ནང་མིའི་སེམས་འཁྲལ་བྱེད་ཀྱི་འདུག

རྒྱ་ནག་གཞུང་གིས་རྔ་པ་ཀིརྟི་དགོན་པར་སློབ་གཉེར་བྱེད་ཀྱིན་པའི་རྨ་ལྷོ་རྩེ་ཁོག་རོང་བོ་སྡེ་བའི་དགེ་འདུན་པ་ལྔ་འཛིན་བཟུང་བྱས་ཡོད་སྟབས། ད་ཆར་ནང་མི་ཚོས་སེམས་འཁྲལ་ཧ་ཅང་ཆེན་པོ་བྱེད་ཀྱིན་ཡོད་འདུག  

དེ་རིང་ཕྱི་ཚེས་ ༢༩ ཉིན་གྱི་ཕྱི་དྲོ་ལྷོ་ཕྱོགས་དགའ་ལྡན་དགོན་པའི་ཀླུ་འབུམ་ཁང་ཚན་གྱི་གྲྭ་ཆོས་འཕེལ་ལགས་ཀྱིས་འདི་གར་གནས་ཚུལ་མཁོ་སྤྲོད་བྱས་པ་ལྟར་ན། ཕྱི་ཟླ་ ༤ ཚེས་ ༢༡ རྔ་པ་ཀིརྟི་དགོན་པའི་ནང་སློབ་གཉེར་བྱས་ཏེ་ལོ་ ༡༠ འགྲོ་བཞིན་པའི་རྨ་ལྷོ་རྩེ་ཁོག་རྫོང་ཉིན་ཕྱུགས་ཞང་རོང་བོ་སྡེ་བའི་རང་ལོ་ ༤༠ ཡས་མས་ཡིན་པའི་གྲྭ་སྙན་གྲགས་དང་རང་ལོ་ ༡༧ ཡིན་པའི་ཁོང་གི་སྤུན་ཆུང་བ་ལྷུན་འགྲུབ། གཞན་རང་ལོ་ ༢༠ ཡིན་པའི་གྲྭ་བློ་བཟང་དཔལ་ལྡན། རང་ལོ་ ༡༥ ཡིན་པའི་གྲྭ་བློ་བཟང་རྒྱ་མཚོ། རང་ལོ་ ༡༣ ཡིན་པའི་བློ་བཟང་ཞི་བ་ལྷ་བཅས་ཀྱང་འཛིན་བཟུང་བྱས་ཡོད་པ་རེད་ཟེར།   

གནས་ཚུལ་མཁོ་སྤྲོད་པའི་བརྗོད་དོན་ལྟར་ན། རྒྱ་ནག་གཞུང་གིས་ཐེངས་འདིར་འཛིན་བཟུང་བྱས་པའི་གྲྭ་བ་དེ་དག་གྲྭ་སྙན་གྲགས་ལགས་ཀྱི་སྤུན་དང་ཚ་བོ་རྐྱང་ཡིན་པ་དང་། ཉེ་ཆར་ཁོང་ཚོའི་ནང་མིས་རྔ་པ་ཀིརྟི་དགོན་པར་རྒྱ་གཞུང་གིས་དམ་དྲག་བྱེད་ཀྱིན་པའི་སྐོར་ཤེས་རྟོགས་བྱུང་སྟེ། ནང་མི་ཁག་ཅིག་རྔ་པ་ཀིརྟི་དགོན་པར་ཁོང་ཚོའི་གནས་སྟངས་གང་འདྲ་ཡིན་མིན་བལྟ་རུ་འགྲོ་སྐབས་འཛིན་བཟུང་བྱས་པའི་གནས་ཚུལ་ཤེས་རྟོགས་བྱུང་འདུག་ལ། སྐབས་དེར་ཁོང་ཚོའི་ནང་མིས་དགོན་པའི་ལས་སྣེ་དང་གྲྭ་བ་ཚོར་དྲིས་སྐབས། དེར་ཡོད་དགོན་པའི་དགེ་འདུན་པ་ཚོར་ཡང་ཞིབ་ཕྲའི་གནས་ཚུལ་ཅི་ཡང་བཤད་རྒྱུ་མེད་སྟབས། ནང་མི་ཚོ་ཕྱིར་རང་ཡུལ་དུ་ལོག་ཡོད་འདུག  དུས་དེ་ནས་བཟུང་ད་ལྟའི་བར་ནང་མི་ཚོས་རྩད་གཅོད་ཇི་ལྟར་བྱས་ཀྱང་། རྒྱ་ནག་གཞུང་གིས་ཁོང་ཚོ་ཅིའི་ཕྱིར་བཙོན་འཇུག་བྱས་པ་དང་གང་དུ་ཡོད་མེད་སོགས་ཀྱི་གནས་སྟངས་གང་ཡང་གསལ་བཤད་བྱས་མེད་སྟབས། ནང་མི་ཚོས་ཁོང་ཚོའི་ཤི་གསོན་གྱི་གནས་སྟངས་ལ་སེམས་ཁྲལ་ཆེན་པོ་བྱེད་ཀྱིན་ཡོད་འདུག  

གསར་འགོད་པ། དོན་གོ