རྒྱ་ནག་ལ་མགོ་འདོགས་ཞུས་པའི་བཅའ་ཁྲིམས་བསྐྱར་བཅོས།

སྐལ་བཟང་དགྲ་འདུལ།

ད་ལྟའི་བཅའ་ཁྲིམས་འཆར་ཟིན་ནང་རྒྱལ་བ་རིན་པོ་ཆེ་ཆབ་སྲིད་ཐུགས་འགན་མ་བཞེས་པར།  དགའ་ལྡན་ཕོ་བྲང་སྲིད་དབང་མཇུག་བསྒྲིལ་རྒྱུ་དེ་གནད་དོན་ཆེ་ཤོས་ཆགས་ཀྱི་མེད་པ་འདྲ་པོ་ཆགས་འདུག དེ་ལས་ཀྱང་ཆེ་བ་ཞིག་ནི་ཁྲིམས་ཐོག་ནས་བོད་རྒྱལ་ཁབ་ཀྱི་གནས་བབ་དེ་རྦད་དེ་མེད་པ་བཟོས་ཏེ་རྒྱ་ནག་གི་མངའ་སྡེའི་གནས་བབ་དུ་བསྒྱུར་རྒྱུ་དེར་གྱུར་འདུག   

རྒྱུ་མཚན་ནི་སྔོན་ཆད་བཅའ་ཁྲིམས་ནང་ཡོད་པའི་བོད་རྒྱལ་ཁབ།  བོད་རྒྱལ་ཁབ་ཀྱི་དབུ་འཛིན།  བཙན་བྱོལ་བོད་གཞུང་ཞེས་པ་ཐམས་ཅད་མེད་པ་བཟོས་ཡོད།  དཔེར་ན།  བཅའ་ཁྲིམས་ཀྱི་ལེའུ་ལྔ་པ་དོན་ཚན་ང་བདུན་པའི་ནང་གསེས་དང་པོའི་ནང་རྒྱལ་ཁབ་ཀྱི་ཁེ་ཕན་ཆེད་ཅེས་པར་མི་རིགས་ཀྱི་ཁེ་ཕན་ཆེད་ཅེས་བསྒྱུར་ཡོད། བོད་རྒྱལ་ཁབ་ཀྱི་དབུ་འཛིན་དགོས་ཀྱི་མེད་སྐོར་བརྗོད་ནས་ཐ་སྙད་འདི་དང་འབྲེལ་བའི་དོན་ཚན་ཡོངས་རྫོགས་ཕྱིར་བསྡུ་བྱས་ཡོད།   ཡང་བཙན་བྱོལ་བོད་གཞུང་ཞེས་པའི་ཐ་སྙད་འདི་བཙན་བྱོལ་བོད་མིའི་གཞུང་གི་སྒྲིག་འཛུགས་ཞེས་བསྒྱུར་ཡོད།   བཅའ་ཁྲིམས་རྙིང་པའི་ནང་དུ་ཡོད་པའི་གཞུང་དང་རྒྱལ་ཁབ་ཀྱི་དབུ་ཁྲིད་ཅེས་པའི་ཐ་སྙད་ལ་གཞུང་གི་ཚབ་ཏུ་འཛིན་སྐྱོང་དང་རྒྱལ་ཁབ་ཀྱི་ཚབ་ཏུ་མི་རིགས་བསྒྱུར་ཏེ་འཛིན་སྐྱོང་དང་མི་རིགས་ཀྱི་དབུ་ཁྲིད་ཅེས་བཟོས་ཡོད།  

གསར་དུ་འགྱུར་བ་བཏང་བའི་ཐ་སྙད་འདི་དག་ནི་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་ཁྲིམས་སྒྲོམ་གཞི་དང་ཡོངས་སུ་མཐུན་པ་རེད།  འགལ་རྐྱེན་གང་ཡང་མེད།  འོན་ཀྱང་བོད་མི་ཚོས་ད་བར་རྗོད་བཞིན་པའི་བོད་རྒྱལ་ཁབ་དང་བོད་གཞུང་ཞེས་པ་དེ་ད་ནས་བཟུང་རང་ངོས་ཀྱིས་ཁྲིམས་ཐོག་ནས་འགྱུར་བ་བཏང་སྟེ་རྒྱ་ནག་གཞུང་ལ་མགོ་འདོགས་ཞུས་པར་ཆགས་མི་འདུག་གམ།

ཐ་སྙད་འདི་དག་སྔོན་བརྗོད་ནང་དུ་བསླེབས་སྐབས།  དངོས་ཡོད་ལོ་རྒྱུས་དང་མ་མཐུན་པ་ཆགས་ཡོད།  གང་ཡིན་ཞེ་ན།  འདས་པའི་བཙན་བྱོལ་བརྒྱུད་རིམ་ནང་།  རྒྱལ་བ་རིན་པོ་ཆེ་བོད་རྒྱལ་ཁབ་དང་གཞུང་གི་དབུ་ཁྲིད་དུ་བརྩིས་ཡོད་ལ།  བཙན་བྱོལ་བོད་གཞུང་ཞེས་བཅའ་ཁྲིམས་སུ་གཏན་འབེབས་གནང་ཡོད།  འོན་ཀྱང་ད་ལྟ་ལོ་རྒྱུས་སུ་འགོད་སྐབས།  དེ་དག་ནི་མི་རིགས་དང་འཛིན་སྐྱོང་།  བཙན་བྱོལ་བོད་མིའི་གཞུང་གི་སྒྲིག་འཛུགས་རེད་བརྗོད་པ་ནི་དངོས་ཡོད་ལོ་རྒྱུས་ལ་འཁྱོག་བཤད་བྱས་པ་གྱུར།

འདི་ནི་དབུ་མའི་ལམ་གཞིར་བཟུང་རྒྱ་དམར་ལ་བསྟུན་མཁས་དང་སྤྲེལ་ལད་བྱས་པ་ཡིན་པ།  ད་ལྟ་བཅའ་ཁྲིམས་འཆར་ཟིན་གཉིས་ཀའི་ནང་གསལ་པོར་མཐོང་རྒྱུ་ཡོད་ལ།  ཁ་སང་བཀའ་ཤག་གིས་གཏམ་བཤད་ནང་ཡང་གསལ་པོ་གསུངས་འདུག   དེ་ཡང་བཀའ་ཤག་གསུང་འཕྲིན་ནང་དུ་གསུངས་པར།  “༧གོང་ས་ཆེན་པོའི་བར་སྐབས་ཀྱི་གསུང་བཤད་དང་གསུང་འཕྲིན་ཁག་གི་ནང་ད་ལྟ་སྐྱོང་བཞིན་པའི་དབུ་མའི་ལམ་གྱི་སྲིད་བྱུས་དང་ཕྱོགས་འགལ་འགྲོ་གཞིའི་བརྗོད་ཚིག་གང་ཡང་བེད་སྤྱོད་གནང་མེད།“ཅེས་དང་།  དཔེ་མཚོན་དུ་བོད་རྒྱབ་ཁབ་ཀྱི་དབུ་ཁྲིད་ཚབ་མི་རིགས་ཀྱི་དབུ་ཁྲིད་དང་བོད་གཞུང་གི་དབུ་ཁྲིད་ཚབ་འཛིན་སྐྱོང་དབུ་ཁྲིད་འགྱུར་བ་བཏང་བ་རེད་ཅེས་བརྗོད་ཡོད།  བཀའ་ཤག་གིས་བཅའ་ཁྲིམས་བསྐྱར་བཅོས་ནང་།  བོད་རྒྱལ་ཁབ་ཀྱི་དབུ་འཛིན་བསྐོ་བཞག་བྱ་རྒྱུ་མེད་པའི་ཐད་རྒྱུ་མཚན་གསུངས་པར།  ཡུལ་མིའི་རྒྱལ་ཁབ་ Republic ལག་བསྟར་བྱ་བར། རྒྱལ་ཁབ་ཀྱི་དབུ་ཁྲིད་དགོས་པའི་ངེས་པ་མེད། དེང་དུས་ Republic ཞེས་པ་རྒྱལ་ཁབ་ཀྱི་མངའ་སྡེ་ཁག་ལའང་བེད་སྤྱོད་བྱེད་ཀྱི་ཡོད་པས་དེ་དག་ལ་འོས་འདེམས་བྱས་པའི་རྒྱལ་ཁབ་ཀྱི་དབུ་ཁྲིད་ཀྱི་ཐ་སྙད་ཡོང་དོན་མེད་ཅེས་བརྗོད་ཡོད།  གསུང་འཕྲིན་དུ་ཡིག་ཐོག་མེད་ཀྱང་བཀའ་བློན་ཁྲི་པས་དངོས་སུ་གཏམ་བཤད་གནང་སྐབས།  དཔེ་མཚོན་དུ་ཡང་ཨུ་རུ་སུའི་མངའ་འོག་གི་སོག་རིགས་མངའ་སྡེ་ཁར་མིག་དང་སྦུ་རི་ཡ་བཞག་སྟེ་གསུངས་པར།  རྒྱལ་ཁབ་མིན་པར་རྒྱལ་ཁབ་དབུ་ཁྲིད་དགོས་དོན་མེད་གསུངས། གོང་གི་བཀའ་མོལ་འདི་དག་ཐད་ཀར་བརྗོད་པ་ཡིན་ན།  བོད་ཀྱང་རྒྱ་ནག་གི་ཆ་ཤས་ཏེ་མངའ་སྡེ་ཞིག་རེད།   རྒྱལ་ཁབ་ཅི་གང་མ་རེད།  དེར་བརྟེན་རྒྱལ་ཁབ་ཀྱི་དབུ་ཁྲིད་ཡོང་ཐབས་ཡོད་མ་རེད་ལ་དགོས་ཀྱི་མ་རེད་ཅེས་པ་དེ་རེད།

བཅའ་ཁྲིམས་བསྐྱར་བཅོས་ཟིན་བྲིས་གཉིས་པ་དེའི་ནང་ཚིག་སླ་རུ་བཏང་སྟེ་མི་རིགས་ཀྱི་དབུ་ཁྲིད་ལས་རྒྱལ་ཁབ་ཀྱི་དབུ་ཁྲིད་ཞེས་པའི་ཐ་སྙད་འདི་བཀོད་མེད་ཀྱང་།  སྤྱིར་ཞབས་སྟེགས་འདིའི་སྟེང་མི་སྣ་བསྐོ་རྩིས་ཡོད།  འོན་ཀྱང་དེ་ནི་ཁྲིམས་ཐོག་ནས་བོད་རྒྱལ་ཁབ་ཀྱི་ངོ་བོ་དོར་ཏེ་རྒྱ་གཞུང་ལ་མགོ་བཏགས་ཞུ་རྒྱུར་འགོག་རྐྱེན་ཆེ་བ་བརྟེན།  ཟིན་བྲིས་དེ་ཚོགས་ཆུང་ནང་མང་མོས་མེད་རྐྱེན་གསུངས་ཏེ་ཁ་སང་ཚོགས་འདུ་དངོས་སུ་མ་འཚོགས་བར་འགྲེམས་སྤེལ་བྱས་མེད།  

དོན་དངོས་ཐོག  ད་ལྟའི་བཅའ་ཁྲིམས་འཆར་ཟིན་གྱིས་ད་ནས་བཟུང་བོད་ལ་ཁྲིམས་ཐོག་ནས་རྒྱལ་ཁབ་ཀྱི་གནས་བབ་མེད་པར་བཟོས་ཏེ་རྒྱ་ནག་གི་ཆ་ཤས་ཤིག་ཡིན་པར་བསྒྱུར་ཡོད།  འོན་ཀྱང་མི་མང་པོས་གནད་དོན་འདི་ཐུགས་སྣང་དེ་ཙམ་མ་བྱུང་བ་རེད་དམ།  ཡང་ན་ང་འཁྲུལ་བ་རེད།  གལ་སྲིད་འཁྲུལ་མེད་ན། འགྱུར་བ་འདི་རྒྱ་ནག་ལ་ཆེས་མཐའ་མཇུག་གི་མགོ་བཏགས་ཞུ་བའི་ཚོགས་འདུ་དེ་རེད་ཞུས་ན་འགྲིག་གི་འདུག་གམ།   ཁ་སང་དབུ་འབྱེད་མཛད་སྒོའི་ཐོག   སྤྱི་འཐུས་ལྷན་ཁང་དང་བཀའ་ཤག་གིས་གསུངས་བཤད་ནང་།    ཚོགས་འདུ་འདི་ནི་བོད་ཀྱི་ལོ་རྒྱུས་ནང་རླབས་པོ་ཆེའི་འགྱུར་མཚམས་ཞིག་དང་བྱུང་རབས་ཀྱི་དོན་སྙིང་ལྡན་པ་ཞིག་རེད་བརྗོད་པ་འདི་དེ་ལྟར་རེད་དམ།

ཕྱི་ལོ་ ༢༠༡༡  ཟླ་ ༥ ཚེས་ ༢༢ ཉིན།