ར་ཤི་ཡར་བོད་ཀྱི་རིག་གཞུང་འགྲེམ་སྟོན།

གནས་ཚུལ་བཏང་འབྱོར་བྱུང་བ་ལྟར་ན། ཟླ་འདིའི་ཕྱི་ཚེས་ ༨ ནས་ ༡༠ བར་གྱི་ཉིན་གསུམ་རིང་ར་ཤི་ཡའི་མངའ་སྡེ་འུ་ལན་ཨོ་བདེ་ཡི་བསམ་འཕེལ་འགྲེམ་སྟོན་ཁང་དུ་བོད་ཀྱི་པར་རིས་དང་། དཀྱིལ་འཁོར་སོགས་བོད་པའི་རྒྱལ་རབས་དང་རིག་གཞུང་མཚོན་པའི་འགྲེམ་སྟོན་ཆེན་པོ་ཞིག་བྱས་ཡོད་འདུག

འགྲེམ་སྟོན་བྱེད་ཡུལ་དེ་ནི་མངའ་སྡེའི་གཞུང་གི་འགྲེམ་སྟོན་ཁང་ཞིག་ཡིན་ཞིང་། ཐང་ཀའི་བཟོ་དབྱིབས་ཅན་གྱི་ཤོག་བྱང་རིང་མོ་བརྒྱ་ལྷག་གི་སྟེང་བོད་ཀྱི་ཆོས་དང་རིག་གཞུང་། ཡུལ་སྲོལ་གོམས་གཤིས། བོད་རྒྱལ་བཙན་པོ་དག་གི་བང་སོ་དང་། དེ་དག་ལས་གསར་རྙེད་བྱུང་བའི་གནའ་རྫས་རིགས། གཞན་ཡང་དགོན་པ་ཆེ་ཤོས་དང་སྐུ་འདྲ་རྩ་ཆེན། བོད་དང་རྒྱལ་ཁབ་གཞན་བར་བཞག་པའི་ཆིངས་ཡིག བོད་དམག་དང་ཤོག་དངུལ།  ས་ཁྲ་རྙིང་པ། ལོ་གསར་གཏོང་སྟངས་དང་། གཉེན་སྒྲིག རྒྱན་གོས། རྩེད་རིགས་སོགས་ཁྱོན་ཡོངས་རྩ་ཆེན་དཔར་རིས་ ༧༠༠ ལྷག་འགྲེམ་སྟོན་བྱས་ཏེ། བརྒྱུད་ལམ་ཁག་ཏུ་ཁྱབ་སྤེལ་བྱས་ཡོད་འདུག

ཐེངས་འདིའི་འགྲེམ་སྟོན་དེ་ནི། ར་ཤི་ཡའི་རྒྱལ་ཁོངས་སུ་བོད་ཀྱི་རྒྱལ་རབས་ལོ་རྒྱུས་དང་འབྲེལ་བའི་རིག་གཞུང་འགྲེམ་སྟོན་ཐོག་མ་དང་གཞི་རྒྱ་ཆེ་ཤོས་དེ་ཆགས་ཀྱི་ཡོད་འདུག་ལ། མ་འོངས་པར་མུ་མཐུད་ར་ཤི་ཡའི་རྒྱལ་ཡོངས་མངའ་སྡེ་གཞན་ཁག་ཏུའང་ལས་འགུལ་དེ་སྤེལ་འཆར་ཡོད་འདུག རིག་གཞུང་འགྲེམ་སྟོན་འདི་ནི་སྨན་པ་གྲྭ་ཚང་འགྲོ་ཕན་རིག་བྱེད་གླིང་གི་སྨན་དགེ་བླ་བྲང་སྐལ་བཟང་ལགས་ཀྱི་བློ་འདོན་མཐུན་འགྱུར་འོག སྒྲོལ་ལྗང་གྲྭ་ཚང་གི་དགེ་རྒན་ཀླུ་འབུམ་སྐལ་བཟང་རྡོ་རྗེ་ལགས་དང་རི་མོ་བ་ཀླུ་བསམ་བློ་བ། བོད་ཀྱི་གསོ་རིག་བང་ཆེན་གསར་ཤོག་གི་རྩོམ་སྒྲིག་པ་སྒྲོལ་དཀར་ལགས་བཅས་ཀྱིས་འདས་པའི་ཟླ་ངོ་གསུམ་ལྷག་རིང་གྲ་སྒྲིག་གིས་ལེགས་འགྲུབ་བྱུང་བ་ཞིག་ཡིན་འདུག་ལ། དཔར་རིས་དག་གི་འགྲེལ་བཤད་ཀྱང་དབྱིན་ཡིག་དང་ར་ཤི་ཡའི་སྐད་ཡིག་ཐོག་བཀོད་ཡོད་འདུག  

སྐུ་ཞབས་སྐལ་བཟང་རྡོ་རྗེ་ལགས་ཀྱིས་ཐེངས་་འདིའི་འགྲེམ་སྟོན་སྐོར་ངོ་སྤྲོད་གནང་བ་ལྟར་ན། ང་ཚོས་ཟླ་ངོ་རེ་ཟུང་ལ་དཀའ་ལས་བརྒྱབ་མཐར་འགྲེམ་སྟོན་འདི་ལེགས་འགྲུབ་བྱུང་སོང་། ད་ཐེངས་ཀྱི་འགྲེམས་སྟོན་གཙོ་བོ་དཔར་རིས་དང་། ཆོས་ཕྱོགས་ནས་སྨན་བླའི་དཀྱིལ་འཁོར་བཞེངས་བསྐྲུན་བྱས་ཏེ་བོད་ཀྱི་ཐུན་མོང་མ་ཡིན་པའི་ལག་རྩལ་སྐོར་ངོ་སྤྲོད་བྱས་པ་ཡིན། ཞེས་དང་། ཁོང་གིས་འགྲེམ་སྟོན་དེའི་དམིགས་ཡུལ་སྐོར་ལ། ༧གང་ས་མཆོག་གིས་ནམ་རྒྱུན་ར་ཤི་ཡའི་མི་མང་ལ་དམིགས་བསལ་ཐུགས་བརྩེ་གནང་གི་ཡོད་ལ། ར་ཤི་ཡའི་མི་མང་གིས་ཀྱང་བོད་ཀྱི་ཆོས་དང་རིག་གཞུང་ཐོག་དོ་སྣང་ཆེན་པོ་བྱེད་ཀྱི་ཡོད། ལྷག་པར་ལོ་རྒྱུས་ཐོག་རྒྱལ་ཁབ་གཉིས་བར་དམིགས་བསལ་འབྲེལ་བ་ཡོད་སྟབས། མི་མང་བྱིངས་ལ་བོད་པའི་ཆོས་དང་རིག་གཞུང་ངོ་སྤྲོད་གནང་རྒྱུ་དེ་ཧ་ཅང་གལ་འགངས་ཆེན་པོ་ཞིག་རེད། དེར་བརྟེན། ང་ཚོས་སོ་སོའི་ལས་ཀའི་ཞོར་དུ་བོད་མི་རིགས་དང་རིག་གཞུང་ལ་ཞབས་ཞུ་ཕྲན་ཙམ་རེ་བསྒྲུབ་རྒྱུ་དེ་ལས་འགན་ཞིག་གི་ངོ་བོའི་ཐོག་ནས་བསྒྲུབས་པ་ཡིན། ཅེས་བརྗོད་འདུག