བཅའ་ཁྲིམས་བསྐྱར་བཅོས་ལས་དོན་གནད་འགའ་གླེང་བ།

ཚངས་དབྱངས་རྒྱ་མཚོ།

༡

སྔོན་གླེང་ལ་ནི་བསམ་ཚུལ་ཆེར་མེད་དེ་ཕར་ཆེར་དེ་ག་རང་གིས་འཐུས་པར་བསམ་ལ། ཚིག་སྦྱོར་གཅིག་གཉིས་ཤིག་དང་། མཇུག་གི་“༸གོང་ས་སྐྱབས་མགོན་ཆེན་པོས་བཅའ་ཁྲིམས་བསྐྱར་བཅོས་ལ་ཆོག་མཆན་བསྩལ་བའི་སྒོ་ནས” ཞེས་པ་ཅུང་ཟད་འགྱུར་བ་གཏོང་དགོས་པར་སྙམ། འགྱུར་བ་ཇི་ལྟར་གཏོང་དགོས་ཞེ་ན། ད་ཡོད་བཅའ་ཁྲིམས་ལེའུ་བཅུ་གཅིག་པ་འདི་ཉིད་ཡུལ་མིའི་རྒྱལ་ཁབ་ཀྱི་སྒྲོམ་གཞི་དང་མཐུན་པ་ཞིག་༸གོང་ས་མཆོག་གིས་བཀའ་ནན་བསྩལ་བ་བཞིན་བཟོས་ཏེ་གོང་ས་མཆོག་གི་སྐུའི་འགན་དབང་ཡོངས་རྫོགས་འོས་འདེམས་བྱས་པའི་མགོ་ཁྲིད་ཁག་ལ་བསྩལ་ཏེ་དེ་དག་བོད་རིགས་ཡོངས་ཀྱི་ངོ་ཚབ་དང་སྲི་ཞུ་སྒྲུབ་པའི་ནུས་ལྡན་དུ་མཛད་དེ་”ཞེས་པར་བཅོས་དགོས་པར་བསམ། དེ་ལྟར་མ་བྱས་པར་རང་འཇགས་བཞག་ན་ང་ཚོའི་ངོས་ནས་༸གོང་ས་མཆོག་ལ་བཅའ་ཁྲིམས་ལ་བསྒྱུར་བཅོས་གཏོང་དགོས་རྒྱུར་ཆོག་མཆན་ཞུས་པ་ལྟ་བུ་ཞིག་ཏུ་འགྱུར་འགྲོ་བར་སེམས་སོ།།

༢

ལས་ཐམ་དང་ལས་རྟགས་ངོས་ཀྱི་ ༼ བོད་གཞུང་དགའ་ལྡན་ཕོ་བྲང་ཕྱོགས་ལས་རྣམ་རྒྱལ ༽ཞེས་པའི་ཚབ་ཏུ་ ༼ བདེ་པ་ཉིད་རྒྱལ་གྱུར་ཅིག ༽ ཞེས་བཅོས་པར་གོ་དོན་ཟབ་རྒྱས་ཡོད་ངེས་ལ། རྒྱ་གར་དང་བལ་ཡུལ་གྱི་ལས་རྟགས་སོགས་དང་མཐུན་པ་འདྲ་ཞིག་ཀྱང་ཡིན་ལས་ཆེ་མོད། དེ་ནི་གལ་མི་ཆེ་སྟེ། གཙོ་བོ་བོད་རང་གི་ངོ་བོ་མཚོན་ཐུབ་དགོས་པ་གཙོ་གནད་དུ་འཛིན་དགོས་སྙམ། ལས་རྟགས་ཀྱི་ངོས་སུ་ཡི་གེ་ཞིག་འབྲི་དགོས་མིན་ལ་བསམ་བློ་གཏོང་རྒྱུ་དང་། གལ་སྲིད་དགོས་པའི་དབང་དུ་བཏང་ན་བཀུར་འོས་བོད་མི་མང་སྤྱི་འཐུས་ཆབ་བྲག་ལྷ་མོ་སྐྱབས་ལགས་ཀྱིས་༼ བཙན་བྱོལ་མང་གཙོའི་བོད་གཞུང་༽ ཞེས་པའམ། ཡང་ན། ༼ བཙན་བྱོལ་བོད་གཞུང་ ༽ཞེས་བཙན་བྱོལ་བོད་གཞུང་གི་མིང་རང་འཇགས་འཇོག་དགོས་པར་འདོད་དོ།།

༣

དོན་ཚན་དང་པོའི་སྐོར་ལ་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་“བཅའ་ཁྲིམས་དོན་ཚན་དང་པོ་གསར་དུ་བཅུག་དགོས་དོན་ནི་ཐབས་མཁས་པོ་ལྟ་བུ་བྱས་ནས་༸གོང་ས་མཆོག་བླ་ན་མེད་པའི་དབུ་ཁྲིད་ཀྱི་ངོ་བོ་དེ་བཟོས་ཡོད་པའི་སྐད་ཆ་རེད་” ཅེས་གསུངས་ཡོད་ཚུལ་དང་། དོན་ཚན་དང་པོའི་ནང་དུ་ “བོད་མི་ཡོངས་ཀྱི་མགོན་སྐྱབས་དང་། བླ་ན་མེད་པའི་དབུ་ཁྲིད།”ཅེས་དང་། ཡང་“བོད་ཀྱི་རྩ་དོན་བསྒྲུབ་སླད་སྤྱིར་བཏང་དང་དམིགས་བསལ་སྐུ་ཚབ་ཁག་གཏན་འཇགས་སམ་དུས་ཡུན་རྒྱས་བཅད་ཀྱི་བསྐོ་འཛུགས་གནང་རྒྱུ་”ཞེས་སོགས་ལ་བསམ་བློ་བཏང་ཡོང་དུས་རྒྱ་ནག་གིས་༸གོང་ས་མཆོག་ཁ་ཁོག་མི་གཅིག་ཚུལ་བསྒྲགས་བཞིན་པ་དེའི་ལམ་ཁར་ང་ཚོས་ཁྲིད་བཞིན་པའི་ཚོར་སྣང་ཞིག་ངང་གིས་འཕེལ་ཡོང་ལ། ང་ཚོས་ཞིབ་ཏུ་བསམ་བློ་བཏང་ན་༸གོང་ས་མཆོག་ང་ཚོས་བླ་ན་མེད་པའི་དབུ་ཁྲིད་དུ་མི་འདོད་མཁན་རྒྱ་ཆ་གཅིག་གཉིས་ཙམ་མི་ཟིན་པ་ཁ་ཚོན་བཅད་ནས་བཤད་ཐུབ་པ་ཞིག་རེད། འོན་ཀྱང་ད་སྐབས་དེ་ཙམ་གྱིས་མ་ཡིན་པར་“ད་ཆ་རང་རེའི་མང་གཙོའི་འཕེལ་རིམ་ཡོངས་སུ་རྫོགས་པའི་ཆེད་དུ་ྋརྒྱལ་བ་རིན་པོ་ཆེས་བོད་ཀྱི་ཆབ་སྲིད་ཀྱི་འགན་ཁུར་མ་དགོས་པར་མི་མང་གིས་འོས་འདེམས་བྱས་པའི་མགོ་ཁྲིད་སོ་སོས་ཆབ་སྲིད་ཀྱི་དབང་ལུང་ཡོངས་རྫོགས་འགན་ཁུར་བྱེད་དགོས་པའི་དུས་ལ་བབས་ཡོད།”པའི་ལམ་སྟོན་ལ་ཡིད་ཆེས་འཕེལ་ན་འདི་དག་མི་དགོས་པར་སེམས་སོ།།

༤

དོན་ཚན་གཉིས་པར་ ༼ བཙན་བྱོལ་བོད་གཞུང་ ༽ ཞེས་པ་ ༼ བཙན་བྱོལ་བོད་མིའི་གཞུང་གི་སྒྲིག་འཛུགས ༽ཞེས་པར་བཅོས་པ་ནི་བསམ་པའི་ཡུལ་ན་འཁོར་མི་ཐུབ་པའི་དོན་གནད་ཅིག་གོ། འོན་ཀྱང་བསམ་བློ་མི་གཏོང་རང་གཏོང་ཡིན་པས་ང་ཚོས་ཞིབ་ཚགས་པོས་བསམ་བློ་བཏང་ཡོང་དུས། ང་ཚོ་གནས་ཡུལ་རྒྱ་གར་གྱི་གནོན་ཤུགས་མ་ཡིན་པ་ནི་སྤྱི་འཐུས་ཚོགས་གཙོ་མཆོག་གིས་གསུངས་ཡོད་ན། ད་ང་ཚོས་བསམ་བློ་གཏོང་ས་གཅིག་མ་གཏོགས་ལྷག་མེད་ལ། དེ་ནི་རྒྱ་ནག་གི་ཁྲིམས་དང་ལྟ་ཚུལ་ལ་མཐུན་ཐབས་བྱེད་བཞིན་ཡོད་པ་ལས་གཞན་ཅང་མིན་ནོ།། དེས་ན་འདི་ལྟར་བསམ་བློ་བཏང་ཡོང་དུས་ང་ཚོས་ལོ་ངོ་ལྔ་བཅུ་ལྷག་ཅིག་གི་རིང་ལ་མུ་ནས་མུ་མཐུད་དེ་རྒྱ་ནག་གི་ཁྲིམས་དང་ལྟ་ཚུལ་ལ་བསྟུན་ཅི་ཐུབ་བྱས་ཏེ། བདེན་དོན་མང་པོ་ཞིག་བློས་གཏོང་བྱས་ཡོད་པ་མངོན་གསལ་རེད། འོན་ཀྱང་ད་སྐབས་ཕྱིར་འདང་ཞིག་བྱོས་དང་། ང་ཚོ་ལ་གྲུབ་འབྲས་ག་འདྲ་ཞིག་ཐོབ་འདུག ངའི་སྣང་ངོར་རྒྱ་གཞུང་གི་ངོས་ནས་གཅིག་ཀྱང་ཐོབ་མི་འདུག་གོ། དེས་ན་ད་དུང་འདི་ལྟར་མུ་མཐུད་དུ་བསྟུན་ཅི་ཐུབ་བྱེད་བཞིན་སོང་ན་ཉི་མ་གཅིག་ལ་ད་ང་ཚོར་རང་དབང་ཡང་མི་དགོས་ཕྱིར་ཡོང་གི་ཡིན་ཟེར་རྒྱུ་ལས་ཅང་མེད་པའི་ཚད་ལ་སླེབ་པའི་དུས་ཚོད་ཡང་ཤར་མི་སྲིད་པ་མིན་པར་སེམས་སོ།། གཞན་ཐ་སྙད་འདི་གཉིས་ཀྱི་ཁྱབ་ཚད་དང་གོ་དོན་སོགས་འབྲོ་མྱི་ཟེར་བ་ཞིག་གིས་གསལ་བོར་གླེང་འདུག་པས་ང་ལ་དེ་ལས་ལྷག་ཅིག་བཤད་རྒྱུ་མེད་པས་ཡིག་ཚོགས་མང་པོ་མ་བྲིས་སོ།།

༥

            དོན་ཚན་བཅུ་དགུ་པ་གཞུང་གི་འགན་འཛིན་གྱི་སྐོར་ལ་“༸གོང་ས་ཆེན་པོས་རྒྱལ་ཁབ་དབུ་འཛིན་གྱི་མཚན་ཐོག་ནས་”ཞེས་དང་“བཀའ་བློན་ཁྲི་པས་འཛིན་སྐྱོང་འགན་འཛིན་གྱི་འགན་དབང་ཐོག་ནས་”ཞེས་པ་ནི་གོང་དང་ཕྱོགས་མཚུངས་ལ་འདིར་ངེས་དགོས་པ་ཞིག་ནི་འདི་ལྟར་བསྒྱུར་བཅོས་བཏང་ན་བཀའ་བློན་ཁྲི་པ་ཞེས་པ་ཡང་འགན་འཛིན་ཞེས་པར་བཅོས་དགོས་པར་སེམས་སོ།། འདིར་འཕྲོས་དོན་ཅིག་བཤད་པར་འདོད་པ་ནི་བཅའ་ཁྲིམས་བསྐྱར་བཅོས་ཀྱི་མགོ་ནས་བཟུང་མཇུག་བར་དུ་ཞིབ་ཏུ་ཀློག་ཡོང་དུས་བཀའ་བློན་ཁྲི་པ་མཆོག་ལ་གཞུང་གི་འགན་འཛིན་གྱི་མིང་སྐམ་པོ་ཞིག་ལས་དོན་དངོས་ཐོག་དབང་ཚད་ཅིག་མེད་པའི་ཚོར་སྣང་བྱུང་ངོ་།། དེ་ཡང་༸གོང་ས་མཆོག་གཞུང་གི་འགན་འཛིན་གྱི་མཚན་ཐོག་ནས་དོན་ཚན་བཅུ་དགུ་པར་དབང་ཚད་དོན་ཚན་དགུ་ཡོད་མོད། བསྐྱར་བཅོས་སྐབས་དེ་དག་ལས་དྲུག་ཕྱིར་བསྡུ་བྱས་ནས་བཀའ་ཁྲི་ལ་དབང་ཚད་གསུམ་མ་གཏོགས་མེད་པ་བྱས་འདུག གསུམ་པོ་དེ་ཡང་སྤྱི་འཐུས་ལྷན་ཚོགས་ཀྱིས་གཏན་འབེབས་བྱས་ཟིན་པའི་ཁྲིམས་ཡིག་དང་སྒྲིག་གཞི་ཁག་གསལ་བསྒྲགས་དང་ལག་བསྟན་བྱེད་རྒྱུ་དང་། བྱས་རྗེས་གཟེངས་རྟགས་དང་། གོ་མིང་བདག་རྐྱེན་སྤྲོད་རྒྱུ་ཙམ། དེ་བཞིན་དུ་དགོས་གལ་ནམ་བྱུང་ལ་སྤྱི་ལྷན་དུ་ལས་དོན་སྙན་ཞུ་དང་གཏམ་བཤད་གནང་རྒྱུ་གོ་སྐབས་ཙམ་མོ།། བསམ་བློ་རེ་གཏོང་དུས་འདི་དག་ནི་བཀའ་ཁྲིའི་དབང་ཚད་མ་ཡིིན་ཏེ་ལས་འགན་ཙམ་དུ་ཟད་དོ།། དབང་ཚད་དངོས་ནི་ཁྲིམས་ཀྱི་ནུས་ཤུགས་ལྡན་པའི་ཁྲིམས་ཡིག་དང་། བཀའ་རྩ་ཁྱབ་བསྒྲགས། དེ་བཞིན་དུ་སྤྱི་འཐུས་ལྷན་ཚོགས་ཀྱི་ཚོགས་འདུ་འཕར་འགྱངས་དང་། བར་མཚམས་འཇོག་པ། གྲོལ་བ། བསྡུ་བསྐོང་། སྤྱི་འཐུས་ལྷན་ཚོགས་འཕོ་འགྱུར་དང་། ལས་དོན་བར་མཚམས་འཇོག་པ། བཀའ་ཤག་གམ་བཀའ་བློན་གང་རུང་འཕོ་འགྱུར། ཛ་དྲག་དང་། གལ་ཆེའི་དམིགས་བསལ་ཚོགས་འདུ་བསྡུ་བསྐོང་། དོན་གནད་གལ་ཆེ་འགའ་རེའི་སྐོར་ལ་བཅའ་ཁྲིམས་གཞིར་བཟུང་མང་ཚོགས་ལ་མང་མོས་ཐག་གཅོད་འོས་བསྡུ་བྱེད་འཐུས་ཀྱི་བཀའ་ཁྱབ་བསྩལ་རྒྱུ་བཅས་སོ།། འདི་དག་ཡོད་ཚད་བཀའ་ཁྲིའི་དབང་ཚད་བྱས་ན་འགྲིག་པར་བཤད་པ་མ་ཡིན་ཡང་། ཡོད་ཚད་ཕྱིར་བསྡུ་བྱས་པ་ནི་རང་གི་དབུ་ཁྲིད་ལ་རང་གིས་མཐོང་མ་སྤྲད་པར་ཟད་དོ།།

༦

དོན་ཚན་ཉེར་གཅིག་པའི་ནང་ནས་ཕྱིར་བསྡུ་བྱས་པ་མང་པོ་ཞིག་ཡོད་མོད། གལ་ཆེ་ཤོས་ནི་བཀའ་ཁྲིའི་འོས་ཆོས་ཀྱི་དོན་ཚན་ཇ་པ་ཕྱིར་བསྡུ་བྱས་པ་དེ་རེད། དེ་ཡང་ད་ནས་བཟུང་བཀའ་ཁྲི་ལོ་ལྔ་ནས་བཅུ་དང་། བཅུ་ནས་ཉི་ཤུ་ལ་བསྡད་ཀྱང་བཅའ་ཁྲིམས་ནང་གསལ་ལྟར་འགྲིག་པར་བཟོས་འདུག འདི་ནི་ཤིན་ཏུ་མི་འོས་ཏེ་རྒྱལ་སྤྱིའི་མང་གཙོའི་འགྲོ་སྟངས་དང་མི་མཐུན་པར་མ་ཟད། རྒྱ་ནག་གིས་ཀྱང་ཧྲུའུ་ཅི་ཞེས་པ་ལོ་ངོ་བཅུ་ལས་ལྷག་འདུག་མི་ཆོག་པའི་ཁྲིམས་ཡིག་ལག་ལྟར་བྱེད་བཞིན་ཡོད་པས་སོ།།

༧

དོན་ཚན་ཉེར་གཉིས་པར་འོས་ཐོན་བཀའ་ཁྲིས་གྲོས་ཚོགས་སུ་རང་གི་ལས་རོགས་བཀའ་བློན་དག་གི་ལོ་རྒྱུས་དང་བཀའ་བློན་འདི་དག་ལ་དོན་ཚན་ཉེར་གཅིག་པའི་ནང་གསེས་བཀའ་ཁྲིའི་འོས་ཆོས་ཁག་ཚང་བའི་གསལ་བཤད་གནང་མི་དགོས་པར་མ་ཟད། ལས་རོགས་བཀའ་བློན་དག་སྤྱི་འཐུས་ལྷན་ཚོགས་སུ་སྤྱི་མོས་ཐོབ་མིན་དང་། སྤྱི་མོས་མ་ཐོབ་པ་དག་ལ་གསང་བའི་འོས་ཤོག་འཕངས་ནས་འོས་འདེམས་བྱ་རྒྱུ་སོགས་ཕྱིར་བསྡུ་བྱས་ཏེ་བཀའ་བློན་ཁྲི་པས་རང་གི་ལས་རོགས་བཀའ་བློན་དག་ཁོ་རང་ཉིད་ཀྱི་འདོད་འདོད་ཅིག་བསྐོ་བཞག་བྱ་དགོས་པར་བཅོས་པ་འདི་ནི། བཀའ་ཁྲི་མཆོག་ལ་དགོས་ངེས་ཀྱི་དབང་ཚད་མི་སྤྲོད་པར་བཀའ་ཁྲི་གཅིག་པུས་ཐག་མི་ཆོད་པའི་ལས་དོན་ཞིག་བཀའ་ཁྲིའི་ཕྲག་ཏུ་འཕང་བར་ཁུམས་སོ།།

༨

དོན་ཚན་ང་བདུན་པར་“རྒྱལ་ཁབ་”ཅེས་པའི་ཚབ་དུ་“མི་རིགས་”ཞེས་པར་བཅོས་འདུག་པ་འདི་ལ་ཡང་བསམ་བློ་གཞན་ཞིག་བཏང་མི་ཆོག་པ་མ་ཡིན་ཏེ། དཔེར་ན་“གཞུང་དང་། མང་ཚོགས་ཀྱི་ཁེ་ཕན་ཆེད་”ཅེས་བཅོས་ན་ཕྱོགས་གང་ལ་བསྒྱུར་ན་ཡང་བསྒྱུར་ས་ཡོད་པས་སོ།། དེ་ཡང་ཉེ་སྔོན་༸གོང་ས་མཆོག་གིས་གཞུང་ཞེས་པ་རྒྱལ་ཁབ་ལ་གོ་མི་དགོས་པའི་གསལ་བཤད་གནང་ཟིན་པ་ལྟར། ང་ཚོས་ངོས་ནས་དེ་ལ་རྩ་འཛིན་བྱས་ནས་གཞུང་ཞེས་པ་དེ་ལ་འགྱུར་བ་མ་བཏང་ན་ལེགས་པ་ལས། དེ་མིན་ང་ཚོས་ཕྱོགས་ཚང་མ་ནས་ཇེ་ཆུང་དང་ཇེ་ཆུང་དུ་བཏང་པ་ཡིན་ན་ཉིན་གཅིག་ལ་འགྱོད་པའི་རྒྱུར་འགྱུར་ངེས་སོ།།

༢༠༡༡ ། ༥ ། ༡༣ ཉིན་བྲིས།