སྨན་རྩིས་ལ་བག་ཆཊ་འཇོག་རྒྱུར་འབད་བརྩོན་ཞུ་རྒྱུ་ཡིན།

བོད་ཀྱི་གསོ་རིག་མཐོ་སློབ་ཚན་ལྡན་ཞིག་གང་མགྱོགས་འཛུགས་བསྐྲུན་བྱ་ཐུབ་རྒྱུ་དང་། དེ་འདྲའི་སློབ་གཉེར་ཁང་དེར་ལོ་ལྟར་སྨན་རམས་པ་བརྒྱ་ཕྲག་ཁ་ཤས་ཐོན་ཐུབ་པ་ཡིན་ན། རིག་གནས་སྲུང་སྐྱོབ་དང་སྤྱི་ཚོགས་ཞབས་ཞུ། བོད་པའི་མཚོན་དོན་སོགས་ཕྱོགས་ཚང་མར་ཐུགས་ཕན་སོས་པ་ཞིག་ཡོང་གི་ཡོད་པས། དེ་ལག་ལེན་འཁེལ་བར་སྐོམ་པ་ཆུ་འདོད་བཞིན་བསྒུག་རྒྱུ་ཡིན། ཅེས་བཀའ་ཁྲི་མཆོག་གིས་གསུངས།  

དེ་རིང་ཕྱི་ཚེས་ ༢ ཉིན་གྱི་སྔ་དྲོའི་ཆུ་ཚོད་ ༡༡ སྟེང་གངས་སྐྱིད་བོད་མིའི་སྒྲིག་འཛུགས་སྨན་རྩིས་ཁང་དུ། བོད་ཀྱི་སྨན་རྩིས་མཐོ་སློབ་དབུ་བརྙེས་ཏེ་ལོ་ ༥༠ འཁོར་བའི་དུས་དྲན་མཛད་སྒོ་ཞིག་ཚོགས་ཡོད་ཅིང་། མཛད་སྒོའི་སྐུ་མགྲོན་གཙོ་བོར་སྒྲུབ་རྒྱུད་བསྟན་པའི་སྲོག་ཤིང་དཔལ་རྒྱལ་བ་ཀརྨ་པ་མཆོག་གིས་གཙོས་པའི། བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་དང་། མང་གཙོ་ཀ་བ་གསུམ་གྱི་མཛད་གཙོ་རྣམ་པ། རང་དབང་ཅན་གྱི་སྡེ་ཚན་འགན་འཛིན། བཀའ་ཟུར་རྣམ་པ། ཝ་ཎ་མཐོ་སློབ་དང་འབྲེལ་ཡོད་སྨན་པ། སྨན་རྩིས་ཁང་གི་ལས་བྱེད་དང་སློབ་ཕྲུག་སོགས་ཁྱོན་མི་ ༣༠༠ ཙམ་འདུ་འཛོམས་བྱུང་ཡོད།

ཐོག་མར་བོད་མིའི་སྒྲིག་འཛུགས་སྨན་རྩིས་ཁང་གི་འགན་འཛིན་སྐུའི་བླ་སྨན་རྟ་མགྲིན་ལགས་ཀྱིས་ལས་རིམ་ངོ་སྤྲོད་གནང་དོན། དེ་རིང་ནི་བོད་གཞུང་སྨན་རྩིས་ཁང་བཙུགས་ཏེ་མི་ལོ་ ༥༠ འཁོར་བའི་ཉིན་མ་རེད། ༧གོང་ས་མཆོག་གི་བཀའ་དྲིན་ལ་བརྟེན་ནས། ༡༩༦༢ ལོའི་ཕྱི་ཟླ་ ༦ པའི་ཚེས་ ༢ ཉིན་སྨན་རྩིས་ཁང་གསར་འཛུགས་གནང་ཡོད་ཅིང་། སྐབས་དང་པོའི་སྨན་སློབ་འཛིན་གྲྭའི་ནང་སློབ་མ་ ༨ དང་། སྐར་རྩིས་སློབ་མ་ ༥ བཅས་བསྡུས་ཏེ། ད་བར་སྨན་སློབ་སྐབས་ ༡༤ དང་རྩིས་སློབ་སྐབས་ ༧ བར་སློབ་མ་ ༣༣༣  སྐྱེད་སྲིང་བྱས་ཡོད། ཅེས་དང་། བོད་གཞུང་སྨན་རྩིས་ཁང་ལ་དམིཊ་ཡུལ་དང་ལས་འགན་ཆེན་པོ་གསུམ་ཡོད་པ་ནི། གཅིག ༧གོང་ས་མཆོག་གི་སྐུའི་འཕྲོད་བསྟེན་ལ་ཞབས་ཞུ་བསྒྲུབ་རྒྱུ་དང་། གཉིས། བོད་ཀྱི་གསོ་བ་རིག་པའི་ཆེད་ལས་མི་སྣ་གསོ་སྐྱོང་བྱ་རྒྱུ། གསུམ། བོད་ཀྱི་གསོ་བ་རིག་པའི་ཁྱད་ཡོན་ལ་བརྟེན་ནས་མིའི་སྤྱི་ཚོགས་ཀྱི་བདེ་རྩ་དང་ཡར་རྒྱས། འཕྲོད་བསྟེན་བཅས་ལ་ཕན་པ་བསྒྲུབ་རྒྱུ་བཅས་ཡིན། དམིགས་ཡུལ་མངོན་འགྱུར་བྱ་ཆེད་སྨན་རྩིས་ཁང་དུ་སྡེ་ཚན་ཁག་ ༡༦ དང་ཡན་ལག་ཁག་སྨན་ཁང་ ༥༤ གསར་འཛུགས་གནང་ཡོད། ཅེས་བརྗོད་བྱུང་།  

ཁོང་གིས་མུ་མཐུད་དུ་གསུངས་དོན། སྨན་སློབ་སྐབས་བཅོ་ལྔ་ནས་འཛིན་རིམ་ ༡༢ ཐོན་པ་རྐྱང་བསྡུ་ལེན་བྱེད་ཀྱིན་ཡོད་ལ། སློབ་ཁྲིད་བྱེད་སྟངས་ལ་མཚོན་ན་སྔོན་དང་མི་འདྲ་བར་བདེ་ལེགས་སྨན་ཁང་དང་ཉམས་མྱོང་བརྗེ་རེས་བྱས་ཏེ། ལག་ལེན་དང་ཉམས་མྱོང་གཉིས་ཀ་ཟུང་འབྲེལ་ཐོག་འགྲོ་ཐུབ་ཀྱི་ཡོད་པ་མ་ཟད། མི་འགྱང་བར་ཚན་རིག་དང་རྒྱ་གར་ཚེ་རིག་བྱེད་དགེ་རྒན་སོགས་གདན་ཞུ་བྱ་འཆར་ཡོད། ༧གོང་ས་མཆོག་གི་ལམ་སྟོན་བཞིན། སྨན་རྩིས་ཁང་གིས་གང་ཐུབ་ཀྱིས་མཐོ་སློབ་འདི་རྒྱ་གར་རྒྱལ་ཡོངས་མཐོ་སློབ་ཁག་དང་མཚན་སྙན་གཅིག་མཚུངས་ཡོང་ཐབས་དང་། ཕྱི་རྒྱལ་ཁག་ཏུ་ལས་དོན་དང་སློབ་སྦྱོང་བཅས་ལ་སྐྱོད་སྐབས། གཙུག་ལག་སློབ་གྲྭ་ཚོར་ངོས་ལེན་ཡོང་བར་འབད་བརྩོན་བྱེད་བཞིན་ཡོད། ཅེས་བརྗོད་བྱུང་།  

དེའི་རྗེས་བཀའ་ཁྲི་ཟམ་གདོང་རིན་པོ་ཆེ་མཆོག་གིས་གསུང་བཤད་གནང་དོན། ང་ཚོ་རྒྱ་གར་དུ་བསླེབས་ཏེ་མི་ལོ་ལྔ་བཅུ་ལྷག་ཕྱིན་པའི་རིང་། རྒྱ་གར་ཚེ་རིག་བྱེད་དང་བོད་ཀྱི་གསོ་རིག་གཉིས་རིག་གནས་ཐ་ཐད་ཡིན་པ་བཟོ་མ་ཐུབ་པར་ཡུན་རིང་ལྷག་པ་རེད། འདས་པའི་ལོ་ཤས་ནང་ཝ་ཎ་མཐོ་སློབ་ཀྱིས་གཙོ་འགན་འཁུར་པ་ལྟར། རྒྱ་གར་གཞུང་གི་འབྲེལ་ཡོད་ལས་ཁུངས་ཁག་གིས་མཐུན་འགྱུར་གནང་སྟབས། ཁྲིམས་མཐུན་ཐོག་རྒྱ་གར་ལ་ཁུངས་གཏུགས་ཀྱང་། རྒྱ་གར་ཚེ་རིག་བྱེད་དང་གཅིག་གྱུར་མིན་པ་ཟུར་དུ་ངོས་འཛིན་ཐོབ་པ་དེ། རྒྱལ་སྤྱིའི་ནང་བོད་ཀྱི་གསོ་རིག་ཡར་རྒྱས་འགྲོ་རྒྱུར་ཕན་ཐོགས་བྱུང་བ་རེད་བསམ་གྱི་ཡོད། གལ་སྲིད། ཁྲིམས་མཐུན་ངོས་འཛིན་ཐོབ་མེད་ན། བོད་ནང་གསོ་རིག་སློབ་སྦྱོང་དར་ཁྱབ་ཆེན་པོ་ཡོད་ཀྱང་། བོད་ནང་བོད་པའི་རིག་གནས་ཀྱི་ངོ་བོར་མ་གནས་པར་རྒྱ་མིའི་རིག་གནས་ངོ་བོར་བརྩི་བ་དང་། རྒྱལ་སྤྱིའི་ཐོག་ལའང་རྒྱ་སྨན་གྱི་ཁྱབ་ཁོངས་འོག་འགྲོ་བཞིན་བའི་གནས་སྟངས་ཤིག་ཆགས་ཡོད་དུས། རྒྱ་གར་གཙོས་པའི་ཕྱིའི་རྒྱལ་ཁབ་ཁག་ཏུ་བོད་ཀྱི་གསོ་རིག་ལ་ཐུན་མོང་མ་ཡིན་པའི་ངོས་འཛིན་ཐོབ་པ་དེ། ལེགས་བྱང་སྲུང་སྐྱོབ་དང་རིག་གནས་འདི་རྒྱ་ནག་གི་རིག་གནས་མ་ཡིན་པར་བོད་པའི་ཐུན་མིན་རིག་གནས་ཤིག་ཡིན་པ་གསལ་པོ་ཆགས་པ་དེ། ཆབ་སྲིད་ཀྱི་དོན་སྙིང་ལྡན་པ་ཞིག་བྱུང་ཡོད་པ་རེད། ང་ཚོས་ངོས་འཛིན་འདི་འདྲ་ཞིག་ཐོབ་པའི་སྐབས་དང་བསྟུན། ཕྱོགས་གཅིག་ནས་རིག་གནས་རྒྱུན་འཛིན་དང་། ཕྱོགས་གཞན་ཞིག་ནས་རྒྱལ་སྤྱིའི་ནང་འགྲོ་བ་མིའི་རིགས་ལ་ཞབས་འདེགས་ཆེན་པོ་ཞིག་འགྲོ་རྒྱུའི་ཆེད་དུ། རིག་གནས་འདིའི་ཐོག་སྦྱངས་བའི་ཆེད་ལས་པ་མང་པོ་ཐོན་དགོས་པ་ཧ་ཅང་གལ་ཆེན་ཆགས་ཡོད། ཅེས་གསུངས།

སྨན་རྩིས་མཐོ་སློབ་གསར་འཛུགས་སྐོར་ལ། སྨན་རྩིས་ཁང་གི་མཛད་སྒོ་སྐབས་༧གོང་ས་མཆོག་གིས་ང་ཚོར་སྨན་པ་སྟོང་ཕྲག་ལྷག་དགོས་ཞེས་གསུངས་བ་བཞིན། དེ་རིང་གི་ལས་བསྡོམས་ནང་འདས་པའི་ལོ་ ༥༠ ནང་སྨན་རམས་པ་ ༢༠༠ ལྷག་བྱུང་ཡོད་ཅེས་གསུངས་སོང་། ཕྱོགས་གཅིག་ནས་བལྟས་ན། མི་ཉིས་བརྒྱ་ལབ་ན་གྲངས་ཀ་མང་པོ་ཡིན་སྲིད་ཀྱང་། ལོ་ལྔ་བཅུར་བགོ་བཤའ་བརྒྱབ་ན་ཧ་ཅང་ཉུང་ཉུང་ཆགས་ཡོད། དངོས་ཡོད་ཐོག་སྨན་རྩིས་ཁང་གི་ཡན་ལག་སྨན་ཁང་ཁག་ཏུ་སྨན་རྩིས་ཁང་གི་སྨན་པས་ཁྱབ་མ་ཐུབ་པ་དང་། རྒྱལ་སྤྱིའི་ཐོག་དགོས་མཁོ་ཡོད་པའི་ས་གནས་ཁག་ཏུ་སྨན་པ་མཁོ་གཏོང་ཐུབ་ཀྱི་མེད་སྟབས། ལས་བསྡོམས་ནང་གསུངས་བ་བཞིན། བོད་ཀྱི་གསོ་རིག་མཐོ་སློབ་ཚན་ལྡན་ཞིག་གང་མགྱོགས་འཛུགས་བསྐྲུན་བྱ་ཐུབ་རྒྱུ་དང་། དེ་འདྲའི་སློབ་གཉེར་ཁང་དེར་ལོ་ལྟར་སྨན་རམས་པ་བརྒྱ་ཕྲག་ཁ་ཤས་ཐོན་ཐུབ་པ་ཡིན་ན། རིག་གནས་སྲུང་སྐྱོབ་དང་སྤྱི་ཚོགས་ཞབས་ཞུ། བོད་པའི་མཚོན་དོན་སོགས་ཕྱོགས་ཚང་མར་ཐུགས་ཕན་སོས་པ་ཞིག་ཡོང་གི་ཡོད་པས། དེ་ལག་ལེན་འཁེལ་བར་སྐོམ་པ་ཆུ་འདོད་བཞིན་བསྒུག་རྒྱུ་ཡིན། ཞེས་དང་།

མཐའ་མར་ཁོང་གིས། ང་ཚོས་ངེས་པར་དུ་དགོངས་པ་བཞེས་དགོས་རྒྱུ་ཞིག་ལ། ད་ཆ་རྒྱ་གར་ཁྲིམས་ཐོག་ཏུ་བོད་ཀྱི་གསོ་རིག་ལ་ངོས་འཛིན་ཐོབ་ཡོད་སྟབས། སྨན་རྩིས་མཐོ་སློབ་འདི་ཡང་རྒྱ་གར་གཙུག་ལག་སློབ་གྲྭ་ཁག་གི་སྒྲིག་འཛུགས་ནང་ངོས་འཛིན་ཡོད་པ་ཞིག་དང་། མཐོ་སློབ་འདི་ནས་ཐོན་པའི་སྨན་པའི་ལག་འཁྱེར་དེ། རྒྱ་གར་རྒྱལ་ཡོངས་གཙུག་ལག་སློབ་གྲྭ་ཁག་གི་སྒྲིག་འཛུགས་ཀྱི་ངོས་འཛིན་ཡོད་པའི་ལག་འཁྱེར་གནང་རྒྱུ་དེ་གལ་ཆེན་པོ་རེད། དེ་མ་གནང་བ་ཡིན་ན། ཁྲིམས་མཐུན་ཐོག་ངོས་ལེན་བྱུང་བའི་དགོས་མཁོ་ཆ་ཚང་ཞིག་ང་ཚོས་བེད་སྤྱོད་གཏོང་མ་ཐུབ་པ་རེད། ཅེས་གསུངས་བྱུང་།

མཇུག་ཏུ་སྐུ་མགྲོན་གཙོ་དཔལ་རྒྱལ་བ་ཀརྨ་པ་མཆོག་གིས་གསུངས་དོན། ༧གོང་ས་མཆོག་གིས་སྨན་རྩིས་མཐོ་སློབ་འདིར་སྨན་པ་བརྒྱ་ཕྲག་ཙམ་དུ་མ་ཟད། སྟོང་ཕྲག་ལྷག་འཐོན་དགོས་པ་དང་། གང་ཐོན་པ་དེ་ཚོ་ཡང་ཚད་དང་ལྡན་པ་ཞིག་ཡོང་དགོས་ཞེས་གསུངས་པ་ལྟར་དེ་ཚོ་ཧ་ཅང་གནད་འགག་ཅིག་ཆགས་ཡོད་པ་རེད། མཐོ་སློབ་འདི་བཙུགས་པའི་ཐོག་མའི་དམིགས་ཡུལ་ནི་སློབ་མ་སྐྱེད་སྲིང་བྱ་རྒྱུ་དེ་རེད། ང་ཚོས་མི་ལོ་ལྔ་བཅུའི་ནང་སློབ་མ་ཅི་ཙམ་སྐྱེད་སྲིང་བྱས་ཡོད་མེད་དང་། དེ་ཚོས་རང་གཞན་ལ་ཕན་ཐོགས་ཅི་ཙམ་བྱུང་ཡོད་མེད་ཐད་ཕྱིར་མིག་ལྟ་སྐབས། རྗེས་སུ་ཡི་རངས་ཞུ་དགོས་པ་ཞིག་དང་སྤོབས་པ་སྐྱེས་དགོས་པ་ཞིག་རེད། ཅེས་དང་།  

ཡང་ཁོང་གིས་མུ་མཐུད་དོན། ད་ལྟ་བོད་ཀྱི་ཆོས་དང་རིག་གཞུང་ཛ་དྲག་གི་གནས་སྟངས་འོག་ལྷུང་ཡོད་སྟབས། ང་ཚོར་བློ་འཚབ་ཆེ་རུ་འགྲོ་དགོས་པ་ཞིག་དང་། ལས་ཀའི་མྱུར་ཚད་སྔར་ལས་ཇེ་མགྱོགས་སུ་བཏང་སྟེ་ཤུགས་སྣོན་རྒྱག་དགོས་ཀྱི་འདུག ཁ་སྔོན་སྨན་རྩིས་མཐོ་སློབ་སློབ་མ་ཚོ་རྒྱུད་སྟོད་ལ་ཡོང་བ་རེད། སྐབས་དེར། ངས་སློབ་མ་ཚོའི་གནས་སྟངས་དྲིས་སྐབས་རྩིས་སློབ་ལྔ་དྲུག་ལས་མི་འདུག་ལ། སློབ་མ་མང་པོ་ཞིག་གིས་རྩིས་ཀྱི་ཕན་ཡོན་སྐོར་ཤེས་ཀྱི་ཡོད་ཚོད་མི་འདུག ངས་བལྟས་ཡོང་ན་ཁག་ཅིག་གིས་སློབ་སྦྱོང་ནི་ལས་ཀ་རག་མིན་དང་འཚོ་བ་ཇི་ལྟར་རོལ་རྒྱུ། སྒོིར་མོ་གང་འདྲ་བཙལ་རྒྱུ་སོགས་ཀྱི་དོན་དུ་ཡིན་ནམ་སྙམ་པའི་དོགས་པ་ཡོང་འདུག ཅེས་གསུངས་སོང་།

ཁོང་གིས་མུ་མཐུད་དུ་གསུངས་དོན། ཀརྨ་པ་སྐུ་ཕྲེང་རིམ་བྱོན་ལ་མཚོན་ན་ལོ་རྒྱུས་ཐོག་སྨན་རྩིས་སྐོར་མཁྱེན་རྟོགས་ལྡན་པ་ཞིག་ཡིན་སྟབས། སོ་སོ་རང་ཉིད་ཀྱང་ངོ་གནོང་དགོས་པ་ཞིག་ཆགས་སོང་། གལ་སྲིད་རང་ཉིད་ལ་མ་འོངས་པར་མི་ཚེ་བསྐྱལ་རྒྱུའི་གོ་སྐབས་རིང་པོ་ཤར་ཚེ། སྨན་རྩིས་གཞུང་ལུཊ་ལ་བག་ཆགས་འཇོག་རྒྱུར་འབད་བརྩོན་ཞུ་རྒྱུ་ཡིན། ངས་སྨན་སྦྱངས་ཏེ་མཁས་པ་ཆགས་རྒྱུ་རེད་དྲན་གྱི་མེད་ཀྱང་། དེ་ལྟར་བྱས་ན་སྨན་རྩིས་ཀྱི་བསྟན་པར་ཞབས་འདེགས་དང་། སྨན་རྩིས་བྱ་བར་ཕྱག་ལས་གནང་མཁན་ཚོར་སེམས་ཤུགས་འཕར་རྒྱུའི་ཆ་རྐྱེན་དུ་འགྲོ་བ་རེད་དྲན་གྱི་ཡོད། ཅེས་གསུངས་སོིང་།     

གསར་འགོད་པ། དཔལ་ལྡན།