ཁྲག་གི་ལྡེབས་རིས་ཅན་གྱི་བཙོན་ཁང་ཞིག

ས་བྱི་ཞི་རྒོལ་ཆེན་མོའི་སྐབས་སུ་རྒྱ་ནག་གཞུང་གིས་བོད་མི་མང་པོ་ཞིག་བཙོན་འཇུག་ཁྲིམས་ཐག་བཅད་དེ་སྡུག་སྦྱོང་མནར་གཅོད་ཚད་ལས་བརྒལ་བ་བཏང་ཡོད་ཅིང་། དེ་དག་ལས་ཁག་ཅིག་བཙོན་གྲོལ་ཙམ་ཐོབ་ཡོད་ཀྱང་། དུས་རྟག་ཏུ་གཞུང་གི་ལྟ་རྟོག་འོག་ལས་ཁུངས་ཁག་གི་གཡོག་པོར་བཀོལ་བ་སོགས་བཟང་བཙོན་ལྟ་བུའི་འོག་བཞག་ཡོད་འདུག

དཀར་མཛེས་ལྷོ་པ་ཞང་རྫོང་ནང་གྲོང་ཚོའི་ཟླ་བ་ཚེ་རིང་ལགས་ཀྱང་གནས་སྟངས་དེའི་འོག་ད་ལྟའི་བར་སྡུག་སྦྱོང་རབ་དང་རིམ་པ་མྱོང་མཁན་ཞིག་ཡིན་ཞིང་། ཁོང་ཟླ་འགའི་རིང་ཕ་ཡུལ་ལ་ཁ་བྲལ་ཏེ་རི་བྱོལ་བྱས་མཐར་རྒྱ་གར་ནང་སྐྱབས་བཅོལ་དུ་འབྱོར་ཏེ་ད་ཆར་དབུས་སྣེ་ལེན་ཁང་དུ་འབྱོར་འདུག

ཉེ་ཆར་འདི་གའི་གསར་འགོད་པ་དབུས་སྣེ་ལེན་ཁང་ལ་ཆེད་དུ་བཅར་ཏེ། རྒྱའི་བཙོན་འོག་ནས་སྐྱུ་གཡའ་བའི་གནས་ཚུལ་མང་པོ་མ་མཐོང་ཐོས་ཡོད་པའི་ཟླ་བ་ཚེ་རིང་ལགས་སུ་བཅར་འདྲི་ཞུས་ཡོད། ཁོང་གིས་ཐོག་མར་སྐབས་དེའི་སྐད་འབོད་ཀྱི་དམིགས་ཡུལ་ངོ་སྤྲོད་དང་འབྲེལ་བརྗོད་དོན། ང་རང་ལ་མཚོན་ན་སྔོན་མ་ནས་རྒྱ་ནག་གཞུང་གིས་བོད་མི་ཚོར་མཐོང་ཆུང་དང་དམའ་འབེབས། བརྙས་བཅོས་རབ་དང་རིམ་པར་བྱས་ཏེ་ཆོས་ལུགས་དད་མོས་དང་སྨྲ་བརྗོད་རང་དབང་སྤྲོད་ཀྱི་མེད་པར་མ་ཟད། ལྷག་པར་དུ་༸པཎ་ཆེན་ཆུང་སྲིད་རིན་པོ་ཆེ་བཙོན་འཇུག་བྱས་ཏེ་ལོ་མང་རིང་གར་ཡོད་ཅི་བྱུང་གི་གནས་ཚུལ་གཅིག་ཀྱང་བོད་མི་ཚོས་ཤེས་རྟོགས་ཐུབ་ཀྱི་མེད་པའི་གནས་སྟངས་ལ་གཞིགས་ཏེ། ང་ཚོ་བོད་པའི་མི་རབས་གསར་བའི་མངོན་འདོད་གང་ཡིན་རྒྱ་ནག་གཞུང་ལ་རང་ངོས་ནས་བརྡ་ལན་སྤྲོད་རྒྱུའི་གྲ་སྒྲིག་བྱས་ཏེ། ༢༠༠༩ ལོའི་ཕྱི་ཟླ་ ༣ པའི་ཚེས་ ༡༤ ཉིན་ངས་དུས་ཡུན་རིང་བོར་སེམས་ལ་ཉར་བའི་ན་ཟུག་ཕྱིར་སྒྲོག་ཕྱིར་རྫོང་དང་སྤྱི་ལེ་ ༡༢  ཡོད་པའི་དཀར་མཛེས་རྫོང་གི་བཞི་མདོར་སོང་སྟེ་རླུང་རྟ་གཏོར་བཞིན། “ བོད་ལ་འགྲོ་བ་མིའི་ཐོབ་ཐང་དགོས། བོད་ལ་རང་དབང་དགོས། ༸རྒྱལ་བ་རིན་པོ་ཆེ་བོད་ལ་ཕེབས་དགོས། ༸པཎ་ཆེན་ཆུང་སྲིད་མཆོག་ཀློད་གྲོལ་གཏོང་དགོས། ” ཞེས་སྐད་འབོད་བརྒྱབ་པ་ཡིན།

སྐབས་དེར་སྐར་མ་ཁ་ཤས་ལས་མ་འགར་བར་དམག་མི་མང་པོ་ཡོང་སྟེ་ང་ལ་གཅར་རྡུང་གཏོང་བཞིན་རླངས་འཁོར་ཞིག་ཏུ་བཅུག་སྟེ། དཀར་མཛེས་རྫོང་ཐོག་ཏུ་ཡོད་པའི་བཙོན་ཁང་གསར་བའི་ཁང་མིག་ཆུང་ཆུང་ཞིག་ཏུ་བཅུག་སོང་། ཁང་པ་དེའི་ནང་སྐྱ་སེར་གཉིས་ཀྱི་གྱོན་ཆས་འདྲ་མིན་གང་སར་གཡུགས་འདུག་ལ། ཉེ་འགྲམ་གྱི་ཅོག་ཙེ་ཞིག་གི་སྟེང་ཉེས་རྡུང་གཏོང་བྱེད་ཀྱི་ལག་ཆ་འགའ་བཞག་འདུག ཁང་པའི་ཐང་དང་གྱང་ངོས་གང་སར་ཁྲག་འགོས་ཏེ་འཇིགས་སྣང་ཆེན་པོ་ཞིག་འདུག ང་ཁང་པ་དེའི་ནང་ཁྲིད་རྗེས། ཐོག་མར་ང་ལ་ངན་སྐུལ་བྱེད་མཁན་ཡོད་མེད་དང་། སྐད་འབོད་རྒྱག་དགོས་པའི་རྒྱུ་མཚན་ཅི་ཡིན་ཚ་འདྲི་བྱས་སོང་། ང་ལ་རྒྱབ་ཏུ་སྐུལ་སློང་བྱེད་མཁན་སུ་གང་ཡང་མེད། ང་རང་ངོས་ནས་ལས་འགུལ་སྤེལ་བ་ཡིན་ཞེས་བཤད་སྐབས། དམག་མི་ལྔས་ངའི་མགོ་དང་རྐང་ལག་ལ་དབྱུག་པས་རྒྱག་བཞིན་ཁྱོད་ཀྱི་རྒྱབ་ཏུ་ངན་སྐུལ་བ་སུ་ཡིན་ང་ཚོས་འཚོལ་ཆོག་ཟེར། གློག་རྒྱུགས་དང་སྐེ་ཐག་པས་བསྡམས་པ་སོགས་ལག་ཆ་འདྲ་མིན་བེད་སྤྱོད་བཏང་སྟེ། ཉིན་དེར་ང་ཐེངས་གསུམ་ལ་དྲན་པ་ཐོར་སོང་། ཁོང་ཚོས་ང་ཤི་མིན་རོ་མིན་ཞིག་ཏུ་བཏང་རྗེས་ཁྲིམས་ཁང་དེའི་ཁང་མིག་ ༨ པའི་ནང་གཡུགས་བྱུང་། ཞེས་བརྗོད་བྱུང་།

ཁོང་གིས་མུ་མཐུད་དུ་བརྗོད་དོན། སྐབས་དེར་ཁང་མིག་དེའི་ནང་རང་ལོ་ ༡༦ ཡིན་པའི་རྗེ་ཟུང་ནང་གི་རིན་ཆེན་ཕུན་ཚོགས་དང་། རང་ལོ་ ༡༧ ཡིན་པའི་ན་གཞོན་གཅིག རང་ལོ་ ༡༩ ཡིན་པའི་ཉག་རོང་གི་ཆོས་ཉིད་རྒྱ་མཚོ་བཅས་སློབ་མ་གསུམ་དང་། གཞན་བེ་རི་དགོན་པའི་གྲྭ་ཉི་ཟླ་དང་རྗེ་ཟུང་ནང་གི་ཡེ་ཤེས་དར་རྒྱས།  དར་རྒྱས་དགོན་པའི་གྲྭ་ཐུབ་བསྟན། རྗེ་ཟུང་ནང་གི་ཡེ་ཤེས་དཔལ་ལྡན། བཀྲ་ཤིས་རྡོ་རྗེ། ཙ་ལེ་ཐུབ་བསྟན་ཕུན་ཚོགས། བེ་རི་དགོན་པའི་གྲྭ་བསོད་ནམས་རྒྱ་མཚོ་བཅས་ང་ཚོ་མི་ ༡༢ ཡོད། ཁོང་ཚོས་བཤད་པ་ལྟར་ན་ང་ཁང་མིག་དེར་མ་བཅུག་པའི་སྔོན་ཏུ་བོད་མི་ཞིག་འདས་གྲོངས་སུ་ཕྱིན་སོང་ཟེར། ཁང་མིག་དེར་བཅུག་སྟེ་ཉིན་གཅིག་གི་རྗེས་སུ་ཆོས་ཉིད་རྒྱ་མཚོར་གཅར་རྡུང་སྐབས་མགོ་ལ་ལྕགས་དབྱུག་གིས་བརྒྱབ་སྟེ་རྨ་ཁ་ཆེན་པོ་བཟོས་སྟབས་བཙོན་ཁང་ནས་གྲོངས་སོང་། གོ་ཐོས་སུ་ཁོང་གི་ཕུང་པོ་ཡང་ནང་མིར་རྩིས་སྤྲོད་བྱས་མི་འདུག

གང་ལྟར། སྐབས་དེར་ང་ཚོའི་བཙོན་ཁང་ནང་ཁྱོན་བསྡོམས་མི་ ༣༠༠ བཙོན་འཇུག་བྱས་པའི་ཁྲོད་གཅར་རྡུང་མནར་གཅོད་བཏང་སྟེ་རྨ་ཁ་བཟོས་མེད་མཁན་ཕལ་ཆེར་གཅིག་ཀྱང་མི་འདུག་ལ། ང་རང་ཡང་ཟླ་ ༧ ལྷག་རིང་གཅར་རྡུང་མནར་གཅོད་ཡང་ཡང་བཏང་སྟེ་མཐར་ཟ་མ་ཡང་བཟའ་མི་ཐུབ་པའི་གནས་སྟངས་ཆགས་སོང་། ལོ་དེར་དཀར་མཛེས་རྫོང་ཐོག་ཏུ་སྔ་ཕྱིར་སྐྱ་སེར་མི་མང་གིས་རྒྱ་གཞུང་ལ་ངོ་རྒོལ་བྱས་སྟབས། བར་མཚམས་ཤིག་ལ་བཙོན་ཁང་དེར་བཙོན་པ་ཁེངས་ཏེ། ང་ཚོ་སྐོར་ཞིག་དཀར་མཛེས་རྫོང་མི་མང་སྨན་ཁང་གི་ཉེ་འཁྲིས་སུ་ཡོད་པའི་བཙོན་ཁང་གསར་པའི་ནང་གནས་སྤོ་བྱས་བྱུང་། བཙོན་ཁང་དེའི་ནང་ཟླ་ ༨ བསྡད་རིང་གཅར་རྡུང་དེ་ཙམ་བཏང་མ་སོང་ཡང་། ཁོང་ཚོས་ཆབ་སྲིད་དང་འབྲེལ་བའི་བཙོན་པ་དང་རྐུ་འཕྲོག་བྱེད་པའི་བཙོན་པའི་བར་དབྱེ་འབྱེད་ཀྱིས་ཉིན་ ༡༥ ཙམ་ལ་ཟ་མ་བཀག་སྟེ་སྲོག་ཉེན་མེད་པ་ཙམ་དུ་བཞག་སྟབས། ཆབ་སྲིད་བཙོན་པ་མང་པོ་ཞིག་ལ་ལྟོགས་མནར་གྱིས་ས་ལ་འགྱེལ་འགྲོ་བཞིན་འདུག ཉལ་ཁང་དང་ཟ་ཁང་སོགས་སུ་གློག་མིག་བཙུགས་ཏེ་ཕན་ཚུན་བར་སྐད་ཆ་ཚིག་གཅིག་བཤད་རྒྱུར་ཡང་ཞེད་སྣང་བྱ་དགོས་པ་ཞིག་རེད། ཅེས་བརྗོད་བྱུང་།

ཡང་ཁོང་གིས་བཙོན་ཁང་གཉིས་པའི་གནས་སྟངས་སྐོར་བརྗོད་དོན། རྗེས་སུ་ང་དཀར་མཛེས་དགོན་པའི་ཉེ་འགྲམ་དུ་ཡོད་པའི་བཙོན་ཁང་གཉིས་པའི་ནང་བཙོན་འཇུག་བྱས་པ་རེད། སྐབས་དེར་བཙོན་ཁང་དེའི་ནང་གྲྭ་བཙུན་དང་མི་སྐྱ་ ༢༠༠ མ་ཟིན་ཙམ་འདུག དེའི་ནང་མང་ཆེ་བ་ཁྲིམས་ཐག་བཅད་ཟིན་པའི་རིགས་ཡིན་སྟབས་ཅུང་ཙམ་གུ་ཡངས་ཀྱི་རྣམ་པ་འདུག  བཙོན་ཁང་དེའི་ནང་ཟླ་ ༤ དང་ཉིན་ ༥ ལྷག་བསྡད་པ་ཡིན། ཕྱིས་སུ་ ༢༠༡༠ ལོའི་ཟླ་ ༢ པའི་ཚེས་ ༦ ཉིན་གྱི་དགོང་མོར་ཁོང་ཚོས་ང་རླངས་འཁོར་ཞིག་གི་ནང་བཅུག་སྟེ། དཀར་མཛེས་རྫོང་གི་གྲོང་ཁྱེར་གྱི་མཐའ་ཞིག་ཏུ་ཁྲིད་སོང་། ས་དེ་ནས་ང་ལ་སྒྲིག་ཁྲིམས་མང་པོ་ཞིག་འགྲེལ་བཤད་བརྒྱབ་སོང་། བདུན་ཕྲག་རེར་ཞང་སྤྱི་བདེ་ལས་ཁུངས་སུ་གནས་ཚུལ་ཡར་ཞུ་བྱ་དགོས་ཚུལ་དང་། ཐག་རིང་དུ་འགྲོ་དགོས་ཚེ་རྫོང་ཉེན་རྟོག་ཁང་གི་ཡི་གེ་ལེན་དགོས་ཚུལ་སོགས་བཤད་རྗེས་བཙོན་གྲོལ་བཏང་སོང་། དུས་དེ་ནས་བཟུང་ང་ཁོང་ཚོས་བཤད་པ་ལྟར་བདུན་རེ་རེ་བཞིན་ཉེན་རྟོག་ལས་ཁུངས་སུ་སོང་བ་ཡིན་ལ། འགྲོ་ཐེངས་རེ་རེར་ལས་ཁུངས་ཀྱི་གཙང་སྦྲ་དང་བུད་ཤིང་གཏུབ་ཏུ་འཇུག་པ་སོགས་ལས་ཀར་བཀོལ་བ་མ་ཟད། ཟླ་རེའི་ཚེས་ ༧ ཉིན་རྫོང་དྲག་ཆས་དམག་མིའི་ལས་ཁུངས་སུ་ཕྱིན་ཏེ། ཟླ་རེའི་འགྲོ་འོང་གི་གནས་ཚུལ་དང་ལས་ཀ་ཅི་བྱས་སོགས་སྙན་སེང་ཞུ་དགོས་ཀྱི་འདུག དེ་ལྟར་ཟླ་བ་མང་པོ་ཕྱིན་ཡང་བཟང་ཕྱོགས་ཀྱི་འགྱུར་བ་གང་ཡང་མེད་སྟབས། ངས་རང་གི་མ་འོངས་པའི་མི་ཚེ་ལ་བདེ་སྐྱིད་དང་རང་དབང་གི་འཚོ་བ་རོལ་བའི་ལམ་ཁ་མེད་པ་ཤེས་ཏེ། ནང་མི་སོགས་ལ་ཤེས་སུ་མ་བཅུག་པར་ལྐོག་ནས་རྒྱ་གར་ནང་བྲོས་བྱོལ་ཏུ་ཡོང་བ་ཡིན། ཞེས་བརྗོད་བྱུང་།

གསར་འགོད་པ། དོན་གོ