ཁྲིམས་ལུགས་ཆེད་མཁས་པ་བློ་བཟང་སེང་གེ་མཆོག་ལ་སྐབས་གསུམ་པའི་བཀའ་བློན་ཁྲི་པའི་འོས་ཤོག་ཐོབ་རྗེས། བཞུགས་སྒར་ངྷ་རམ་ས་ལར་བོད་གཞུང་དམངས་རྒྱལ་ཡོངས་ཚོགས་ཆེན་ཐོག་བཅར་ཡོད་པ་དང་། བཀའ་ཤག་ནང་སྔོན་འགྲོའི་ལས་རིམ་ཁག་ཅིག་སྒྲུབ་བཞིན་ཡོད་པའི་གོ་སྐབས་དང་བསྟུན་ཏེ་འདི་གའི་གསར་འགོད་པའི་བཅར་འདྲི་ཞུས་ཡོད།
དྲི་བ། ཉེ་ལམ་དབུས་འོས་བསྡུ་ལྷན་ཁང་གིས་བཀའ་སྤྱི་གཉིས་ཀྱི་འོས་བསྡུའི་གྲུབ་འབྲས་གསལ་བསྒྲགས་བསྐྱངས་ཏེ། སྐུ་ཉིད་བཀའ་ཤག་སྐབས་བཅུ་བཞི་བའི་བཀའ་བློན་ཁྲི་པར་འོས་ཐོབ་ཡོད་པ་མཁྱེན་རྟོགས་བྱུང་མ་ཐག་སེམས་ཚོར་གང་འདྲ་བྱུང་སོང་ངམ།
ལན། ཚོར་བ་ཤུགས་ཆེན་པོ་ཞེ་དྲག་བསླེབས་སོང་། མི་དེ་འདྲའི་མང་པོ་ཞིག་གིས་ཡིད་ཆེས་དང་རེ་བ་བཅོལ་ཏེ། ང་ལ་རྒྱབ་སྐྱོར་གནང་བ་རེད། སྔོན་འགྲོའི་སྐབས་སུ་ཡང་འོས་ཤོག་མང་པོ་ཐོབ་ཡོད་ཀྱང་། དངོས་གཞི་ལ་སྔོན་འགྲོ་ལས་ཀྱང་མང་བ་ཐོབ་ཡོང་སྐབས། མི་མང་ལ་སྔར་ལས་ལྷག་པའི་རེ་བ་དང་ཡིད་ཆེས་ཤིག་སྐྱེ་ཡོང་གི་འདུག ལྷག་པར་དུ་འོས་བསྡུའི་གྲུབ་འབྲས་གསལ་བསྒྲགས་མ་གནང་གོང་ལ། བོད་ནས་གཞས་བཏང་ཡོད་པ་ཞིག་གོ་སོང་ལ། འོས་གསལ་བསྒྲགས་བསྐྱངས་པའི་ཉི་མོར་ཡང་། ཨ་མདོ་ནས་༼ སེང་གེ་གསུམ ༽ཟེར་བའི་གཞས་འདྲ་བཏང་བ་ཐོས་སོང་། དངོས་གཞིའི་འོས་བསྡུའི་སྔ་ཕྱིར་བོད་ནང་གི་བོད་མི་མང་པོ་ཞིག་གིས་བསང་གསོལ་བཏང་བ་དང་། འོས་ཤོག་གསལ་བསྒྲགས་ཀྱི་ཉིན་མོར་སྤྲོད་སྐྱིད་གཏོང་བ་དང་། ཤོག་སྦག་སྒྲོན་གྱི་ཡོད་པ་སོགས་གོ་སོང་ལ། རྗེས་སུ་ང་ལ་ཡི་གེ་དང་འཚམས་འདྲིའི་ཁ་བཏགས་སོགས་བཏང་ཡོང་གི་འདུག དེ་དག་བརྒྱུད་དེ་སེམས་ཚོར་དང་སྤོབས་པ་ཆེན་པོ་ཞིག་བསླེབས་སོང་། ང་རང་གི་སེམས་ལ་དངོས་གནས་དྲང་གནས་ལྷག་བསམ་རྣམ་དག་དང་། སེམས་ཤུགས་བརྟན་པོས་ཐོག་ནས་དཀའ་ལས་རྒྱག་གི་ཡིན་བསམ་པ་ཞིག་བྱུང་སོང་། བསམ་པ་ཅི་བཞིན་ལམ་ལྷོང་ཡོང་བའི་སྨོན་ལམ་ཡང་བརྒྱབ་པ་ཡིན།
དྲི་བ། འོས་བསྡུ་སྔོན་འགྲོ་དང་དངོས་གཞི་གཉིས་ཀའི་ཁྲོད་སྐུ་ཉིད་ལ་འོས་ཤོག་མང་པོ་ཐོབ་པ་དང་། ཐེངས་འདིར་སྐུ་ཉིད་ལ་བཀའ་བློན་ཁྲི་པ་ཐོབ་དགོས་པའི་རྒྱུ་རྐྱེན་གང་ལ་ངོས་འཛིན་གནང་གི་ཡོད་དམ།
ལན། བཙན་བྱོལ་བོད་མིའི་ཚོགས་སྒེར་མང་པོ་ཞིག་གིས་སྐབས་སྔོན་མ་དག་ལས་ལྷག་པའི་བགྲོ་གླེང་དང་གཏམ་བཤད་མང་པོ་གོ་སྒྲིག་ཞུས་ཡོད་པ་རེད། སྤྱི་ཡོངས་ནས་བཙན་བྱོལ་བོད་མི་ཚོའི་ཆབ་སྲིད་གོ་རྟོགས་མཐོ་རུ་འགྲོ་བཞིན་ཡོད་པ་ཞིག་ལ་ངོས་འཛིན་བྱེད་ཀྱི་ཡོད། དེ་བཞིན། བགྲོ་གླེང་དང་གཏམ་བཤད་རིམ་པའི་སྐབས་མི་མང་ཚོས་དོ་སྣང་ཆེན་པོ་དང་། ཁ་རྣ་མིག་གསུམ་བེད་སྤྱོད་ཡག་པོ་བཏང་སྟེ། གནས་ཚུལ་ཚང་མ་རྟོགས་པའི་ཐོག་ནས་སེམས་ཐག་བཅད་པ་དང་། གདམ་གསེས་བྱས་པ་ཞིག་ལ་ངོས་འཛིན་བྱེད་ཀྱི་ཡོད། ནང་མི་གཅིག་ལ་མཚོན་ན། ཕ་མ་བུ་ཕྲུག་བཅས་ནང་མི་གསུམ་ཡོད་པ་ཞིག་གིས་རང་རང་གི་མོས་ཕྱོགས་ལྟར། འོས་མི་གསུམ་ལ་འོས་བླུགས་པ་རེད་ཟེར་བ་ཞིག་གོ་ཡོང་གི་འདུག འདི་ནི་དམངས་གཙོའི་གོ་རྟོགས་ཚད་མཐོན་པོར་བསླེབས་ཡོད་པའི་རྟགས་ཤིག་རེད། ལྷག་པར་དུ་ང་རང་གི་འོས་ཤོག་ཐད་ནས་དངོས་གཞི་ལ་སྔོན་འགྲོ་ལས་ཀྱང་མང་བ་ཐོབ་ཡོང་སྐབས། མི་དམངས་ཟེར་བ་འདི་ཞེ་དྲག་བརྟན་པོ་རེད་བསམ་གྱི་འདུག ཐོག་མ་ང་འོས་གཞིར་ལངས་རྒྱུ་ཡིན་ཟེར་སྐབས། གྲོགས་པོ་རེ་ཟུང་གིས་ངྷ་རམ་ས་ལ་དང་ཝ་ཤིན་ཊོན་ཏུ་ཁྱེད་ལ་ཧ་ལམ་རྒྱབ་སྐྱོར་བྱེད་མཁན་མི་འདུག་ཟེར་མཁན་བྱུང་། དེ་བཞིན་གྲོགས་པོ་གཞན་འགའ་རེ་ཡིས་ཀྱང་། ཁྱེད་རང་ལངས་པ་ཡག་པོ་རེད་དེ། རོགས་པ་གཞན་དག་མི་ཆེན་ཡིན་སྟབས། ཁོང་ཅག་གི་ཟུར་ནས་ཁྱེད་ལ་ཐར་ལམ་ཞིག་རག་ཁག་པོ་རེད་ཟེར། དེ་འདྲ་གསུང་མིན་ལ་མ་བལྟས་པར། མང་ཚོགས་ནང་དངོས་སུ་སྐད་ཆ་བཤད་དུ་ཕྱིན་པ་ཡིན། མང་ཚོགས་དང་མཉམ་གཤིབ་བྱས་ཏེ་བསམ་ཚུལ་བརྗེ་རེས་བྱས་ཡོང་སྐབས། སོ་སོར་སྔར་ལས་ལྷག་པའི་སྤོབས་པ་དང་། མི་མང་ལ་ཡིད་ཆེས་ཤིག་སླེབས་ཡོང་གི་འདུག
དྲི་བ། སྐུ་ཉིད་ཀྱིས་སྔོན་ཆད་ཆིག་སྒྲིལ་དང་གསར་གཏོད། རང་མགོ་རང་ཐོན་གསུམ་ཤུགས་ཆེན་པོ་བཤད་པ་རེད་ལ། དེ་མིན་གྱི་ལས་དོན་མང་པོ་ཞིག་བསྒྲུབ་རྒྱུ་ཡིན་པའི་ཁས་ལེན་གནང་བ་རེད། འོན་ཀྱང་། འོས་ཐོབ་པའི་རྗེས་སུ་སྔར་གྱི་བཤད་སྟངས་ལ་ཅུང་འགྱུར་བ་ཐེབས་འདུག་ཟེར་མཁན་ཡོང་གི་ཡོད་སྟབས། དེ་ལ་གསལ་བཤད་གང་འདྲ་ཡོད་དམ།
ལན། ང་རང་གི་གཞི་རིམ་གྱི་ལྟ་གྲུབ་གསུམ་སྟེ། ཆིག་སྒྲིལ་དང་གསར་གཏོད། རང་མགོ་རང་ཐོན་གསུམ་ལ་འགྱུར་བ་རྩ་བ་ནས་མེད། ལངས་ཕྱོགས་དེ་རང་གི་ཐོག་ནས་ལས་ཀ་བྱ་རྒྱུ་ཡིན། དེ་ལས་གཞན་པའི་ཁས་ལེན་བྱས་པ་ཁག་ལའང་འགྱུར་བ་ཡོད་པ་མ་རེད། ང་རང་གིས་གང་བཤད་པ་དེ་ང་རང་གིས་བསྒྲུབ་རྒྱུ་རེད། ལེགས་འགྲུབ་ཡོང་མིན་དང་། གྲུབ་འབྲས་ཐོན་མིན་ཟེར་བ་དེ་གནས་ཚུལ་གཞན་ཞིག་རེད། ཆིག་སྒྲིལ་ལྟ་བུར་མཚོན་ན་མེད་དུ་མི་རུང་བ་ཞིག་རེད། བོད་པའི་རྩ་དོན་དང་རྩ་དོན་རྩོད་ཕྱོགས་ཀྱི་འཚེ་མེད་ཞི་བའི་ལྟ་གྲུབ་ལ་ཞིབ་འཇུག་བྱེད་མཁན་ཡོངས་ཀྱིས་ཁ་གཅིག་གྲགས་ཐོག་ཆིག་སྒྲིལ་ཟེར་བ་དེ་ཨང་དང་པོར་མཐོང་གི་ཡོད་པ་རེད། ང་ཚོའི་སྤྱི་ཚོགས་ལ་ཕྱིར་མིག་ཅིག་བལྟས་པ་ཡིན་ན། ཆོལ་ཁ་ཆོས་ལུགས་ཀྱི་མཐུན་ལམ་དེ་ཡར་རྒྱས་ཆེན་པོ་ཕྱིན་ཡོད་པ་རེད། མཚམས་རེར་རྙོག་གླེང་རེ་ཟུང་ཡོང་སྲིད་ཀྱང་། རྩ་བའི་ལངས་ཕྱོགས་དེ་ཆིག་སྒྲིལ་གྱི་ཐོག་ནས་གཡོ་འགུལ་ཐེབས་ཉན་གི་མ་རེད། དེ་བཞིན། རང་མགོ་རང་འཐོན་ཟེར་བ་དེ་ཡང་གཅིག་མཚུངས་རེད། དུས་དང་རྣམ་པ་ཀུན་ཏུ་རང་མགོ་རང་ཐོན་གྱི་ལམ་ལ་འབད་བརྩོན་བྱ་དགོས་པ་རེད་མ་གཏོགས། གཞན་ལ་བརྟེན་བསྡད་པའི་འཚོ་བ་དེ། ནམ་ཞིག་གཞན་གྱི་རྒྱབ་སྐྱོར་ཆད་པ་ཡིན་ན། རང་གི་སྦོ་ལུག་རྒྱུ་ལས་ལྷག་ཡོད་པ་མ་རེད།
དྲི་བ། བློ་བཟང་སེང་གེ་མཆོག་ངྷ་རམ་ས་ལར་བཅར་ཏེ། བཀའ་ཤག་ནང་ད་ཆར་དངོས་སུ་ལས་ཀ་མགོ་འཛུགས་གནང་ཡོད་རབས་གོ་སོང་། དེའི་སྐོར་ངོ་སྤྲོད་ཅིག་གནང་རོགས།
ལན། ཐེངས་འདིར་ང་ངྷ་སར་ཡོང་དོན་གཙོ་བོ་རྒྱལ་ཡོངས་ཚོགས་ཆེན་ཐོག་བཅར་བ་ཡིན། ངས་སྔོན་མ་བཀའ་ཁྲི་ཟམ་གདོང་རིན་པོ་ཆེ་མཆོག་ལ་ཞུས་པ་ཡིན། སྐབས་དེར་ཁོང་གིས་མཐུན་འགྱུར་རོགས་རམ་ག་རེ་དགོས་ཀྱང་གནང་གི་ཡིན་གསུངས་སོང་། ཉེ་ཆར་ང་འདིར་འབྱོར་མ་ཐག་བཀའ་ཤག་ནང་ལས་ཁུངས་ཆུང་ཆུང་ཞིག་དང་། བཀའ་བློན་རྣམ་པ་བཞུགས་ཤག་གི་སྐུ་མགྲོན་སྡོད་གནས་སུ་ང་ལ་ཁང་པ་ཡང་གྲ་སྒྲིག་གནང་སོང་། ཉིན་འདི་འགར་ངས་འཛམ་གླིང་གང་ས་ནས་ཡོང་བའི་གསར་འགོད་པ་ཧ་ཅང་མང་པོ་ཞིག་ལ་སྐད་ཆ་བཤད་རྒྱུའི་ལས་རིམ་བསྒྲིགས་ཡོད། ལྡི་ལིའི་རྒྱ་གར་བརྙན་འཕྲིན་ IDTV གྱིས་བཅར་འདྲི་བྱས་སོང་ལ། བྷི་བྷི་སི་བརྙན་འཕྲིན་ཁང་གི་ hardtake ཟེར་བ་དེའི་སྟེང་ལ་ཡང་སྐད་བཏང་སོང་། དེ་བཞིན་སི་ཨིན་ཨིན་བཅས་ཀྱི་བཅར་འདྲི་དང་ལེན་བྱས་པ་ཡིན། ཕྱི་ཟླ་དྲུག་པ་ཧྲིལ་བོར་ང་ངྷ་རམ་ས་ལར་འདུག་རྒྱུ་ཡིན། སྐབས་དེར་བོད་གཞུང་གི་ལྷན་ཁང་རེ་རེ་བཞིན་ཞིབ་འཇུག་བྱས་ཏེ། བཀའ་བློན་ཁྲི་པ་གཙོས་པའི་བཀའ་བློན་རྣམ་པས་ད་བར་དུ་ག་རེ་གནང་ཡོད་དང། ད་ལྟའི་གནང་སྟངས་གང་འདྲ་ཡིན་པ་སོགས་མགོ་འཚོས་པ་བྱ་རྒྱུ་ཡིན། ང་རང་གི་གཞི་རིམ་ལྟ་གྲུབ་གསུམ་གྱི་ཐོག་ནས་ལས་ཀ་བྱ་དགོས་དུས། འདས་པའི་ལས་དོན་ལ་བསྐྱར་ཞིབ་དང་། ད་ལྟའི་གནང་སྟངས་ལ་རྒྱུས་ལོན་བྱས་ཏེ། མ་འོངས་པའི་འཆར་གཞི་བསྒྲིག་དགོས་པ་རེད། དེ་དང་མཉམ་དུ་མ་འོངས་པའི་བཀའ་བློན་གདམ་ཕྱོགས་ལ་ཡང་བསམ་བློ་གཏོང་དགོས་པ་རེད། ཕྱི་ཟླ་བདུན་པའི་ནང་ཕྱིར་ཨ་རིར་ཕྱིན་ཏེ། ཝ་ཤིན་ཊོན་ཏུ་༧གོང་ས་མཆོག་གི་དུས་འཁོར་དབང་ཆེན་ལ་བཅར་རྒྱུ་ཡིན། ཟླ་བདུན་པའི་ཟླ་མཇུག་ཙམ་ལ་ཕྱིར་ངྷ་རམ་ས་ལར་ཡོང་སྟེ། ཕྱི་ཟླ་ ༨ པའི་ཚེས་ ༡༤ ཉིན་ད་ལྟའི་བཀའ་ཤག་གི་དུས་ཡུན་འཁྱོལ་གྱི་ཡོད་སྟབས། རྩིས་སྤྲོད་རྩིས་ལེན་ལ་གྲ་སྒྲིག་བྱ་དགོས་པ་རེད།
དྲི་བ། ད་ཆར་བཀའ་ཤག་གི་ལས་ཁུངས་ནང་དངོས་སུ་འཛུལ་ཏེ་ལས་ཀ་བྱེད་སྐབས། གདང་ཚོད་དང་། ཡང་ན་སེམས་འཚབ་གང་འདྲ་བྱུང་ཡོད་པ་དང་། གཞུང་ཞབས་ལས་བྱེད་ཚོས་མཉམ་རུབ་བྱེད་མིན་ཐོག་གཟིགས་ཚུལ་གང་འདྲ་བྱུང་སོང་ངམ།
ལན། ངས་སྔོན་མ་ནས་ཞུས་བསྡད་པ་ལྟར། གངས་སྐྱིད་ཀྱི་ལས་ཁུངས་ནང་ཞོགས་པ་ཆུ་ཚོད་དགུ་བ་ནས་ཕྱི་དྲོའི་ཆུ་ཚོད་ལྔ་བའི་བར་ལས་ཀ་བྱས་མྱོང་མེད་མོད། ལས་བྱེད་དག་གི་ལས་ཀ་བྱེད་སྟངས་དང་། ལྷན་ཁང་ཁག་གི་འགྲོ་སྟངས་གང་ལ་གང་འཚམ་ཤེས་ཀྱི་ཡོད། གཞུང་ཞབས་ལས་བྱེད་ཚོས་མཉམ་རུབ་བྱེད་མིན་ཐད་སེམས་ཁྲེལ་ཁྱོན་ནས་མེད། རྒྱ་གཞུང་གིས་གང་ཞིག་བཤད་ཀྱི་ཡོད་ཟེར་ན། བཙན་བྱོལ་ནང་གི་མི་ཐོག་རྒན་པ་རྫོགས་ཚར་བའི་ཉིན་མོ་དེར་བཙན་བྱོལ་བོད་གཞུང་སྦོ་ལུག་རྒྱུར་རྒྱག་གི་ཡོད་ཀྱང་། དེ་འདྲ་རྩ་བ་ཉིད་ནས་ཡོང་གི་མ་རེད། མི་རབས་གཞོན་པ་ཚོས་རྒན་རབས་པ་དག་གི་བཀའ་དྲིན་དྲན་པའི་ཐོག་ནས་བཙན་བྱོལ་བོད་གཞུང་དེ་ནུས་པ་ལྡན་པ་ཞིག་དང་། ཚགས་ཚུད་པོའི་ཐོག་ནས་གནས་ཐུབ་པར་འབད་བརྩོན་བྱ་རྒྱུ་ཡིན། རྩ་དོན་བདེན་མཐའ་མ་གསལ་བར་ལོ་བརྒྱ་དང་ཉིས་བརྒྱར་བསྒུག་དགོས་བྱུང་ཡང་། གཞུང་གི་སྒྲིག་འཛུགས་དེ་མུ་མཐུད་སྲ་བརྟན་དུ་གནས་ཐུབ་པ་ཞིག་བཟོ་རྒྱུ་ཡིན། ཞེས་རྒན་པར་གུས་ཞབས་དང་བརྩི་མཐོང་ཆེན་པོའི་ཐོག་ནས་ལས་ཀ་བྱེད་རྒྱུ་ཡིན། གཞུང་ཞབས་རྣམ་པ་ཚོས་ད་བར་རྩ་དོན་ལ་དཀའ་ལས་ཅི་ཙམ་བརྒྱབ་ཡོད་པ་ངས་ཤེས་ཀྱི་ཡོད་ལ། མ་འོངས་པར་ཡང་མུ་མཐུད་དཀའ་ལས་རྒྱག་རྒྱུའི་ལྷག་བསམ་དང་སེམས་ཤུགས་ལ་འགྱུར་བ་མེད་པའི་ཡིད་ཆེས་ཡོད།
དྲི་བ། སྐུ་ཉིད་ཀྱིས་ཐེངས་འདིའི་བོད་གཞུང་དམངས་རྒྱལ་ཡོངས་ཚོགས་ཆེན་ཐོག་དགོངས་འཆར་གང་འདྲ་ཞིག་བསྣམས་ཡོད་དམ།
ལན། ད་ལྟ་ང་རང་བཀའ་བློན་ཁྲི་པར་འོས་ཐོབ་ཙམ་ཡིན་སྟབས། ང་རང་སྒེར་གྱི་བསམ་ཚུལ་གང་ཐུབ་ཀྱིས་གཡོལ་ཏེ་མ་བཤད་ན་བསམ་ཡོད། གང་ཡིན་ཟེར་ན་བཀའ་བློན་ཁྲི་པ་ཟམ་གདོང་རིན་པོ་ཆེ་བཞུགས་བཞུགས་པ་རེད། དེ་བཞིན་བཀའ་ཤག་སྐབས་བཅུ་གསུམ་པ་དང་སྤྱི་འཐུས་སྐབས་བཅུ་བཞི་བའི་ལས་ཡུན་འཁྱོལ་ཡོད་པ་མ་རེད། ཚོགས་ཆེན་གྱི་གྲོས་གཞི་ཁག་གི་ཐོག་གཞིས་ཆགས་ཁག་ནས་བགྲོ་གླེང་སྦྱང་བཤད་ལྷུག་པོ་གནང་སྟེ་དགོངས་འཆར་འཁྱེར་ཡོང་གི་ཡོད་པ་རེད། ང་རང་བཀའ་བློན་ཁྲི་པར་ལངས་ནས་དུས་ཚོད་ཞེ་དྲག་ཕྱིན་མེད་སྟབས། མི་མང་གི་སེམས་ནང་ཚོར་བ་ཤུགས་ཆེན་པོ་ཡོད་པ་རེད། ངས་བསམ་འཆར་འདྲ་བཏོན་པ་ཡིན་ན། ང་ལ་རྒྱབ་སྐྱོར་བྱེད་མཁན་ཚོས་ངའི་བསམ་ཚུལ་ལ་རྒྱབ་སྐྱོར་བྱེད་པ་དང་། འོས་མི་གཞན་ལ་རྒྱབ་སྐྱོར་བྱེད་མཁན་ཚོས་དགོངས་འཆར་གཞན་པ་གསུང་སྲིད་པ་རེད། དེ་འདྲ་བྱུང་བ་ཡིན་ན་མཉམ་རུབ་ཀྱི་ནུས་པ་འཐོན་ཐུབ་པ་མ་རེད། རྒྱུ་མཚན་དེ་དག་ལ་བསམས་ཏེ་ང་རང་སྒེར་གྱི་བསམ་ཚུལ་མི་བཤད་རྒྱུར་འབད་བརྩོན་ཞུ་བཞིན་ཡོད།
དྲི་བ། ཉེ་ལམ་༧གོང་ས་མཆོག་གི་དམིགས་བསལ་སྐུ་ཚབ་རྣམ་གཉིས་ཀྱིས་བཀའ་བློན་ཁྲི་པའི་འོས་མི་རྣམ་པར་ནང་ཚགས་ཀྱི་བཀའ་མོལ་ཞིག་གནང་ཡོད་རབས་གོ་སོང་ལ། ད་ཆར་སྐུ་ཉིད་ཀྱིས་བོད་རྒྱ་འབྲེལ་མོལ་ཐོག་ལས་དོན་ཇི་ལྟར་མགོ་བརྩམ་འཆར་ཡོད་དམ།
ལན། ཉེ་ཆར་ང་ཚོ་བཀའ་བློན་ཁྲི་པར་ལངས་མཁན་འོས་མི་གསུམ་ལ། དམིགས་བསལ་སྐུ་ཚབ་རྣམ་པས་ནང་ཁུལ་གྱི་བཀའ་མོལ་ཞིག་གནང་སོང་། སྐབས་དེའི་བཀའ་མོལ་གྱི་ནང་དོན་ཁག་དམིགས་བསལ་གསང་བ་དེ་འདྲ་མ་རེད། བཀའ་བློན་ཁྲི་པའི་ངོས་ནས་༧གོང་ས་མཆོག་གི་དགོངས་གཞི་དང་། བོད་རྒྱ་ཆེའི་མི་མང་གིས་ཐག་གཅོད་གནང་བའི་སྲིད་བྱུས་དེ་ལག་བསྟར་བྱ་དགོས་པ་དེ་རེད། འདིའི་ཐད་ང་རང་སྒེར་ངོས་ནས་ཀྱང་སྔོན་མ་ནས་བཤད་བསྡད་པ་ལྟར། བོད་རྒྱ་ཆེའི་མི་མང་གིས་ཐག་གཅོད་གནང་བཞག་པའི་དབུ་མའི་ལམ་གྱི་ཐོག་ལ་ཤར་སྐྱོད་བྱ་རྒྱུ་ཡིན་ལ། འཕྲལ་ཕུགས་གང་ཐད་ནས་བསམ་བློ་བཏང་ཡང་། ལམ་ཁ་འདི་ལས་ལྷག་ཅིག་མཐོང་གི་མི་འདུག འོན་ཀྱང་བོད་རྒྱ་འབྲེལ་མོལ་གྱི་སྐུ་ཚབས་དང་། ཕྱི་རྒྱལ་དོན་གཅོད་ཁག་དེ་སྔ་བཞིན་མུ་མཐུད་༧གོང་ས་མཆོག་གི་མཚན་ཐོག་ནས་གནང་དགོས་པ་རེད་བསམ་གྱི་ཡོད། རྒྱ་གཞུང་གིས་སྔོན་མ་བཙན་བྱོལ་གྱི་མི་རབས་རྒན་པ་རྫོགས་སྐབས། བཙན་བྱོལ་བོད་གཞུང་སྦོ་ལུག་གི་རེད་ཟེར་བ་དེའི་ཐད། བཙན་བྱོལ་སྤྱི་ཚོགས་ཀྱིས་དབུ་ཁྲིད་གསར་པ་འོས་འདེམས་ལ་དོ་སྣང་ཆེན་པོ་བྱེད་ཀྱི་ཡོད་པ་དང་། ང་དང་ང་ལྟ་བུའི་གཞོན་སྐྱེས་མང་པོ་ཞིག་མདུན་དུ་ཐོན་ཏེ། མི་རབས་རྒན་པའི་ལས་འགན་དེ་དག་དགའ་བཞིན་སྤྲོ་བཞིན་རྩིས་ལེན་བྱེད་ཀྱི་ཡོད་པ། མི་རབས་རྒན་པའི་རྩ་དོན་འཐབ་རྩོད་ལ་དཀའ་ལས་བརྒྱབ་པའི་འཕྲོས་དེར་མི་རབས་གསར་པ་ཚོ་འཇུག་བཞིན་ཡོད་པ་འདིས་པེ་ཅིན་ལ་བརྡ་ལན་གསལ་བོ་ཞིག་བསྟན་ཡོད་སྟབས། ཉེ་ལམ་འོས་ཤོག་བླུགས་པའི་རྗེས་ཀྱི་ཉིན་གཉིས་པར་འཇིགས་སྐུལ་རིང་ལུགས་པ་རེད་ཟེར་ནས་ང་ལ་ཁ་མཆུ་ཆེན་པོ་ཞིག་བཙུགས་པ་རེད། དེ་ནི་ཁོང་ཚོའི་ཐོག་མའི་རྩིས་རྒྱག་སྟངས་འཁྲུག་ཡོད་པ་ངོས་ཟིན་བྱུང་བའི་རྟགས་རེད།
དྲི་བ། ཐེངས་འདིར་བཅའ་ཁྲིམས་བསྐྱར་བཅོས་དང་བསྟུན་ཏེ། བཀའ་ཁྲི་གཙོས་པའི་བཀའ་བློན་རྣམ་པའི་ལས་ཡུན་དུས་ཚོད་ངེས་མེད་བཟོས་ཡོད་པ་དེའི་ཐད་དགོངས་འཆར་གང་འདྲ་ཡོད་དམ།
ལན། འདིའི་སྐོར་ལ་ངས་སྔོན་མ་གསར་ལམ་ཁག་ཅིག་ནང་བཤད་པ་ཡིན། བཀའ་བློན་གྱི་ཡུན་ཚད་དེ་དུས་ཚོད་ངེས་མེད་དུ་མ་བཞག་ན་བསམ་ཡོད། བཀའ་བློན་ཁྲི་པར་སུ་ཞིག་ཕེབས་ཀྱང་ལོ་བཅུའི་ནང་ལས་དོན་མ་འགྲུབ་པ་དེ་འདྲ་ཡོང་གི་མ་རེད། ངས་དུས་རྒྱུན་བཤད་བསྡད་ཡོད། བཀའ་བློན་ཁྲི་པའི་དུས་ཚོད་རྒྱས་བཅད་ཡོད་ན་ཡག་པོ་ཡོད་པ་རེད། དུས་ཚོད་འགྱུར་བཞིན་ཡོད་པ་རེད། མི་རབས་རྗེ་བཞིན་ཡོད་པ་རེད། མིའི་བསམ་བློ་གཏོང་ཕྱོགས་དང་གནས་ཚུལ་ཆ་ཚང་ལ་འགྱུར་བ་འགྲོ་བཞིན་ཡོད་པ་རེད། མི་རབས་གསར་བར་གོ་སྐབས་སྤྲོད་དགོས་པ་རེད། གལ་སྲིད་བཀའ་བློན་ཁྲི་པས་ལོ་བཅུའི་ནང་རྫོགས་མ་ཐུབ་པའི་ལས་ཀ་འདྲ་ཡོད་ན། བཀའ་བློན་ཁྲི་ཟུར་ཡིན་པའི་སྐབས་སུ་གནང་ཡང་ལམ་ཁ་ཁྱོན་ནས་མེད་པ་དེ་འདྲ་མ་རེད།
དྲི་བ། ༧གོང་ས་མཆོག་གིས་ད་ནས་བཟུང་ཆབ་སྲིད་དང་འཛིན་སྐྱོང་གཉིས་ཀའི་སྐུ་དབང་མཚམས་འཇོག་གནང་གི་ཡོད་པ་རེད། སྐུ་ཉིད་ལ་མཚོན་ན་ལོ་རྒྱུས་ཀྱི་དཀྱོག་མཚམས་ཆེན་པོ་ཞིག་གི་བཀའ་བློན་ཁྲི་ཆགས་ཡོད་སྟབས། དབང་ཚད་དང་ལས་འགན་གྱི་ཐད་ནས་དགོངས་ཚུལ་གང་འདྲ་ཡོད་དམ།
ལན། ༧གོང་ས་མཆོག་གིས་ཕུགས་རྒྱང་རིང་པོ་ཞིག་ལ་གཟིགས་ཏེ། ཆབ་སྲིད་ཀྱི་སྐུ་དབང་དེ་མི་མང་གིས་བདམས་པའི་མགོ་ཁྲིད་ལ་སྤྲོད་བཞིན་ཡོད་པ་རེད། དེ་ནི་ཧ་ཅང་གི་གཟི་བརྗིད་ཆེན་པོ་ཞིག་ལ་ངོས་འཛིན་བྱེད་ཀྱི་ཡོད། རྒྱལ་སྤྱིའི་གསར་འགྱུར་བརྒྱུད་ལམ་ཁག་གིས་དོ་སྣང་ཆེན་པོ་བྱེད་ཀྱི་འདུག ལྷག་པར་དུ་ཉིན་འདི་གར་ང་ལ་གསར་འགྱུར་བརྒྱུད་ལམ་ཁག་གིས་དོ་སྣང་ཤུགས་ཆེན་བྱེད་ཀྱི་ཡོད་པ་དེ་ཡང་། གཙོ་བོ་༧གོང་ས་མཆོག་གི་གནང་སྟངས་དེ་ལ་བརྟེན་ནས་བྱུང་བ་རེད། སོ་སོར་ལས་འགན་ལྕི་རུ་སོང་བ་དེར་བློ་འཚབ་དང་ཞེད་སྣང་གང་ཡང་མི་འདུག ༧གོང་ས་མཆོག་བཞུགས་བཞུགས་པ་རེད། ལམ་སྟོན་བཀའ་སློབ་ཞུ་ས་ཡོད་པ་རེད། དེར་བརྟེན་སེམས་ནང་གདེང་ཚོད་གང་ལ་གང་འཚམ་སླེབ་ཀྱི་འདུག་ལ། ང་རང་གི་ངོས་ནས་ཀྱང་དཀའ་ལས་རྒྱག་གི་ཡིན་བསམ་པའི་ཆོད་སེམས་ཡོད་ལ། རྒན་རབས་པ་དག་གིས་ང་ལ་རྒྱབ་སྐྱོར་གནང་གི་རེད་བསམ་པའི་ཡིད་ཆེས་ཀྱང་ཡོད།
དྲི་བ། སྐུ་ཉིད་བཀའ་བློན་ཁྲི་པར་འོས་ཐོབ་ཡོད་སྟབས་བོད་ཀྱི་དུས་བབ་བརྒྱུད་དེ་བོད་གཞིས་བྱེས་མི་མང་ལ་འབོད་སྐུལ་འདྲ་ཞུ་རྒྱུ་ཡོད་དམ།
ལན། འོས་བསྡུའི་ཁྲོད་ང་ལ་རྒྱབ་སྐྱོར་གནང་མཁན་ཡོངས་ལ་སྙིང་ཐག་པ་ནས་ཐུགས་རྗེ་ཆེ་ཞུ་བཞིན་ཡོད་ལ། དེ་དང་ཆབས་ཅིག་འོས་ཤོག་ནང་འཛུལ་ཞུགས་གནང་མཁན་ཡོངས་ལ་ཐུགས་རྗེ་ཆེ་ཞུ་བཞིན་ཡོད། བཀའ་བློན་ཁྲི་པར་བཞེངས་མཁན་བསྟན་འཛིན་རྣམ་རྒྱལ་ལགས་དང་། བཀྲ་ཤིས་དབང་འདུས་ལགས་རྣམ་གཉིས་འོས་བསྡུའི་ནང་ཞུགས་པ་དེ་ནི། བོད་པའི་རྩ་དོན་འཐབ་རྩོད་དང་ལོ་རྒྱུས་ནང་ཧ་ཅང་གཟི་བརྗིད་ལྡན་པ་ཞིག་ཆགས་ཡོད། ཁོང་རྣམ་པ་གཉིས་ལ་ངས་ཚར་གཉིས་ལ་གློག་འཕྲིན་བརྒྱུད་འབྲེལ་བ་གནང་ཡོད། ཁོང་རྣམ་པས་ཀྱང་ང་ལ་འཚམས་འདྲིའི་གློག་འཕྲིན་འབྱོར་སོང་། དེ་བཞིན། འོས་བསྡུའི་ལས་རིམ་འདིས་ང་ལ་ཕན་ཐོགས་ཆེན་པོ་ཞེ་དྲག་བྱུང་སོང་། བསམ་བློ་གཏོང་སྟངས་དང་འཆར་གཞི་བསྒྲིག་རྒྱུར་ལམ་ཕྱོགས་གསལ་པོ་བསྟན་སོང་། མ་འོངས་པར་ང་ཚོ་ཚང་མ་རྡོག་རྩ་ཆིག་སྒྲིལ་གྱིས་༧གོང་ས་མཆོག་གི་བཀའ་དགོངས་གཞིར་བཟུང་ལས་ཀ་བྱ་དགོས་པ་རེད། དེ་བཞིན། བོད་ནང་གི་ཤ་ཁྲག་གཅིག་པའི་བོད་རིགས་སྤུན་ཟླ་ཚོས་བོད་ལ་རང་དབང་ག་དུས་འཐོབ་རྒྱུ་དང་། ༧གོང་ས་མཆོག་གི་ཞལ་ག་དུས་མཇལ་རྒྱུར་བསྒུག་བསྡད་ཡོད། ངས་སྔོན་མ་ཁས་ལན་གང་བྱས་ཐམས་ཅད་ལ་དམ་བཅའ་བརྟན་པོས་ཐོག་ནས་ཤུགས་རྒྱག་རྒྱུའི་ཆོད་སེམས་ལ་འགྱུར་བ་མེད།
གསར་འགོད་པ། དོན་གྲུབ་བཀྲིས།
མཁས་དབང་བློ་བཟང་སེང་གེས་NDTV་ཐོག་ཏུ་སྐད་ཆ་བཤད་པའི་སྐབས་སུ། ངས་མིང་དོན་མཚུངས་པའི་རང་སྐྱོང་གི་དབུ་མའི་ལམ་གྱི་སྲིད་ཇུས་ལ་རྒྱབ་སྐྱོར་བྱེད་ཀྱི་ཡོད། བོད་ཀྱི་གཞོན་སྐྱེས་རྣམས་ཀྱིས་རང་བཙན་འདོད་པ་དང་ཁོང་ཚོས་ང་ལ་བོད་ནང་དུ་རང་དབང་ཞིག་བཟོ་དགོས་པར་རེ་བ་བྱེད་བཞིན་ཡོད། དེར་བརྟེན། ད་ལྟ་ང་ལྟ་བ་གཉིས་ཀྱི་བར་དུ་གནས་ཡོད་ཟེར་བ་ལ་བལྟས་ན་ཁོང་གི་མ་འོངས་པའི་སྲིད་ཇུས་ཀྱི་ལངས་ཕྱོགས་དེ་ད་དུང་ལམ་ཁ་གང་ཞིག་ཏུ་འགྲོ་རྒྱུའི་གཏན་འཁེལ་མེད་པ་གསལ་བོ་རེད།
བློ་བཟང་སེངྒེ་མཆོག་ལ།
ད་དུང་བཀའ་ཁྲིའི་འོས་ཤོག་ཐོབ་པ་ཙམ་ལས་ཁོང་གིས་བྱ་གཅིག་ཀྱང་མགོ་བཟུང་མེད་ན། སྔོན་མ་ཁས་ལེན་གང་བྱས་ཐམས་ཅད་ལ་ད་ནས་འགྱུར་བ་འགྲོ་དོན་ཅི་ཡོད། ཁྱེད་ཀྱིས་བཤད་པས་བསྒྲིགས་འཛུགས་དང་འཆར་གཞི་རྣམས་ལེགས་པོ་མཐོང་ནས་ང་ཚོས་ཁྱེད་ལ་འོས་ཤོག་འཕངས་པ་རེད།
ད་ནི་རེ་བ་གཉིས་པ་དེ། ཁྱེད་ཀྱིས་ཁ་བཤད་དོན་ལ་ཡོད་མེད་རིམ་གྱིས་བལྟ་རྒྱུ་ཡིན་མ་གཏོགས། གཞན་བྱ་བ་མ་མཐོང་གོང་ནས་བསྟོད་སྨད་ཅི་བྱེད། སྤྱིར་བོད་པའི་སྤྱི་ཚོགས་འདི་རྒྱུ་མཚན་མ་རྟོགས་གོང་ནས་འུར་རྒྱག་རྒྱུ་ལ་ཧ་དགའ་པོ་འདུག
ཕར་ཆེར་སྤྲེའུ་རྒྱུད་པ་ཡིན་པའི་རྒྱུ་མཚན་ཀྱིས་ཡིན་པ་འདྲ།
བོད་གཞི་བྱེས་གཉིས་ནས་རེ་བ་དང་ཡིད་ཆེས་ཇི་ཙམ་བྱ་ཡིས་ཡོད་མེད་སྐུ་ངོ་མཆོག་ནས་མཁྱེན་གསལ་དང་། འོན་ཀྱང་ཉིད་ཀྱི་མཁས་བླངས་པ་ཐམས་ཅད་སྒྲུབ་ཐུབ་པའི་ངེས་པ་མེད་ཀྱང་མཁས་ལེན་ལག་བལྟར་བྱ་དགོས་པ་དོན་གྱི་དམ་ཡིན། དེ་ལྟར་མ་བྱུང་བ་ཡིན་ན་དེ་རིང་བསྟོད་པ་འཐེན་ཡང་། སང་ཉིན་ངོ་རྒོལ་མི་བྱེད་པའི་ངེས་པ་མེད་པས་དེ་ལུགས་ཟབ་ཟབ་དགོས་པའི་རེ་སྐུལ་ཞུ་རྒྱུ་ལས་གཞན་གང་ཡང་ཤོད་རྒྱུ་མེད།
ཕ་བཟང་གི་བུ། ཁ་བཤད་ལག་ཐོག་ཏུ་ལོན་རྒྱུ་དེ་ངེད་བོད་པ་ཚང་གི་གཤིས་སྤྱོད་ཡིན་པས་མ་བརྗེད་པར་ཡིད་ལ་ཉོར། ལས་དོན་རྣམས་ཡིད་རེ་བཞིན་འགྲུབ་པའི་སྨོན་འདུན་འང་བྱེད།
ངས་སྔོན་མ་ཁས་བླངས་བྱས་པ་ཐམས་ཅད་ལ་འགྱུར་བ་མེད།
དེ་ཤིན་ཏུ་ལེགས་འོན་ཀྱང་ཆབ་སྲིད་པ་སུ་འདྲ་ཞིག་ཡིན་རུང་དེ་འདྲ་རང་བཤད་ཀྱི་རེད།
དཔེར་ན་རྒྱ་གར་གྱི་འོས་སློང་བའི་ཚེ་ན་ལམ་ཁ་མེད་སར་ལམ་བཟོ་རྒྱུ་དང་ཆུ་མེད་སར་ཆུ་འདྲེན་རྒྱུ་སྨན་ཁང་མེད་སར་སྨན་ཁང་བཟོ་རྒྱུ་ལས་སོགས་སྐད་ཆ་ལུང་པ་གང་ཤོད་ཀྱི་རེད།
འོན་ཀྱང་ཁོ་འོས་ཐོབ་ཚར་དུས་ཐུག་ས་དང་སྐད་ཆ་ཤོད་ས་ཡང་མི་ཐོབ་ཅིང་སྔར་གྱི་སྐད་ཆ་ཐམས་ཅད་རྙིང་དྲི་ཐུལ་ལེར་འགྱུར་བཞིན་ཡོད།
ཁྱེད་ནས་༧གོང་ས་༧་མཆོག་པོ་ཏ་ལར་གདན་འདྲེན་ཞུ་ཐུབ་པ་བྱེད་ཀྱི་ཡིན་གསུངས་ཡོད་དེ་གཅིག་པོར་བསྒྲུབ་ཐུབ་པ་བྱུང་ན་ང་ཚོར་དེས་ཆོག
དེ་མིན་ཟམ་གདོང་རིན་པོ་ཆེ་ཡིས་རྒྱ་གར་གྱི་ཁྲིམས་དང་ཆབ་སྲིད་འགྲོ་ལུགས་རྣམས་དཔེ་བཤུས་ཏེ་ལོ་ངོ་བཅུ་འདས།
ཁྱེད་ཀྱིས་ཨ་རི་ཡི་ཁྲིམས་དང་ཆབ་སྲིད་འགྲོ་ལུགས་དཔེ་བཤུས།
ཉིན་ཅིག་བོད་མི་རྣམས་ཤར་ནུབ་གཉིས་ཀྱི་ཁྲིམས་དང་ཆབ་སྲིད་ཐམས་ཅད་ཉ་དང་ཉུང་མ་བསྲེས་ཏེ་མགོ་བོ་རྨོངས་སུ་བཅུག་སྟེ་འཇིག་རྟེན་གྱི་བར་དོར་འཁྱམས་སུ་འཇུག་ཉེན་འདུག
དེ་ཁྱེད་ཀྱི་ཐུགས་ལ་འཇག་རོགས།
བཀའ་བློན་ཁྲི་པ་བློ་བཟང་སེང་གེ་ལགས་སྙིང་རྗེའི་ཡུལ་དུ་གྱུར་འདུག བོད་ཀྱི་དོན་དུ་དཀའ་ངལ་ཇི་ཙམ་བརྒྱབ་དགོས་དྲན་ནའང་། ད་ལྟའི་བཀའ་ཁྲི་དང་སྤྱི་འཐུས་རྣམས་ཀྱིས་བོད་གཞུང་ནུས་མེད་དུ་བཟོ་ཚར་སེམས།
བོད་མི་ཞེས་པ་འདི་བསོད་ནམས་མེད་པའི་སྒང་ལ་ཡོད་སྡད་པའི་ཚོེ་བ་ཞིག་བྱུང་གངས་ཅན་སྐྱེ་འགྲོ་ཡོངས་ཀྱི་ངེས་པ་དོན་གྱི་༧སྐྱབས་གཅིག་ཞི་བའི་མགོན་པོ་ཡིད་བཞིན་ནོར་བུ་ནི་ཞལ་བཞུགས་གནང་།
གཞོན་སྐྱེས་ལྷག་བསམ་ཅན་དང་ཤེས་ཡོན་ཅན་གྱི་བོད་དོན་འཐབ་རྩོད་ནི་ཇེབརྟན་དང་ཇེ་གླིང་འདུག། རྒན་རབས་ལོ་རྒྱུས་དང་འཛིན་སྟང་གི་ཕྱུག་པའི་ཕོ་རབ་རྣམས་ནི་རི་བཞིན་བརྗིད།
བཀའ་སྤྱི་གཉིས་ལས་གྲུབ་པའི་དབུ་ཁྲིད་ཆོད་སེམ་ཆེན་པོ་དང་ཤེས་ཡོན་ཆེན་པོ་གདམ་ཁ་མི་ནོར་བ་ལམ་ལྷོང་བྱུང་འདུག་པས་ངོ་མ་དགའ་འོས་པ་ཞིག་ཅི་ཡི་ཕྱིར་མིན
བཀའ་ཁྲི་ལགས་དེ་དེ་བཞིན་འགྲུབ་པའི་རེ་བ་དང་ཡིད་ཆེས་ཀྱི་ཁེང་ཡོད།
བོད་མི་ཚོ་མཐུན་བསྒྲིལ།
མཐུན་སྒྲིལ་ནི་སྲོག་རྩ་ཡིན་ལ་མཐུན་སྒྲིལ་ནི་མེད་དུ་མི་རུང་བ་ཞིག་ཡིན་པས་མཐུན་སྒྲིལ་བྱོས་ཡ། མཐུན་སྒྲིལ་ལས་ལྷག་པ་ཞིག་མེད་ཁི། ཕ་བཟང་བུ་ཚོ།
ལས་དོན་རྣམས་ལེགས་འགྲུབ་ཡོང་བས་ཡིད་ཆེས་དང་རེ་བའི་ཁེངས།
དེ་དེ་བཞིན་དུ་འགྲུབ་པར་གྱུར་ཅིག དེ་དེ་བཞིན་འགྲུབ་ནས་བོད་རྒྱལ་བར་གྱུར་ཅིག བོད་རྒྱལ་ལོ། བོད་རྒྱལ་ལོ། བོད་རྒྱལ་ལོ།
སྐུ་ངོ་ལགས། གསུང་འབྱོན་རྒྱུ་དེ་གལ་ཆེན་རེད། བོད་མིས་སྐུ་ཉིད་བཀའ་ཁྲིར་གདམ་ཡོད་ཀྱང་ཟིན་བྲིས་ཚོགས་ཆུང་གིས་སྐུ་ཉིད་བཙན་བྱོལ་སྐྱིད་སྡུག་གི་ཚོགས་གཙོར་འགྱུར་བ་གཏོང་བཞིན་པས། ངེས་པར་དུ་གསུང་འབྱོན་དགོས་ཀྱི་འདུག གལ་སྲིད་སྐུ་ཉིད་ནས་གསུང་མ་འབྱོན་ཚེ་སྐུ་ཉིད་ཀྱང་ཚོགས་འདུ་འདིར་ཞུགས་ཟིན་པས། འོས་འགན་ལ་གཡོལ་ཐབས་མེད་ལ། ལོ་རྒྱུས་ཀྱི་ནག་ཉེས་ཅན་དུ་མི་འགྱུར་བའི་ངེས་པའང་མེད། གཞན་རྒྱ་མིའི་གཞུང་གིས་གོང་ས་མཆོག་དང་ཁོང་གི་མཐའ་འཁོར་གྱི་མི་ཁ་ཤས་ཀྱི་མདུན་ལམ་གཏོགས་བཤད་ཀྱི་མིན་ཞེས་ས་བསྒྲགས་གནམ་བསྒྲགས་གནང་བཞིན་པས། ཞི་མོལ་ལྟ་བུའི་ཕྱོགས་ལ་རེ་བ་ཆེར་མེད་ལ། སྔར་ཡོད་སྲ་བརྟན་གྱིས་གོ་སྐབས་ལ་སྒུག་རྒྱུ་ལས་ལྷག་མེད། གལ་སྲིད་སྔར་ཡོད་ལ་འགྱུར་བ་ཐེབས་པའི་ཕྱི་ཉིན། རོགས་བསྐྱོར་གནང་མཁན་ཚོའང་ཐབས་ལམ་ལྷག་མེད།
བོད་ནང་ནས་མཁས་དབང་བློ་བཟང་སེང་གེ་མཆོག་བཀའ་ཁྲི་ཕེབས་པའི་རྟེན་འབྲེལ་གླུ་གཞས་དང་སྙན་རྩོམ་མང་པོ་ཞིག་ཐོན་དང་ཐོན་བཞིན་ཡོད་འདུག་ལ་དེ་ཡང་ན་དཔེ་ན་བོད་ནང་གཞས་མ་ཀུན་དགའ་སྒྲོལ་མས་གླུ་གཞས་ཆེད་སྒྲིག་དང་བོད་མགོ་ལོག་ཕྱོགས་ནས་ཡིན་པའི་གཞས་པ་ཡེ་ཤེས་གྲགས་པ་ལགས་ཀྱི་གླུ་གཞས་ཆེད་སྒྲིག་སོགས་ཀྱི་ནང་དོན་(སེང་གེ་སུམ་འཛོམ།) ཞུས་པ་སོགས་ཐོན་ཡོད་དེ་བཞིན་བོད་ནང་གི་སྙན་ངག་པ་གྲགས་ཅན་ལྷམ་ཀོག་ནས་(ལྷ་རྒྱལ་ལོ་)ཞུས་པའི་སྙན་རྩོམ་དང་ས་དཀྱིལ་ཚེ་བཀྲ་ནས་(ཁྲི་ལ་གསོལ་བའི་མི།)ཅེས་པ་སོགས་མང་པོ་ཐོན་འདུག། དེ་ཡང་མི་མང་གི་འོས་འདེབས་བྱེད་པའི་བཀའ་ཁྲི་སྐབས་གསུམ་པ་ཁོང་ལ་དམིགས་བསལ་རྒྱལ་སྤྱིའི་དོ་སྣང་སྤྲོད་ཏེ་ད་བར་སྙན་གྲགས་ཆེ་བའི་དྲ་ལམ་དང་བརྙན་འཕྲིན་ཚགས་ཤོག་སོགས་སུ་New Prime Minister of Tibet Dr Lobsang Sangay མཁོད་པའི་ནང་དོན་ལྟར་བོད་ཀྱི་སྲིད་བློན་གསར་པ་མཁས་དབང་བློ་བཟང་སེང་གེ་ཅེས་ཁ་གཅིག་གྲགས་ཏུ་ཐོན་ཡོད་། དེ་ཡང་དུས་འདི་ནི་བོད་ཀྱི་ལོ་རྒྱུས་དཀྱོག་མཚམས་ཆེན་པོ་ཞིག་གི་སྐབས་ཡིན་པས་དམངས་ཚོགས་ཁྲོད་དུས་ཀྱི་གནང་བའི་དངོས་གྲུབ་རེད་ཟེར་བའི་བོད་མིའི་ལྟ་ཚུལ་དང་དངོས་ཡོད་ཤེས་ཡོན་ཀྱི་ཚད་འཛིན་ཆོག་པའི་རྒྱལ་སྤྱིའི་ཁོང་ལ་ལྟ་ཚུལ་གཉིས་ཁ་མ་བྲལ་བ་གཅིག་ཏུ་སྤུངས་ནས་བལྟས་ན་ཁོང་ནི་བོད་གསར་པའི་དབུ་ཁྲིད་ཐོག་མ་དེ་ཆགས་ཡོད།