འབའ་པ་སྐལ་བཟང་འཕྲིན་ལས།
བཙན་བྱོལ་བོད་མིའི་སྒྲིག་འཛུགས་དང་དམངས་ཀྱི་སེམས་ཁམས།
བཙན་བྱོལ་བོད་མིའི་བཅའ་ཁྲིམས་ཟིན་བྲིས་ནང་བོད་གཞུང་ཞེས་པའི་ཚིག་ཚབ་ཏུ་བཙན་བྱོལ་བོད་མི་ཡི་སྒྲིག་འཛུགས་ཞེས་འཁོད་པ་མཐོང་འཕྲལ་མི་མང་པོ་ཞིག་སེམས་ཁམས་སྟོང་སང་སང་ཤིག་ཏུ་འགྱུར་ཡོད་པ་རེད། རང་བཙན་གཙང་མ་ནས་ལམ་དབུ་མ། ལམ་དབུ་མ་ནས་རང་ སྲིད་རང་སྐྱོང་། དེ་ནས་མིང་དོན་དོན་མཚུངས་པའི་མི་རིགས་ས་གནས་རང་སྐྱོང་། དེ་ཡི་ཐོག་ད་དུང་མར་ཕབ་ནས་དེ་རིང་བོད་གཞུང་ཞེས་པའི་མིང་བྱང་དེ་གཏོར་ནས་བཙན་ བྱོལ་བོད་མིའི་སྒྲིག་འཛུགས་བར་བསླེབས་སོང་ལ།
ད་ནི་གཞུང་དང་རྒྱལ་ཁབ་གང་ཡང་མེད་པར་སེམས་ནང་ནས་འཇུ་ས་བརྟེན་ས་ཅི་ཡང་མ་ལྷག་པར་སྟོང་སང་ངེ་གྱུར་ཐལ། ད་ནི་རྒྱ་ནག་གིས་བཤད་པ་ལྟར་ཡུལ་གྱར་སྲིད་གཞུང་ལ་ལས་ཀ་གཅིག་ཡོད་པ་ནི་རང་ཉིད་མེད་པར་བཟོ་རྒྱུ་དེ་རེད་ཟེར་བ་བཞིན་དེ་རིང་བྱ་བ་དེ་ཡི་མགོ་འཛུགས་པ་ཨེ་ཡིན་སྙམ་ནས་གང་ཞིག་བོར་བརླག་སོང་པའི་སྣང་བའི་དབྱིངས་སུ་གནས་ཡོད།
སྤྱིར་བཏང་དྷ་སར་ཡོད་པའི་བཙན་བྱོལ་བོད་གཞུང་ཟེར་བ་དེ་རྒྱལ་ས་ལྷ་སར་ཡོད་པའི་བོད་ཆོས་སྲིད་གཉིས་ལྡན་གྱི་གཞུང་དེ་རྒྱ་དམར་གྱི་དྲག་གནོན་དང་བཙན་འཛུལ་ལ་སོགས་པའི་ཉེན་ཁ་ལས་བྱོལ་པའི་གཞུང་ཞིག་ལ་གོ་བ་རེད་ལ། ང་ཚོ་བོད་མི་ཡི་མིག་ངོར་རྒྱལ་ཁབ་གཅིག་གི་སྲིད་གཞུང་གི་སྣང་ཚུལ་ཡང་ཡོད་ཆོག འོན་ཀྱང་རྒྱ་ནག་ལ་བསྟུན་མཁས་ཀྱི་སྲིད་བྱུས་འོག་ནས་བོད་གཞུང་ཞེས་པའི་མིང་དེ་བསྒྱུར་དགོས་པ་ཡང་གཏན་ནས་ཡོད་པ་མིན་ཏེ། རྒྱ་ནག་གི་ལྷ་སར་ཡོད་པའི་བཀའ་ཤག་གི་སྲིད་གཞུང་དེར་སྐབས་སྔོན་མ་ནས་བོད་ས་གནས་སྲིད་གཞུང་ཟེར་ནས་རང་ཉིད་ཀྱི་དབང་ འོག་ཏུ་ཡོད་པའི་གཞུང་ཞིག་ལས་རྒྱལ་ཁབ་ཀྱི་གཞུང་གི་གོ་བབ་སྤྲོད་ཀྱི་མེད་པས་དྷ་སའི་ཡོད་པའི་གཞུང་དེ་ལ་རང་བཙན་རྒྱལ་ཁབ་ཀྱི་སྲིད་གཞུང་ལ་བརྩིས་ནས་ལམ་དབུ་མའི་ལམ་ལུགས་འོག་ནས་གྲོལ་མོལ་བཟོ་པར་འགོག་རྐྱེན་སྤྲོད་མི་སྲིད། དེས་ན་མིག་གཉིས་ནང་སྣང་སོ་སོར་ཡོད་པའི་གཞུང་དེ་སོར་བཞག་བྱས་ན་ལམ་དབུ་མའི་རིང་ལུགས་ལ་དོ་ཕོག་ཅི་ཡང་འགྲོ་མིོ་སྲིད།
གནས་ཡུལ་རྒྱལ་ཁབ་ཀྱི་ཁྲིམས་ལུགས་འོག་ནས་བོད་གཞུང་ཞེས་པའི་མིང་བྱང་དེས་ད་ཕན་དཀའ་ངལ་སྤྲོད་རབས་མེད་ལ། ད་ཡང་དཀའ་ངལ་གང་ཞིག་འོངས་པའི་སྔོན་བརྡ་གང་ཡང་མེད། ཡོད་ཚད་གནས་ཡུལ་རྒྱལ་ཁབ་ཀྱི་ཁྲིམས་ལུགས་བསྐྱོད་དགོས་ན་ང་ཚོ་ཉི་མ་སང་ཉིན་ནས་གནས་འདིར་སྡོད་མི་ཆོག་པར་རང་འགུལ་ཐོག་ནས་འགྲོ་དགོས་པའང་ཆགས་སྲིད།
གང་ལྟར་བོད་གཞིས་བྱེས་གཉིས་སུ་ཡོད་པའི་བོད་མི་རྣམས་ཀྱིས་དྷ་སའི་གཞུང་དེ་བོད་གཞིེས་བྱེས་གཉིས་ཀྱི་ཚབ་མཚོན་པའི་ལྷ་སའི་སྲིད་གཞུང་དེ་གནས་སྤོས་ཙམ་ལ་ངོས་འཛིན་གྱི་ཐོག་ནས་ནམ་ཡང་ང་ཚོའི་སྲིད་གཞུང་ངོ་སྙམ་ནས་སེམས་པའི་བབ་སྟེགས་ཤིག་ཏུ་སེམས་བཞིན་ཡོད། ད་ནས་བཙན་བྱོལ་བོད་མིའི་སྒྲིག་འཛུགས་ཞེས་བཅོས་པ་ཡིན་ན་བཙན་བྱོལ་ན་ཡོད་པའི་བོད་མི་ཡི་བདེ་དོན་ཚོགས་པའི་ཚབ་མ་གཏོགས་མཚོན་མི་ནུས་པས་མིང་ཚིག་དེ་གང་བྱུང་ བཅོས་འགྱུར་གཏོང་པའི་དབང་ཆ་དེ་ང་ཚོ་བྱེས་འབྱོར་བ་གཅིག་པུ་ལ་ཡོད་མེད་ཀྱང་བསམ་གཞིག་བྱ་དགོས།
བཙན་བྱོལ་བོད་མིའི་སྒྲིག་འཛུགས་དང་བོད་རྒྱ་ཞི་མོལ།
སྤྱིར་བཏང་བོད་གཞུང་ཞེས་པའི་མིང་དེ་བཙན་བྱོལ་བོད་མིའི་སྒྲིག་འཛུགས་ཟེར་བའི་ཚིག་ཚབ་ཏུ་བཅོས་དགོས་པའི་ཆེད་དོན་ནི་གནས་ཡུལ་རྒྱལ་ཁབ་ཀྱི་ཁྲིམས་ལུགས་ལ་བསྟུན་པ་ཡིན་ཟེར་ཡང་། གཙོ་བོ་རྒྱ་ནག་ལ་བསྟུན་མཁས་ཀྱི་སྲིད་བྱུས་ཤིག་འཛིན་པར་གདོན་མི་ཟ་ལ་རྒྱ་ནག་འཐབ་ཕྱོགས་གཅིག་འགྱུར་ཁང་གིས་ཏྰ་ལའི་བླ་མ་བོད་ཀྱི་མགོ་ཁྲིད་ཀྱི་མཚན་གནས་ཟུར་ན་ཡང་ཏྰ་ལའི་བླ་མ་དང་ཁོང་གི་རྗེས་འབྲང་པ་ཉུང་ཤས་ཤིག་གི་མདུན་ལམ་ཐག་གཅོད་ཆེད་གྲོས་མོལ་ལམ་ཁ་ཡོད་པ་ལས་ཡུལ་གྱར་སྲིད་གཞུང་དང་གྲོལ་མོལ་ཡོང་ཐབས་མེད་ཟེར་ནས་བཤད་པ་ལྟར་ཟིན་བྲིས་ཚོགས་ཆུང་གི་བཅའ་ཁྲིམས་ཟིན་བྲིས་ནང་དུ་ཡང་། བོད་གཞུང་ཞེས་པའི་ཚིག་བཅོས་པ་རེད་ལ། ད་ཐེངས་༧གོང་ས་མཆོག་བོད་ཀྱི་དབུ་ཁྲིད་ཀྱི་མཚན་གནས་ཟུར་བ་དང་སྟབས་བསྟུན་རྒྱ་གཞུང་གིས་ཀྱང་ཏྰ་ལའི་བླ་མ་དང་ཁོང་གི་རྗེས་འབྲང་པ་ཉུང་ཤས་དང་ལྷན་གྲོས་མོལ་གྱི་ལམ་ཁ་ཡོད་རབས་བཤད་དུས་དྷ་སའི་གནད་ཡོད་མི་སྣ་བསྙད་པ་ཚོས་ཀྱང་། ༧གོང་ས་བོད་ཀྱི་དབུ་ཁྲིད་ཀྱི་མཚན་གནས་ལས་ཟུར་ན་དམིགས་བསལ་སྐུ་ཚབ་མིང་ཐོག་ནས་བོད་དོན་ཐག་གཅོད་ཀྱི་དབང་ཚད་དང་ལམ་ཁ་མེད་དུས། རྒྱ་གཞུང་གིས་གོང་ས་མཆོག་གི་རྗེས་འབྲང་པ་ཉུང་ཤས་ཤིག་གྲོལ་མོལ་གྱི་ལམ་ཁ་ཡོད་མདོག་བསྟན་པའི་གོ་སྐབས་དེ་ལེན་འདོད་ཀྱི་བཅའ་ཁྲིམས་ནང་བཙན་བྱོལ་བོད་མིའི་སྒྲིག་འཛུགས་ཟེར་བའི་ཚིག་དེ་འབད་ཆེན་པོས་སྣོན་ཐབས་བྱས་པ་རེད།
འདས་པའི་ལོ་ཤས་རིང་རྒྱ་དང་ལྷན་དུ་གྲོལ་མོལ་བྱས་རིང་རྒྱ་ཡིས་བཀོད་མངགས་ལྟར་རང་རྒྱལ་དང་མེས་རྒྱལ་ཞེས་པའི་ཚིག་ཡན་བེད་སྤྱོད་བཏང་ཡོད་ལ། མི་རིགས་ས་གནས་རང་སྐྱོང་གི་ཚིག་ཀྱང་སྤྱད་ཡོད། འོན་ཀྱང་རྟིང་མར་མི་རིགས་ས་གནས་རང་སྐྱོང་གི་མིང་བྱང་འཁོད་པའི་དགོས་འདུན་ཡིག་ཆ་ལ་ཡ་ལན་བཟང་པོ་མེད་པའི་ཁར་རྣམ་པ་བསྒྱུར་པའི་རང་བཙན་རེད་ཟེར་ནས་སྔར་བཞིན་སྐྱོན་འཛུགས་བྱས་ཡོད། དེ་ཐེངས་ཀྱང་རྒྱ་ཡིས་བཀོད་མངགས་དང་རྒྱ་ལ་འཛིན་པའི་བསྟུན་མཁས་སྲིད་ཇུས་ཀྱི་འོག་ནས་བཙན་བྱོལ་བོད་མིའི་སྒྲིག་འཛུགས་ཟེར་ནས་བཅོས་ན་ཡང་རྟིང་མར་རྒྱ་གཞུང་གི་ཁ་བྲལ་གྱི་ལས་འགུལ་སྤེལ་སྟངས་རེད་ཟེར་རྐྱང་རེད། གལ་ཏེ་བཅའ་ཁྲིམས་ནང་བཙན་བྱོལ་བོད་མའི་སྒྲིག་འཛུགས་ཞེས་འཁོད་ཚར་རྗེས་བཙན་བྱོལ་བོད་མི་ཡི་སྒྲིག་འཛུགས་ ཞེས་པའི་མིང་བྱང་འོག་ནས་བོད་རྒྱ་གྲོས་མོལ་ཐེངས་ཁ་ཤས་མཐུད་སྲིད་ཀྱང་དོན་དམ་པར་གཞིས་ལུས་བོད་མིའི་མངོན་འདོད་གཏན་ནས་སྒྲུབ་ཐུབ་མི་སྲིད།
གང་ལྟར་དྷ་སའི་སྲིད་དོན་པ་ཁྱུ་གཅིག་འཐབ་ཕྱོགས་གཅིག་འགྱུར་ཁང་གི་བཀའ་དང་ཐག་ཇེ་ཉེ་ནས་ཉེར་སོང་པའི་སོང་པའི་ཚོར་སྣང་བྱུང་ལ། བོད་རྒྱ་ཞི་མོལ་ཟེར་བ་དག་ཀྱང་དོན་དུ་དབུ་མའི་ལམ་གྱི་རིན་གོང་གཅོད་བྱེད་རང་ཆགས་པའི་ཚོར་སྣང་བྱུང་། ད་ཐེངས་ཀྱི་གནང་སྟངས་དེ་ད་ནི་རྒྱ་ལ་ང་ཚོ་རྒྱ་འོག་ཏུ་འཛུལ་བཅུག་རོགས་ཟེར་བ་ལྟ་བུ་ཞིག་ཡིན་པའི་ཚོར་སྣང་ཡང་བྱུང་ངོ་།།
གང་ལྟར་ད་ནས་དྷ་རམ་ས་ལ་ཕྱོགས་ནས་དབུ་མའི་ལམ་གོང་ཇེ་གཅོག་དང་མགོ་དེ་ཇེ་སྙེ་རེད་ལ། པེ་ཅིང་ཕྱོགས་ནས་མགོ་ཇེ་མཁྲེགས་དང་ཧམ་པ་ཇེ་ཆེ་རེད། རྒྱ་ཡི་མིག་ནང་ང་ཚོས་སྒྲོག་བཞིན་པའི་དབུ་མའི་ལམ་དེ་ཡང་རང་བཙན་ལྟར་ཡོད་ཐག་ཆོད་རེད། རྒྱ་ཡི་དགོས་འདོད་དང་མིག་ནང་གི་དབུ་མའི་ལམ་དེ་ནི་བོད་གཞུང་ཕྱིར་བསྡུས་ཏེ། དགོས་འདུན་གང་མེད་པར་བོད་དུ་ལོག་རྒྱུ་དེ་རེད།
གྲོགས་པོ་རྣམས་བསམ་བློ་ཡག་པོ་གཏོང་རོགས་།
བོད་གཞུང་ཞེས་པའི་མིང་དེ་བཙན་བྱོལ་སྒྲིགས་འཛུགས་ལ་སྒྱུར་དགོས་དོན་འདི་རེད།།
དབུས་གཙོང་ཆོལ་ཁ་ནས་མི་གཉིས་ཀྱིས་བོད་གཞུང་རྒྱ་གར་ཁྲིམས་ཁང་ནང་ལ་བཏུགས་ནས་ལོ་མང་པོ་སོང་པ་རེད་། ཁྲིམས་ཁང་ནས་བོད་གཞུང་ཞེས་པ་ཅིག་ཁས་མི་ལེན་དུས་།
ཁ་མཆུ་མི་གཉིས་པོ་ལ་ཐུབ་སྲིད་པ་འམ་། ཡང་ན་ཁྲིམས་ཁང་ནས་མིང་སྒྱུར་དགོས་པའི་
བཀའ་རྒྱ་གཏང་སྲིད་པ་ལ་བསམ་ནས་གནས་ཚུལ་བྱུང་པ་རེད་།
ཧ་མ་གོ་བའི་ཧམ་བཤད་མ་གསུངས་ན་ཡག་།
དྲ་གྲོགས་སྐལ་བཟང་ལགས།
བསྐྱར་དུ་ཞུ་དགོས་བྱུང་སོང་བས་དགོངས་འགལ་མེད་པ་ཞུ།
རང་བཙན་གཙང་མ་ནས་ལམ་དབུ་མ། ལམ་དབུ་མ་ནས་རང་ སྲིད་རང་སྐྱོང་། དེ་ནས་མིང་དོན་དོན་མཚུངས་པའི་མི་རིགས་ས་གནས་རང་སྐྱོང་། དེ་ཡི་ཐོག་(ད་དུང་མར་ཕབ་ནས་)ཅེས་ལངས་ཕྱོགས་མི་འདྲ་བ་དང་རིམ་པ་མི་འདྲ་བ་
ཆེན་པོ་གསུམ་བཤད་ནས་རིམ་པ་བྱས་ནས་མར་མར་ཕབ་ཡོད་ཚུལ་དེ་ཁྱེད་རང་གི་
བཤད་པ་རེད།ཡིན་ན་ཡང་མཆན་ནང་དུ་དེ་གསུམ་ལ་ཁྱད་པར་མ་འབྱེད་པར་གཅིག་པ་ཡིན་ཁུལ་བཤད་འདུག།དེས་ན་(ད་དུང་མར་ཕབ་ནས་)ཅེས་པའི་ཚིག་དེ་ལ་གོ་དོན་གཏན་ནས་མེད་པའི་ནམ་མཁའི་མེ་ཏོག་གི་སྤུན་མཆེད་དེ་ཡིན་ནམ།ཁྱད་པར་མེད་པ་ཤེས་བཞིན་དུ་ཁྱད་པར་ཡོད་ཁུལ་བཤད་ན་ནི་རྒྱུ་མཚན་ཞིག་ཡོད་དགོས་ལ།རིག་པ་དག་གསལ་ཅན་གྱི་མི་ཞིག་ཡིན་དེ་འདྲ་རེད།མིན་ན་ནི་གང་ཤེས།མདོར་ན་ངའི་དྲི་བ་ནི་དེ་གསུམ་གྱི་བར་ལ་ཁྱད་པར་གང་ཡོད་གསལ་པོ་ཞིག་བཤད་རྒྱུ་ཡོད་དམ། ཁྱད་པར་མེད་ན་གོང་གི་ཚིག་སྦྱོར་གྱི་རིམ་པ་དེའི་གོ་དོན་དང་དགོས་པ་རྒྱུ་མཚན་གང་
ཡིན་ནམ།བཀའ་ལན་ཁ་གསལ་གཅིག་ཡོད་པ་ནི་ངའི་རེ་བ་རེད།དེ་མིན་དྲ་བརྒྱུད་བྱིས་བློ་ལ་གང་དྲན་བྲིས་ནས་ཁྱབ་སྤེལ་བྱས་ན་ཕན་ཐོག་མི་འདུག།རང་དབང་ཡོད་པ་རྣམས་བེད་སྤྱོད་གཏོང་སྟངས་མི་ཤེས་ན་དུད་འགྲོ་དང་གཅིག་མཚུངས་རེད།
དྲ་གྲོགས་མི་ཉག་པ་ལགས།ངས་ཀྱང་ཟིན་བྲིས་ན་འདུག་ཟེར་བ་ལས་ཐག་བཅད་འདུག་ཟེར་མེད་ལ།གྲོས་ཚོགས་ནང་གླེང་ན་ཡང་འདྲ་མ་གླེང་ན་་འདྲ་རང་ཉིད་བོད་མི་ཞིག་ཡིན་པའི་ཆ་ནས་གནད་དོན་དེའི་སྐོར་གླེང་ཆོག་པ་དང་ཐོབ་ཐང་ཡོད་ཙ་ན་ངས་ཀྱང་སྐད་ཆ་འདི་དག་བཤད་ལེ་ཡིན།
མི་རིགས་ས་གནས་རང་སྐྱོང་སོགས་དབུ་མའི་ལམ་ལུགས་ཡིན་ཟེར་མཁན་དང་འགྲེལ་བརྗོད་རིང་པོ་རེ་གནང་མཁན་ཡང་ཡོད་པ་རེད་ལ།དེ་དག་དབུ་མའི་ལམ་ལུགས་མ་རེད་ཟེར་མཁན་ཀྱང་ཡོད་པ་རེད།
ངས་ཀྱང་དབུ་མའི་ལམ་ཟེར་བའི་ལྟ་གྲུབ་གཞི་འཛིན་ས་དེ་ཚད་མཐོའི་རང་སྐྱོང་ལ་ངོས་འཛིན་བྱེད་བཞིན་ཡོད་ལ།གཞི་འཛིན་ས་གང་ཡང་མེད་པར་རིན་གོམ་ཇི་ལྟར་གཅོད་ཀྱང་དབུ་མའི་ལམ་ལུགས་ཀྱི་ཁྱབ་ཁོངས་ཡིན་པའི་བསྙད་འདོགས་དག་ལ་ཡིད་རྟོན་གཏན་ནས་མེད་།
སྐལ་བཟང་ལགས་ཞུ་རྒྱར།
སྤྱི་བཏང་བྱས་ནས་ཁྱེད་རང་བཤད་པ་རྣམས་བདེན་པ་ལྟ་བུའི་སེམས་ཚོར་དེ་མི་མང་པོ་ཞིག་ལ་ཡོང་ངེས་རེད།འོན་ཀྱང་གནས་དོན་དེའི་ཐོག་གྲོགས་ཚོགས་སུ་བགྲོ་གླེང་གནང་རྒྱུ་རེད།ཐུགས་ཁྲལ་གནང་ཆོག་ཀྱང་དེ་ཙམ་གྱི་དགོས་པ་མ་མཐོང།ཟིན་བྲིས་ཚོགས་ཆུང་གི་ཟིན་བྲིས་རྣམས་ཟིན་བྲིས་ཙམ་ལས་ཐག་གཅོད་མིན། ཟིན་བྲིས་གང་བརྒྱབ་ཆོག་མིན་ས་མཚམས་མེད་ཙང་ཟིན་བྲིས་མང་པོ་ཞིག་བརྒྱབ་
ནས་གྲོགས་ཚོགས་སུ་སྤྱན་འབུལ་ཞུ་དགོས་པ་དེ་ཟིན་བྲིས་ཚོགས་ཆུང་གི་ལས་འགན་རེད།ཞུ་འདོད་བྱུང་བ་ཞིག་ནི་ཁྱེད་རང་གི་རྩོམ་ཡིག་གིས་འབྲས་རྟགས་ཤིག་མངོན་པ་ནི་ཁྱེད་རང་གིས་དབུ་མའི་ལམ་དང་རང་སྲིད་རང་སྐྱོང་།བོད་རིགས་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་གསུམ་གྱི་བར་ལ་ཁྱད་པར་ཆེན་པ་ཞིག་
ཡོད་པ་ངོས་འཛིན་བྱས་པ་དེ་རེད།རང་བཙན་གཙང་མ་ནས་ལམ་དབུ་མ།ལམ་དབུ་མ་ནས་རང་སྲིད་རང་སྐྱོང་།དེ་ནས་མིང་དོན་དོན་མཚུངས་པའི་མི་རིགས་ས་གནས་རང་སྐྱོང་།དེ་ཡི་ཐོག་ད་དུང་མར་ཕབ་ནས་ཅེས་བྲིས་པ་དེ་རེད།རྒྱུ་མཚན་དེ་ལ་བསམ་ན་ཁྱེད་རང་གིས་ངེས་པར་དུ་དབུ་མའི་ལམ་དང་རང་སྲིད་རང་སྐྱོང་མིང་དོན་མཚུངས་པའི་རང་སྲིད་རང་སྐྱོང་གསུམ་གྱི་བར་ལ་ཁྱད་པར་གང་ཡོད་གསལ་པོ་ཞིག་བཀའ་ལན་ཡོད་པ་མཁྱེན་མཁྱེན།
གོ་སྐབས་རེ་ཤོར་བ་དང་མགོ་བསྐོར་རེ་ཐེབས་པ། བཙན་བྱོལ་གཞུང་གི་བཙའ་ཁྲིམས་ཟིན་བྲིས་ཚོགས་ཆུང་གིས་བཙའ་ཁྲིམས་ཟིན་བྲིས་ནང་བཙན་བྱོལ་བོད་གཞུང་ཞེས་པའི་མཚན་གནས་དེའི་ཚབ་ཏུ་བཙན་བྱོལ་བོད་མིའི་སྒྲིགས་འཛུགས་བཞེས་བཀོད་པ་ནས་བཟུང་བོད་མི་མང་པོ་ཞིག་གི་སེམས་ལ་རྨ་ཁ་དང་ཡིད་ནས་རེ་བལྟེས་བཅོལ་ཡུལ་མེད་པ་སྟོང་སྟོང་ལྷང་ལྷང་གི་འཚོ་བ་སྐྱུར་མོ་ཞིག་སྦྱིན་ཡོད་པ་ཀུན་གྱི་མཐོང་ཆོས་ཡིན།
རེད་ཡ་འདས་པའི་ལོ་རབས་དེ་དག་ལ་ཕྱིར་མིག་ཞིག་བལྟས་པ་ཡིན་ན་དངོས་སུ་མཐོང་བ་ནི་གོ་སྐབས་རེ་ཤོར་བ་དང་ལྷན་དུ་མགོ་བསྐོར་རེ་ཀྱང་ཐེབས་ཡོད་པ་མ་ཡིན་ནམ། གོ་སྐབས་ཤོར་མཁན་ནི་རྒྱལ་བོད་གཉིས་ཀ་ཡིན་ཀྱང་མགོ་བསྐོར་ཐེབས་མཁན་ནི་བཙན་བྱོལ་བ་ང་ཚོ་མིན་ནམ། ངས་འདས་པའི་ལོ་རྒྱུས་མང་པོ་མི་ཤེས་ཀྱང་ངེད་རང་བྱིས་པའི་སྐབས་ཞིག་ལ་རྒྱ་ནག་གི་དབུ་འཁྲིད་ཏེང་ཞོའོ་ཕིང་གིས་རང་བཙན་གྱི་སྐད་ཆ་མ་བཤད་ན་དེ་མིན་ག་རེ་བཤད་ཀྱང་གྲོས་མོལ་གྱི་ལམ་ནས་ཐག་གཅོད་ཐུབ་ལུགས་ཞིག་བཤད་ཡོད།
གཅིག་བྱས་ན་དེ་ཡང་མགོ་བསྐོར་གཏོང་ཐབས་ཞིག་དང་བསླུ་ཁྲིད་བྱ་ཐབས་ཤིག་ཡིན་ངེས་ཀྱང་སྐབས་དེ་དུས་བཙན་བྱོལ་ནང་རང་བཙན་གཙང་མའི་ལངས་ཕྱོགས་ཞིག་བཟུང་ཡོད་པས་ཐ་ཀར་འབྲེལ་བ་བྱུང་མེད་པ་ནི་རྒྱ་བོད་གཉིས་ཀྱི་གྲོས་མོལ་གྱི་གོ་སྐབས་ཤིག་ཤོར་བ་རེད་སྙམ།
དེའི་དབང་ལས་བཙན་བྱོལ་ནང་ལྟ་སྒྲུབ་འདྲ་མིན་ཞིག་དར་མགོ་ཚུགས་དེ་ཡང་༼རང་བཙན་གཙང་མ་༽དང་། ༼རང་བདག་རང་གཅོད༽ ༼བདེན་པའི་དབུ་འཛུགས༽ ༼དབུ་མའི་ལམ་༽སོགས་མི་མང་ལ་འདེམས་ཀ་སྤྲད་པ་ཡིན། འོན་ཀྱང་སྐབས་དེ་དུས་ཀྱི་མི་མང་གིས་ཆབ་སྲིད་ཀྱི་གོ་མཐོར་ག་འདྲ་ཞིག་ཡོད་ངས་འགྲེལ་བརྗོད་བྱ་དགོས་མེད།
སེམས་ཤུགས་ནི་ད་ལྟ་ལས་ཆེ་བ་མེད་ནའང་ཆུང་བ་རྩ་བ་མེད། རིམ་པ་དེ་འདྲ་ཞིག་རྒྱུད་གཞུང་གི་ཆབ་སྲིད་ཀྱི་ལངས་ཕྱོགས་ལ་འགྱུར་བ་ཐེབས་ནས་༼དབུ་མའི་ལམ་༽ནི་བོད་གཞུང་གི་ཆབ་སྲིད་ཀྱི་ལངས་ཕྱོགས་ཞིག་ཏུ་གཏན་འབེབས་བྱས་པ་ནས་བཟུང་རྒྱལ་སྤྱིའི་ནང་ཕྱི་ཚུགས་ཀྱི་རྒྱབ་བསྐྱོར་མང་དག་ཞིག་ཐོབ་ཡོད་ཀྱང་རྩ་དོན་ལ་དམན་པའི་རྒྱབ་བསྐྱོར་ཞིག་ད་བར་དུ་རེག་མེད།
ཕྱི་ལོ་ ༡༩༩༥ གཡས་གཡོན་ནང་༼ལོ་དུས་གསལ་པོ་མ་ཤེས་༽ཡོ་རོབ་མཉམ་སྦྲེལ་ནས་རྒྱ་དམར་གནོན་ཤུགས་སྤྲད་དེས་དུས་ཚོད་ངེས་ཅན་ནང་བོད་ཀྱི་བདེ་དོན་ཆེད་༸གོང་ས་རྒྱལ་བ་རིན་པོ་ཆེ་དང་བཀའ་མོས་མ་གནང་ན་བཙན་བྱོལ་གཞུང་དེ་ཁྲིམས་མཐུན་གྱི་གཞུང་ཞིག་ཏུ་ངོས་འཛིན་བྱ་རྒྱུ་ཡིན་ཞེས་བཤད་པས་རྒྱ་དམར་ལམ་སེང་གོ་སྐབས་དམ་འཛིན་བགྱིས་ནས་བཙན་བྱོལ་གཞུང་དང་འབྲེལ་བ་བྱས།
བཙན་བྱོལ་གཞུང་ནས་སྔོན་འགྲོའི་ཆ་རྐྱེན་གང་ཡང་མེད་པའི་ཐོག་ནས་རྒྱ་གཞུང་གི་བཤད་པ་ལྟར་གྲོས་མོས་ཐེངས་དགུ་བར་རྒྱུད་ནས་གོ་སྐབས་དེ་ཤོར་དུ་བཅུགས་པ་མ་ཟད་མི་ལོ་མང་པོ་ཞིག་རིང་མགོ་བསྐོར་བཏང་ཡོད། འདི་ལོའི་བོད་གཞུང་གི་མཚན་བརྗེ་སྒྱུར་གྱི་བྱ་བ་དེ་ཡང་ངས་བལྟས་ན་ཡང་བསྐྱར་མགོ་བསྐོར་ཞིག་ཐེབས་ཀྱི་མེད་དམ་སྙམ་ནས་སེམས་པ་སྐྱོ་ཞིང་སྐྱོ་ཞིང་ཟིན་བྲིས་འདི་ཉིད་སྤེལ་བ་ཡིན་པས་ནོར་འཇོལ་ཡོད་ན་བཟོད་པར་མཛོད་ཅིག
༼བོད་གཞུང་དགའ་ལྡན་ཕོ་བྲང་ཕྱོགས་ལས་རྣམ་རྒྱལ་༽ཞེས་པའི་མིང་ཡང་མེད། བོད་གཞུང་ཟེར་བའི་མིང་ཡང་མེད། ད་ཐད་ཀར་ཀྲུང་གོའི་བཙན་བྱོལ་བོད་མིའི་སྒྲིག་འཛུགས་ཞེས་བསྒྱུར་ན་གང་འདྲ་འདུག
སྤུན་གྲོགས་སྐལ་བཟང་འཕྲིན་ལས་ལགས་ཀྱི་བསམ་ཚུལ་ལ་རྒྱབ་སྐྱོར་དང་བསྔགས་བརྗོད་ཡོད་་་་་རེད་བོད་གཞུང་གི་བབ་ཡ་མེད་མ་རྟོག་བབ་ནས་ག་རེ་གནང་རྩིས་ཡོད་ཤེས་ཀྱི་མི་འདུག་།གང་ལྟར་ང་ཚོའི་གཞུང་གི་རྒྱ་ནག་ལ་འབྲེལ་མོ་ཆད་དུ་འདི་འདྲ་ཞིག་གནང་དགོས་མེད་བསམ་གྱི་ཡོད་།
ཁྱོད་ཚོར་ཁག་མེད། འོན་ཀྱང་ཞིབ་ཏུ་བསམས་ན་སྡུག་སྐད་འདི་འཕྱིས་དྲགས་ཡོད། མ་འོངས་པའི་བོད་འདི་ཀྲུང་གོའི་མངའ་དབང་འོག་སྡོད་རྒྱུའི་སྲིད་ཇུས་ཕྱི་གསལ་ནང་གསལ་ཡོངས་གྲགས་རེད། དེས་ན་ད་བཙན་བྱོལ་བོད་གཞུང་ཞེས་མིང་རྫིག་པོ་ཞིག་ཁུར་མ་ཁུར་ཅང་མེད་པ་རེད། ནང་ཁྲོལ་བརྗེས་ཚར་ན་ཕྱི་གོས་ཙམ་གྱིས་ཅི་ལ་ཕན།
བརྗེ་ན་བརྗེ་རུ་ཆུག བསྒྱུར་ན་སྒྱུར་དུ་ཆུག སྟེར་ན་སྟེར་དུ་ཆུག ད་ཅང་ལྷག་མེད་པ་རེད། ལྷག་མེད་པ་དེ་རྒྱ་གཞུང་གིས་བཟོས་པ་རེད། བོད་ལ་རོགས་མགོན་ཞིག་མེད་པས་མ་འཇོན་པ་རེད། ད་རུང་འཇོན་གི་མ་རེད།
ད་སྐབས་སུ་བབ་པ་དང་བྱེད་ཐུབ་པ་རེ་ཡོད་པ་དེ་མི་རིགས་རང་སྐྱོང་དང་རང་སྲུང་གི་ཐབས་ཤེས་གང་ཡག་རེ་འཚོལ་རྒྱུ་དང་དོན་ཕན་ག་རེ་ཐུབ་མིན་ལ་སྔར་ལྷག་གིས་འབད་བརྩོན་བྱེད་དགོས། གཞིས་ལུས་བོད་མི་ཚོའི་བདེ་སྡུག་ལ་བལྟས་ནས་སྙིང་སྟོབས་རེ་སྐྱེད་དགོས། ལམ་བུ་ཞིག་འཚོལ་དགོས། ད་ནི་རེ་སྟོང་གི་གཞུང་ལམ་ཆེན་པོ་རིང་མོ་དང་གསར་གྱི་ཟམ་པ་སོགས་ལ་རྨི་ལམ་མ་གཏོང།
འབའ་པ་སྐལ་བཟང་འཕྲིན་ལས་ཀྱི་གསུངས་པ་ལ་མངོན་པར་བསྟོད་དོ་དེ་དེ་བཞིན་ཏེ་ཇི་ལྟར་ཁྱེད་གསུངས་པ་བཞིན་ང་དང་ང་འདྲ་བའི་མི་མང་པོ་ཞིག་གི་སེམས་ཁམས་སྟོང་པ་ཆགས་པ་མ་ཟད་ཟས་ཀྱང་ཡིད་ཁར་མི་ཡོང་བའི་ཁར་ར་བྱེད་གི་ཡོད་པ་ངེས་དངོས་སུ་མཐོང་སོང་ད་དྲྭ་གྲོགས་ཚོ་འདེས་སྐོར་ལ་རྩོམ་མང་དག་ཞིག་སྤེལ་ནས་གཞུང་དམངས་འཚོག་ཆེན་ལ་ཕུལ་ཐུབ་ན་རེ་བ་ཅུང་ཟད་ཨེ་ཡོད་བསྙམ།