བསོད་ནམས་དབང་ལྡན།
སྐབས་འདི་ནི་རང་རེའི་མང་གཙོའི་གཞུང་དང་ཁྱད་པར་དུའང་བོད་ཀྱི་ལོ་རྒྱུས་ནང་གནད་འགག་ཤིན་ཏུ་ཆེ་བའི་དུས་སྐབས་ཤིག་ཡིན་སྟབས། མི་རེ་ངོ་རེ་ནས་འགན་ཁུར་ཏེ་བཅའ་ཁྲིམས་བསྐྱར་བཅོས་ཀྱི་སྐོར་བསམ་བློ་གཏོང་རྒྱུ་དང་བགྲོ་གླེང་ལྷུག་པོ་བྱེད་དགོས་ངེས་ཡིན། དེས་ན་ཕྲན་གྱིས་ཀྱང་ཅུང་ཟད་ཞུ་ན། སྤྱིར་རང་རེའི་མང་གཙོའི་འཕེལ་རིམ་ལ་ཕྱིར་བལྟས་བྱེད་ན་དུས་ཡུན་ཐུང་ངུ་ཞིག་གི་ནང་འཕེལ་ཚད་ལེགས་པོ་བྱུང་ཡོད་པའང་གཙོ་ཆེར་༸གོང་ས་མཆོག་གི་ཐུགས་རྗེ་དང་སྐུ་དྲིན་ཉག་གཅིག་ཡིན་པ་བརྗེད་མི་ཉན། དེ་སྔ་ ༡༩༦༠ ལོར་༸གོང་ས་མཆོག་གིས་དམངས་གཙོ་གསོལ་རས་གནང་བ་ནས་བོད་གཞུང་དགའ་ལྡན་ཕོ་བྲང་གི་ལོ་རྒྱུས་ནང་ལེའུ་གསར་པ་ཞིག་དབུ་འཛུགས་གནང་བ་དང་། ༡༩༦༣ ལོར་བཅའ་ཁྲིམས་གཏན་འབེབས་གནང་བ། ༡༩༩༡ ལོར་སྤྱི་འཐུས་ཀྱི་གྲངས་འབོར་སྤར་བ། ༢༠༠༡ ལོར་མི་མང་གིས་ཐད་ཀར་བཀའ་བློན་ཁྲི་པ་འོས་འདེམས་བྱས་པ་ནས་བོད་གཞུང་དགའ་ལྡན་ཕོ་བྲང་གི་དུས་སྐབས་ལ་འགྱུར་བ་ཤུགས་ཆེན་ཞིག་བཏང་གནང་བའི་འགྲེལ་བརྗོད་རྒྱལ་དབང་དོན་གྱི་བདག་པོས་ཡང་ཡང་གནང་བ་ལྟར་ལགས། ཁྱད་པར་དུའང་ད་ལོ་ ༢༠༡༡ ལོར་དོན་གྱི་བདག་པོ་རང་གི་ཞལ་ནས་ཐུགས་ཐག་གཙང་བཅད་ཀྱི་རྡོ་རྗེའི་བཀའ་ལུང་ནན་པོ་ཕེབས་པ་ལ་བརྟེན་ནས་བོད་གཞུང་དགའ་ལྡན་ཕོ་བྲང་ཕྱོགས་ལས་རྣམ་རྒྱལ་གྱི་དུས་སྐབས་ནི་རྒྱལ་ཁའི་ངང་ནས་མཇུག་ལེགས་པར་གྲུབ་ཟིན་པ་ཀུན་གསལ་ལྟར་ཡིན།
འོན་ཀྱང་བྱུང་བ་ལ་ཉམས་ཀྱིས་བལྟས་ན། མང་གཙོའི་ལམ་ལུགས་ལ་སྲིད་འཛིན་ལམ་ལུགས་དང་སྲིད་བློན་ལམ་ལུགས་གཉིས་ཡོད་རབས་འདུག་པ་ལས། དེ་སྔའི་བོད་ཀྱི་མང་གཙོ་ནི་ ༡༩༦༠ ནས་ ༢༠༠༠ བར་དུ་སྲིད་འཛིན་ལམ་ལུགས་ལྟ་བུ་དང་། ༢༠༠༡ ལོར་བཀའ་ཁྲིས་སྲིད་ཕྱོགས་ཀྱི་འགན་ཕལ་མོ་ཆེ་གཙང་བཞེས་གནང་སྟེ། དོན་གྱི་བདག་པོ་མཆོག་གིས་སྲིད་ཕྱོགས་ཀྱི་ཕྱག་ལས་མང་པོ་རྒྱུན་པར་གནང་མི་དགོས་པར་སྲིད་འཛིན་གྱི་མཚན་གནས་བཞེས་པ་ལྟ་བུས་ཕྱེད་བགྲེས་ཡོལ་ཚུལ་དུ་བཞུགས་པ་ནས་བཟུང་ ༢༠༡༠ བར་སྲིད་བློན་ལམ་ལུགས་ལྟ་བུ་ཆགས་ཡོད།
ད་ལོར་༸གོང་ས་མཆོག་གི་བཀའ་དགོངས་མཐར་ཐུག་ཡོངས་རྫོགས་བགྲེས་ཡོལ་གནང་བ་ནས་སྲིད་ཀྱི་ཐུགས་འགན་ཡོངས་རྫོགས་༼འོས་འཚམས་ཅན་ཐམས་ཅད་༽བཀའ་ཁྲི་ལ་གནང་སྟབས། ད་ནི་སླར་ཡང་རང་རེའི་མང་གཙོ་འདི་སྲིད་འཛིན་ལམ་ལུགས་སུ་འགྱུར་བ་ཡིན་པས། བཀའ་བློན་ཁྲི་པའི་མཚན་ལ་སྲིད་སྐྱོང་ངམ་སྲིད་འཛིན་ཞེས་ངེས་པར་དུ་བསྒྱུར་དགོས་ཏེ། བཀའ་བློན་ཞེས་པས་བློན་པོར་གོ་ཞིང་། བློན་པོ་ཡིན་ན་དེའི་གོང་དུ་སྲིད་ཕྱོགས་ནས་གཞན་ཞིག་ཡོད་དགོས་པ་ལས་མེད་པའི་ཕྱིར་རོ།། གལ་ཏེ་མི་བསྒྱུར་ན་ནི་དེའི་གོང་དུ་སྲིད་འཛིན་ལྟ་བུ་ཞིག་བསྐོ་དགོས་པ་ལས་ དེའང་ལས་ལྷག་ཡིན་པས། དགོས་མེད་རེད་སྙམ།
འགའ་ཞིག་གིས་ད་བར་བཀའ་ཁྲི་རིམ་པ་མང་དུ་བྱོན་ཚར་བ་རྒྱུ་མཚན་དུ་བགྲངས་ནས་བཀའ་ཁྲིའི་མཚན་བརྗེ་མི་རུང་ཟེར་བ་དང་། བརྗེ་ན་ནི་སྲིད་སྐྱོང་དང་པོ་གཞི་ནས་བརྩི་སྟེ་བཀའ་ཁྲིའི་བྱ་གཞག་མཇུག་བསྡུ་དགོས་པ་དོན་མེད་ཟེར་ཡང་། དེ་ནི་མ་བརྟག་པ་ཡིན་ཏེ། བོད་གཞུང་དགའ་ལྡན་ཕོ་བྲང་ཡང་འགྱུར་བའི་དུས་ལ་བསླེབས་ཟིན་པ་ཡིན་ན། བཀའ་ཁྲིའི་མཚན་ཙམ་བསྒྱུར་མི་རུང་བ་ཅི་ཡོད། ཡང་ཁོ་རང་གིས་བཀའ་ཁྲི་གསར་པ་ལ་སྲིད་བློན་གྱི་མཚན་གནས་ཕུལ་ན་ཡག་པོ་འདུག་ཟེར་ཡང་། དེ་ནི་ནང་འགལ་ཡིན་པར་མ་ཟད། གོང་སྨྲོས་ལྟར་གྱི་སྐྱོན་ཡོད་ལ། བོད་ཀྱི་རྒྱལ་པོའི་ལམ་ལུགས་དང་མང་གཙོའི་ལམ་ལུགས་གཉིས་ཀ་མཉམ་གནས་བྱེད་ཐབས་ཟེར་བ་ནི་རྨི་ལམ་ཙམ་སྟེ། དོན་གྱི་བདག་པོ་མཆོག་གིས་ཉེ་ཆར་དུས་རབས་འདིར་རྒྱལ་པོའི་ལམ་ལུགས་སོགས་མཇུག་བསྒྲིལ་ཟིན་པའི་བཀའ་གསལ་པོ་ཕེབས་པ་ཙམ་དུ་མ་ཟད། དངོས་སུ་ཕྱག་བསྟར་གནང་སྟེ་སུས་ཀྱང་བཙན་ཤད་མ་ཞུས་པར་ཆབ་སྲིད་ཀྱི་ཐུགས་འགན་ཡོངས་རྫོགས་མང་ཚོགས་ལ་གསོལ་རས་གནང་ཟིན་པས། ད་རྒྱལ་པོའི་ལམ་ལུགས་རྒྱུན་གནས་བྱེད་ན། རྒྱལ་པོ་གང་ནས་འཚོལ་རྒྱུ་ཡིན་ལགས། དེས་ན་ངའི་བསམ་པར་བཀའ་བློན་ཁྲི་པའི་མཚན་དེ་སྲིད་སྐྱོང་དུ་བསྒྱུར་ན་འོས་འཚམ་ཅན་དུ་མཐོང་ངོ་། །
ཡང་བཀའ་ཁྲི་ལ་དུས་ཡུན་ངེས་ཅན་ཡོད་པ་ལྟར་སྤྱི་འཐུས་ལའང་ཡོད་དགོས་ཟེར་བ་ནི། གནད་འགག་མ་རྟོགས་པའི་རིགས་འགྲེ་ཐལ་ཆེས་པ་ཞིག་རེད། རྒྱུ་མཚན་ནི་སྤྱི་འཐུས་ལྷན་ཚོགས་ནི་ཁྲིམས་བཟོ་ལྷན་ཚོགས་ཡིན་གཤིས། ཁྲིམས་བཟོ་བ་རྣམས་ལ་ཅི་ཙམ་ལོ་མང་གི་ཉམས་མྱོང་ལྡན་པ་དེ་ཙམ་གྱིས་བཅའ་ཁྲིམས་བཟོ་རྒྱུ་དང་བཅོས་རྒྱུ་སོགས་ལ་ཕན་ཐོགས་ཆེ་བས། དུས་ཡུན་ངེས་ཅན་མེད་པ་ཉིད་ལེགས་པ་ཡིན་སྟབས། སྟོབས་ཆེན་ཨ་རིའི་རྒྱལ་ཁབ་ཀྱིས་ཀྱང་གྲོས་ཚོགས་ཚོགས་མི་ལ་དུས་ཡུན་ངེས་ཅན་བཟོས་མེད་པར་མ་ཟད། འགའ་ཤས་ཀྱིས་མི་ལོ་སུམ་ཅུ་བཞི་བཅུ་བར་གྲོས་ཚོགས་ཚོགས་མི་བྱས་པའི་སྙན་གྲགས་དང་བྱ་དགའ་ཡང་གནང་སྲོལ་ཡོད་རབས་འདུག་གོ །
དགོད་བྲོ་བ་རང་རེད།
སྤྱི་འཐུས་ཚོའི་རྣམ་དཔྱོད་བཅའ་ཁྲིམས་སྐྱར་བཅོས་དང་འབྲེལ་བ་མེད་ན།
སུ་དང་བཅའ་ཁྲིམས་སྐྱར་བཅོས་འབྲེལ་བ་ཡོད་དམ།
སྤྱི་འཐུས་དེ་ཚོ་ཡང་བཀའ་ཁྲི་ལྟར་ཐེངས་གཉིས་ལས་བསྟུད་མར་བྱས་མི་ཆོག་པ་བཟོས་ན་དགེ་མཚན་ཆེ་བར་མངོན།
ཕྲན་གྱི་རྩོམ་འདི་མདུན་ངོས་སུ་བཀོད་གནང་བས། དུས་བབ་རྩོམ་སྒྲིག་པ་མཆོག་ལ་ཐུགས་རྗེ་ཆེ་ཞུ་ཞིང་། དྲ་གྲོགས་ཚོས་དགོངས་ཚུལ་གསུངས་པར་ཡང་ཐུགས་རྗེ་ཆེ།
སྤྱི་འཐུས་དུས་ཡུན་ངེས་ཅན་བཟོ་དགོས་ཟེར་བ་ནི་གོང་དུ་རྩོམ་ནང་བྲིས་ཡོད་པ་ལྟར་མི་རུངབ་ཞིག་རེད། ད་ལྟའི་སྤྱི་འཐུས་ཚོ་ལ་ཤེས་འཇོན་མེད་རབས་བཤད་པ་ནི་་་་་བཅའ་ཁྲིམས་བསྐྱར་བཅོས་དང་འབྲེལ་བ་དེ་ཙམ་མེད། རྒྱུ་མཚན་ནི། བཅའ་ཁྲིམས་ཞེས་པ་ནི་མི་ལོ་མང་པོའི་བར་དུ་ལས་དོན་གྱི་གཞི་འཛིན་ས་ཡིན་པས། གང་ཟག་བྱེ་བྲག་པ་དང་། ཡུལ་དུས་བྱེ་བྲག་པ་ཁོ་ན་ལ་དམིགས་ནས་བཟོ་མི་རུང་། སྔ་ཕྱིའི་དུས་ཚོད་མང་པོ་ལ་བསམ་བློ་ཞིབ་ཚགས་གཏང་དགོས་ངེས་ཡིན།
བཀའ་ཁྲིའི་མཚན་ལ་སྲིད་འཛིན་ནམ་སྲིད་སྐྱོང་གང་དགའ་གང་འོས་ཤིག་འདོགས་ཆོག་ཅིང་། འདོགས་དགོས་པར་སེམས་ཏེ། རྒྱ་ཆེའི་ཀློག་པ་པོ་རྣམ་པས་དགོངས་ཚུལ་གང་མང་གསུང་རོགས་ཞུ།
སྲིད་སྐྱོང་ལས་སྲིད་འཛིན་ཡག་པ་འདུག གང་གིས་ན། སྲིད་སྐྱོང་ཞེས་པའི་ཐ་སྙད་དེ་དེ་སྔོན་བླ་རྒྱུད་དབང་འཛིན་པའི་སྐབས་སུ་༸རྒྱལ་དབང་སྐུ་ཕྲེང་རིམ་བྱོན་རྣམས་དགུང་ན་ཕྲ་སྐབས་དེའི་སྐུ་ཚབ་ཏུ་སྲིད་སྐྱོང་བར་བསྐོས་པའི་མི་དེ་དག་ལ་གོ་བ་དང་། ང་ཚོས་རྒྱལ་ཁབ་ཚང་མའི་འགོ་འཛིན་ལ་སྲིད་འཛིན་ཞེས་འབོད་པ་ལས་སྲིད་སྐྱོང་ཞེས་ཐ་སྙད་གང་ལའང་འཇུག་མྱོང་མེད་པས། དགོས་མེད་དཀའ་རྙོག་ཙམ་དུ་ལགས་སོ།
སྤུན་གྲོགས་ཚོའི་བསམ་ཚུལ་སྟོན་གནང་བ་དགའ་བསུ་ཞུ་།
བོད་རྒྱལ་ཡོངས་་ཚོགས་ཆེན་ཐེངས་གཉིས་པ་དབུ་འཛུགས་གནང་་བར་དགའ་བསུ་ཡོད་ཡིན་ནའང་བཅའ་ཁྲིམས་བསྐྱར་བཅོས་བགྲོ་གླེང་ལྷུག་པོ་དང་གྲོས་ཆོད་རྣམས་ཀྱང་ཁ་བཤད་ལག་བསྟར་ཡོ་བར་ མཁྱེན་ མ ཁྱེན།
ཆོས་སྲིད་འབྲེལ་གྱི་ལམ་ལུགས་དེ་འཇུག་སྒྲིལ་དགོས་པ་དེ་དངོས་གནས་ཕྱི་གྲགས་ན་མ་གཏོགས་སྔ་རྩ་བ་ནས་ཉིད་ནས་གྲགས་མེད།
སྟོབས་ཆེན་ཨ་རིའི་རྒྱལ་ཁབ་ཀྱི་གྲོ་ཚོགས་ཀྱི་ཚོགས་མི་རྣམས་ལ་རིག་པའི་གཞུང་ལུགས་ཀྱི་ཁྲིམས་ལུགས་ཐོག་ལ་སྦྱངས་བརྩོན་མི་དམན་པ་ཡོད་ཤ་སྟག་རེད།
ངེད་ཚོའི་གྲོས་ཚོགས་ཀྱི་ཚོགས་མི་བརྒྱ་ཆ་དགུ་གོ་དགུར་རིག་པའི་གཞུང་ལུགས་ཀྱི་ཁྲིམས་ལུགས་ཐོགས་ལ་སྦྱངས་བརྩོན་རྩ་བ་ནས་མེད།
བཀའ་ཁྲི་དུས་ཡུན་ངེས་ཅན་ཡོད་པ་ལྟར་སྤྱི་འཐུས་ལའང་ཡོད་དགོས། སྤྱི་འཐུས་འགའ་རེ་དུས་ཡུན་རིང་པོ་ཇི་ཙམ་སོང་ཡང་རིག་པའི་གཞུང་ལུགས་ཀྱི་ཐོག་ལ་སྦྱངས་བརྩོན་མེད་ཙང་གྲོས་ཚོགས་ནང་ས་མིག་བཀག་པ་ཙམ་ལས་དོན་འབྲས་སྨིན་པའི་ལས་ཀ་གང་ཡང་བྱེད་ཐུབ་ཀྱི་མེད།