དོན་འགྲུབ་ལྷ་དར།
སྤྱི་དོན་ཆེད་དུ་སྲོག་གི་དམ་བཅའ་བཞག།
འགྲུབ་པའི་ལས་ཤིགས་བསམ་ནས་ལྟོགས་སྐོམ་མྱོང་།།
ལྷ་ཡི་བཀའ་ལུང་ཕེབས་ཀྱང་ལྡོག་མ་ནུས།།
དར་བའི་སྙིང་དེས་བོད་མི་ཀུན་ལ་བོས།།
དཀོན་མཆོག་ཡར་འཕེལ།
དཀོན་པའི་ནང་ན་སྤྱི་བའི་ལས་སྒྲུབ་མཁན།།
མཆོག་དུ་གྱུར་བའི་སྐྱེ་བུ་སྙིང་སྟོབས་ཅན།།
ཡར་ངོའི་ཟླ་བཞིན་རྒྱས་པའི་རྒྱལ་གཅེས་སེམས།།
འཕེལ་བཞིན་གོང་མཐོར་དགོས་ལ་བརྡ་ཞིག་བརྒྱབས།།
བསྟན་འཛིན་ནོར་བཟང་།
བསྟན་པའི་ཞིང་མཆོག་བོད་ཡུལ་ཁ་བ་ཅན།།
འཛིན་སྐྱོང་དར་སྤེལ་བྱེད་ལ་སྐུལ་བའི་སྟོབས།།
ནོར་བུ་དགོས་འདོད་ལྟ་བུའི་རིགས་ཀྱི་བུ།།
བཟང་བོའི་ལས་ལ་ཞིམ་མེད་དགོས་པར་བསྟན།།
ཁྱེད་གསུམ་བོད་ཀྱི་འདས་མ་ད་གསུམ་ཆེད།།
གཅེས་པའི་ལུས་སྲོག་འབེན་དུ་བཞག་གྱུར་ནས།།
ཁྲིམས་མེད་ལུགས་མེད་རྒྱ་ནག་སྲིད་གཞུང་ལ།།
འཚེ་མེད་ཞི་བའི་འབོད་པ་སྙིང་ནས་གུས།།
ཤི་བ་ལས་ཀྱང་གསོན་པ་ཐབས་རེ་ཡོད།།
ད་ནི་འཆི་བའི་སྒོ་མོ་ཕར་བརྒྱབས་དེ།།
རིགས་ཀྱི་མ་འོངས་ཆེད་དུ་སླར་འཁོར་ནས།།
ཚེ་བཀང་བོད་དོན་སྒྲུབ་པའི་ལམ་གཞན་སྙོགས།།
དཔའ་བོ་གསུམ་གྱི་ལ་རྒྱ་རི་ལྟར་བརྟན།།
ཀ་བ་གསུམ་གྱི་དབུ་འཁྲིད་སེམས་འཚབ་འཚབ།།
ཆོལ་ཁ་གསུམ་གྱི་མི་བུས་རྒྱང་ལྟ་བྱས།།
རྒན་གཞོན་དར་གསུམ་ཅི་བྱ་གཏོད་མེད་གྱུར།།
རིགས་ཀྱི་དཔའ་བོ་གསུམ་གྱིས་གཞན་དོན་སྒོམ།།
རིགས་ཀྱི་དཔའ་བོ་གསུམ་གྱི་ཁ་ཟས་བཅད།།
རིགས་ཀྱི་དཔའ་བོ་གསུམ་གྱིས་དྲང་བདེན་འབོད།།
རིགས་ཀྱི་དཔའ་བོ་ཁྱེད་གསུམ་སྙིང་ནས་གུས།།