ཤར་ཕྱོགས་ཁུག་རྟ།
བོད་གངས་ཅན་པ་རྣམས་ནི་ནང་ཆོས་དང་འབྲེལ་བའི་སྤྱི་ཚོགས་ཤིག་ཏུ་འཚར་ལོངས་བྱུང་ཡོད་ལ། དེའི་སྤྱི་ཚོགས་ནི་ནང་པའི་ཆོས་ཀྱི་བཟང་པོའི་ཀུན་སྤྱོད་ཀྱི་ཞགས་རྩི་དང་མ་བྲལ་བར་གནས་པས། བོད་མི་རྣམས་ཀྱིས་འགྲོ་བ་སེམས་ཅན་ཙམ་མ་ཟད། སྣོད་ཀྱི་བཀོད་པ་རང་བྱུང་ཁམས་ཆེན་མོར་གཅེས་སྤྲས་གནང་སྟངས་ནི་དམིགས་བསལ་ཞིག་ཡིན། སྤྱི་ཚོགས་ཀྱི་བསམ་བློའི་འཕེལ་རིམ་དང་ཡུལ་དེའི་རིག་གནས་ཀྱི་བབ་དང་བསྟུན་ཏེ་བྱུང་བའི་ཁོར་ཡུག་སྲུང་སྐྱོབ་བྱེད་ཐབས་རྣམས་རང་བཞིན་བོད་མི་རྣམས་ཀྱི་ཀུན་སྤྱོད་ཀྱི་གྲུབ་ཆ་ཞིག་ཏུ་གྱུར་ཡོད། བོད་མི་རྣམས་ཀྱིས་གཏེར་ཁ་སྔོག་པ་དང་ཆུ་དཀྲུག་པ། ཤིང་གཅོད་པ་སོགས་བྱས་ན་ཡུལ་ལྷ་ཁྲོས་པ་དང་། ས་བཅུད་ཉམས་ནས་མུ་གེ་དང་ཐན་སྐྱོན་ཡོང་དོགས་ལ་ཡིད་ཆེས་བྱེད་ཅིང་། དེའི་སྲོལ་རྒྱུན་གྱིས་ད་དུང་ཁོར་ཡུག་སྲུང་སྐྱོབ་བྱེད་པ་ལ་ཐུན་མོང་མ་ཡིན་པའི་ཀུན་སྤྱོད་ཚད་ལྡན་གྲུབ་ཡོད།
འོན་ཀྱང་རྒྱ་ནག་གིས་བོད་བཙན་ཟོས་བྱས་པ་ནས་བོད་ཀྱི་ས་ཆེན་པོའི་བཅུད་ཉམས་ཤིང་། དེར་གནས་བཅས་པའི་སེམས་ཅན་མང་ཆེ་བ་རྩ་སྟོང་དུ་འགྲོ་བཞིན་པ་ནི་འཛམ་གླིང་ཀུན་གསལ་ཆགས་ཡོད། རྒྱ་ནག་གིས་དབང་བསྒྱུར་བྱེད་སྟངས་ལ་མི་སེམས་བསླུ་བ་ནས་ཞི་དྲག་གང་རུང་གིས་བོད་མི་རྒྱ་མིར་བསྒྱུར་ཐབས་དང་། བོད་མི་ཉུང་དུ་གཏོང་ཐབས་སོགས་ཀྱི་སྲིད་བྱུས་ཀྱི་མཉམ་དུ་ད་དུང་གཏིང་ནག་པོའི་སྲིད་བྱུས་གཞན་ཞིག་སྤེལ་བཞིན་ཡོད་པ་ནི། ཁོར་ཡུག་གཏོར་བརླག་གཏོང་བའི་སྲིད་བྱུས་འདི་ཡིན་ཞིང་། ཁོར་ཡུག་གཏོར་བརླག་བཏང་བས་ས་བཅུད་ཉམས་པ། གནམ་གཤིས་དོ་མི་ཉམས་པ། ཐན་སྐྱོན་ཆེ་བ། ཆུ་སྐམ་པ་སོགས་ས་ཆེན་པོའི་བཅུད་ཤོར་འགྲོ་བས། བོད་མི་རྣམས་རང་སར་གནས་ཐབས་མི་ཡོང་རྒྱུའི་དུས་ཚོད་ལ་ངང་སྒུག་བྱེད་བཞིན་པའི་རྒྱ་ནག་གི་བྱེད་ཕྱོགས་འདི་ནི་དུས་རབས་ ༢༡ པ་འདིའི་ནང་མི་སྤྱོད་ལས་འདས་པའི་དཔེ་མཚོན་ཨང་དང་པོ་དེ་ཆགས་ཡོད།
བོད་ལ་འཛམ་གླིང་གི་སྣེ་གསུམ་པ་ཞེས་འབོད་ཅིང་། རྒྱ་ཁྱོན་ལ་སྤྱི་ལེ་གྲུ་བཞི་མ་ས་ཡ་གཉིས་དང་ཕྱེད་ཀ་ཡོད་པའི་བོད་ཀྱི་ས་ཆ་ནི། ཨེ་ཤ་ཡའི་ཆུ་བོ་ཆེ་ཁག་གི་འབྱུང་ཁུངས་ཡིན་ལ། རྒྱ་དཀར་ནག་གཉིས་དང་། པ་ཀི་སི་ཐན། འབར་མ། ཐའེ་ལན་ཌི་སོགས་བརྒྱུད་འཛམ་གླིང་གི་མི་འབོར་བརྒྱ་ཆའི་ ༤༧ གྱི་ཐོན་སྐྱེད་ནུས་ཤུགས་དང་འབྱུང་ཁམས་ལ་འབྲེལ་བ་ཡོད་པར་འཛམ་གླིང་ཡོངས་གྲགས་ཀྱིས་ངོས་འཛིན་གནང་གི་ཡོད། རྒྱ་ནག་གིས་བོད་བཙན་འཛུལ་མ་བྱས་སྔོན་༧གོང་ས་ལྔ་བ་ཆེན་པོའི་དུས་ནས་ཡོད་པའི་༼ རི་རྒྱ་ཀླུང་རྒྱ་བསྡམས་པའི་རྩ་ཚིག་ཆེན་མོ ༽ སོགས་ཀྱི་ཁྲིམས་ཀྱིས་ཁྱབ་ནས་བོད་ཀྱི་ཁོར་ཡུག་ནི་མི་སྨོན་རང་སྐྱིད་དུ་གནས་ལ། སྨན་ལྗོངས་འབྲུག་དང་བོད་རྒྱལ་ཁབ་གཉིས་ནི་ཁོར་ཡུག་སྲུང་སྐྱོབ་ཀྱི་ལམ་སྲོལ་གཏན་འབེབས་གནང་མཁན་འཛམ་གླིང་ནང་ཐོག་མའི་གྲས་སུ་དེང་སང་ཁོར་ཡུག་ཞིབ་འཇུག་པ་དག་གིས་ཡོངས་གྲགས་སུ་བཞེད་ཀྱི་ཡོད།
བོད་མི་ཚོས་ཁོར་ཡུག་སྲུང་སྐྱོབ་བྱ་དགོས་དོན་ནི་ཕ་ས་ཕ་ཡུལ་ཡིན་པ་དང་། རང་ཉིད་རང་སའི་བདག་པོ་ཡིན་པས་བོད་ཀྱི་མི་རབས་གསར་བ་རྣམས་རང་སར་གནའ་འཆའ་ཐུབ་དགོས་པ་དེས་ཡིན་མོད། རྒྱ་ནག་གཞུང་གིས་” བོད་ལ་སྔ་མོར་ཁོར་ཡུག་སྲུང་སྐྱོབ་བྱེད་པའི་ལམ་སྲོལ་མེད་ཚུལ་དང་། དེའི་རྒྱུ་མཚན་ནི་བོད་མི་ཚོས་རང་སའི་ཐོན་ཁུངས་རྣམས་ལ་ཞིབ་ཏུ་རྒྱུས་མངའ་བྱས་མེད་“ཅེས་གླེན་བཤད་བྱས་ཡོད། དེ་ནི་ཁོང་ཚོས་བོད་སར་ལག་པ་བསྐྱངས་དགོས་པའི་རྒྱུ་མཚན་བོད་ཀྱི་ས་ཆའི་ཐོན་ཁུངས་ཕུན་སུམ་ཚོགས་པོ་ཡིན་པ་སྦས་ཀྱང་ཕྱི་ལ་ཤོར་པའི་གཟུགས་བརྙན་རང་རེད་མ་གཏོགས་གཞན་ཅི་གང་མ་རེད།
ཡང་ཁོང་ཚོས ” ལོ་ངོ་ ༦༠ ཡི་ཚུན་ལ། བོད་ལྗོངས་སུ་ཁོར་ཡུག་སྦག་བཙོག་གི་དོན་རྐྱེན་ཆེན་པོ་གཅིག་ཀྱང་བྱུང་མྱོང་མེད་པ་དང་། གཙང་བོ་དང་མཚོ་མཚེའུ་གཙོ་བོ་དག་སྔར་བཞིན་གདོད་མའི་ཚུལ་དུ་གནས་ཡོད། ” ཅེས་དང་། ཡང་ཁ་སྐྱེངས་ངོ་ཚ་ཅུང་ཙམ་མེད་པར། ” བོད་ལྗོངས་རྙིང་བའི་བརྒྱ་ཆའི་ ༡ ཡང་ཟིན་མེད་པའི་བོད་ལྗོངས་ཀྱི་ནགས་ཚལ་ཁེབས་ཚད་དེ་བརྒྱ་ཆའི་ ༡༡.༩༡ བར་འཕར་བ་རེད” ཟེར། རིག་པ་རྣལ་དུ་གནས་མཁན་ཞིག་ཡིན་ན། རྫུན་གཏམ་འདི་འདྲ་བཤད་རྒྱུ་ནི་རང་གི་གྱོན་གོས་རང་གིས་བཤུས་ནས་དམར་ཧྲེང་སེ་ཁྲོམ་ལ་ཕྱིན་པ་དང་འདྲ་བར་ངོས་འཛིན་བྱེད་ཀྱང་། ངོ་ཚ་ཞེས་པའི་མིའི་རིགས་ཀྱི་རྩ་ལམ་དག་ཏུ་ཁྱབ་པའི་རིག་གནས་ལ་འབྲེལ་འདྲིས་མེད་མཁན་ཚོ་ལ་ནི། དེ་ཡང་ཅི་ཡང་ཡིན་ཚོད་མ་རེད་མོད། དོན་དག་ཆུང་ཆུང་འདི་གཅིག་པུ་ནས་བསམ་བློ་བཏང་བ་ཡིན་ནའང་རྒྱ་བོད་གཉིས་དུས་གཏན་དུ་མཉམ་གནས་ཞི་མཐུན་ཞིག་མེད་པ་གསལ་བཤད་བྱས་ཡོད་པ་རེད།
ངས་གོང་གི་སྐྱག་རྫུན་ཆེན་པོ་འདི་གཉིས་ཀྱི་ནང་རུལ་ཅུང་ཙམ་སྔོག་ན། མི་རྣམས་ལ་ངེས་ཤེས་ཤིག་ཐོབ་ངེས་ཡིན། བོད་ཀྱི་གདོད་མའི་ནགས་ཚལ་གྱི་རྒྱ་ཁྱོན་ལ་སྤྱེ་ལེ་གྲུ་བཞི་མ་ ༢༢༡༨༠༠ ཡོད་པ་དང་། ༡༩༨༥ ལོར་ནགས་ཚལ་གྱི་རྒྱ་ཁྱོན་སྤྱེ་ལེ་གྲུ་བཞི་མ་ ༡༣༤༠༠༠ ལས་ལྷག་མེད་པ་ནི་ཕྱེད་ཙམ་ཉུང་དུ་ཕྱིན་ཡོད། ནགས་ཚལ་ཞིབ་འཇུག་དག་གིས་བརྗོད་ན། བོད་ལ་རང་བྱུང་གོད་ཆགས་ཀྱིས་ནགས་ཚལ་ཉམས་ཉེས་སོང་བ་ལས་རྒྱ་ནག་གཞུང་གིས་གནོད་སྐྱོན་བཏང་བ་ཉུང་ཉུང་མིན་ཚུལ་བཤད་ཡོད། བོད་ཀྱི་ས་ཁུལ་ནས་ཚད་གཞི་གཏན་འབེབས་བྱས་པའི་ཤིང་ཆ་ལོ་རེར་འོར་འདྲེན་བྱས་པ་དག་ནི། བཤད་སྟངས་ཙམ་མིན་པར་དངོས་སུ་མིག་ལ་མཐོང་རྒྱུ་ཡོད་པ་འདི་ཡིན་སྟབས། ཨུ་ཡོན་ཀྲང་གཞོན་པ་༧པཎ་ཆེན་རིན་པོ་ཆེས་ཀྱང་རྒྱ་གཞུང་གི་ཁ་གྲགས་ཚད་ལ་བཤད་བསྡད་པའི་འཛུགས་བསྐྲུན་ནི་བོད་ཀྱི་ས་ནས་རྒྱ་གཞུང་གིས་རྐུ་འཕྲོག་བཅོམ་གསུམ་བྱས་པ་དང་བསྡུར་ཐབས་མེད་པའི་སྡོམ་ཚིག་གསལ་བོར་བཀོད་གནང་ཡོད།
ལོ་རབས་བརྒྱད་བཅུ་པའི་ནང་བོད་མི་བཙོན་པ་མི་གྲངས་ ༢༠༠༠༠ ཙམ་ནས་ཉིང་ཁྲི་ས་ཁུལ་ནས་ནགས་ཚལ་གཅོད་འབྲེག་དང་འོར་འདྲེན་བྱས་པ་དང་། ༡༩༥༩ ལོར་ཨ་མདོ་རྔ་བ་ཁུལ་གྱི་ནགས་ཚལ་རྒྱ་ཁྱོན་ཧེག་ཀྲར་(Hectari)ས་ཡ་ ༢.༢༠ དང་། ཤིང་ཆའི་གསོད་ཚད་རྒྱ་དཔང་གྲུ་བཞི་མ་སྤྱི་ཁྲེ་ས་ཡ་ ༣༤༠ ཙམ་ཡོད་ཀྱང་། རྗེས་སུ་ནགས་ཚལ་ཧེག་ཀྲར་ ༡.༡༧ དང་། ཤིང་ཆ་གསོག་ཚད་རྒྱ་དཔངས་གྲུ་བཞི་མ་སྤྱི་ཁྲེ་ས་ཡ ༡༨༠ ཙམ་ལས་ལྷག་མེད། ཨ་མདོ་ཀན་ལྷོ་ས་ཁུལ་ནས་ཕྱི་ལོ་ ༡༩༨༥ བར་རྒྱ་ནག་གཞུང་གིས་ཤིང་ཆ་རྒྱ་དཔངས་གྲུ་བཞི་མ་སྤྱི་ཁྲེ་ས་ཡ་ ༦.༤༤ གཅོད་འབྲེག་བྱས་ཡོད། རྒྱལ་སྤྱིའི་ཁྲིམས་དོན་མཁས་པའི་ལྷན་ཚོགས་ཀྱི་སྙན་ཐོ་ལྟར་ན། ཤིང་ཆ་དེ་དག་ཞེང་ཚད་སེན་ཌི་མི་ཌར(Centimetre) ༣༠ དང་། རིང་ཚད་སྤྱི་ཁྲེ་ ༣ བྱས་པའི་སྡོང་མར་གཏུབ་སྟེ་ནར་ནར་མཐུད་རྒྱབ་པ་ཡིན་ན་སའི་གོ་ལར་བསྐོར་བ་གཉིས་ཐེབས་ཀྱི་ཡོད་པར་ཐ་ཚིག་ནན་བསྒྲགས་བྱས་ཡོད། ༡༩༩༨ ལོར་རྩེ་ཆུ་བརྒྱུད་ནས་རྒྱ་ནག་ལ་ཆུ་ལོག་བྱུང་སྟེ་ས་ཁུལ་མང་པོར་གནོད་སྐྱོན་ཤུགས་ཆེར་བྱུང་སྐབས། བོད་ཀྱི་ས་ཁུལ་ཡོངས་ནས་ཤིང་ནགས་གཅོད་འབྲེག་མཚམས་འཇོག་དགོས་པའི་བཀའ་བཏང་ཡོད་ཀྱང་། ༡༩༩༩ ཟླ ༢ ནང་ཟི་ཁྲོན་ཞིང་ཆེན་གྱི་བོད་ས་ནས་ཤིང་ཆ་འོར་འདྲེན་གྱི་རླངས་འཁོར་གྲངས་ལས་འདས་པ་བཏང་འདུག་པ་ཨ་རིའི་རྩོམ་པ་པོ་ཞིག་གིས་མཐོང་སྟེ། ༼ བོད་དང་བོད་མི། ནེའུ་ཡོག ༽ ཅེས་དེབ་ནང་གསལ་བོར་བྲིས་ཡོད་པ་རེད།
སྨྱུག་འཛིན་པ་ཁོ་བོར་མཚོན་ན། ལོ་རབས་བརྒྱད་བཅུའི་ནང་སྐྱེས་མཁན་ཞིག་དང་། སྟོང་ལོ་གསར་བའི་བར་བོད་དུ་འཚོ་སྐྱེལ་བར་བརྟེན། ཁོ་བོ་སྐྱེས་སའི་གྲོང་གསེབ་ཁག་ཏུའང་ཤིང་ནགས་གཅོད་འབྲེག་གིས་ནགས་རི་རྣམས་དཀར་སེང་ངེ་གྱུར་ཡོད་པ་ནི་སློབ་ཆུང་འགྲིམས་སྐབས་ནས་གསལ་བོར་མཐོང་གི་ཡོད། ཡིན་ནའང་ས་བདག་བོད་མི་རྣམས་ལ་ནི་སྡོད་ཁང་ཙམ་རྒྱག་རྒྱུ་ལ་ཤིང་ཆ་མེད་པའི་དཀའ་ངལ་ཡོང་གི་ཡོད་ལ། མཚམས་རེར་ཆུ་ལོག་ཆེན་པོས་ཁུར་ཡོང་པའི་ཤིང་སྡོང་རེ་འགའ་གྲོང་མིར་ལག་སོན་བྱུང་བ་རྣམས་ཀྱང་རྒྱ་གཞུང་གིས་ཉེས་ཆད་གཏོང་བས་མ་ཟད། ང་སྐྱེས་སའི་གྲོང་གསེབ་དེའི་ཚེ་རིང་དབང་རྒྱལ་ཟེར་བ་ཆུ་ཤིང་སྡོང་བོ་གཉིས་ཀྱི་ཕྱིར་དུ་བཙོན་འཇུག་གིས་ཟི་ལིང་སྟོང་སྐོར་དུ་ལམ་བཟོར་བཏང་བ་དང་། ཟླ་དྲུག་གི་རྗེས་སུ་རྒྱ་སྒོར་ཉིས་སྟོང་གིས་བཙོན་ནས་གློད་ཐུབ་པ་བྱུང་ཡོད།
བོད་མིའི་གནས་ཡུལ་རེ་རེར་འདི་ལྟའི་རྒྱ་གཞུང་གི་ཚད་ལས་བརྒལ་བའི་བྱ་སྤྱོད་རྗོད་ཀྱི་ཡོད་པ་ཞིབ་ཏུ་མ་མཁྱེན་པར། བོད་ཀྱི་ཁོར་ཡུག་སྨྲ་བ་ཚོའི་སྐད་ཆ་ནི་རྟོགས་དཀའ་བ་ཞིག་དང་ཁུངས་ལུང་མེད་པར་བརྗོད་རྒྱུ་ནི། ཡེ་རྡོར་དང་བཀྲ་ཤིས་སོགས་ཀྱི་རྒྱབ་ཏུ་སྦས་པའི་རྒྱ་གཞུང་གི་སྡིག་པ་མིག་བཙུམ་གྱི་བྱ་སྤྱོད་ངོ་མ་དེ་མ་རེད་དམ།
ད་དུང་དངོས་ཡོད་སྦས་སྐུང་གིས་ཅི་མི་སྙམ་པར་བོད་སར་ཤོག་སྒོར་དུང་ཕྱུར་མང་པོ་བཏང་རབ་ཀྱི་གསར་འགྱུར་བརྒྱུད་ལམ་རྫུན་བཟོ་བྱས་ཏེ། རང་སྣང་དག་སྟེ་འདུག་སྟངས་འདི་གཅིག་བྱས་ན། དུས་ཡུན་གང་འཚམས་རེར་འདྲ་ཆགས་པོ་རེ་ཡིན་མོད་ཀྱང་། མི་རྣམས་ནི་ཞིབ་འཇུག་དང་། བདེན་པའི་རྗེས་སུ་འགྲོ་མཁན་ཞིག་ཡིན་སྟབས། རྒྱ་ནག་གུང་བྲན་གྱི་རང་སེམས་རང་གིས་གསོ་པའི་རྫུན་གཏམ་བསྟར་བསྒྲིགས་ཀྱིས་ཁུངས་མི་འཁྱོལ་བ་ནི་དུས་ཚོད་ཀྱི་སྔ་ཕྱི་ཙམ་རེད།
རྒྱུ་མཚན་དེས་གསར་དུ་བཀའ་ཁྲིར་སླེབས་རྒྱུའི་འབུམ་རམས་པ་བློ་བཟང་སེང་གེས་བོད་ཀྱི་ཁོར་ཡུག་གཏོར་བརླག་བཏང་ཚུལ་བརྗོད་པ་ནི་ཐལ་ཆ་གང་ཡང་མིན་ལ། ཁོང་གིས་རྒྱལ་སྤྱིའི་སྟེང་གི་དོན་དངོས་བཤད་པ་དེ་བཙན་བྱོལ་བོད་གཞུང་གི་གཞུང་འབྲེལ་གྱི་སྐད་ཆ་ཡིན་པར་གཡམ་སྒྲོག་བྱེད་པ་ནི། ཁུངས་ལུང་བྲལ་བའི་བཤད་སྟངས་རང་ཡིན་ཡང་། རླབས་ཆེན་གྱི་སྐྱེས་བུ་༧གོང་ས་ཏཱ་ལའི་བླ་མས་གནའ་ནས་འབོད་སྐུལ་གནང་བ་བཞིན། བཙན་བྱོལ་བོད་གཞུང་གི་ཡིག་སྣོད་ཚུན་ཆུད་ལ་ཞིབ་འཇུག་བྱས་ཆོག་པའི་བདེན་པ་རི་རྒྱལ་འདྲ་བོའི་འགྱིང་ཉམས་ད་དུང་བསྡད་བསྡད་པ་རེད་ལ། ག་དུས་ཡིན་ཡང་དོགས་གཅོད་དུ་ཕེབས་ཆོག་པའི་སྒོ་མོའང་ཕྱེས་ཕྱེས་པ་རེད།
དེ་ནི་གཙོ་བོ་རྒྱ་ནག་གི་འགོ་ཁྲིད་ཚོ་མིའི་གྲལ་དུ་འགྲོ་འདོད་ཡོད་མེད་དང་། མིའི་བདེ་སྡུག་ཐག་གིས་གཅོད་པའི་ཆོད་སེམས་ཡོད་མེད་ལ་རག་ལས་ཡོད་པ་རེད། དེས་ན་རྗེས་སུ་ཡེ་རྡོར་དང་བཀྲ་ཤིས་སོགས་ཀྱིས་ཀྱང་སྨྱུག་ཁ་འདི་མི་དོན་ཐད་བསྒྱུར་ཨེ་ཐུབ་ལྟོས་ན་དགའ་བར་འདོད།
མུ་འགོད།
![A large crowd walks in a market area outside Dadar station in Mumbai, India, Friday, March 17, 2023. [AP Photo/Rajanish Kakade]](https://tibettimes.net/wp-content/uploads/2026/04/Screen-Shot-2026-04-02-at-5.36.58-PM-360x180.png)
ཤར་ཕྱོགས་ཁུག་རྟ་ཁྱེད་ལ་ཐུགས་རྗེ་ཆེ་ཞུ། ཁྱེད་ལྟ་བུ་ལ་ངས་གངས་ཅན་བོད་ཀྱི་བུ་ཕྲུག་ཅེས་འབོད་འདོད། ཡོན་ཏང་ཁྱེད་ཀྱི་དངོས་མིང་འགོད་རོགས། བཀྲ་ཤིས་ཟེར་བའི་མིང་ཐོག་ནས་ང་ཚོར་སྐྱོན་བརྗོད་བྱས་པར་རྒྱ་གཞུང་གིས་རྒྱུན་དུ་བཤད་པའི་བཟང་ས་མཛེས་ས་ཡིན་ས་རྐྱང་རྐྱང་ནས་བཤད་པ་མ་གཏོགས་ངན་ས་དང་སྡུག་ས་དང་མ་ཡིན་ས་ནས་རྩ་བ་ནས་བཤད་མི་འདུག ། བོད་མདོ་དབུས་ཁམས་གསུམ་གྱི་ས་ཆར་གཏེར་ཁ་ཇི་ཙམ་རྔོག་འདུག་མིག་ལྟོས་དང་སེམས་ཀྱིས་བཟོད་པ་ཞིག་མི་འདུག །་དཔེར་ན་མི་ཉག་རྭ་རྔ་ཁར་གསེར་གྱི་གཏེར་ཁ་ཉིན་མཚན་མེད་པར་གློག་འཕྲུལ་གྱིས་རྔོག་བཞིན་པ་དང་། མུ་ལེ་ལུང་པར་ཟངས་ཀྱི་གཏེར་ཁ་དང་། ལི་ཐང་ལུང་པར་གཏེར་རིགས་སྣ་ཚོགས་རྔོག་འདོན་དང་། མ་ཟད་སྔར་ཡིན་ན་དགོན་སྡེ་སྟོང་ཕྲག་དྲུག་ལྷག་གཏོར་བཤིག་བཏང་བའི་རིན་པོ་ཆེའི་ཅ་ལག་རྣམས་དང་སྐུ་འདྲ་རྙིང་པ་ཁྲི་སྟོང་མང་པོ་རིན་ཐང་གཞལ་དུ་མེད་པ་རྣམས་རྒྱ་གཞུང་དང་དཔོན་ངན་རྣམས་ཀྱིས་ཁྱུར་མིད་བྱས་པ་ང་ཚོས་བརྗེད་ག་ལ་རུང་། དཔེར་ན་དགའ་ལྡན་དགོན་པའི་རྗེ་བླ་མའི་སྐུ་གདུང་གི་རང་འོད་ཆེ་བའི་རྡོ་རྗེ་ཕ་ལམ་འཛམ་གླིང་དུ་སྐད་གྲགས་ཅན་དེ་གང་དུ་འཁུར་བ་རེད། བོད་ཕྲུག་ཚོས། མེས་པོས་བཞག་པའི་བྱས་རྗེས་ང་ཚོས་ཇི་བརྗེད་རུང་།
ཤར་ཕྱོགས་ཁུག་རྟ་ལགས་ལ། ནུབ་ཕྱོགས་ཁུག་རྟས་རྩོམ་བྲིས་ལ་ཐུགས་རྗེ་ཆེ་དང་། མུ་འགོད་ཡོང་བའི་རེ་བསྐུལ་བཅས། བོད་ཀྱི་རི་རྒྱ་ཀླུང་རྒྱ་བསྡོམས་པར་མཛོད་ཅིག བོད་ཀྱི་ཁོར་ཡུག་སྲུང་སྐྱོབ་མཛོད་ཅིག