ལོག་ལྟ་ཅན་ཆཊ་འགྲོ་བ་རེད་ཅེས་འཇིཊ་སྐུལ་བྱེད་མཁན་འདུག

སོ་སོའི་རྒྱུད་ན་ནང་ཆོས་གདེང་ཕེར་བ་ཞིག་མེད་པའི་རྟགས་རེད། ནང་ཆོས་ཀྱི་ཤེས་ཚད་རགས་ཙམ་ལས་མེད་ན། རླུང་ཤར་ལ་གཡུག་ན་ཤར་དང་ནུབ་ལ་གཡུག་ན་ནུབ་ཅེས་པའི་དཔེ་ལྟར་ཆགས་བ་ཡོང་གི་རེད་ཟེར།

ཟླ་འདིའི་ཕྱི་ཚེས་ ༡༧ ཉིན་ནས་ཟླ་རྗེས་མའི་ཚེས་ ༢༠ བར་ཨ་རིའི་ཨེ་མི་རི་གཙུག་ལག་སློབ་གཉེར་ཁང་དང་།  བཞུགས་སྒར་བོད་ཀྱི་དཔེ་མཛོད་ཁང་གཉིས་མཉམ་འབྲེལ་ཐོག་ཨེ་མོ་རི་དང་བོད་ཀྱི་ཚན་རིག་ལས་རིམ་གྱི་དབྱར་ཁའི་ཚན་རིག་འཛིན་གྲྭ་ “ཨེ་མོ་རི་དང་བོད་ཀྱི་ཚན་རིག་སྣེ་ཁྲིད” ཐེངས་བཞི་པ་དེ། ས་ར་བོད་ཀྱི་མཐོ་རིམ་སློབ་གཉེར་ཁང་དུ་འཚོགས་བཞིན་ཡོད་པ་དང་། ཐེངས་འདིའི་ཚན་རིག་འཛིན་གྲྭར་ཆོས་བརྒྱུད་རིས་མེད་ཀྱི་དགེ་འདུན་པ་ ༨༠ ཙམ་མཉམ་ཞུགས་གནང་ཡོད་འདུག

ཐེངས་འདིའི་ཚན་རིག་ཟབ་སྦྱོང་སྐབས་གཙོ་བོ་རྩིས་རིག་དང་སྐྱེ་དངོས་ཚན་རིག དབང་རྩའི་ཚན་རིག དངོས་ཁམས་ཚན་རིག་སོགས་ལ་ཟབ་སྦྱོང་སྤྲོད་འཆར་ཡོད་པ་དང་། དེ་ཡང་རྩིས་རིག་ནི་དེང་རབས་རིག་གནས་སྤྱི་དང་ཁྱད་པར་དུ་ཚན་རིག་སློབ་སྦྱོང་གི་རྨང་གཞིའི་ཤེས་བྱ་ཞིག་ཆགས་ཡོད་སྟབས། དངོས་ཁམས་ཚན་རིག་གིས་མཚོན་པའི་ཚན་རིག་གི་སློབ་ཚན་གཞན་དག་ལ་གོ་བ་ཡག་པོ་ལོན་ཆེད། ཐེངས་འདིའི་ཟབ་སྦྱོང་གི་བདུན་ཕྲག་དང་པོར་རྩིས་རིག་སློབ་ཁྲིད་གནང་རྒྱུ་དང་། ནང་པ་སངས་རྒྱས་པས་འཇིག་རྟེན་བཀོད་པ་པོ་མི་འདོད་ཅིང་། འཇིག་རྟེན་འདིའི་ཕྱི་ནང་གི་བཀོད་པ་མཐའ་དག་རྒྱུ་རྐྱེན་རྟེན་འབྲེལ་ལས་བྱུང་བར་ངོས་འཛིན་ལྟར། ཚན་རིག་གི་ལྟ་ཚུལ་དང་སྒྲུབ་བྱེད་འགོད་སྟངས་སོགས་ཤེས་རྟོགས་ཡོང་ཆེད། ཟབ་སྦྱོང་གིོ་བདུན་ཕྲག་གཉིས་པར་སྐྱེ་དངོས་ཚན་རིག་དང་། བདུན་ཕྲག་བཞི་པར་དངོས་ཁམས་ཚན་རིག་བཅས་ཀྱི་ཟབ་སྦྱོང་སྤྲོད་རྒྱུ་ཡིན་འདུག

འདི་གའི་གསར་འགོད་པས་ཟབ་སྦྱོང་གོ་སྒྲིག་ཚོགས་ཆུང་གི་ལས་བྱེད་ཉི་མ་རྒྱལ་མཚན་ལགས་སུ། ཚན་རིག་ཟབ་སྦྱོང་འདིའི་ཐོག་མའི་བྱུང་རིམ་དང་། ད་ལྟའི་གྲུབ་འབྲས་སྐོར་ལ་བཅར་འདྲི་ཞུས་པར་ཁོང་གིས་གསུངས་དོན། ལས་གཞི་འདི་ཐོག་མར་དགེ་བཤེས་བློ་བཟང་བསྟན་འཛིན་ལགས་བརྒྱུད་ཨ་རིའི་ཨེ་མོ་རི་གཙུག་ལག་སློབ་གྲྭ་དང་བོད་ཀྱི་དཔེ་མཛོད་ཁང་བར་འབྲེལ་པ་བྱུང་སྟེ། ༢༠༠༨ ལོར་གྲྭ་པ ༣༠ ལས་གྲུབ་པའི་སྐབས་དང་པོའི་འཛིན་གྲྭ་མགོ་འཛུགས་བྱས་ཤིང་། ༢༠༠༩ ལོར་གྲྭ་པ་ ༥༠ ལས་གྲུབ་པའི་སྐབས་གཉིས་པ་བསྡུས་ཏེ། ད་ལྟ་འཛིན་གྲྭ་གཅིག་ལོ་རིམ་གསུམ་པ་དང་། གཞན་པ་དེ་ལོ་རིམ་བཞི་པར་བསླེབས་ཡོད། ལོ་ལྔ་ཡི་དུས་ཡུན་དེ་ ༢༠༡༢ དང་ ༢༠༡༣ བཅས་ལ་རིམ་བཞིན་ཐོན་རྗེས་ཁོང་ཚོ་ཕྱིར་སོ་སོའི་དགོན་པར་ཕྱིན་ཏེ། གཙོ་བོ་དགོན་སྡེ་ཁག་ཏུ་ཚན་རིག་སློབ་སྦྱོང་གི་སྣེ་ཁྲིད་པ་བྱ་རྒྱུའི་དམིགས་ཡུལ་བཟུང་ཡོད་པ་རེད། ཅེས་ངོ་སྤྲོད་གནང་བྱུང་།

ཁོང་གིས་མུ་མཐུད་དུ་བརྗོད་དོན། གྲྭ་པ་ཚོར་ཚན་རིག་སློབ་སྦྱོང་སྤྲད་ན་གྲུབ་འབྲས་ཅི་འདྲ་ཡོང་མིན་ཐད་དོགས་གཞི་ཡོད་མཁན་ཡོད། ཐེངས་ཤིག་ཨ་རི་ནས་ཡིན་པ་བྷོ་བྷི་སེ་གྷར་ཁོང་གིས་༧གོང་ས་མཆོག་ལ་ངས་བོད་ལ་ཇི་ལྟར་རོགས་སྐྱོར་བྱ་དགོས་ཞེས་ཞུས་སྐབས། ཚན་རིག་གི་ཐོག་ནས་རོགས་སྐྱོར་ཡོང་བའི་བཀའ་ལན་བསྩལ་ཡོད། སེ་གྷར་གྱིས་དེ་ལ་གྲུབ་འབྲས་ཐོན་སྲིད་དམ་ཞེས་བཀའ་འདྲི་ཞུས་པར་༧གོང་ས་མཆོག་གིས་གཅིག་བྱས་ན་ལོ་ ༡༠༠ རྗེས་ནས་གྲུབ་འབྲས་འཐོན་སྲིད་ཅེས་གསུངས་ཡོད་པ་རེད། དེ་བཞིན་དགོན་སྡེ་ཁག་ཏུ་སྲོལ་རྒྱུན་རིག་གནས་ལ་སློབ་སྦྱོང་བྱེད་པའི་སྟེང་ཚན་རིག་ལ་སློབ་སྦྱོང་བྱས་ཚེ་གཅིག་ནས་ནང་ཆོས་སློབ་གཉེར་པ་ཚོའི་གོ་རྟོགས་སད་རྒྱུ་དང་གཉིས་ནས་སློབ་སྦྱོང་གི་བརྒྱུད་རིམ་ཁྲོད་ནང་ཆོས་དང་ཚན་རིག་ཟུང་འབྲེལ་བྱས་ན། གནས་ལུགས་དང་དཔྱད་པ་གཏོང་སྟངས་ལ་ཕན་རླབས་ཆེན་པོ་ཡོད་པར་དགོངས་པ་བཞེས་ཀྱི་ཡོད་པ་རེད། ཅེས་བརྗོད་བྱུང་།

ཚན་རིག་ཟབ་སྦྱོང་གི་ལོ་རིམ་གསུམ་པའི་འབྲས་སྤུངས་བློ་གསལ་གླིང་གི་གྲྭ་དབང་གྲགས་ལགས་སུ། ཚན་རིག་སློབ་གཉེར་གྱི་འདུན་པ་ཇི་ལྟར་འཁོར་ཚུལ་དྲིས་སྐབས་ཁོང་གིས་ལན་འདེབས་གནང་དོན། ༧གོང་ས་མཆོག་སྐུ་ན་གཞོན་དུས་ནས་ཚན་རིག་ལ་ཐུགས་སྣང་ཡོད་ཅིང་། ལྷག་པར་དུ་ ༡༩༦༢ ཙམ་ནས་ཁོང་གིས་ཚན་རིག་ལ་སློབ་སྦྱོང་གནང་ཞིང་། ཕྱིས་སུ་བོད་ཀྱི་དགོན་སྡེ་གྲྭ་ཚང་ཁག་ལ་ཚན་རིག་སློབ་སྦྱོང་སྤྲོད་རྒྱུ་གལ་ཆེར་གཟིགས་ཏེ། ནང་པའི་དགེ་འདུན་པ་ཚོས་ཚན་རིག་ལ་དོ་སྣང་བྱ་དགོས་པའི་བཀའ་སློབ་རིམ་པར་བསྩལ་ཡོད་པ་མ་ཟད།  སུད་སིར་བརྟེན་གཞི་བྱས་པའི་འབྲི་གུང་དགོན་པ་བརྒྱུད་ “ཚན་རིག་ནང་ཆོས་ལ་འཕྲད་པ་” ཞེས་པའི་ལས་གཞི་ཞིག་ ༢༠༠༠ ལོ་ནས་མགོ་བརྩམས་ཡོད་པ་དེ་དག་ལ་བརྟེན་ཏེ། ང་རང་གིས་ཚན་རིག་སྦྱང་འདོད་ཆེན་པོ་བྱུང་སོང་། རྗེས་མ་བོད་པའི་སྤྱི་ཚོགས་དང་ལྷག་པར་དུ་དགོན་སྡེ་གྲྭ་ཚང་ཁག་ལ་ཚན་རིག་སློབ་ཁྲིད་དར་སྤེལ་གཏོང་རྒྱུ་དང་། ཚན་རིག་དང་ནང་ཆོས་ཟུང་འབྲེལ་ཐོག་ཕན་ནུས་འདོན་ཐུབ་པའི་ལས་དོན་ཞིག་ལ་འཇུག་ཐུབ་པར་དམིགས་ཡུལ་བཟུང་ཡོད། ཅེས་བརྗོད་བྱུང་།

ཁོང་གིས་མུ་མཐུད་བརྗོད་རྒྱུར། ཚན་རིག་ཟེར་པ་དེ་ཕྱི་དངོས་པོའི་གནས་ལུགས་གཏན་ལ་འབེབ་པའི་རིག་པ་ཞིག་དང་། ནང་ཆོས་ལས་ཞིབ་ཚགས་ལྡན་ཞིང་གཏིང་ཟབ་པ་ཞིག་རེད། ནང་ཆོས་ནི་གང་ཟག་དེའི་སྤྱོད་པ་ཞི་ཞིང་དུལ་པ་ཞིག་དང་། རྒྱུད་ལ་བཟང་སྤྱོད་དང་ནང་སེམས་ཀྱི་ཞི་བདེ་སྐྲུན་ཐབས་ཀྱི་བསླབ་གཞི་ཞིག་རེད། ལྟོས་གྲུབ་ཀྱི་ཆ་ནས་གཞི་དངོས་པོའི་གནས་ལུགས་གཏན་ལ་འབེབས་པ་དང་ནང་སེམས་ཀྱི་བདེ་བ་སྐྲུན་པར་ཚན་རིག་དང་ནང་ཆོས་ཟུང་འབྲེལ་ཐོག་སློབ་གཉེར་བྱས་ན་ཕན་ཐོགས་ཆེན་པོ་ཡོད་པ་གཏན་འཁེལ་རེད། ཅེས་བརྗོད་བྱུང་།  

ཟབ་སྦྱོང་ལོ་རིམ་བཞི་པའི་ནང་གི་དགའ་ལྡན་ཤར་རྩེ་གྲྭ་ཚང་ནས་ཡིན་པ་འབྲུ་སྐལ་བཟང་ལགས་སུ་ཚན་རིག་སློབ་སྦྱོང་གི་བརྒྱུད་རིམ་ཁྲོད་ཀྱི་བློ་སྐྱེད་དང་། དགོན་སྡེ་ཁག་ཏུ་ཚན་རིག་སློབ་གཉེར་དར་བའི་དགེ་སྐྱོན་སྐོར་དྲིས་པའི་ལན་དུ། ༢༠༠༡ ནས་ང་ཚན་རིག་སློབ་སྦྱོང་གི་ལས་རིམ་ལ་ཞུགས་པ་ཡིན། ཚན་རིག་ནི་ནང་ཆོས་ལས་གཞན་པའི་རིག་གཞུང་ཞིག་ཡིན་སྟབས། རིག་གནས་མ་འདྲ་པ་གཉིས་ཞིབ་བསྡུར་ཐོག་སློབ་སྦྱོང་བྱས་ཡོང་སྐབས། དེ་སྔོན་སྦྱང་པའི་གཞུང་བཀའ་པོད་ལྔ་སོགས་ཕུད་པའི་གཞུང་གཞན་མང་པོ་ཞིག་ལ་ལྟ་ཀློག་བྱ་དགོས་ཀྱི་འདུག ཚན་རིག་ལ་སློབ་གཉེར་བྱས་པ་བརྒྱུད་དེ་ནང་ཆོས་ལ་སྔར་ལས་ལྷག་པའི་གོ་བ་ཇེ་ཟབ་དང་། ཁ་ཇེ་གསལ་ཡོང་བའི་ཕན་ཐོགས་འདུག ད་ཆར་ངས་ནང་ཆོས་དང་ཚན་རིག་གཉིས་ཀྱི་འབྲེལ་པ་དང་འགལ་འདུ་རིགས་ལ་ཉམས་ཞིབ་བྱ་རྒྱུར་བསམ་བློ་གཏོང་གི་ཡོད།  ད་ལྟའི་ཆར་དབང་པོ་ལྔ་ཡུལ་ལ་འཇུག་ཚུལ་གྱི་ཐད་ཚན་རིག་གི་ལྟ་ཚུལ་དང་ནང་ཆོས་ཀྱི་འདོད་ཚུལ། དེའི་ཞིབ་ཕྲའི་གནས་ཚུལ་ལ་ཞིབ་འཇུག་གི་ལས་གཞི་ཞིག་མགོ་བརྩམས་ཡོད། ཅེས་དང་།

ཁོས་མུ་མཐུད་དོན། ཚན་རིག་དང་ནང་ཆོས་གཉིས་གཅིག་རྒྱལ་གཞན་ཕམ་དང་མཐུན་ཐབས་མེད་པའི་ཕྱོགས་འགལ་རང་བཞིན་གྱི་རིག་པའི་གཞུང་ལུགས་གཉིས་སུ་འདོད་པའི་ལྟ་ཚུལ་ཡོད་ཀྱང་། དོན་དངོས་ཐོག་དེ་འདྲ་ཞིག་མ་རེད། རིག་གནས་གཅིག་གི་སྟེང་ལ་རིག་གནས་གཞན་ཞིག་བསྣན་ཡོང་ན། གང་ཟག་དེའི་བློ་རིག་གི་ནུས་པས་འདང་མིན་ཡོང་སྲིད་ཀྱང་། ཚན་རིག་སློབ་པར་བརྟེན་ཏེ་ནང་ཆོས་ལ་དད་པ་དང་ཡིད་ཆེས་ཆུང་དུ་འགྲོ་བ་དེ་འདྲ་ཡོང་གི་མ་རེད་སྙམ། འོན་ཀྱང་། སྤྱི་ཡོངས་ནས་བཤད་ན་དེ་འདྲ་ཉུང་ཤས་ཡོང་སྲིད་ཀྱང་། དེ་ཚོ་སོ་སོའི་རྒྱུད་ན་ནང་ཆོས་གདེང་ཕེར་བ་ཞིག་མེད་པའི་རྟགས་རེད། ནང་ཆོས་ཀྱི་ཤེས་ཚད་རགས་ཙམ་ལས་མེད་ན། རླུང་ཤར་ལ་གཡུག་ན་ཤར་དང་ནུབ་ལ་གཡུག་ན་ནུབ་ཅེས་པའི་དཔེ་ལྟར་ཆགས་བ་ཡོང་གི་རེད། ཅེས་ལན་འདེབས་གནང་བྱུང་།

མཐར་ལོ་རིམ་བཞི་པའི་དགེ་བཤེས་ཉི་མ་བཀྲ་ཤིས་ལགས་སུ། ཚན་རིག་གི་ཟབ་སྦྱོང་འདིར་མ་ཞུགས་སྔོན་ལ་ཚན་རིག་ཐོག་དོ་སྣང་ཡོད་མེད་དྲིས་པར་ཁོང་གིས། ང་ཆུང་ཆུང་ཡིན་དུས་ཕ་མ་ཚོས་ནང་ཆོས་ནི་ཁུངས་བཙན་པོ་དང་རྒྱུ་མཚན་ཡང་དག་ཅིག་ཡོད་པ་རེད་གསུངས་མྱོང་ཡོད་ལ། རྗེས་སུ་སློབ་གྲྭ་ནས་ཚན་རིག་སློབ་སྦྱོང་བྱེད་སྐབས་ཀྱང་། རྒན་པ་རེ་ཟུང་གིས་ཚན་རིག་ཟེར་པ་དེས་ཆོས་ལ་དད་པ་ལོག་འགྲོ་པ་དང་། མི་ལོག་ལྟ་ཅན་ཆགས་འགྲོ་བ་རེད་ཟེར་ནས་འཇིགས་སྐུལ་བྱེད་མཁན་འདུག སྐབས་དེར་ང་ཆུང་ཆུང་ཡིན་ཡང་། གལ་སྲིད་ནང་ཆོས་ཁུངས་བཙན་པ་དང་རྒྱུ་མཚན་ཡང་དག་ཅིག་ཡོད་ན། ཚན་རིག་སྦྱངས་བ་ཙམ་གྱིས་ལྟ་བ་ལོག་འགྲོ་བ་དེ་འདྲ་གང་ཡིན་ན་བསམ་པའི་ཡ་མཚན་སྐྱེས་མྱོང་། ཞེས་དང་།

མ་འོངས་པར་དགོན་པ་ཁག་ནང་ཚན་རིག་སློབ་སྦྱོང་དར་སྤེལ་ཆེད། སྤྱིར་གྲྭ་ཚང་ཁག་ཏུ་སློབ་སྦྱོང་བྱེད་བཞིན་པའི་ཕྱག་དཔེ་གཅིག་པ་ཡིན་ན་ཡང་འགྲོ་སྟངས་ཀྱི་ཐད་ནས་གྲྭ་ཚང་སོ་སོ་མ་འདྲ་བ་ཅུང་ཙམ་རེ་ཡོད་སྟབས། སོ་སོའི་ཁོར་ཡུག་ལ་བསྟུན་པའི་ཚན་རིག་སློབ་ཚན་ཆ་བགོས་དང་སློབ་ཁྲིད་གནང་སྟེ། དགེ་ལུགས་རྒྱུགས་སྤྲོད་ཀྱི་གནས་རིམ་ལ་མ་བསླེབས་པའི་ལོ་གཅིག་ཙམ་གྱི་གོང་བར་ཚན་རིག་གི་སློབ་གཞི་ཐོན་ཐུབ་པ་ཞིག་བཟོས་པ་ཡིན་ན། ཕྱོགས་གཉིས་ཀར་འཐུས་ཤོར་མི་འགྲོ་པ་ཞིག་ཆགས་ངེས་རེད། ཅེས་ལན་འདེབས་གནང་སོང་།

གསར་འགོད་པ། བནྡེ་སྐྱབས།