བཙོན་པ་གསུམ་ཀློད་གྲོལ།

རྒྱ་ནག་གཞུང་གིས་ཁམས་སྡེ་དགེ་རྫ་ཁོག་ཤང་གི་གྲྭ་བཀྲ་ཤིས་རྒྱལ་མཚན་དང་ཡེ་ཤེས་རྒྱ་མཚོ། ཡེ་ཤེས་དབང་ལྡན་གསུམ་བཙོན་གྲོལ་བཏང་ཡོད་འདུག

ནིའུ་ཛི་ལན་ཌི་གནས་སྡོད་གྲྭ་བློ་བཟང་དཀོན་མཆོག་ལགས་ཀྱིས་གནས་ཚུལ་མཁོ་སྤྲོད་བྱས་པ་ལྟར་ན། རྒྱ་ནག་གཞུང་གིས་ས་བྱི་ཞི་རྒོལ་ཆེན་མོའི་སྐབས་སྡེ་དགེ་རྫོང་རྫ་ཁོག་ཤང་དགོན་གསར་དགོན་པའི་གྲྭ་བཀྲ་ཤིས་རྒྱལ་མཚན་དང་། ༢༠༠༩ ལོའི་གསུམ་བཅུའི་དུས་དྲན་བསླེབ་ལ་ཉེ་སྐབས་རྫ་ཁོག་ས་གནས་སུ་སྐད་འབོད་དང་སྦྱར་ཡིག་བཀྲམས་མཁན་རྫ་ཁོག་དགའ་ཡེ་གྲོང་ཚོའི་གྲྭ་ཡེ་ཤེས་རྒྱ་མཚོ།  ཡོ་ལ་གྲོང་ཚོའི་གྲྭ་ཡེ་ཤེས་དབང་ལྡན་བཅས་ ༢༠༠༨ དང་ ༢༠༠༩ སོ་སོར་རྒྱ་གཞུང་ལ་ངོ་རྒོལ་གྱི་ལས་འགུལ་འདྲ་མིན་སྤེལ་བའི་ཉེས་མིང་འོག་འཛིན་བཟུང་བཙོན་འཇུག་བྱས་ཡོད་ཅིང་། ཉེ་ལམ་ཟླ་གཅིག་ལྷག་གི་གོང་དུ་ཁོང་གསུམ་ཀློད་གྲོལ་བཏང་ཡོད་འདུག ཡིན་ནའང་། ཉེ་ཆར་ཁོང་གསུམ་ནང་མིར་རྩིས་སྤྲོད་བྱས་སྐབས། ཡེ་ཤེས་རྒྱ་མཚོར་བཙོན་ཁང་དུ་ཉེས་རྡུང་ཚད་མེད་བཏང་བའི་དབང་གིས་འགྲོ་འདུག་ལ་དཀའ་ངལ་འཕྲད་བཞིན་པའི་གནས་སུ་བསྐྱལ་ཏེ་སྨན་བཅོས་བྱེད་ཀྱིན་ཡོད་པར་མ་ཟད། གྲྭ་ཡེ་ཤེས་དབང་ལྡན་ལགས་ལའང་གཅིག་མཚུངས་ཀྱིས་མནར་གཅོད་བཏང་སྟེ། ད་ལྟའི་ཆར་དཀར་མཛེས་ས་ཁུལ་གྱི་སྨན་ཁང་ཞིག་ཏུ་སྨན་བཅོས་བྱེད་དགོས་བྱུང་འདུག

རྒྱ་ནག་གཞུང་གིས་ཁོང་གསུམ་ལ་མནར་གཅོད་ཚད་ལས་བརྒལ་བ་བཏང་སྟེ་ཉེན་ཁའི་གནས་སུ་བསྐྱལ་མཐར་ཀློད་གྲོལ་བཏང་བ་ཞིག་ཡིན་ཡང་། ས་བྱི་ཞི་རྒོལ་ཆེན་མོའི་སྐབས་ནས་རྫ་ཁོག་ཤང་ནང་འཛིན་བཟུང་བྱས་པའི་གྲྭ་བློ་བཟང་དོན་ཡོད་དང་འཇམ་དབྱངས་ཆོས་འཕེལ། རྫ་དོ་བྱམས་པ་ལྷུན་གྲུབ། ཧོར་མདའ་བསོད་དཔལ་བཅས་བཞི་རྒྱ་ནག་གྲོང་ཁྱེར་ཁྲིན་ཏུའུ་ཉེ་འགྲམ་གྱི་བཙོན་ཁང་ཞིག་ཏུ་བཀག་ཉར་བྱས་འདུག

གསར་འགོད་པ། དོན་གོ