བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་པ་ཚོགས་ཏེ་ཉིན་གཉིས་ལྷག་གི་བགྲོ་གླེང་བརྒྱུད་བཅའ་ཁྲིམས་བསྐྱར་བཅོས་ཟིན་བྲིས་ཀྱི་སྔོན་གླེང་ལ་ཚོགས་ཆུང་མང་ཆེ་བས་སྤྱི་མོས་བྱུང་འདུག
ཕྱི་ཚེས་༢༡ཉིན་གྱི་ཕྱི་དྲོ་ནས་བཟུང་བོད་གཞུང་མང་རྒྱལ་ཡོངས་ཚོགས་ཆེན་གྱི་ཚོགས་ཞུགས་པ་རྣམས་ཚོགས་ཆུང་བཅུ་རུ་བགོས་ཏེ།བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་གི་ཟིན་ཐོའི་སྔོན་གླེང་དང་དོན་ཚན་དང་པོའི་སྐོར་ལ་ས་གནས་མི་མང་གི་བསམ་ཚུལ་དང་འབྲེལ་བགྲོ་གླེང་གོ་བསྡུར་གནང་ཡོད་པ་ལྟར། དེ་རིང་གསར་འགོད་པས་ཚོགས་ཆུང་ཁག་ཅིག་གི་ནང་གོང་གསལ་དོན་ཚན་ཁག་དང་འབྲེལ་བའི་བཅའ་ཁྲིམས་བསྐྱར་བཅོས་ཀྱི་གནད་དོན་ཐད་ཐག་གཅོད་གང་འདྲ་བྱུང་མིན་དྲིས་པར།
ཚོགས་ཆུང་བདུན་པའི་ཚོགས་གཙོ་བཀའ་ཟུར་བཀྲས་མཐོང་བསྟན་འཛིན་རྣམ་རྒྱལ་ལགས་ཀྱིས་གསུང་དོན།ང་ཚོའི་ཚོགས་ཆུང་ནང་འགྲོ་བཞིན་པའི་བསམ་ཚུལ་མང་ཆེ་བ་ཐག་གཅོད་བྱ་ཐུབ་པ་དེ་འདྲ་མ་རེད།བསམ་ཚུལ་ཤུགས་ཆེ་ཤོས་བཅའ་ཁྲིམས་བསྐྱར་བཅོས་དེ་གཏིང་ཟབ་པོ་དང་རྒྱ་ཆེན་པོ་ཡིན་སྟབས།ཉིན་གཅིག་གཉིས་ནང་བྲེལ་འཚུབ་བྱ་རྒྱུ་ཞིག་མ་ཡིན་པར་ཉམས་མྱོང་ཅན་དང་ཆེད་མཁས་པ་གདན་ཞུའི་ཐོག་བསྐྱར་བཅོས་གཏོང་དགོས་ཀྱི་འདུག་ཅེས་བསམ་ཚུལ་བཏོན་ཡོང་གི་འདུག དེ་བཞིན་བཅའ་ཁྲིམས་བསྐྱར་བཅོས་ཀྱི་སྔོན་གླེང་དུ་བོད་རྒྱལ་གཉའ་ཁྲི་བཙན་པོ་ནས་བོད་ཀྱི་ལོ་རྒྱུས་སྙིང་བསྡུས་དང་བཙན་བྱོལ་གྱི་ལོ་རྒྱུས་སྙིང་བསྡུས་འཁོད་དགོས་པའི་སྐོར་ནས་བསམ་ཚུལ་བྱུང་སོང་བར་མ་ཟད།བཙན་བྱོལ་བོད་མིའི་གཞུང་དང་བོད་མི་རིགས་ཟེར་བའི་མིང་གི་ཐད་མང་ཆེ་བས་ ‘‘ བཙན་བྱོལ་བོད་གཞུང་། ” དང ‘‘བོད་མི། ” ཞེས་འཇོག་དགོས་པ་དང་།བཀའ་བློན་གྱི་ལས་ཡུན་དང་བཀའ་བློན་ཕྱག་རོགས་འདེམས་པའི་ཐད་སྔོན་མ་ལྟར་རང་སོར་འཇོག་དགོས་པའི་ཐག་གཅོད་བྱུང་སོང།ཞེས་གསུང་བྱུང་།
ཚོགས་ཆུང་དང་པོའི་ཚོགས་མི་ཚངས་དབྱངས་རྒྱ་མཚོ་ལགས་ཀྱིས་བརྗོད་དོན། ང་ཚོའི་ཚོགས་ཆུང་ནང་ཉིན་གཉིས་ལྷག་གི་རིང་སྔོན་གླེང་ནང་༸གོང་ས་མཆོག་གི་གསུང་འཕྲིན་འཇོག་དགོས་ཀྱི་འདུག་ཅེས་བརྗོད་མཁན་ཁག་ཅིག་དང་། ༸གོང་ས་མཆོག་གིས་ལུང་དྲངས་པའི་རྒྱལ་རབས་ལོ་རྒྱུས་ཀྱི་སྐོར་བདམས་བཀོད་བྱེད་དགོས་པའི་བསམ་ཚུལ་འདོན་མཁན་ཁག་ཅིག སྔོན་གླེང་འགྲིག་མི་འདུག་ཟེར་མཁན་ཁག་ཅིག་བཅས་བསམ་ཚུལ་མི་འདྲ་བ་གསུམ་བྱུང་སོང་ཡང་སྔོན་གླེང་དགོས་པའི་ཐད་ལ་སྤྱི་མོས་བྱུང་སོང་།བསམ་ཚུལ་ཤུགས་ཆེ་ཤོས་དེ་སྔོན་གླེང་ནང་བཙན་བྱོལ་བོད་མིའི་གཞུང་གི་སྒྲིག་འཛུགས་དང་༸གོང་ས་མཆོག་ལ་མི་རིགས་ཀྱི་དབུ་འཛིན་ཟེར་བའི་ཐ་སྙད་གཉིས་བསྒྱུར་བཅོས་བཏང་ཡོད་པའི་སྐོར་ནས་བྱུང་སོང་། མཐའ་མར་བཙན་བྱོལ་བོད་གཞུང་ཞེས་འཇོག་དགོས་པར་སྤྱི་མོས་དང་མི་རིགས་ཀྱི་དབུ་འཛིན་མི་འགྲིག་པར་བསྐྱར་བཅོས་བྱ་དགོས་པར་སྤྱི་མོས་བྱུང་བ་རེད། དོན་ཚན་དང་པོའི་ནང་གསེས་གསུམ་པའི་ནང་གི་སྐུ་ཚབ་དོན་གཅོད་དང་འབྲེལ་བའི་༸གོང་ས་མཆོག་གི་མཚན་གནས་སྐོར་གནས་མིན་བསམ་ཚུལ་མ་འདྲ་བ་གཉིས་བྱུང་མཐར་ཕྱོགས་གཉིས་ཀྱི་བསམ་ཚུལ་ཕུལ་ཡོད་པ་རེད། གཞན།བཀའ་ཁྲིའི་ལས་ཡུན་སྔར་བཞིན་འཇོག་དགོས་པ་དང་བཀའ་བློན་ཕྱག་རོགས་སྤྱི་འཐུས་ལྷན་ཚོགས་ནས་གསང་བའི་འོས་ཤོག་འཕེན་དགོས་པའི་བསམ་ཚུལ་བྱུང་སོང་།ཞེས་བརྗོད་བྱུང་།
ཚོགས་ཆུང་གཉིས་པའི་ཚོགས་མི་བསྟན་རྡོར་ལགས་ཀྱིས་བརྗོད་དོན།ང་ཚོའི་ཚོགས་ཆུང་ནང་བསྐྱར་བཅོས་ཚོགས་ཆུང་གི་ཟིན་ཐོའི་ནང་བཙན་བྱོལ་བོད་གཞུང་གི་མིང་ལ་འགྱུར་བ་བཏང་སྟེ་བཙན་བྱོལ་བོད་མིའི་གཞུང་གི་སྒྲིག་འཛུགས་ཞེས་བཏགས་པ་དེ་འགྲིག་མེད་པའི་ཐད་དགག་པ་དང་བསམ་ཚུལ་ཤུགས་ཆེན་པོ་བྱུང་སྟེ། མཐའ་མར་ད་ལྟ་ག་རེ་ཡིན་པ་དེ་མུ་མཐུད་སོར་འཇོག་བྱ་དགོས་པའི་ཐད་ལ་སྤྱི་མོས་བྱུང་སོང་།༸གོང་ས་མཆོག་གི་ཆབ་སྲིད་ཀྱི་སྐུ་དབང་དོར་ཏེ་བོད་གཞུང་གི་དབུ་ཁྲིད་གནང་མི་ཐུབ་ཀྱང་།རྒྱལ་སྤྱིའི་འགྲོ་ལུགས་ནང་ཆབ་སྲིད་ཀྱི་དབང་ཆ་དང་འཛིན་སྐྱོང་གི་འགན་འཁྲི་མེད་པར་རྒྱལ་བོ་དང་རྒྱལ་མོའི་མཚན་གནས་ཡོད་པ་ལྟར།ཆབ་སྲིད་ཀྱི་དབང་ཆ་དང་འཛིན་སྐྱོང་གི་འགན་འཁྲི་མེད་པའི་མཚན་གནས་གསལ་པོ་ཞིག་འབུལ་དགོས་པའི་བསམ་ཚུལ་ཤུགས་ཆེན་པོ་བྱུང་བར་མ་ཟད། གཞུང་གི་དབུ་ཁྲིད་མ་གནང་ཡང་རྒྱལ་ཁབ་ཀྱི་དབུ་ཁྲིད་མུ་མཐུད་གནང་དགོས་པའི་ཐད་མང་མོས་བྱུང་སོང་།དཀའ་ངལ་ཆེ་ཤོས་དབྱིན་ཇིའི་ཚིག་དང་བོད་ཡིག་གི་ནང་དུ་ཡོད་པའི་གཞུང་གི་དབུ་ཁྲིད་དང་རྒྱལ་ཁབ་ཀྱི་དབུ་ཁྲིད་ཀྱི་ཚིག་མི་འདྲ་བའི་དབང་གིས་ཚིག་གསར་བ་བཟོ་དགོས་པ་ཆགས་ཡོད་འདུག་ལ། གཞན་སྤྱི་འཐུས་ཀྱི་ལས་ཡུན་ལ་ཚད་འཛིན་དགོས་པའི་ཐད་ལ་བསམ་ཚུལ་བྱུང་བ་ལས་དུས་ཡུན་ག་ཚོད་ཅིག་གི་རིང་གནང་མིན་དེ་གཏན་འཁེལ་བྱུང་ཐུབ་མ་སོང་། དེ་མིན་ཚོགས་འདུའི་དུས་ཡུན་ཐུང་དྲག་པའི་ཐད་ལའང་བསམ་ཚུལ་མང་པོ་ཞིག་བྱུང་སོང་།ཞེས་བརྗོད་བྱུང་།
ཚོགས་ཆུང་བརྒྱད་པའི་ཚོགས་གཙོ་སྤྱི་འཐུས་སྨོན་མཁར་བསོད་ནམས་ཕུན་ཚོགས་ལགས་ཀྱིས་བརྗོད་དོན། ང་ཚོའི་ཚོགས་ཆུང་གི་ངོས་ནས་ཉིན་གཉིས་མ་ཟིན་ཙམ་གྱི་རིང་སྔོན་གླེང་དང་དོན་ཚན་དང་པོའི་ནང་གི་ཚིག་ཁ་ཤས་བསྒྱུར་བཅོས་བཏང་མཐར་སྤྱི་མོས་བྱུང་ཡོད། དེ་ཡང་ཐོག་མར་སྔོན་གླེང་ནང་གི་ཚིག་གི་འབྲུ་དོན་ཐད་བགྲོ་གླེང་གོ་བསྡུར་བྱས་ཏེ་ཚིག་གསར་བར་བསྒྱུར་བཅོས་ཐོག་མང་མོས་བྱུང་བ་དང་། དེ་ནས་རིམ་གྱི་དོན་ཚན་དང་པོའི་ནང་གསེས་རིམ་པའི་ཐོག་གྲོས་བསྡུར་སྦྱང་བཤད་དང་ཚིག་རེ་རེར་བསྡོམས་བརྒྱབ་མཐར་དོན་ཚན་དང་པོར་སྤྱི་མོས་བྱུང་སོང་། བགྲོ་གླེང་ནང་ཤུགས་ཆེ་ཤོས་དེ་ ‘‘ རང་ཆས་སུ་ཡོད་པ། ” ཞེས་པའི་ཚིག་འདིའི་ཐོག་༸གོང་ས་མཆོག་འཕགས་པ་སྤྱན་རས་གཟིགས་ཀྱི་རྣམ་སྤྲུལ་དང་བོད་དེ་འཕགས་པ་སྤྱན་རས་གཟིགས་ཀྱི་གདུལ་ཞིང་། བོད་མི་ཚོ་འཕགས་པ་སྤྱན་རས་གཟིགས་ཀྱི་གདུལ་བྱ་ཡིན་པའི་དབང་གིས་ཕན་ཚུན་ལ་ལས་སྨོན་གྱི་འབྲེལ་བ་ཡོད་སྟབས། ཕན་ཚུན་འགན་འཁུར་བའི་ཐོག་དང་དབང་བསྐུར་བའི་ཐད་ལ་འགལ་ཟླ་མེད་པ་ཞིག་གནང་བའི་ཐད་གོ་བསྡུར་ལྷུག་པོ་གནང་ཡོད། ཅེས་བརྗོད་བྱུང་། 
༥༽ཚོགས་ཆུང་དགུ་བའི་ཚོགས་གཙོ་དགེ་བཤེས་ངག་དབང་བསམ་གཏན་ལགས་ཀྱིས་བརྗོད་དོན།ང་ཚོའི་ཚོགས་ཆུང་ནང་བཀའ་བསྡུར་གནང་བའི་སྐབས་སུ། སྤྱིར་བཏང་རྒྱ་ཆེན་པོ་ཞིག་གི་ཐོག་ནས་ལྟ་ཚུལ་དང་བསམ་ཚུལ་མང་པོ་བྱུང་བ་དང་མཉམ་དུ་ཚོགས་བཅར་བ་མང་པོ་ཞིག་གིས་ས་གནས་སོ་སོའི་བསམ་འཆར་ཡིག་ཆ་མང་པོ་འཁུར་ཡོད་པ་དེའི་ཐད་ལའང་བགྲོ་གླེང་གནང་བ་རེད།ཉིན་གཉིས་མ་ཟིན་ཙམ་གྱི་རིང་གོ་བསྡུར་གནང་སྐབས་རིགས་གཅིག་གིས།ད་རེེས་ཚོགས་ཆེན་འདིའི་ཐོག་ཉེ་ཆར་སྤྱི་འཐུས་ལྷན་ཚོགས་ཀྱིས་༸གོང་ས་མཆོག་ལ་སྔར་རྒྱུན་ལྟར་མཛད་འགན་བཞེས་དགོས་པའི་གསོལ་འདེབས་ཞུ་དགོས།ཞེས་གླེང་མཁན་འདུག་ལ།མང་པོ་ཞིག་གིས་འཛིན་སྐྱོང་དབུ་ཁྲིད་དེ་མི་མང་གི་འོས་འདེམས་བྱས་པའི་དབུ་ཁྲིད་ཀྱིས་གནང་དགོས་ཀྱང་། བོད་རྒྱལ་ཁབ་ཀྱི་དབུ་ཁྲིད་དང་བོད་མི་མང་གི་དབུ་ཁྲིད་ཀྱི་མཚན་གནས་བཞེས་རོགས་ཞེས་གསོལ་བ་ཕུར་ཚུགས་སུ་འདེབས་དགོས་པའི་སྐོར་ནས་ཀྱང་གླེང་སློང་བྱུང་སོང་།༸གོང་ས་མཆོག་གིས་མཚན་གནས་བཞེས་དགོས་པའི་རྒྱུ་མཚན། ལོ་རྒྱུས་དང་ད་ལྟ་མ་འོངས་གནས་སྟངས་གང་གི་ཆ་ནས་ཀྱང་༸གོང་ས་མཆོག་དང་བོད་མི་རིགས་གཉིས་ཁ་བྲལ་ཐབས་མེད་པ་ཞིག་ཆགས་ཡོད་སྟབས།ནང་གི་གནས་ཚུལ་ཙམ་མིན་པར་ཕྱིའི་རྒྱལ་ཁབ་ཁག་གི་ལྟོས་པ་ཡིན་ནའང་།༸གོང་ས་མཆོག་གི་དབུ་ཁྲིད་པའི་ཐོག་མི་མང་ཤར་བསྐྱོད་བྱ་ཐུབ་པ་ཞིག་དགོས་རྒྱུ་དེ། མིའི་ལྟ་སྟངས་དང་ངོས་འཛིན་ཕྱོགས་གང་ཅིའི་ཐད་ནས་གལ་ཆེན་ཡིན་པ་ཙམ་མ་ཟད། རྒྱ་ཕྱོགས་ནས་ཚུར་བལྟས་པ་ཡིན་ནའང་རྒྱུན་རིང་པོ་ཞིག་གི་འཐབ་རྩོད་ལའང་ཧ་ཅང་གལ་ཆེན་ཆགས་ཡོད་པའི་སྐོར་དང་། གལ་སྲིད། གོང་གསལ་གྱི་གནད་དོན་གཉིས་ཐོག་འགྲོ་མ་ཐུབ་པ་ཡིན་ན། བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་གི་ཟིན་ཐོའི་ཐོག་བསམ་བློ་གཏོང་དགོས་པའི་སྐོར་ལ་སྤྱི་མོས་བྱུང་སོང་། ཞེས་བརྗོད་བྱུང། 
ཚོགས་ཆུང་བཅུ་བའི་ཚོགས་མི་སྤྱི་འཐུས་ངག་དབང་ལྷ་མོ་ལགས་ཀྱིས་བརྗོད་དོན། ང་ཚོའི་ཚོགས་ཆུང་ནང་བགྲོ་གླེང་ཤུགས་ཆེ་ཤོས་དེ་བཅའ་ཁྲིམས་བསྐྱར་ཟིན་བྲིས་ཀྱི་དོན་ཚན་དང་པོའི་ནང་གསེས་གསུམ་པའི་ནང་གི་ཚིག་དོན་བསྐྱར་བཟློས་ཀྱི་རིགས་དང་གནད་འགག་ཆེན་པོ་མེད་པའི་རིགས་ཕྱོགས་གཅིག་ཏུ་བསྡུས་པ་ཡིན་ན། ཡར་ཞུ་དུས་ཞུ་བདེ་བོ་དང་ཕྱག་ལས་གནང་མཁན་ལའང་གནང་བདེ་བོ་ཡོད་པའི་བསམ་ཚུལ་གཅིག་དང་།ཡང་ཁག་ཅིག་གིས་བཅའ་ཁྲིམས་བསྐྱར་བཅོས་ནང་ཡོད་པ་དེ་རང་སོར་བཞག་བྱེད་དགོས་པའི་སྐོར་བཅས་དགོངས་ཚུལ་གཉིས་བྱུང་སོང་ལ།མཐའ་མར་བཅའ་ཁྲིམས་ཟིན་བྲིས་ནང་ཡོད་པའི་ཚིག་དོན་རེ་འགར་འགྱུར་བ་བྱུང་བ་ཙམ་ལས།བཅའ་ཁྲིམས་བསྐྱར་བཅོས་ཀྱི་ཟིན་བྲིས་རང་སོར་འཇོག་དགོས་པའི་ཐོག་ལ་སྤྱི་མོས་བྱུང་སོང་།དེ་མིན་བཙན་བྱོལ་བོད་གཞུང་དང་བཙན་བྱོལ་བོད་མིའི་སྒྲིག་འཛུགས་གཉིས་ལས་“བཙན་བྱོལ་གཞུང་གི་སྒྲིག་འཛུགས།” ཞེས་འཇོག་དགོས་པ་དང་། བཀའ་བློན་གྱི་ལས་ཡུན་དང་བཀའ་བློན་ཕྱག་རོགས་འདེམས་སྟངས་ཀྱི་ཐད་ནས་སྔོན་མ་ལྟར་བཀའ་བློན་ཁྲི་པ་རང་གི་ཕྱག་རོགས་ཀྱི་མིང་གཞུང་གྲོས་ཚོགས་ནང་ཕུལ་རྗེས་གྲོས་ཚོགས་ནས་ཐག་གཅོད་ཐོག་འདེམས་རྒྱུར་སྤྱི་མོས་བྱུང་སོང་།ཞེས་བརྗོད་བྱུང་།གསར་འགོད་པ།དོན་གོ
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ཕར་རྐྱང་ཚུར་བསྐུམས་ག་རེ་བྱས་ཀྱང་། རྒྱལ་ཁབ་གཅིག་ལ་གཞུང་གཉིས་མི་ཡོང་བ་སོགས་ཀྱི་འགྲེལ་བཤད་སྣ་ཚོགས་ཀྱིས་གཞུང་དེ་སྒྲིག་འཛུགས་སུ་བསྒྱུར་དུས། སྒྲིག་འཛུགས་ཞིག་ལ་སྒྲིག་གཞི་ཡོད་པ་ལས་བཅའ་ཁྲིམས་ཡོད་པ་མ་རེད། དེ་འདྲ་སོང་ཙང་ད་དུང་གནད་འགག་ཆེ་ཤོས་དེ་ལུས་འདུག ད་ནི་བཅའ་ཁྲིམས་བསྐྱར་བཅོས་ཟེར་རྒྱུ་མེད་པར་སྒྲིག་གཞི་བསྐྱར་བཅོས་སམ་ཡང་ན་བཙན་བྱོལ་བོད་མའི་སྒྲིག་གཞི། དེའི་རྗེས་སུ་རིན་པོ་ཆེ་ཞེས་འབོད་ཀྱང་ཆོག མི་འབོད་ཀྱང་ཆོག་གང་ལྟར་སོ་སོའི་བརྗོད་བདེའི་ཐོག་ནས་འབོད་ཆོག འོན་ཀྱང་ད་དུང་བཅའ་ཁྲིམས་ཞེས་འབོད་བསྡད་ན་ཇི་ལྟར་གནད་ལ་འཁེལ་བའི་འགྲེལ་བཤད་རྒྱག་ཐབས་བྲལ་འདུག་
མཚན་གནས་ཡིན་ནམ་མཚན་ནས་ཡིན། ཕལ་ཆེར་ཕྲན་གྱི་བསམ་ཚུལ་བྱས་ན་དེ་མཚན་གནས་ཡིན་དགོས་པ་ཞིག་འདུག ཅི་སྟེ་དག་ཆ་ནོར་ཡོད་པ་ཡིན་ན། རྗེས་སུ་ཡིད་གཟབ་དགོས་པ་ཡིན། དུས་བབ་ཚང་གི་དེ་དྲའི་ཡིག་ནོར་མང་པོ་ཤོར་བ་ཡིན་ན་།
སྐད་ཡིག་དང་སྐད་ཡིག་ཞེས་པའི་འབོད་སྒྲ་སྒྲོགས་ནས་དགོས་པ་མེད་པ་ཡིན། ལྷག་པར་བྱེས་ཀྱི་གཞུང་འབྲེལ་མིན་པའི་ཚགས་ཤོག་ཡག་པོ་ཞིག་ཏུ་རྩིས་ཀྱི་ཡོད་པས། མིས་རིན་ཐང་སྤྲོད་དུས་རིན་ཐང་ངོ་ཤེས་དགོས་པ་ཡིན།
བཅའ་ཁྲིམས་བསྐྱར་བཅོས་ནང་ཐོན་པའི་༼མི་རིགས་ཀྱི་འགན་འཛིན༽ཟེར་བ་དེ་ནི་༼རྣམ་པ་འགྱུར་བའི་སྡེ་སྲིད་༽ཀྱི་དོན་རེད་ལ། དེ་ནི་གོང་ས་མཆོག་གི་བཀའ་གསུང་དྲོན་མོའི་ལྡོག་ཟླ་ཆགས་ཡོད་ཅིང་། དེ་དོན་བཅའ་ཁྲིམས་ཟིན་བྲིས་སྔོན་གླེང་ནས་ཀྱང་གསལ་བོ་ར་འཕྲོད་ཡོད་སྟབས། ངེས་པར་དུ་མེད་པ་བཟོ་དགོས་ཀྱི་འདུག
རིགས་ཀྱི་བུའམ་རིགས་ཀྱི་བུ་མོ་དག་གིས་སྐྱབས་གསུམ་ཀུན་འདུས་ཀྱི་ངོ་བོ་སྒོམས་དེ་མཐའ་གཉིས་སུ་མ་ལྷུང་བའི་ལམ་དབུ་མར་བརྒྱུད་མཐར་ཐུག་དགའ་ལྡན་ཕོ་བྲང་གི་གདུལ་བྱའི་ཞིང་ཁམས་གངས་རི་ར་བའི་སྐོར་བའི་ཞིང་ལ་འཁྲིད་བ་དང་མྱུར་དུ་ཁྲིད་པ་དང་མྱུར་ནས་མྱུར་དུདང་གེག་མེད་ཡིད་ལ་རེ་བ་ལྟར་འགྲུབ་ཅིག་ཤོག
དུས་བབ་ཚང་གི་ལས་ཚོས་དཀའ་ལས་བརྒྱབས་ཏེ་ད་ཐེངས་ཁ་ཐུག་གསར་འགྱུར་ཚ་བོ་རྐྱང་རྐྱང་བཏང་བར་དགའ་བསུ་ཞུ། མི་མང་གིས་དྲ་ངོས་སུ་བལྟས་ནས་ཡོད་ལ་ཉན་ནས་བསྡད་ཡོད་རེད། གཞན་མཚན་ནས་ཞེས་པ་ཕལ་ཆེར་མཚན་གནས་ལ་བསྒྱར་དགོས་རྒྱུ་རེད་བསམ། ཁ་བྱང་དེ་ནོར་བ་ཡིན་ནམ་དཔྱད་པར་འཚལ།