དོན་དག་མེད་པའི་ཐ་སྙད་ཆུང་ཆུང་།

ཨ་མཆོད་འཇམ་དཔལ་ཚུལ་ཁྲིམས།

ཁ་བྱང་གི་འགྲེལ་བ།

ཁ་བྱང་གི་ཚིག་འདི་དཔལ་ལྡན་བཀའ་བློན་ཁྲི་བ་མཆོག་གིས་གྲོས་ཚོགས་ལ་བཀའ་ཤག་གི་གསལ་བཤད་གནང་སྐབས་བེད་སྤྱོད་གནང་བའི་ཚིག་ཅིག་རེད། ཁོང་གིས་“ད་ལྟ་རྒྱ་གར་གྱི་གནོན་ཤུགས་མེད་ལ་རྒྱ་མིའི་གནོན་ཤུགས་ཀྱང་མེད། ཡིན་ན་ཡང་མ་འོངས་པར་གནོན་ཤུགས་བྱུང་པ་ཡིན་ན་དོན་དག་མེད་པའི་གདོང་ལེན་བྱེད་ཁག་པོ་ཅན་གྱི་ཐ་སྙད་ཅིག་ང་ཚོས་ཉར་ནས་བསྡད་ན་ཇབ་གང་མི་འདུག”་ཅེས་གསུང་འདུག ད་དུང་ཁོང་གིས “དོན་ལ་འགྱུར་བ་གང་ཡང་མེད་ན་ཡང་ཐ་སྙད་ཆུང་ཆུང་ཞིག་ལ་བརྟེན་ནས་དཀའ་ངལ་བྱུང་ན” ཞེས་གསུངས་སོང་། ཚིག་འདི་དག་ལ་རྟེན་ནས་ཁོང་གི་དགོངས་པའི་ནང་དུ་བོད་གཞུང་ཞེས་པ་འདི་ལ་བརྩི་བཀུར་དང་གལ་གནད་གང་ཙམ་གཟིགས་ཀྱི་ཡོད་པ་མཐོང་ཐུབ་པར་སྙམ།  

ཉེ་ཆར་རང་རེའི་བཙན་བྱོལ་གཞུང་གི་མིང་མེད་པར་བཏང་བ་འདི་ལ་སྤྱི་ཚོགས་ནང་དུ་ཕྱོགས་གཅིག་གིས་དེ་ནི་ལག་པས་ཡར་བཞེངས་གཏོར་མ། རྐང་བས་མར་བཤིག་ཀླུད་རོ་བཟོས་པ་རང་རེད་བསམ་ནས་བློ་མ་བདེ་ལོང་བས་རྩམ་སྐྱ་འགམ་འདྲར་གྱུར་བ་དང་། ཕྱོགས་གཅིག་གིས་འདི་ནི་ དུས་ཐོག་གི་ཆར་བ། གནད་ཐོག་གི་སྐད་ཆ་རེད་ཟེར་ནས་ཕྱོགས་གཉིས་ཀ་སེམས་པ་བསམ་པའི་འཁྱེར་སོ་ཁ་ཁ། ལག་ལས་ཀའི་བྱེད་སོ་སོ་སོར་གྱུར་ནས་ནང་ཁུལ་བསམ་འཆར་མི་མཐུན་པ་ཤུགས་ཆེན་བྱུང་།

དེ་ལ་རང་རང་གི་ཟིན་མཚམས་དེ་ལ་རང་རང་གིས་བློ་རིག་བཀོལ་ནས་ཁུངས་ཇེ་བཙན་དང་། གནས་ལུགས་ལ་ཇེ་ཉེར་གཏོང་བའི་འབད་བརྩོན་བྱེད་ཀྱིན་པ་འདི་ནི་སྤྱིར་ན་ཆོས་ཉིད་ཅིག་ལོས་ཡིན། ད་ལན་གྱི་རྩོད་པ་འདི་ནི་གཞུང་ཕྱོགས་དང་དམངས་ཕྱོགས་ཀྱི་འགལ་ཟླའི་རང་བཞིན་དུ་གྱུར་ཞིང་། གཞུང་ཕྱོགས་ནས་ཚིག་ལ་མི་རྟོན་དོན་ལ་རྟོན་ཞེས་ཐ་སྙད་ཙམ་ལ་གལ་ཆེན་དུ་བརྩི་མི་འོས་ཚུལ་བཤད་ནས་ད་ལན་གྱི་གནད་དོན་འདི་ཅི་ཆུང་གང་ཆུང་དུ་སྒྲུབ་པའི་འབད་བརྩོན་བྱེད་ཅིང་། དམངས་ཕྱོགས་ནས་འདི་ནི་རང་སྲོག་རང་གིས་བཅད་པ་རེད་ཅེས་བཤད་ནས་ད་ལན་གྱི་གནད་དོན་འདི་ཅི་ཆེ་གང་ཆེ་རུ་སྒྲུབ་པའི་འབད་བརྩོན་བྱེད།

འདིའི་སྐོར་ལ་སྔར་ཡང་གུས་པས་ཕོ་ངན་གྱིས་བཤད་སྔ། བོང་ལིས་རྒྱུག་སྔ་བྱས་ནས་རང་སེམས་ལ་འཆར་སྒོ་གང་ཡོད་དེ་སྐེ་བཅད་ན་སྐེ་ཁྲག་འོ་མ། བྲང་བཀོག་ན་དྲན་པ་དཀར་བོ་བྱས་ནས་གང་ཤེས་རེ་བྲིས་ཡོད་ཀྱང་། ཕན་རྒྱུའི་ཚབ་ལ་གནོད་དུ་སོང་ནས། བསམ་སའི་ཁ་ལ་མ་སོང་། མ་བསམ་སའི་མིག་ལ་སོང་ཡོད་མེད་ཀྱང་ཤེས་དཀའ་། དེའི་ཕྱིར་ད་ལྟ་བདག་གིས་ཁྱིམ་བུ་སྤུན་ནང་འཁྲུག་བྱེད་པ་དེ། །ཆུས་བརྟན་པ་ཤོར་བའི་བསུ་མ་རེད། །རྗེ་རྒྱལ་བློན་ནང་འཁྲུག་བྱེད་པ་དེ། །ཇུས་རྒྱལ་སྲིད་ཤོར་བའི་སྔ་བལྟས་རེད། ཟེར་བ་བཞིན་འདི་ལྟར་ནང་ཁུལ་བསམ་བློ་མ་མཐུན་པར་ཕྱོགས་གཉིས་ཀྱི་རང་རང་གི་བལྟ་བ་དེ་བདེན་ལུགས་རྒྱན་ལུགས་རྣམས་རང་རང་གི་ཕྱོགས་གཏོགས་རྣམས་ལ་རེ་བཤད་ནས་སྡོད་པ་ལས། ཕན་ཚུན་བསམ་ཚུལ་རྗེ་རེས་ཀྱིས་རྡར་ཤ་མ་བཅད་པར་བསྡད་ན་ཉིན་ཞིག་ཟས་ཁོག་ལ་བཟུང་ན་དུག་ཏུ་གྱུར་། གཏམ་ཁོག་ལ་ཉར་ན་མཁོན་དུ་འགྱུར་གྱི་རེད་བསམ་ནས་དཔྱད་པ་ཐུང་ངུ་འདི་བྱེད་བྱས་པ་ཡིན།

དེས་ན་མིང་ཙམ་ཞེས་པ་འདི་ཅི་འདྲ་ཞིག་ལ་གོ་དགོས་སམ། ངོ་མ་མིང་ཞིག་ཡིན་ན་དོན་སྙིང་མེད་པས་ཁྱབ་པ་ཡིན་ནམ། དུས་རྟག་ཏུ་མིང་དང་དོན་གཉིས་འགལ་བ་ཡིན་ནམ། མིང་ལ་གཙིགས་སུ་བཟུང་བ་ཡིན་ན་དེ་ལ་གལ་གནད་ཅན་གྱི་དོན་ཞིག་རག་རྒྱུ་མེད་པས་ཁྱབ་བམ། ཞེས་པའི་དྲི་བ་འདི་དག་ལ་ལན་འདེབས་པའི་འབད་བརྩོན་གྱིས་རང་གི་དམ་བཅའ་དེ་སྲུང་བའི་ཐབས་ཤེས་བྱེད་རྒྱུ་ཡིན།

ཟམ་གདོང་རིན་པོ་ཆེ་ནི་རང་གི་རྩ་བའི་དམ་བཅའ་སྲུང་བ་ལ་མཆོག་ཏུ་གྱུར་བ་ཞིག་རེད། མང་ཚོགས་དཀྱུས་མའི་དཀྱིལ་དུ་ཁོང་གི་དམ་བཅའ་གང་འདྲ་ཞིག་ལ་དགག་པ་དང་དྲི་བ་ག་འདྲ་ཞིག་བཏང་ཡང་སྐབས་ཐོག་དེར་ལན་གྱིས་ཟློག་པར་མི་ནུས་པའི་དགག་ལན་དང་དྲིས་ལན་ཚ་བོ་ཐོག་འདྲ་བ་རེ་འདེབས་པ་ནི་ཁོང་གི་ཁྱད་ཆོས་སུ་ཡོངས་གྲགས་དེ་རེད། སྐད་ཆ་འདི་ཕྱོགས་གཞན་ནས་ཟམ་གདོང་རིན་པོ་ཆེ་འདི་རང་གི་དམ་བཅའ་སྲུང་ཆེད་དུ་འགྲེལ་ལོག་བྱེད་པ་ལ་ཁྱད་དུ་འཕགས་པ་ཞིག་རེད་ཅེས་བཤད་ཀྱང་མི་འོས་པ་མི་འདུག མ་གཞི་ད་ནི་སྐད་ཆ་འདི་འདྲ་ཁ་ལ་ལེན་འདོད་མི་འདུག་མོད་ད་ལྟ་སྐབས་དང་འབྲེལ་བས་ཞུ་དགོས་བྱུང་། རང་ཅག་གི་བཤད་སྲོལ་ལ། མཁས་པས་བཤད་ན་ཅི་ཡང་བདེན། ཞེས་པ་ཞིག་ཡོད་པ་འདི། མཁས་པས་འགྲེལ་ན་ཅིར་ཡང་འགྱུར། ཞེས་པའི་དོན་ཡིན་པར་ཁོ་བོས་བསམ་གྱིན་འདུག

གཞུང་གི་ཕྱོགས་འཛིན་པ་དག་གིས་“ཐ་སྙད་ཙམ་དང་མིང་ཙམ་འཛིན་པ་གལ་ཆེ་འམ་དོན་དག་སྙིང་པོ་འཛིན་པ་གལ་ཆེ་”ཞེས་རྟོན་པ་རྣམ་བཞིའི་རིགས་ལམ་སྤྱད་ནས་ཐ་སྙད་དང་དོན་གཉིས་དུས་རྟག་ཏུ་འགལ་བ་ཡིན་པ་ལྟ་བུའི་ཐལ་འགྱུར་ཚ་བོ་ཞིག་འཕེན། ཐལ་འགྱུར་འདི་དམངས་ཕྱོགས་ཀྱིས་སེམས་ལ་ཅི་མ་བདེན་ཨང་སྙམ་པའི་ཟུགས་འགྲོ་བ་ཞིག་མ་ཡིན་ཡང་སྐབས་ཐོག་དེར་གཅིག་གིས་གཅིག་གི་ངོ་གདོང་ལ་བལྟ་ཙམ་བྱེད་པ་ལས་དེ་མ་ཐག་ཏུ་ལན་འདེབས་ཞིག་མ་རག་པ་བལྟ་བུར་འགྱུར་བཞིན་ཡོད་པར་སྣང་། 

གཞུང་ཕྱོགས་ཀྱི་ཐལ་འགྱུར་ལ་བལྟས་ན་མིང་ངམ་ཐ་སྙད་ཡིན་ན་དེ་དོན་གལ་གནད་ཅན་ལ་ནམ་ཡང་འགྱུར་རྒྱུ་མེད་པ་དང་། མིང་དང་དོན་གཉིས་ནམ་ཡང་འགལ་ཟླ་ཡིན་པ་ལྟ་བུ་ཞིག་གསུང་གི་ཡོད། གང་ལགས་ཤེ་ན་མིང་དང་དོན་གཉིས་འདེམས་ཀ་ལ་སྤྲད་ནས་རྟོན་བཞིའི་རིགས་ལམ་སྤྱད་དེ་གཞན་ཕྱོགས་ཀྱི་ཁ་འགོགས་ཐབས་བྱས་པ་རེད། དེར་མ་ཟད་མིང་ཡིན་པ་ཙམ་གྱིས་མིང་ཙམ་ཡིན་དགོས་ཤག་ལྟ་བུར་ཡང་བཞག་ཡོད། གང་ལགས་ཤེ་ན་བོད་གཞུང་ཞེས་པ་འདི་མིང་ཙམ་ཡིན་ཤག་བྱེད་པ་ལས་དོན་སྙིང་ལྡན་པའི་མིང་ཞིག་ཡིན་ནམ་མིང་ཙམ་ཡིན་མིན་གྱི་ཚུལ་ཚིག་ཟུར་ཙམ་ཡང་གླེང་གི་མེད་པ་རེད།

ཐོག་མར་མིང་དང་མིང་ཙམ་ལ་ཁྱད་པར་ཅི་ཡོད་ཀྱི་སྐོར་ལ་ཁྱེད་ཅག་གིས་ཐུགས་གཞིག་ཅིག་གནང་ནས་ཁྱེད་ཅག་གི་རྒྱུད་ཀྱི་གཏན་ཚིག་གི་དྲན་ཚོར་གང་ཞིག་ཟམ་གདོང་གི་རྟོན་བཞིའི་རིག་པའི་ཐལ་འགྱུར་གྱིས་ནུས་མེད་དུ་བཏང་ཟིན་པ་དེ་སླར་གསོ་བྱ་རྒྱུ་ཡིན། མིང་ཞེས་པ་ནི་ཀུན་ལ་དགོས་པ་དང་། ལྷག་པར་དུ་འཇིག་རྟེན་པ་ལ་དེ་བས་ཀྱང་དགོས་པའི་དོན་དག་གལ་ཆེན་ཞིག་རེད། “སྐྱེས་པའི་མི་ལ་གྲགས་པའི་གཏམ་དགོས། བསགས་པའི་ནོར་ལ་སྲུང་བའི་རྭ་དགོས།” ཟེར་བ་མིན་ནམ། འཇིག་རྟེན་པའི་གྲལ་དུ་ཚུད་མིན་གྱི་ཚད་འཛིན་བྱེད་ལ་འཇིག་རྟེན་ཆོས་བརྒྱད་ཟེར་བ་ཞིག་འདྲེན་རྒྱུ་ཡོད་པའི་ནང་ནས་སྙན་པ་དང་། མི་སྙན་པ། བསྟོད་པ། སྨད་པ་བཅས་བཞི་ནི་མིང་དང་འབྲེལ་བའི་ཆོས་བཞི་རེད། སྤྱི་ཚོགས་ཚན་རིག་གིས་བཤད་ཚུལ་ལྟར་ན་འཇིག་རྟེན་མི་ཞིག་ལ་མེད་དུ་མི་རུང་བའི་དགོས་མཁོ་གསུམ་ཡོད་པ་ནི་ཟས་གོས་གནས་མལ་གསུམ་ཡིན་ཞིང་། ཅུང་འུད་ཀྱིས་བཤད་ན་མིང་ནི་འདིའི་ནང་དུ་ཡང་ཚུད་ཡོད་པར་བཤད་ཆོག་སྟེ། རང་ཅག་གི་ཁ་རྒྱུན་དུ་“ལྟོ་གོས་གཏམ”་གསུམ་ཞེས་ལྟོ་གོས་གཉིས་ཀྱི་གྲལ་དུ་གནས་མལ་གྱི་ཚབ་ལ་གཏམ་བཞག་ནས་བགྲང་ཡོད་པ་མ་ཡིན་ནམ། འདི་དག་གིས་མིང་ཞིག་ཡིན་ན་མིང་ཙམ་དང་ཐ་སྙད་སྐམ་པོ་ཡིན་མིན་ལ་དོགས་པ་མེད་པ་དེ་འདྲ་མ་ཡིན་པ་དེ་ད་ལྟ་ཀློག་པ་པོ་ཁྱེད་ཅག་གིས་དྲན་པ་གསོས་ཡོད་པའི་རེ་བ་ཡིན།

མིང་ནི་དེ་འདྲའི་གལ་ཆུང་ཞིག་མིན།

དེས་ན་མིང་ཞིག་ཡིན་པ་ཙམ་གྱིས་མིང་ཙམ་པོ་བ་འམ་ཐམ་སྙད་སྐམ་པོ་ཟེར་བ་ཞིག་ཡིན་མི་དགོས། ནམ་རྒྱུན་ང་ཚོས་“མིང་ཙམ་ལ་མ་རྩོད་དོན་ལ་རྩོད”་ཞེས་བཤད་སྲོལ་ཡོད་པའི་མིང་ཙམ་ཟེར་བ་ནི་དཔེར་ན། བུ་སྤུན་གཉིས་ཀྱིས་ལས་ཀ་ཞིག་བྱས་ན་དེ་བྱེད་མཁན་གྱི་མིང་དེ་སོ་སོ་ལ་རག་ཐབས་ཀྱི་དོན་དུ་ཤི་འཐབ་རོ་འཐབ་བྱེད་མཁན་ཡོད་པ་དེ་འདྲ་ལ་གོ་དང་། དེ་བཞིན་བུ་ལོན་སྒོར་མོ་འབུམ་མང་པོ་བླངས་བའི་མི་ཞིག་ཕྱི་རྒྱལ་ལ་སྒོར་མོའི་དོན་དུ་སོང་རྗེས་མི་དེས་སྒོར་མོའི་དོན་དུ་གཙང་སྤྱོད་བཀྲུ་ཡི་མིན་ཞེས་ལབ་ན་དེ་ལ་“ཁྱོད་ལ་བུ་ལོན་དེ་འདྲའི་ཆེན་པོ་ཡོད། ད་སྒོར་མོ་དེ་འདྲ་མང་པོ་ཞིག་རག་གི་ཡོད་ན་མིང་ཙམ་ལ་མ་བལྟ།”་ཞེས་བཤད་ཆོག་པ་རེད། མིང་ཙམ་ཞེས་པ་འདི་འདྲ་ཞིག་ལ་གོ་བ་ལས་མིང་ཞེས་པའི་ཚིག་ཡོད་ཚད་ཐམས་ཅད་མིང་ཙམ་དང་ཐ་སྙད་ཙམ་ཡིན་པ་འདྲ་བ། མིང་ཞེས་པའི་ཚིག་ཡོད་ཚད་ཐམས་ཅད་རིན་ཐང་ཆུང་བ་འདྲ་བ། མིང་ཞེས་པའི་ཚིག་ཡོད་ཚད་ཐམས་ཅད་ནམ་ཡང་དོན་ལས་གལ་ཆུང་བ་འདྲ་བ་དེ་འདྲ་ཡེ་ནས་མིན་པར་སྐབས་རེ་དོན་ལས་མིང་གལ་ཆེ་བ་ཡང་ཧ་ཅང་མང་།  

སྐབས་རེ་དོན་ལས་མིང་གལ་ཆེ་བ་ཡང་ཧ་ཅང་མང་། ལྷག་པར་དུ་ཆབ་སྲིད་ཀྱི་ནང་དུ་ལས་དོན་སྒྲུབ་པའི་བརྒྱ་ཆའི་དགུ་བཅུ་ཙམ་ལ་ཐོག་མར་མིང་སྐྲུན་ཞིང་དེ་ནས་དེ་འབྲེལ་གྱི་དོན་སྒྲུབ་པ་དེ་འདྲ་རེད། དེ་ནི་འཇིག་རྟེན་མི་ལ་གཏམ་སྙན་པ་དེ་ཧ་ཅང་གལ་ཆེ་བར་བརྩི་བ་དང་འབྲེལ་མེད་དམ་སྙམ།  གང་ལྟར་གཏམ་མགོ་སྣ། ཁོག་དཔུང་ལ་རྒྱ་ཟེར་བ་འདི་ཐམས་ཅད་ཀྱིས་མིང་གི་སྐོར་བཤད་ཀྱི་ཡོད་པ་རེད། དཔེར་ན། འཛམ་གླིང་གི་རྒྱལ་ཁབ་སོ་སོས་འགྲོ་སོང་གང་མང་ཞིག་རང་རང་གི་མི་སེར་གྱི་ཁ་དང་ལག་པའི་བར་ནས་བཅད་དེ་རྩེད་མོའི་ཆེད་དུ་གཏོང་གི་མི་འདུག་གམ། དེ་དག་མིང་གི་ཆེད་དུ་རེད། ས་ཁུལ་བྱེ་བྲག་རེ་ལ་རང་བྱུང་གི་གོད་ཆག་རེ་བྱུང་དུས་འཛམ་གླིང་གི་རྒྱལ་ཁབ་དག་གིས་རོགས་རམ་དངོས་དང་རོགས་རམ་རུ་ཁག་ཇི་ལྟར་གཏོང་གི་འདུག ཨ་རིའི་རོགས་རམ་མ་སླེབས་པའི་འཛམ་གླིང་གི་གོད་ཆད་ཅིག་ཧ་ལམ་མེད་པ་འདི་ལ་མིང་གི་ཆེད་དུ་བྱས་པ་ཅུང་ཟད་ཀྱང་མི་འདྲེས་སམ། མཐའ་ན་བཟོ་ཚོང་ལས་གྲྭ་དག་གིས་སྒོར་མོ་དུང་ཕྱུར་མང་པོ་བཏང་ནས་རང་རང་གི་ཚོང་རྫས་ཁྱབ་བསྒྲགས་བྱེད་པ་འདི་མིང་གི་ཆེད་དུ་མིན་ན་གང་རེད།

ད་ལན་ལ་ཆ་བཞག་ན་ཡང་ཕྱི་རྒྱལ་གྱི་དོན་གཅོད་ཁག་གིས་༧གོང་ས་མཆོག་གི་མཚན་བེད་སྤྱོད་གནང་ཆོག་པའི་བོད་སྐུལ་གསོལ་བ་ཕུར་ཚུགས་འདེབས་མཁན་ང་ཚོ་རེད་ལ། དེ་ལ་༧གོང་ས་མཆོག་གིས་ཀྱང་ཞལ་བཞེས་གནང་ཡོད། འདིས་མིང་དེ་གལ་ཆེ་བ་ཞིག་བསྟན་པ་མིན་ན་གང་ཡིན། ལར་ནས་མིང་ལ་གལ་ཆེན་མི་བརྩི་བའི་འདུ་ཤེས་དེ་སངས་རྒྱས་ཆོས་ལུགས་ཀྱིས་ཤན་ཤུགས་ཤིག་ཡིན་པས་ཆོས་ཀྱི་ལམ་སྲོལ་སྲིད་ལ་བཀབ་པ་དེ་འགྲིག་མ་སོང་བསམ་པ་ཡིན།

དཔེར་ནཿ གང་ཟག་ཅིག་རང་གི་སྐྱེ་སའི་རྒྱལ་ཁབ་ཀྱི་འབངས་མི་ཡིན་བཞིན་དུ་རྒྱལ་ཁབ་གཞན་ཞིག་གི་ཁོངས་མིར་ཞུགས་ན་རང་གི་སྐྱེ་སའི་རྒྱལ་ཁབ་དེའི་འབངས་མི་རྦད་དེ་མ་ཡིན་པ་འམ་ཡང་ན་ཕྱེད་ཙམ་ལས་མ་ཡིན་པར་གྱུར་བ་མ་ཡིན་ནམ། དོན་དུ་གང་ཟག་དེའི་རྒྱལ་ཁུངས་ཀྱི་མིང་ཙམ་སྒྱུར་བ་ལས་ནང་གི་ཤ་ཁྲག་རྗེས་མེད་ལ་མཐའ་ན་སོ་སོའི་འབོད་མིང་ཀྱང་རང་སོར་གནས་ཡོད། འོན་ཀྱང་ཉིན་དེ་ནས་བཟུང་རང་སྐྱེ་སའི་རྒྱལ་ཁབ་དེའི་མིའི་མི་གོ་མི་ཆོད་པར་གྱུར་བ་རེད། འབངས་མི་གཅིག་གིས་རྒྱལ་ཁབ་ཅིག་གི་མི་གོ་ཆོད་བཞིན་དུ་གློ་བུར་དུ་མི་ཆོད་པར་འགྱུར་བ་དེ་མིང་སྒྱུར་བ་ཙམ་ལས་བྱུང་བ་རེད།

དཔལ་ལྡན་བཀའ་ཁྲི་མཆོག་གིས་བཙན་བྱོལ་བོད་གཞུང་ཕྱིར་བསྡུ་གནང་མེད་པའི་སྒྲུབ་བྱེད་ལ་ད་ལྟ་དམངས་གཙོའི་ཀ་བ་གསུམ་ཀའི་ཆ་ཤས་ཕྲ་མོ་ཙམ་ཡང་ཕྱིར་བསྡུ་མ་གནང་བར་ཉུང་སྔར་བཞིན་ཕྱག་ལས་གནང་བཞིན་ཡོད་པ་དེ་བཀོད་སོང་བ་དཔེ་འདི་དང་འདྲ་བ་ཞིག་མི་འདུག་གམ། ཡང་གཅིག་བཤད་ན་མི་ཞིག་གིས་ཞི་མི་ཞིག་ལ་འདིའི་མིང་ལ་ཞི་མི་ཟེར་རུང་ད་དུང་ཡང་སྟག་ཡིན་དེ། འདི་ལ་མཆེ་སྡེར་སོགས་དམར་གཡག་སྟག་གི་མཛུམ་དྲུག་ཡོངས་སུ་རྫོགས་པ་ཚང་ཡོད་ཟེར་བ་དང་འདྲ་བ་ཞིག་མི་འདུག་གམ་སྙམ། གོང་མི་དེས་ཀྱང་མིང་དེ་མ་གཏོགས་ཆ་ཤས་ཕྲ་མོ་ཙམ་ཡང་འགྱུར་བ་བཏང་མེད་ཅིང་། མཐའ་ན་རང་གི་འབོད་མིང་ཚུན་ཆད་ནས་བརྗེས་མེད་པ་རེད། འོན་ཀྱང་རྒྱལ་ཁབ་གཞན་གྱི་མི་ཁུངས་ལ་ཞུགས་པའི་རྗེས་དང་མ་ཞུགས་པའི་སྔོན་གྱི་བར་ལ་ཁྱད་པར་ག་ཚོད་ཡོད་ཀྱི་རེད་དམ། ཡང་གཅིག་བཤད་ན་འདི་ནི་རྒྱལ་ཁབ་དེའི་འབངས་མི་ཡིན་པར་ཡིག་ཐོག་ལ་བྲིས་ཀྱང་དོན་དུ་སྐྱེ་སའི་རྒྱལ་ཁབ་ཀྱི་འབངས་སྔར་བཞིན་ཡིན། གང་ལགས་ཤེ་ན་མགོ་རྐང་ལག་སོགས་ལུས་ཀྱི་ཕྱི་ནང་གི་ཆ་ཤས་ཕྲ་མོ་ཙམ་ཡང་འགྱུར་བ་སོང་མེད་ཅེས་བཤད་པ་དང་འདྲ་བ་ཞིག་མི་འདུག་གམ་སྙམ། 

ལར་ནས་ཁོང་བཀའ་བློན་ཁྲི་བའི་མཚན་ཐོག་ནས་བཙན་བྱོལ་བོད་གཞུང་ཕྱིར་བསྡུ་བྱས་མེད་པར་ད་ཡོད་ཀ་བ་གསུམ་དེ་དེ་རང་ཡིན་པར་གྲོས་ཚོགས་སུ་གསུངས་བ་ལ་ཡིད་ཅུང་ཟད་དགའ་ནས་ཡོད། གང་ལགས་ཤེ་ན་འདིས་ཉུང་མཐར་ཡང་མ་འོངས་པར་ལུང་ཙམ་འདྲེན་རྒྱུ་ཡོད་པ་ཞིག་ཏུ་གྱུར་བ་རེད། འོན་ཀྱང་ཁོང་གིས་“བཙན་བྱོལ་བོད་གཞུང་གི་མང་གཙོའི་ཀ་བ་གསུམ་གྱི་ཁྲིམས་མཐུན་གྱི་སྒྲིག་འཛུགས་བཅའ་ཁྲིམས་རིན་པོ་ཆེའི་དགོངས་དོན་གང་ཡོད་དེ་དག་གྲ་མ་མཉམ་པ་དང་། གྲུ་མ་ཞིག་པར་ཡོད་མ་གཏོགས་ཕྱིར་བསྡུ་བྱས་མེད། ཅེས་བཀའ་བློན་ཁྲི་བས་འགན་ཁུར་ཡོད་པའི་ཐོག་ནས་ཚིག་ཐག་ཆོད་པོས་སྙན་གསན་ཞུ་ཡ་ཡིན།”་ཞེས་གསུང་བ་ལས་“བཙན་བྱོལ་བོད་གཞུང་ཕྱིར་བསྡུ་བྱས་མེད། ད་ལྟ་ངྷ་སར་ཡོད་བཞིན་པའི་བོད་མིའི་སྒྲིག་འཛུགས་འདི་བཙན་བྱོལ་བོད་གཞུང་ཡིན།”ཞེས་ཚིག་ཐད་ཀར་ནི་གསུང་མི་འདུག འདི་ནི་ཞོར་འཕྲོས་ཙམ་ཡིན།

མདོར་ན་མིང་གིས་དོན་མཚོན་གྱི་ཡོད་པ་འདི་རང་ཅག་གིས་གཏན་ནས་མ་བརྗེད་མི་འོས། དོན་ལ་བརྟེན་ནས་མིང་འབྱུང་རྒྱུ་ཞིག་ཡོད་པ་ལོས་བདེན་ཀྱང་། མིང་ལ་བརྟེན་ནས་དོན་འབྱུང་རྒྱུ་ཡོད་པ་ཡང་དེ་བཞིན་དུ་བདེན་པ་རེད། ལྷག་པར་དུ་ཆོས་དང་སྲིད་གཉིས་ཀྱི་ལྟ་ཕྱོགས་མི་མཐུན་ས་གཙོ་བོ་ཞིག་འདི་ན་གནས་ཡོད། ཆོས་ཀྱིས་དོན་ལས་མིང་འབྱུང་བའི་རྒྱུད་རིམ་དེ་ལ་གཞི་འཛིན་ཞིང་། སྲིད་ཀྱིས་མིང་ལས་དོན་འབྱུང་བའི་རྒྱུད་རིམ་དེ་ལ་གཞི་གཙོ་བོ་འཛིན་པ་ཡིན། དེའི་ཕྱིར་ད་ལན་མིང་ལས་དོན་གལ་ཆེན་དུ་བདམ་པ་དེ་དོན་དུ་ཆོས་ཀྱི་ལམ་ལུགས་ཀྱིས་སྲིད་ཀྱི་ལམ་ལུགས་ལ་གནོད་པ་ཡང་གཅིག་བསྐྱལ་སོང་སྙམ། ཆོས་སྲིད་སྐྱོང་ལུགས་སོ་སོ་ཡིན་པས་གཅིག་གིས་གཅིག་ལ་འདི་ལྟར་གནོད་བྱེད་དུ་འགྲོ་བ་ཡིན། འདི་ནི་ཡང་ཆོས་སྲིད་ཟུང་འབྲེལ་གྱི་ལམ་ལུགས་མི་བཟང་བའི་སྒྲུབ་བྱེད་གསོན་པོ་གཅིག་རེད།

ཚེས་ ༦ ཚེས་ ༢ ཀྱི་ཉིན་བཀའ་ཤག་གིས་རྒྱ་ནག་གིས་གནོན་ཤུགས་ཡེ་ནས་མེད་ཚུལ་ནན་གྱིས་གསུང་སོང་ཡང་། ཚོགས་ཆེན་མ་འཚོགས་པའི་སྔོན་ཞིག་ལ་ཟིན་བྲིས་ཚོགས་ཆུང་གིས་ཐ་སྙད་ལ་འགྱུར་བ་གཏོང་དགོས་པའི་རྒྱུ་མཚན་ལ་རྒྱ་གར་དང་རྒྱ་ནག་གཉིས་ཀའི་གནོན་ཤུགས་དང་འབྲེལ་ཡོད་པར་དངོས་སུ་གསུང་སོང་། དེ་དུས་རྒྱ་ནག་གིས་བོད་ཀྱི་བཅའ་ཁྲིམས་ལུང་དྲངས་ནས་མི་འགྲིག་པ་བཟོ་ཡི་ཡོད་ཚུལ་གསུང་སོང་། རྒྱ་ནག་གིས་ཐ་སྙད་དེ་གནད་དོན་གལ་ཆེན་ཞིག་ཡིན་པ་དང་། ཐ་སྙད་དེ་རང་གིས་ཁོང་ཚོ་ལ་གནོད་པ་ཞིག་ཐེབས་ཀྱི་ཡོད་པར་བསྟན་པ་རེད། རྒྱུ་མཚན་དེ་རང་གིས་ཀྱང་ཐ་སྙད་འདི་གལ་ཆེན་པོ་ཞིག་ཡིན་པ་མི་མཚོན་ནམ།

སྐབས་རེ་མིང་ནི་དོན་ཡང་ཡིན།

གཉིས་པ་མིང་དང་དོན་གཉིས་འགལ་ཡོད་མདོག་གི་བཤད་སྟངས་འདི་ལོག་འགྲེལ་ཡིན་པ་ཁུངས་སྐྱེལ་རྒྱུ་ཡིན། བཤད་སྟངས་འདི་འདྲ་ལས་དེ་གཉིས་ནང་འགལ་དུ་སྟོན་གྱི་ཡོད་པ་ཟམ་གདོང་རིན་པོ་ཆེས་སྔོན་ནས་སྐབས་གཞན་དུ་ཁས་ལེན་སོང་ཟིན་པས་དེ་ལ་གཞི་བཅོལ་ནས་བཤད་ཀྱིན་ཡོད། སྤྱིར་ན་མིང་དང་མིང་ཙམ་པོ་གཉིས་ཁྱད་པར་ཡོད་པ་གོང་དུ་བཤད་པ་འདི་ཡིན་ཞིང་། མིང་དང་དོན་གཉིས་འགལ་བ་ཞིག་ཡེ་ནས་མིན། མིང་འགའ་རེ་དོན་ཡིན་ཞིང་། དོན་འགའ་རེ་མིང་ཡིན།

ཕྱི་ལོ་ ༡༩༨༩ ལོར་༧གོང་ས་མཆོག་ལ་ནོ་བྷེལ་ཞི་བདེའི་གཟེངས་རྟགས་ཕུལ་དུས་རང་ཅག་གིས་དགའ་སྤྲོ་སྟོན་མོ་ལ་ཇི་ལྟར་མ་རོལ། ཕྱི་ལོ་ ༢༠༠༨ ལོར་༧གོང་ས་མཆོག་ལ་ཨ་རིའི་གསེར་གྱི་རྟགས་མ་ཕུལ་སྐབས་ང་ཚོས་འཕགས་ཚག་ག་ཙམ་མ་བརྒྱབས། ནོ་བྷེལ་ཞི་བདེའི་བདག་ཉིད་ཅེས་པ་འདི་མིང་མིན་ན་གང་རེད། དེ་དག་མིང་ཡིན་ཞིང་དོན་ཡང་རེད། ཞེ་ས་བྱས་ན་མཚན་དང་མཚན་གནས་ཞེས་འབོད་པ་རེད། དེའི་ཕྱིར་མིང་ཕྱིར་བསྡུ་བྱས་ན་དོན་ཕྱིར་བསྡུ་བྱས་པར་མཐོང་བ་རེད། དེ་འདྲ་སོང་ཙང་ད་ལན་གྱི་ཕྱིར་བསྡུ་བྱས་པའི་བཙན་བྱོལ་བོད་གཞུང་གི་མིང་དེ་མིང་ཡིན་ལ་དེ་བཙན་བྱོལ་བོད་གཞུང་གི་དོན་དེ་དང་འདྲ་བ་ཞིག་ཡིན་ཞིང་། དེ་ཕྱིར་བསྡུ་བྱས་པ་དེ་བཙན་བྱོལ་བོད་གཞུང་ཕྱིར་བསྡུ་བྱས་པ་ཞིག་གམ་དེ་དང་འདྲ་བ་ཞིག་ལ་མཐོང་དོན་དེ་རེད། ལོ་རྒྱུས་ཐོག་ལ་བསམ་བློ་བཏང་ན་རང་རེའི་བླ་ཆེན་མང་པོ་ཞིག་རྒྱ་ནག་དང་སོག་པོའི་ཆོ་ལོའི་དོན་དུ་ཇི་ཙམ་རྒྱུགས་རབས་མེད་དམ། འདི་ཐམས་ཅད་མིང་གི་དོན་དུ་རེད། མིང་དེ་གལ་ཆེ་བའི་རྐྱེན་གྱིས་རེད། མིང་དེ་དག་དོན་ཡིན་པའི་རྐྱེན་གྱིས་རེད།

རྟགས་མ་དང་ཆོ་ལོ་འདི་དག་མིང་ཤ་སྟག་ཡིན་ཞིང་མིང་ཙམ་མ་ཡིན་པར་དོན་ཡང་ཡིན། མིང་དེ་དག་ལ་བརྟེན་ནས་དོན་དག་ཅི་ཙམ་འགྲུབ་མ་སོང་། དེའི་ཕྱིར་མིང་དེ་འདྲ་རག་པ་ནི་དོན་རག་པ་དང་གཉིས་སུ་མེད་པ་རེད། དཔེར་ནཿ ༧གོང་ས་མཆོག་ལ་ནོ་བྷེལ་ཞི་བདེའི་གཟེངས་རྟགས་ཕུལ་བ་དང་མ་ཕུལ་བའི་དུས་ཚོད་ཀྱི་ནང་དུ་སྐུའི་མཛད་པ་འཕྲིན་ལས་ཁྱད་པར་གང་ཙམ་ཞིག་བྱུང་སོང་། སྟོབས་ཆེན་རྒྱལ་ཁབ་ལ་འགྲུལ་བཞུད་ཡིན་ན། གྲགས་ཅན་མི་སྣ་ལ་མཇལ་འཕྲད་ཡིན་ན། སོ་སོའི་བོད་ཀྱི་རང་དོན་ཡིན་ན། ཅི་ས་ལ་དྲུག་གང་ས་ཅི་ཐད་ནས་མཛད་པ་འཕྲིན་ལ་ཧ་ཅང་ཁྱད་པར་བྱུང་མ་སོང་སམ། དེ་དག་མིང་གནས་རྗེས་འབྲེལ་གྱིས་འོང་གིན་ཡོད་པ་ཞིག་རེད། ཆུང་ས་ནས་སློབ་གྲྭ་ཞིག་གི་ནང་དུ་གང་ཟག་གང་གཉིས་ལས་གཅིག་ལ་ཤེས་ཚད་ཕུལ་དུ་བྱུང་བ་ཞིག་ཡོད་ཀྱང་ཁོང་ལ་ལག་འཁྱེར་མེད་པ་དང་། གཞན་དེ་ལ་ཤེས་ཚད་གོང་ལས་གནམ་སའི་ཁྱད་པར་གྱིས་ཞན་པ་ཡོད་རུང་ལག་འཁྱེར་མཐོན་པོ་ཞིག་ཡོད་ན་སློབ་ཁྲིད་བྱེད་པའི་གོ་སྐབས་ལག་འཁྱེར་ཡོད་མཁན་དེ་ལས་ཤེས་ཚད་ཡོད་མཁན་དེ་ལ་མི་འཐོབ་པ་རེད།

ཆོ་ལོ་ཟེར་བ་དང་མཚན་བསྟོད་ཟེར་བ་འདི་དག་མིང་ཡིན་པ་ཙམ་དུ་མ་ཟད་དེ་དང་དེ་འདྲ་བའི་མིང་ཞིག་སུ་ལ་རག་ན་མི་ཚེ་གཅིག་གི་བྱས་རྗེས་ཡིན་པར་དགའ་སྤྲོ་བྱེད་དགོས་པའི་དོན་ཞིག་མིན་ནམ། དེ་བཞིན་སྐབས་སུ་བབ་པ་བོད་ཀྱི་སྲིད་གཞུང་གི་མིང་འདི་ཡང་མིང་ཡིན་པ་ཙམ་དུ་མ་ཟད་མི་ལོ་ཉིས་སྟོང་ལྷག་གི་རིང་ལ་གནས་ཤིང་། བོད་རང་གི་ངོ་འཛིན་པའི་ལོ་རྒྱུས་ཀྱི་བདེན་ཁ་སྦྱིན་པའི་དོན་དག་ཧ་ཅང་ཧ་ཅང་གལ་གནད་ཆེན་པོ་ཞིག་རེད། དོན་ནི་མདོར་བསྡུས་བོད་རྒྱལ་ཁབ་རེད། ཐ་སྙད་འདི་སྲུང་བ་དང་བོད་རྒྱལ་ཁབ་སྲུང་བ་གཉིས་ངོ་བོ་དབྱེར་མེད་པར་གཟིགས་ནས་མི་ལོ་ཉིས་སྟོང་ལྷག་གི་རིང་ལ་ཨུ་ཚུགས་ཀྱིས་ཉར་ནས་འོང་བ་རེད། རྒྱུ་མཚན་འདི་དག་གིས་གཞུང་ཕྱོགས་ཀྱིས་མིང་ཡིན་ན་དོན་དང་འགལ་བ་ཡིན་མདོག་མདོག་དང་། མིང་ཡིན་ན་མིང་ཙམ་པོ་ཡིན་པའི་ཁྱབ་མདོག་མདོག་གི་འཆད་ཚུལ་དེའི་བརྫུན་ཁོང་ཧད་ཀྱིས་རྟོལ་སོང་མི་འདུག་གམ། འདི་ལྟར་མིང་དང་མིང་མི་འདྲ་བ་ཡིན་ལ་ཐ་སྙད་དང་ཐ་སྙད་མི་འདྲ་བ་རེད། གནད་དོན་འདི་ཤེས་དགོས་ཀྱི་འདུག

དེར་བརྟེན་ད་ལན་གྱི་ཕྱིར་བསྡུ་བྱས་པའི་ཐ་སྙད་འདི་ནི་རང་འགར་གྱི་ཐ་སྙད་ཅིག་ཕྱིར་བསྡུ་བྱས་པ་དང་ཡེ་ནས་འདྲ་བ་མིན་པར་འཆི་གསོན་གྱི་དོན་ལ་འབྲེལ་བའི་ཐ་སྙད་ཅིག་ཕྱིར་བསྡུ་བྱས་པ་རེད། ཐ་སྙད་གང་ཞིག་མེད་པར་བཏང་བས་གསོན་པོ་ཡིན་ཀྱང་གཤིན་པོའི་གྲལ་དུ་ཚུད་འགྲོ་བས་རང་སྲོག་རང་གིས་བཅད་པ་དང་གཉིས་སུ་མེད་པའི་ཐ་སྙད་ཕྱིར་བསྡུ་བྱས་པ་རེད། ཐ་སྙད་གང་ཞིག་གསོན་པོར་ཉར་བས་རང་ཉིད་བར་དོའི་ཕྲང་ལ་ཡོད་ཀྱང་གསོན་པོའི་གྲལ་དུ་ཚུད་ཐུབ་པའི་ཐ་སྙད་ནུས་ལྡན་ཞིག་ཕྱིར་བསྡུ་བྱས་པ་རེད། རང་ཅག་གི་ཐུགས་ལ་འདི་དུས་གཏན་མངའ་བར་ཞུ།

མཐའ་དོན་ཞེན་སྐུལ་གཅིག

དཔལ་ལྡན་བོད་ཀྱི་གཞོན་ནུའི་ལྷན་ཚོགས་ཀྱིས་ཚོགས་པའི་ངོས་ནས་བོད་གཞུང་མི་མཐུད་ནས་བེད་སྤྱོད་བྱེད་རྒྱུ་ཡིན་པའི་ཁྱབ་བསྒྲགས་མཛད་པ་འདི་ཁོ་བོའི་བློ་ལ་ཧ་ཅང་འཐད་བྱུང་། ཁ་སྔོན་ངས་ཀྱང་འདི་འདྲ་ཞིག་ཡོང་རྒྱུ་མེད་དམ་སྙམ་ནས་དེའི་སྐོར་དཔལ་ལྡན་བོད་མི་མང་སྤྱི་འཐུས་ལྷན་ཚོགས་ལ་ཞུ་ཡིག་ཅིག་ཕུལ་ཡོད། དེའི་ངོ་བཤུས་བདག་གི་དུས་བབ་ཟིན་བྲིས་ལ་བཀོད་ཀྱང་ཡོད། ད་ནི་བོད་གཞུང་གི་མིང་དེ་ཕྱིར་བསྡུ་བྱས་ནས་ཁྲིམས་སུ་བཅས་ཟིན་པས་སེམས་ལ་འདོད་པ་ཡོད་རུང་མེད་རུང་བྱེད་རྒྱུ་ཆེན་པོ་ཞིག་མེད། མ་འོངས་སྔོན་གཟིགས་ལྟ་བུའི་བྱེད་སྟངས་འདི་གཅིག་བྱས་ན་གནད་འགག་ཆེན་པོ་ཞིག་ཡིན་སྲིད་ན་ཐང་། དེས་ན་རང་རང་གི་ངོས་ནས་ཕར་མིང་ག་འདྲ་ཞིག་གིས་འབོད་པ་ནི་དམངས་གཙོའི་སྤྱི་ཚོགས་ནང་དུ་རང་རང་གི་རང་དབང་ཡིན་ངེས་པས་འུ་ཅག་སྒེར་གྱི་ངོས་ནས་མུ་མཐུད་ནས་བཙན་བྱོལ་བོད་གཞུང་ཞེས་པའི་མིང་འདི་མུ་མཐུད་ནས་བཀོལ་དགོས་ཀྱི་འདུག དེའི་ཕྱིར་རང་རེའི་སྤྱི་ཚོགས་ཀྱི་སྒེར་དང་ཚོགས་པ་ཡོངས་རྫོགས་དང་། དམའ་མཐར་ཡང་གཞུང་འབྲེལ་མ་ཡིན་པའི་ཚོགས་པ་དག་གིས་ཀྱང་གཞོན་ནུ་ལྷན་ཚོགས་ཀྱིས་བྱེད་སྟངས་ཇི་བཞིན་ཐག་གཅོད་གསལ་བོར་མཛད་དེ། བཙན་བྱོལ་བོད་གཞུང་ཞེས་པ་འདི་མུ་མཐུད་ནས་བཀོལ་སྤྱོད་ཨུ་ཚུགས་ཀྱི་གནང་རོགས་འབོད་སྐུལ་ཞུ་རྒྱུ་ཡིན། འདི་ལྟར་བྱས་ན་གཞུང་འབྲེལ་ཡིག་ཆའི་ནང་དུ་བོད་གཞུང་ཞེས་པ་འདི་བརླགས་སོང་རུང་མང་ཚོགས་ཀྱི་ཁ་དང་། གཞུང་འབྲེལ་མ་ཡིན་པའི་ཡིག་ཆ་དག་གི་ནང་དུ་བཙན་བྱོལ་བོད་གཞུང་དེ་ཤི་མ་གསོན་ཙམ་ཞིག་གནས་ཐུབ་པ་ཞིག་འབྱུང་རྒྱུ་རེད།