ད་ལོར་རྒྱ་གར་རྒྱལ་ཡོངས་བོད་པའི་འཛིན་རིམ་བཅུ་གཉིས་ཀྱི་ཡིག་རྒྱུགས་ཁྲོད། གྷོལ་པ་པུར་བོད་ཁྱིམ་གྱི་རྒྱུགས་འཕྲོད་ཚད་བརྒྱ་ ༡༠༠ ཟིན་ཏེ་ཨང་དང་པོ་རེད།
ཕྱི་ལོ་ ༢༠༡༡ ལོའི་བཙན་བྱོལ་བོད་མིའི་རྒྱ་གར་རྒྱལ་ཡོངས་འཛིམ་རིམ་བཅུ་གཉིས་ཀྱི་ཡིག་རྒྱུགས་གྲུབ་འབྲས་དེ་ཕྱིར་བསྒྲགས་བྱས་འདུག འདི་ལོར་བཙན་བྱོལ་བོད་མིའི་སྤྱི་ཚོགས་ནང་འཛིན་རིམ་བཅུ་གཉིས་ཀྱི་ཡིག་རྒྱུགས་ནང་འཛུལ་ཞུགས་བྱེད་མཁན་སློབ་གྲྭ་ཁག་ ༡༥ ཡོད་ཅིང་། དེའི་ནང་ཡིག་རྒྱུགས་གཏོང་ཆོག་པའི་སློབ་མ་གྲངས་ ༡༤༥༤ ཙམ་བྱུང་ཡོད་པ་ལས་དངོས་སུ་ཆ་ཤས་ལེན་མཁན་ ༡༣༩༠ ཙམ་བྱུང་ཡོད། དེ་དག་ཁྲོད་ཡིག་རྒྱུགས་འཕྲོད་མཁན་ ༡༢༥༨ ཙམ་བྱུང་ཡོད་ཅིང་། བསྐྱར་རྒྱུགས་གཏོང་དགོས་པ་ ༡༠༧ དང་། ཡིག་རྒྱུགས་མ་འཕྲོད་པ་ ༢༤ ། དེ་བཞིན། ཡིག་རྒྱུགས་གཏོང་མ་ཐུབ་པ་ ༦༤ བཅས་ཡོད་འདུག
ཡིག་རྒྱུགས་འཕྲོད་མཁན་གྲས་སུ་བུ་ ༥༩༧ དང་། བུ་མོ་ ༦༦༡ བཅས་བྱུང་ཡོད་འདུག་ལ། ད་ལོའི་སློབ་གྲྭ་ཁག་གི་ཡིག་རྒྱུགས་འཕྲོད་ཚད་བརྒྱ་ཆ་ ༩༠།༥༠ ཡིན་ཞིང་། ན་ནིང་ལོའི་ཡིག་རྒྱུགས་འཕྲོད་ཚད་བརྒྱ་ཆ་ ༨༦།༤༨ ཙམ་ཡིན་སྟབས། ད་ལོ་ན་ནིང་གི་འཕྲོད་ཚད་ལས་མཐོ་རུ་ཕྱིན་ཡོད།
འདི་ལོར་ཚན་རིག་ཡིག་རྒྱུགས་ཁྲོད་ཨང་རིམ་དང་པོ་ཐོབ་མཁན་སི་ལ་ཀོ་བོད་ཁྱིམ་སློབ་གྲྭའི་སློབ་མ་བསྟན་འཛིན་ཚེ་རིང་ལགས་ཡིན་ཞིང་། ཁོང་གི་ཡིག་རྒྱུགས་སྐར་གྲངས་བརྒྱ་ཆ་ ༩༠།༦ཡིན་པ་དང་། ཨང་གཉིས་པ། སི་ལ་ཀོ་བོད་ཁྱིམ་སློབ་མ་བསྟན་འཛིན་སྒྲོལ་མ་ལགས་ཀྱི་སྐར་གྲངས་བརྒྱ་ཆ་ ༩༠།༤། ཨང་གསུམ་པ། སི་ལ་ཀོ་བོད་ཁྱིམ་སློིབ་མ་ཀུན་བཟང་ཚེ་འཕེལ་ལགས་ཀྱི་སྐར་གྲངས་བརྒྱ་ཆ་༨༧།༨། ཨང་བཞི་པ། སི་ལ་ཀོ་བོད་ཁྱིམ་སློབ་མ་ཨོ་རྒྱན་རྒྱ་མཚོ་ལགས་ཀྱི་སྐར་གྲངས་བརྒྱ་ཆ་༨༦།༨། ཨང་ལྔ་པ། མ་སི་གཏན་སློབ་ཀྱི་སློབ་མ་ནེ་ཧ་མི་སི་ཧར་ལགས་ཀྱི་སྐར་གྲངས་བརྒྱ་ཆ་ ༨༥།༦ བཅས་རེད།
ཚོང་ལས་སྡེ་ཚན་གྱི་ཁོངས་སུ་ཨང་དང་པོ་ཐོབ་མཁན་སྦེལ་ཀོབ་བོད་ཁྱིམ་སློབ་གྲྭའི་སློབ་མ་བསྟན་འཛིན་ཆོས་འཛོམས་ཡིན་ཞིང་། ཁོང་གི་ཡིག་རྒྱུགས་གྲུབ་འབྲས་ཀྱི་སྐར་གྲངས་བརྒྱ་ཆ་ ༨༩།༢ ཡིན་ཞིང་། ཨང་གཉིས་པ། སྦེལ་ཀོབ་བོད་ཁྱིམ་གྱི་སློབ་མ་བསོད་ནམས་ལགས་ཀྱི་སྐར་གྲངས་བརྒྱ་ཆ་༨༩། ཨང་གསུམ་པ། སྦེལ་ཀོབ་བོད་ཁྱིམ་གྱི་སློབ་མ་བསྟན་འཛིན་ཆོས་དབང་ལགས་ཀྱི་སྐར་གྲངས་བརྒྱ་ཆ་༨༨།༤། ཨང་བཞི་བ། སྦེལ་ཀོབ་བོད་ཁྱིམ་གྱི་སློབ་མ་བསྟན་འཛིན་ཚེ་ལྷ་ལགས་སྐར་གྲངས་བརྒྱ་ཆ་ ༨༨།༢། ཨང་ལྔ་པ། སྦེལ་ཀོབ་བོད་ཁྱིམ་གྱི་ཚེ་རིང་ཆོས་སྒྲོན་ལགས་ཀྱི་སྐར་གྲངས་བརྒྱ་ཆ་ ༨༧།༤ བཅས་ཡིན་འདུག
འབྱུང་རིག་སྡེ་ཚན་གྱི་ཁོངས་སུ་ཨང་དང་པོ་ཐོབ་མཁན་མ་སུ་རུ་བོད་ཁྱིམ་གྱི་སློབ་མ་རིན་ཆེན་དབང་མོ་ལགས་ཡིན་ཞིང་། ཁོང་མོའི་ཡིག་རྒྱུགས་གྲུབ་འབྲས་ཀྱི་སྐར་གྲངས་བརྒྱ་ཆ་ ༩༢།༨། ཨང་གཉིས་པ། མ་སུ་རི་བོད་ཁྱིམ་གྱི་ཚེ་རིང་རྒྱལ་པོ་ལགས་ཀྱི་སྐར་གྲངས་བརྒྱ་ཆ་ ༨༨།༨། ཨང་གསུམ་པ། རྡོར་གླིང་གཏན་སློབ་ཀྱི་མཁན་ཆེན་སིན་ལགས་ཀྱི་སྐར་གྲངས་བརྒྱ་ཆ་ ༨༨།༢ ། ཨང་བཞི་བ། མ་སུ་རི་བོད་ཁྱིམ་གྱི་སློབ་བུ་ཕུན་ཚོགས་ཚེ་འཕེལ་ལགས་ཀྱི་སྐར་གྲངས་བརྒྱ་ཆ་ ༨༧།༤། ཨང་ལྔ་པ། མ་སུ་རི་བོད་ཁྱིམ་གྱི་ཡོན་ཏན་ཕུན་ཚོགས་ལགས་ཀྱི་སྐར་གྲངས་བརྒྱ་ཆ་ ༨༦།༤ བཅས་ཡིན་འདུག
འདི་ལོར་རྒྱ་གར་རྒྱལ་ཡོངས་ཡིག་རྒྱུགས་ནང་ཞུགས་མཁན་བོད་པའི་སློབ་གྲྭ་ཁག་ ༡༥ ཙམ་ཡོད་པའི་ནང་། ཨང་དང་པོ་ཐོབ་མཁན་གྷོལ་པ་པུར་བོད་ཕྲུག་ཁྱིམ་སྡེ་ཡིན་ཞིང་། སློབ་གྲྭ་དེའི་ཡིག་རྒྱུགས་འཕྲོད་ཚད་བརྒྱ་ཆ་ ༡༠༠ ཡིན་འདུག ཨང་གཉིས་པ་ནི། སི་ལ་ཀོ་བོད་ཁྱིམ་ཡིན་ཞིང་། སློབ་གྲྭ་འདི་ནི་ད་ལོར་གསར་དུ་རྒྱལ་ཡོངས་ཡིག་རྒྱུགས་ནང་ཞུགས་པ་ཞིག་ཡིན་ལ། ཆ་སྙོམས་ཡིག་རྒྱུགས་འཕྲོད་ཚད་བརྒྱ་ཆ་ ༩༨།༢༡ ཡིན་འདུག ཡིག་རྒྱུགས་འཕྲོད་ཚད་དམའ་ཤོས་ཌལ་ཧོར་གཏན་སློབ་ཡིན་ཞིང་། སློབ་གྲྭ་དེའི་ཡིག་རྒྱུགས་འཕྲོད་ཚད་བརྒྱ་ཆ་ ༦༧།༧༤ ཙམ་ལས་ཟིན་ཡོད་མི་འདུག
གསར་འགོད་པ། དཔལ་ལྡན།
མ་འོངས་བོད་ཀྱི་གསོན་རྣམས་ཀྱི་ཡིག་རྒྱུགས་གྲུབ་འབྲས་ལ་དགའ་བསུ་ཞུ།