དུས་རང་དུ་རང་ལུས་མེ་རུ་སྒྲོན་པའི་རྒྱལ་གཅེས་པ་གྲྭ་ཕུན་ཚོགས་ལགས་ཀྱི་སྐུ་དཔར་ཁོང་དང་མཉམ་དུ་བཞག་ནས་ཁོ་དང་མཉམ་དུ་གླེང་ན་དབའ་བོའི་རྗེས་དྲན་དུ་གྱུར་འགྲོ་བ་ཡིན་ནམ། དེ་མིན་ན་དབའ་བོ་ཟེར་བ་དེ་ནི་རང་གི་ཚེ་སྲོག་ལེགས་སྐྱེས་སུ་ཕུལ་མཁན་ཁོ་ན་ཞིག་ལ་ངེས་འཛིན་བྱེད་དགོས་པ་ཡིན་ནམ་ཅི། དུས་དེ་རིང་བོད་དུ་བཙན་གནོན་འོག་དུ་ཤི་གསོན་གྱི་ངོ་བ་རྩ་ནས་ཡིད་ལ་ཡང་དྲན་དཀའ་བའི་ཆབ་སྲིད་བཙོན་པ་དེ་དག་གང་རེད་དམ། དེ་དག་ནི་དབའ་བོ་ཡིན་ནམ་ཅི། ང་ཚོས་དེ་དག་གི་ཆེད་དུ་སྐད་འབོད་བྱེད་དགོས་པ་ཡིན་ནམ། གླེང་དགོས་པ་ཡིན་ནམ། ཁྲོག་སྒྲོག་ཤུགས་ཆེན་བྱེད་དགོས་སམ། ཡང་ན། ཁོང་ཚོ་རྒྱ་ནག་གི་འདོད་བློ་འཁང་རེག་བར་དུ་རྩེད་ཆོས་སུ་བཙོན་དུ་བསྡད་ན་འགྲིག་གི་ཡོད་པ་རེད་དམ། ཁོང་ཚོས་གཅེས་པའི་སྲོག་དེ་ཡང་འདས་ཟིན་པའི་བོད་ཀྱི་རྒྱལ་གཅེས་པ་དེ་དག་དང་མ་འདྲ་དོན་གང་ཡིན་ནམ། གསོན་ཡོད་པའི་རེད་དམ། བོད་དོན་དུ་ད་དུང་ཡང་མནར་གཅོད་མྱོང་བཞིན་ཡོད་པས་ཡིན་ནམ།

དབའ་བོའི་ཉིན་མོ་རེད་ཟེར་ནས་གླེང་མཁན་དེ་དག་གིས་དབའ་བོ་ཟེར་བ་ནི། དངོས་ནས་གང་ཞིག་གི་ཐད་ནས་ངེས་འཛིན་བྱེད་ཀྱི་ཡོད་པ་ཡིན་ནམ། རང་སྲོག་ལ་བརྩེ་བ་མེད་མཁན་གྱི་མི་ཞིག་འཛམ་གླིང་འདིར་ག་ཚོད་ཡོད་སྲིད་དམ། དངོས་ནས་ཉུང་ངུ་ལས་མེད། བརྩེ་བ་ལས་བརྒལ་ཐུབ་པའི་མི་དེ་དག་ནི་དབའ་བོར་ངེས་འཛིན་བྱས་ན་འགྲིག་གི་རེད་དམ། མདོར་བསྡུས་ན་ངས་ཞིབ་དུ་བསམ་བློ་བཏང་བ་དེར་ནོར་འཁྲུལ་ཤོར་མེད་པ་ཡིན་ན། བྱ་དངོས་སྤྱོར་གསུམ་གང་ཞིག་གི་ཆེད་དུ་རང་སྲོག་བློས་གཏོང་བྱེད་པ་དེ་ནི་དངོས་ནས་ཐབས་ཤེས་ཡག་ཤོས་དེ་གཏན་ནས་མིན་ལ། དེ་ཡི་གྲུབ་འབྲས་ཀྱང་དེ་འདྲའི་བཟང་བོ་ཞིག་ཐོན་ཁག་པོ་ཡིན། དེ་ལས་མི་གཅིག་ཤི་བ་ལས། མི་གཅིག་གསོན་བསྡད་པ་ཡིན་ན། ད་གཟོད་རིན་ཐང་ཡོད་ལ། བྱེད་སྟངས་ཀྱང་མང་། ལམ་ཁ་ཡང་མང་། གོ་སྐབས་ཀྱང་མང་། ལས་དོན་ཡང་མང་། རེད་དེ། ནམ་ཡང་བསམ་རྒྱུ་དྲན་རྒྱུ་མེད་པའི་རོ་སྐོག་སྐམ་པོ་སྲུང་མཁན་གྱི་ང་འདྲ་བ་དག་ནི་ཤི་གསོན་གང་ལ་ཡང་ཁྱད་པར་གཏན་ནས་མེད་ལ། མི་རིགས་ཀྱི་དབའ་བོ་ཟེར་ནས་གླེང་ཐུབ་ཀྱང་མེད་ལ། དབའ་བོ་ཟེར་བའི་སྐོར་ལ་སྐད་ཆ་བཤད་པའི་ལྕེ་དེ་ཡང་ཚད་ལྡན་ཞིག་ནམ་ཡང་མེད་པ་ཡིན།