རྩོམ་པ་པོ། ཚའོ་ཁྲང་ཆིན། ཕུན་ཚོགས་ཀྱིས་བསྒྱུར།
ཏག་ཏག་དུས་རབས་གཅིག་གི་དུས་ཡུན་ནང་། འཛམ་གླིང་དཀྱིལ་ཤར་དང་བྱང་ཨ་ཧྥི་རི་ཀ་བཅས་ནས་དམངས་གཙོའི་འགྱུར་ལྡོག་ཤུགས་ཆེན་བྱུང་སྟེ་ད་ལྟའི་གནས་བབ་འདིར་བསླེབས་ཚར་ཡོད་མོད། རྒྱ་དམར་གཞུང་ནི་སྔར་བཞིན་ཆབ་སྲིད་བསྒྱུར་བཅོས་ཐད་སྐྱི་གཉེར་ཙམ་ཡང་འགུལ་གྱིན་མེད་པ་མ་ཟད། དེ་ལས་ལྡོག་སྟེ་གཞུང་དང་བསམ་ཚུལ་མི་མཐུན་པའི་མི་རྣམས་ལ་དམ་དྲག་ཤུགས་ཆེན་གཏོང་བཞིན་ཡོད། འདི་ལྟའི་གནས་སྟངས་འོག དུས་ཡུན་ཐུང་ཐུང་ཞིག་གི་ནང་རྒྱ་ནག་གི་ཆབ་སྲིད་ལ་རྩ་བའི་འགྱུར་བ་འབྱུང་རྒྱུ་དཀའ་ཙམ་ཡོད་ལ། དེར་ཁོར་ཡུག་དང་རྒྱབ་ལྗོངས་གང་ནས་བལྟས་ཀྱང་མཐུན་རྐྱེན་ཡོངས་སུ་འཛོམས་མེད།
དོན་ངོ་མར་རྒྱ་ནག་མི་མང་ནི་ཊོའུ་ནེ་ཤི་ཡའི་(Tunisia)མི་རྣམས་དང་མི་མཚུངས་པ་དང་། དེ་བཞིན་ཨི་ཇིབ་(Egypt) མི་མང་དང་མི་འགྲན་པ། ནང་སྒོས་སུ་ཁྲག་དྲོན་གྱི་འཐབ་རྩོིད་བརྒྱུད་རང་དབང་བརྩོན་ལེན་བྱེད་ཕོད་པའི་ལེ་བྷི་ཡ(Labya)མི་མང་དང་གཏན་ནས་མི་དོ་བ་མ་ཟད། ཡེ་མིན་མི་མང་དང་ཅི་ལེ་མི་མང་སོགས་ལ་རྩད་ནས་མི་དོ་བ་ཡིན་ནམ། དོན་ངོ་མར་རྒྱ་ནག་ནི་ཨེ་ཤི་ཡ་ཤར་མའི་ནད་རོ་དང་། འཛམས་གླིང་རྒྱལ་ཁབ་ཁག་གི་ཆེས་མཐའ་མའི་དམངས་གཙོའི་ལམ་དུ་སྐྱོད་མཁན་རྗེས་ལུས་རྒྱལ་ཁབ་གཅིག་པུ་དེར་འགྱུར་རྒྱུ་ཡིན་ནམ།
མདོར་བསྡུས་ནས་བཤད་ན། རྒྱལ་ནག་ལ་མཁྲེག་འཛིན་གྱི་རྒྱལ་ཞེན་དམིགས་བསལ་བ་ཞིག་ཡོད་ཅིང་། གནས་བབ་དེར་རྒྱུ་རྐྱེན་མི་འདྲ་བ་ཁག་བཞི་སྔར་བཞིན་གནས་ཡོད།
དང་པོ། གུང་ཁྲན་ཏང་གི་དཔལ་འབྱོར་འཕེལ་རྒྱས་ཀྱིས་དམངས་སེམས་ཉོས་པ།
དྲུག་བཞིའི་དམར་གསོད་ཆེན་མོའི་རྗེས་སུ། སྐབས་དེའི་དབང་འཛིན་གཅིག་ལྕོག་ཏིན་ཞའོ་ཕིན་མའོ་ཡི་དུས་རབས་ལ་ཕྱིར་བསྐྱེད་ཡོངས་སུ་བྱས་མེད་ནའང་། དཔལ་འབྱོར་འཕེལ་རྒྱས་གཏོང་བ་ཁོ་ནས་གུང་ཁྲན་ཏང་གི་དབང་ཆ་ཐག་གཅོད་བྱེད་ཐུབ་པར་ངོས་འཛིན་རྒྱུན་འཛིན་བྱས་ཡོད། ཏིན་ཞོ་ཕིན་རང་ཕྱོགས་ཀྱི་མི་ཚང་མས་དཔལ་འབྱོར་ནི་དབང་ཆ་ཐག་གཅོད་བྱེད་པའི་ཐབས་ཤེས་བླ་མེད་ཅིག་ཏུ་བསམ་ཡོད་སྟབས། མི་མཐུད་དཔལ་འབྱོར་སྒོ་འབྱེད་ལ་ཤུགས་སྣོན་བྱས་ཡོད། འདི་ལྟའི་བསམ་ཚུལ་གྱི་འོག་ནས་གུང་ཁྲན་ཏང་གིས་དཔལ་འབྱོར་སྒོ་འབྱེད་བྱས་པ་དང་། གུ་ཡང་གི་རྣམ་པ་དང་ལྷོད་ཡང་ཟེར་བའི་བཤད་སྟངས་བེད་སྤྱད་དེ་རྒྱ་ནག་མི་མང་ལ་གཟུགས་མེད་ཀྱི་དཔལ་འབྱོར་སྒུལ་ཤུགས་གཞི་རྒྱ་ཆེ་བ་མཁོ་སྤྲོད་བྱས་ཡོད། དེ་ཡང་རྒྱ་ནག་གི་འདས་པའི་ལོ་རྒྱུས་ནི་དབུལ་ཕོངས་ཡིན་པ་འདིས་ཁོ་ཚོར་མཁོ་སྤྲོད་ཀྱི་གོ་སྐབས་ཡག་པོ་སྤྲད་ཡོད་ལ། མི་ཚང་མས་རྒྱུ་ཐོག་ལ་རྒྱག་རྒྱུར་རྔམ་སེམས་ཆེ་བ་འདིས་ཀྱང་རྒྱ་ནག་ལ་དཔལ་འབྱོར་འཕེལ་རྒྱས་མུ་མཐུད་ཡོང་བའི་འབྲེལ་བ་གསལ་བོ་བསྟན་ཡོད། དེ་བས་གུང་ཁྲན་ཏང་གིས་གནད་འགག་དེ་དང་དཔལ་འབྱོར་འཕེལ་ཤུགས་ཀྱི་རྒྱབ་ལྗོངས་འདི་ཉིད་བེད་སྤྱད་དེ་མི་མང་གི་ལྷིང་འཇགས་སམ་ངོ་རྒོལ་མི་བྱེད་པའི་གནས་བབ་ཉོ་སྒྲུབ་བྱེད་ཀྱིན་ཡོད།
གཉིས་པ། གུང་ཁྲན་ཏང་གི་ཤུགས་ཆེ་བའི་དྲིལ་བསྒྲོག
འདི་ལ་ཕྱོགས་ངོས་གཉིས་ནས་གླེང་གི་ཡོད། གཅིག་ནི་རྒྱ་ནག་གི་དཔལ་འབྱོར་འཕེལ་རྒྱས་ཀྱི་གྲུབ་འབྲས་གུང་ཁྲན་ཏང་གི་རླབས་ཆེ་བའི་བྱས་རྗེས་ཡིན་ཚུལ་དང་། གུང་ཁྲན་ཏང་གིས་རྒྱ་ནག་གི་དབུ་ཁྲིད་བྱས་པ་དོན་སྙིང་ལྡན་ཚུལ། (ཀྲུང་གོ་གུང་ཁྲན་ཏང་གིས་རྒྱ་ནག་གི་ཚབ་མཚོན་བྱེད་ཐུབ་ཟེར་བའི་དོན) དེ་ལས་ཀྱང་རྒྱ་ནག་ནི་སྟོབས་ཆེན་རྒྱལ་ཁབ་ཡིན་ཚུལ་དང་། གཟི་བརྗིད་ཆེ་ཚུལ་སོགས་བརྗོད་དེ་འདས་པའི་མི་ལོ་དྲུག་བཅུའི་རིང་རྒྱ་ནག་མི་མང་རྣམས་ལ་མི་རིགས་རིང་ལུགས་ཀྱི་འདུ་ཤེས་ཤུགས་བརྗོད་བྱེད་ཐབས་བྱས་ཏེ། མི་མང་རྣམས་དམར་པོའི་གཞུང་གི་དཔལ་འབྱོར་འཕེལ་རྒྱས་དང་ཆབ་སྲིད་ལག་ལེན་བཅས་དོན་དངོས་དང་མཐུན་པ་ཞིག་ཡིན་ཚུལ་ལ་ཡིད་ཆེས་འཕེར་བར་བྱས་ཡོད། གཉིས་ནི་རྒྱ་ནག་མི་མང་རྣམས་འདས་པའི་གོད་ཆགས་ཀྱི་དབང་གིས་“ཟིང་འཁྲུག་”ལ་ཤིན་ཏུ་འཚེར་སྣང་ཡོད་པའི་ལོ་རྒྱུས་བེད་སྤྱད་དེ། གུང་ཁྲན་ཏང་མེད་ན་གནམ་ས་བདེ་འཇགས་ཡོང་མི་ཐུབ་ཚུལ་ཤུགས་བརྗོད་བྱེད་པ་དང་། གུང་ཁྲན་ཏང་ཁོ་ནའི་ནུས་པ་དང་དབུ་ཁྲིད་ཀྱི་གོ་གནས་ཤུགས་བརྗོད་ཀྱིས། “ཟིང་འཁྲུག་”དང་གོད་ཆག་གི་འཇིགས་སྣང་མི་མང་གི་སེམས་སུ་འཛུལ་ཐབས་བྱས་ཡོད། དེར་བསྟུན་རྒྱ་ནག་མི་མང་རྣམས་ཀྱི་སེམས་ལ་“འགྱུར་ལྡོག་”ཟེར་བ་ནི་འཇིགས་སྣང་ཅན་ཞིག་དང་ཟིང་འཁྲུག་ཟེར་བ་ནི་གོད་ཆག་ཆེན་པོ་ཞིག་ཡིན་པའི་ངེས་ཤེས་སྐྱེས་སུ་བཅུག་པ་ལ་བརྟེན་ཏེ། གུང་ཁྲན་ཏང་གི་འདོད་བློར་བཀོད་འགུག་བྱེད་པར་གོང་རིམ་གྱི་དམ་དྲག་དང་བཙན་གནོན་ཅི་བྱས་ལ་བཟོད་བསྲན་ཐུབ་པའི་སྣང་ཚུལ་ཁྱད་པར་བ་འབྱུང་བར་བྱས་ཡོད་པ་མ་ཟད། རྒྱ་ནག་མི་མང་ཤིན་ཏུ་མང་པོ་ཞིག་གི་སེམས་སུ་གུང་ཁྲན་ཏང་གིས་ལོ་ངོ་དྲུག་བཅུ་ལྷག་གི་རིང་“ཟིང་འཁྲུག་”བཟོས་པ་དང་“གོད་ཆག་”ཅི་ཙམ་བཟོས་པ་གཏིང་བརྗེད་དུ་འགྲོ་རུ་བཅུག་ཡོད།
གསུམ། གུང་ཁྲན་ཏང་གི་དྲག་གནོན་སྲིད་བྱུས།
ཆབ་སྲིད་སྒེར་གཅོད་དབང་འཛིན་པའི་ལག་འོག་ནས་མཆོངས་ཕོད་པའི་མི་སུ་ཡང་དྲག་གནོན་འོག་ཚུད་ཡོད། དེ་ཡང་ཏིན་ཞོ་ཕིན་གྱི་སྐབས་ནས་རང་དབང་བརྩོན་ལེན་བྱེད་མཁན་ཚོར་མིང་ཆས་འདྲ་མིན་གཡོགས་ཏེ་དྲག་གནོན་ཀྱི་མཆེ་བ་ཡོངས་སུ་འབུས་པར་བྱས་ཡོད་པ་བཞིན། ད་ལྟའི་ཧུའུ་ཅིན་ཐའོ་སྐབས་ཀྱི་དུས་རབས་འདིར་བསླེབས་པ་ན་དེ་ལྟའི་མིང་ཆས་འདོགས་ཚུལ་ལ་བྱུང་ཆུབ་ཡོད་པ། དེང་གི་སྐབས་སུ་དམངས་གཙོ་དང་རང་དབང་ལ་ཕྱོགས་མཁན་གྱི་མི་རྣམས་ལ་ནག་ཚོགས་དང་། ཁ་བྲལ་བ། གདོང་བཏུམ་ཆོམ་རྐུན། ཁྲམ་པ། རྒྱ་ནག་མི་མང་ལ་གནོད་འཚེ་གཏོང་མཁན་སོགས་ཀྱི་མིང་ཆལ་བེད་སྤྱད་དེ་མུ་མཐུད་འཇིགས་སྐུལ་དྲག་གནོན་བྱེད་པའི་དུས་སྐབས་སུ་འཕེལ་ཡོད། གནས་སྟངས་འདི་ནི་སྔོན་ལྟར་ཕྱོགས་གཅིག་ནས་དམ་དྲག་བྱེད་ཀྱང་ཕྱོགས་གཅིག་ནས་གུ་ཡང་བྱེད་པ་ལྟ་བུའི་རྣམ་པ་གང་ཡང་མེད་པར་ཕྱོགས་ཡོངས་ནས་དྲག་གནོན་ཤུགས་ཆེར་གཏོང་བཞིན་པ་དེ་ཡིན། སྤྱིར་བྱང་ཨ་ཧྥི་རི་ཀ་དང་འཛམ་གླིང་དཀྱིལ་ཤར་སོགས་སུའང་སྒེར་གཅོད་ལམ་ལུགས་སྤེལ་གྱིན་ཡོད་ས་མང་པོ་ཞིག་ཡོད་ཀྱང་། རྒྱ་དམར་གཞུང་ལྟར་སྒྱུ་རྩལ་བློ་འགུག་གི་དྲག་གནོན་དང་སྟངས་འཛིན་བྱེད་ཐབས་བེད་སྤྱོད་བྱེད་པའི་གོ་རིམ་དུ་འཕེལ་ཡོད་པ་སུ་ཡང་མེད། རྒྱ་དམར་གཞུང་གི་ཆབ་སྲིད་སྒེར་གཅོད་བྱེད་སྟངས་ནི་ཆེས་ཞིབ་ཚགས་ལྡན་པ་དང་། ཆེས་གདུག་རྩུབ་ཆེ་བ། ཆེས་འཇིགས་སུ་རུང་བ་ཞིག་ཡིན།
བཞི། མང་ཚོགས་ཀྱི་དབུ་ཁྲིད་ཡིན་མདོག་སྟོན་མཁན་འགའི་ཤུགས་རྐྱེན།
རྒྱ་ནག་གི་དམངས་གཙོའི་དབུ་ཁྲིད་ཡིན་ཟེར་མཁན་ཁ་ཤས་ཀྱིས། གདུག་རྩུབ་ཆེ་བའི་སྲིད་དབང་ལ་ཁ་གཏད་གཅོག་པར་གུང་ཁྲན་ཏང་ལ་བསམ་ཤེས་བབ་བསྟུན་བྱེད་དགོས་ཚུལ་དང་། ང་ཚོ་དགྲ་བོ་ངོ་མ་མེད་ཚུལ་སོགས་ཞི་བདེ་དང་འཚེ་བ་མེད་པའི་ལམ་དུ་བསྐྱོད་དགོས་ཟེར། སྐད་ཆ་མཐོན་པོ་ཤོད་མཁན་འདི་དག་གི་ངོས་འཛིོན་ཁྲོད་མགོ་འཐོམས་རང་བཞིན་གྱི་བཀག་རྒྱ་ཞིག་ཡོད། ཁོ་ཚོས་གུང་ཁྲན་ཏང་གི་ནོར་འཁྲུལ་ཧ་གོ་བཞིན་དུ་སྐད་ཆ་མཐོན་པོ་འདི་རིགས་ཆེད་དུ་བརྗོད་ཀྱིན་ཡོད་ལ། བསམ་ཤེས་ལྡན་པའི་སྤྱང་ལྟོགས་འཚོལ་བར་ངང་སྒུག་བྱེད་ཀྱིན་ཡོད། འདི་ལྟའི་སྐད་ཆ་མཐོན་པོ་བཤད་པས་རང་ཉིད་ཀྱི་བདེ་འཇགས་སྲུང་ཐུབ་པ་མ་ཟད། (ཐད་ཀར་གུང་ཁྲན་ཏང་ལ་ངོ་རྒོལ་བྱེད་དགོས་ཚུལ་བརྗོད་མི་ཐུབ་པས་ཉེན་ཁ་ཆེར་མེད།) རང་ཉིད་ཀྱི་ཀུན་སྤྱོད་ཀྱང་འཛམ་གླིང་རང་བཞིན་ཅན་དུ་ཕྱོགས་ཏེ། ནོ་བྷེལ་ཞི་བདེ་གཟེངས་རྟགས་སོགས་ཐོབ་པར་འབད་བརྩོན་གནང་གི་ཡོད། འདི་དག་གི་ཤུགས་རྐྱེན་ཀྱིས་རྒྱ་དམར་གཞུང་གི་ཆབ་སྲིད་སྒེར་གཅོད་དབང་འཛིན་པར་ཡིད་ཆེས་དང་བག་ཕེབས། ལྷོད་ཡང་བཅས་ཐོབ་ཀྱིན་ཡོད་པ་ཟད། མི་མང་གི་ངོ་རྒོལ་ལ་འཇིགས་སྣང་ཅི་ཡང་བྱེད་ཀྱིན་མེད་ཅིང་ཆབ་སྲིད་བསྒྱུར་བཅོས་ཀྱི་ཁ་ཕྱོགས་གཏན་འབེབ་ཀྱང་བྱེད་ཐུབ་ཀྱིན་མེད།
འདི་ལྟར་ན་རྒྱ་ནག་ལ་རེ་བ་ཅི་ཡང་མེད་སོང་བ་ཡིན་ནམ་ཟེར་ན། དེ་ལོས་ཡོད། ཐོག་མར་གོང་དུ་བཤད་པའི་རྒྱུ་རྐྱེན་བཞིའི་བསམ་བློའི་འདུ་ཤེས་ཀྱིས་རྒྱ་ནག་མི་མང་རང་དབང་འཐབ་རྩོད་ཀྱི་ལམ་དུ་ཕྱོགས་ཐུབ་མེད་པ་དང་། བསམ་བློ་ནི་ལས་འགུལ་གྱི་སྣེ་ཁྲིད་པ་ཡིན་པའི་ངེས་འཛིན་གསལ་བོ་བྱས་ཏེ། མུ་མཐུད་གཤམ་གསལ་རྒྱུན་ཤེས་ཚན་པ་བཞི་བརྒྱུད་བསྒྲགས་བྱ་དགོས།
མུ་འགོད།
སྤྱིར་འཛམ་གླིང་འདི་འགྱུར་པ་འགྲོ་བཞིན་ཡོད་དུས་གུང་ཁྲན་ཏང་གཅིག་བུ་རྟག་བརྟན་ངང་གནས་མི་ཐུབ་པ་གསལ་བོ་རེད་དཔེར་ན་དམར་ཕྱོགས་གཙོ་འཛིན་མོ་ཙེ་ཏུང་ནས་བཟུང་དམར་ཕྱོགས་བའི་ལག་དམར་ཧུའུ་ཅེན་ཐོ་མི་ཐོག་བཞི་པ་རེད་དེའི་བར་གྱི་རྒྱ་ནག་དམར་ཕྱོགས་ཀྱི་འགྱུར་པ་ལ་གཟིགས་དང་ད་རྒྱ་ནག་རྟག་བརྟན་ངང་གནས་ཐུབ་ས་རེད་དམ། མ་ཟད་ད་སྐབས་བུན་ཇཱ་པོ་ཟེར་པ་དེས་ཡང་མང་གཙོ་ཟེར་པ་སོགས་ཚིག་འགའ་ཤས་ཞིག་ཁ་ནས་ཤོར་བཞིན་ཡོད་པ་དང་ད་གུང་ཁྲན་ཏང་གི་ནོར་འཁྲུལ་བྱེད་བཞིན་ཡོད་པ་ཧ་གོ་ནས་ད་རྒྱལ་སྤྱིའི་ནང་དུ་འགྲོ་མ་ཐུབ་པ་སོགས་ཆབ་སྲིད་སྒེར་གཅོད་དབང་འཛིན་པའི་ལས་གནས་ལ་འགྱུར་པ་བྱུང་རྒྱུ་ཡིན་པ་དངོས་ཡོད་རེད། ད་སྐབས་རྒྱ་མའི་མཁས་དབང་དང་རྩོམ་པ་པོ་ཤེས་ལྡན་པ་ཚོས་རྒྱ་ནག་དམར་ཕྱོགས་ཚང་གི་བྱས་ཉས་ཞིག་ཡིན་པ་མཐོང་བཞིན་ཁོང་ཚོས་ཤི་རུ་མི་འཇུག་ཐག་གཅོད་རེད་དེ་འདྲ་ཡིན་དུས་དེ་ལས་སྐྱོབ་ཐབས་བྱེད་ངས་རེད།
ངོ་མ་བཤད་ན། དེང་སང་གི་རྒྱ་ནག་འདི་འཐོར་ཟིན་པའི་ཅང་ཅེཧྲིའི་སྲིད་གཞུང་ལས་ཐབས་སྡུག་པོ་འདུག
༡ རྒྱ་ནག་གི་འགོ་ཁྲིད་ཚོའི་ལྐོག་ཟ་རུལ་ཟུངབྱེད་པ་མང་དྲག་པས་མི་མང་གིས་རྒྱ་མིའི་འགོ་ཁྲིད་ཚོ་དགྲ་བཞིན་མཐོང་གི་ཡོད།
༢ རྒྱལ་ཁབ་ཀྱི་རྩ་ཁྲིམས་ནི་མི་མང་གི་ཁྲིམས་ཡིན་པ་ལས་འགོ་ཁྲིད་ཚོའི་རྒྱལ་ཁབ་ཀྱི་ཁྲིམས་འཁུར་རྒྱུ་མེད་པས་གཞུང་དམངས་བར་ལ་འགལ་བ་ཆེན་པོ་ཡོད།
༣ རྒྱ་ནག་གིས་རང་ལ་སྟོབས་འབྱོར་ཡོད་བསམ་ནས་ཕྱིའི་རྒྱལ་ཁབ་མང་པོར་གཉོམ་འཛུག་བྱེད་དྲག་པས་རྒྱལ་སྤྱིའི་ཚོགས་ནང་རྒྱ་ནག་དང་ཁ་ཞེ་མཐུན་ས་མེད། རྒྱུ་རྐྱེན་དེ་རིགས་ལས་དེང་སང་རྒྱ་ནག་ལ་ཉེན་ཁ་ཆེན་པོ་འདུག
རྒྱ་ནག་མི་ཤེས་པའི་བོད་པ་རྣམས་ལ་ཕུལ།
བོད་པ་རྣམས་དང་། སྒོས་སུ་བཙན་བྱོལ་གྱི་བོད་པ་ཕལ་མོ་ཆེས་བསམ་བློ་འདི་འདྲ་ཞིག་གཏོང་གིན་ཡོད།
རྒྱ་ནག་ནི་འཛམ་གླིང་གི་ཆེས་རྒྱུ་མཚན་མེད་པའི་རྒྱལ་ཁབ་དང་དང་གནས་ལུགས་མེད་པའི་སྤྱི་ཚོགས། དངོས་ཡོད་ལ་མི་འཚམས་པ། སྐྱག་རྫུན་ཁོ་ནས་དུས་འདའ་བར་གྱེད་ཀྱིན་པ། ཁྲིམས་མེད་ལུགས་མེད་ཅིག་ཡིན་པ་མ་ཟད་། དེང་སྐབས་ཀྱི་རྒྱ་ནག་སྤྱི་ཚོགས་ཀྱང་དྲག་པོ་དང་བཙན་དབང་ཁོ་ནས་ཆབ་སྲིད་སྲིས་བྱུས་ལག་བསྟར་བྱེད་ཀྱིན་པ། རྒྱ་ནག་ནི་མགྱོགས་པོར་ཁ་འཐོར་ཏུ་འགྲོ་ཆོག་ཆོག་ཡིན་པ་ལྟ་བུའི་ལྟ་ཚུལ་ཤུགས་ཆེ།
དེ་ལའང་རྒྱུ་མཚན་ཁྱོན་ནས་མེད་པ་ཞིག་མིན་མོད། རྒྱ་ནག་གི་སྤྱི་ཚོགས་དངོས་ཡོད་དཔང་ལ་བཞག་སྟེ་བལྟས་པ་ཡིན་ན། རྒྱ་ནག་གི་མི་རིགས་དུང་ཕྱུར་བཅུ་གསུམ་ལྷག་རྫུན་རྐུབ་རྫུན་སྐྱེལ་ཁོ་ན་དང་། བཙན་དབང་དྲག་ཤུགས་ཁོ་ནས་དབང་འོག་ཏུ་འདུ་དགོས་ཟེར་བ་ནི་ཅུང་དངོས་ཡོད་ཀྱི་གནས་ལུགས་དང་མི་མཚམས་པ་ཞིག་ཡིན་པར་སྙམ་ལ། དེ་ལས་དུས་རབས་འདིར་ཐོན་པའི་སྤྱི་ཚོགས་ཤིག་དེ་བཞིན་རྒྱུ་མཚན་དང་གནས་ལུགས་གང་ཡང་མེད་པའི་ཐོག་དབང་ཤུགས་ཀྱིས་བེད་སྤྱོད་བྱ་རྒྱུ་ནི་ཕྱོགས་གང་ནས་བལྟས་ཀྱང་ལན་པོ་གང་ཡང་མེད། དེ་ནི་གཙོ་བོ་ད་ལྟའི་རྒྱ་ནག་སྤྱི་ཚོགས་ཀྱི་འཕེལ་རྒྱས་དང་མིང་མང་གི་གོ་རྟོགས་དངོས་ལ་ཆ་བཞག་ནས་གླེང་གི་ཡོད།
འུ་ཚོས་ནམ་རྒྱུན་གུང་ཁྲན་ཏང་ལ་སྐྱོན་བརྗོད་བྱེད་སྟངས་ཀྱི་མཐོང་ཚུལ་ལས་ལྡོག་སྟེ་བསམ་ཚུལ་རེ་གླེང་ན། གུང་ཁྲན་ཏང་གིས་སྒེར་སྤྱོད་དང་དམ་དྲག་ཅི་བྱས་ལམ་དུ་འགྲོ་དགོས་པ་དང་། གུང་ཁྲན་ཏང་གིས་བསམ་ཕྱོགས་ཅི་སྤེལ་ལེགས་འགྲུབ་བྱུང་དགོས་པའི་རྒྱུ་རྐྱེན་དག་ནི་རྒྱ་ནག་མི་མང་དང་། མི་མང་དེ་དག་གི་བསམ་བློའི་འགྱུར་བ། ནང་སྒོས་སུ་་རྒྱ་ནག་་མི་མང་གི་རིག་གནས་འདུ་ཤེས་དང་། འཚོ་བའི་དགོས་མཁོ་བཅས་ལ་རག་ལས་ཡོད་པ་གསལ་བོ་ཧ་གོ་དགོས་སྙམ།
དེ་མིན་ཚོགས་པ་དང་ཏང་ཁག་སུ་ཞིག་སྤྱི་ཚོགས་ཀྱི་དབུ་ཁྲིད་ཀྱི་སྣེ་རུ་ལངས་ཐུབ་ཡོད་པ་ལ་རྒྱུ་རྐྱེན་དང་གནས་ལུགས་གསལ་བོ་རེ་ཅི་བས་ཡོད་ཅིང་། དམངས་གཙོའི་སྲིང་གཞུང་དང་དབང་འཛིན་སྒེར་སྤྱོད་པ་སུ་ཡིན་ཡང་སྤྱི་ཚོགས་ཀྱི་རྨང་གཞིའམ། སྤྱི་ཚོགས་ཀྱི་དགོས་མཁོའི་རྒྱབ་ལྗོངས་ཤིག་ནི་ངེས་པར་དགོས། དེ་ནི་སྤྱི་ཚོགས་དཔྱད་བརྗོད་པ་རྣམས་ཀྱིས་སྲིད་གཞུང་དང་མང་ཚོགས་གཉིས་ནི་རྒྱ་མཚོ་དང་རྒྱ་མཚོའི་ངོས་ཀྱི་གྲུ་ལྟ་བུའི་འབྲེལ་བ་ཡོད་ཅིང་། རྒྱ་མཚོ་ཇི་ལྟར་འཕྱོམ་པ་དང་གྲུ་ཡང་དེ་ལྟར་གཡོ་དགོས་པའི་གནས་ལུགས་གསལ་བོ་བསྟན་པ་ལྟར་ཡིན།
བསམ་ཞིབ་གསལ་བོ་བྱས་པ་ཡིན་ན་། མིག་སྔའི་རྒྱ་ནག་གི་གནས་བབ་ལས་གནས་ལུགས་འདི་འདྲ་ཞིག་མཐོང་ཡོང་སྟེ། དང་པོ། རྒྱ་ནག་མི་རིགས་ནི་རྒྱལ་ཞེན་གྱི་འདུ་ཤེས་ཤིན་ཏུ་ཟབ་འི་མི་རིགས་ཤིག་ཡིན་པ་དང་། ལོ་རྒྱུས་ཁྲོད་རྒྱལ་ཞེན་ཀྱི་སྟོབས་ཤུགས་ལ་བརྟེན་ནས་འཛམ་གླིང་མི་མང་དང་སྒོས་སུ་རྒྱ་ནག་གཅིག་གྱུར་ལ་ཤུགས་རྐྱེན་ཟབ་མོ་ཐེབས་ཡོད་པའི་ལོ་རྒྱུས་ཀྱི་བག་ཆགས་ད་དུང་ཡང་ཉམས་པ་མེད་པར་གནས་ཡོད་པ།
གཉིས་ནི། རྒྱ་ནག་གི་མི་རིགས་རང་གཤིས་ཀྱི་ངོས་ནས་དང་། རིག་གནས་སྣང་ཚུལ། དེ་བཞིན་རིན་ཐང་ལྟ་ཚུལ་སོགས་ཀྱི་ངོས་གང་ནས་བལྟས་ཀྱང་། དམངས་གཙོའི་ལམ་ལུགས། དམངས་གཙོའི་འགྲོ་སྟངས་དང་ཧེ་བག་ཅུང་ཆེན་པོ་ཤོར་ཚར་བའི་མི་རིགས་ཤིག་ཡིན་པ་མ་ཟད། ཚོགས་པ་དང་ཚན་ཆུང་སོགས་འདུ་འཛོམས་ཆུང་ངུའི་རིགས་སོགས་སུའང་འགོ་བ་དང་དཔོན་པོ་བཅས་བསྐོས་ཏེ་འགོ་བ་གཅིག་དང་ཚོགས་པ་གཅིག ཏང་ཁག་གཅིག་གི་དབུ་ཁྲིད་བྱེད་པར་གོམས་སྲོལ་གཏིང་འདྲིས་སུ་གྱུར་བས་དམངས་གཙོ་གཅིག་སྡུད་ཀྱི་འདུ་ཤེས་ཟབ་པ།
གསུམ་ནི། རྒྱ་ནག་པ་རྣམས་གོང་མའི་རྒྱལ་རྒྱུད་རིམ་བྱུང་མང་པོ་བརྒྱུད་རིག་གནས་དང་ལོ་རྒྱུས། དེ་བཞིན་སྒྱུ་རྩལ་བཅས་ཕུན་སུམ་ཚོགས་པ་དང་། ས་ཁོངས་རྒྱ་ཆེ་བ། མི་རིགས་སྣ་མང་ཅན་ཡིན་པ། ཐོན་ཁུངས་ཕུན་སུམ་ཚོགས་པོ་ཡིན་ཚུལ། འཛམ་གླིང་ལོ་་རྒྱུས་ཁྲོད་རྒྱ་ནག་པ་རྣམས་ཀྱི་བློ་གྲོས་དང་རྣམ་དཔྱོད་ལ་འགྲན་སློང་མི་ཐུབ་པ་ལྟ་བུའི་ང་རྒྱལ་དང་སྤོབས་པའི་བག་ཆགས་གཏིང་ཟབ་ཡོད་པ་བཅས་ལ་བརྟེན། རྒྱ་ནག་གི་གནས་བབ་མགྱོགས་མྱུར་ངང་འགྱུར་བ་འགྲོ་མི་ཐུབ་པར་གནས་ཡོད།
དེར་བརྟེན་རྒྱ་ནག་གཞུང་འགྱུར་བ་མི་འགྲོ་བའི་རྒྱུ་རྐྱེན་རྒྱ་དམར་གུང་ཁྲན་གཅིག་པུས་དབང་སྤྱོད་ཁོ་ནས་བཟུང་ཡོད་པ་ཞིག་དང་། རྒྱ་དམར་གུང་ཁྲན་གྱི་སྒེར་གཅོད་ཁོ་ནས་མི་མང་གི་སེམས་རྩ་བཀག་ཡོད་པའི་ལྟ་ཚུལ་རྣམས་བརྒྱ་ཆའི་བརྒྱས་འགྲིག་རྟགས་རྒྱག་ཐུབ་པ་ཞིག་མིན།
འདི་ལྟར་བཤད་ན་མི་མང་པོ་ཞིག་གིས་ཁོ་བོས་རྒྱ་ནག་ཕྱོགས་ནས་སྐད་ཆ་བཤད་ཀྱིན་འདུག་ཟེར་ངེས་ལ། རྒྱ་ནག་ཕྱོགས་ནས་ལངས་བཞིན་འདུག་ཀྱང་ཟེར་ངེས་ཡིན། ངས་ཀྱང་རྒྱ་ནག་དམར་པོ་ཕམ་པར་རྒྱོབས། རྒྱ་ནག་གུང་ཁྲན་ཁ་འཐོར་དུ་འགྲོ་བར་ཤོིག རྒྱ་དམར་གཞུང་མགྱོགས་པོ་མགོ་རྟིང་སློག་ངེས་པ་སོགས་ཁ་གཡང་ལྟ་བུའི་དཔྱད་གཏམ་དང་། འུ་ཚོའི་རྣ་ལ་སྙན་པའི་གསར་འགྱུར་དག་མུ་འགོད་གང་མང་བྱེད་པ་ལ་ལས་ཚགས་ཅི་ཡང་མེད་མོད། འདི་ལྟར་བོད་པ་རྣམས་རྒྱ་ནག་གི་སྤྱི་ཚོགས་དངོས་ལ་ཟབ་ཞུགས་བྱེད་མ་ཐུབ་པར། རྩོམ་པ་པོ་དང་གསར་འགོད་པ་རེ་གཉིས་ཀྱི་ཁ་གཡང་འོག་ཤོར་ཉེན་ཆེ་དྲགས་ན། ནམ་ཞིག་དངོས་ཡོད་སྤྱི་ཚོགས་ཀྱིས་ཁ་གྲག་ཡོང་བ་ཡིན་ན། སྐབས་དེར་བོད་པ་རྣམས་གཞི་ནས་རྒྱ་ནག་སྤྱི་ཚོགས་ལ་རྒྱུས་མ་ལོན་པའི་ནག་ཉེས་དང་ནོང་འགྱོད་ཆེན་པོ་ཞིག་ཏུ་ལྷུང་ཉེན་ལ་ཡིད་མ་བདེ་བར་འདི་ལྟར་བརྗོད་པ་ཙམ་ཡིན།
ལོང་བྱུང་ཚེ་འདི་འདྲའི་རིགས་མང་ཙམ་བསྒྱུར་གནང་ཡོང་བར་ཞུ།
༡༽ གུང་ཁྲན་ཏང་གི་དཔལ་འབྱོར་འཕེལ་རྒྱས་ཀྱིས་དམངས་སེམས་ཉོ་ཐུབ་མེད་པ་ནི། བོད་དང་སོག་པོ་སོགས་ཀྱིས་མཚོན་པའི་གྲངས་ཉུང་ཁག་གི་མི་འདོད་པའི་རྣམ་འགྱུར་ལ་ཅིག་ལྟོས་དང་གསལ་ཡོང་ངེས་སོ།།
༢༽ གུང་ཁྲན་ཏང་གི་ཤུགས་ཆེ་བའི་དྲིལ་བསྒྲགས་ཤུགས་ཆེན་ཡིན་རུང་། རྫུན་པའི་རྣམ་འགྱུར་ནི། ཡུན་རིང་དུ་གནས་ས་མེད་པ་ནི། ལོ་རྒྱུས་དང་བདེན་པས་ར་འཕྲོད་ཀི་ཡོད་པ་འདིའོ།།
༣༽ གུང་ཁྲན་ཏང་གི་དྲག་གནོན་སྲིད་བྱུས་ཀྱིས་གནས་སྐབས་རང་སྲུང་ཐུབ་རུང་། དེ་ནི། འདྲ་མཉམ་ཞིག་དང་ཞི་འཇམ་མིན་པས་ན། ཡུན་རིང་དུ་དེའི་སྲིད་བྱུས་མི་བརྟན་པ་ནི། དེང་སང་གི་དཀྱིལ་ཤར་གླིང་གི་གསར་བརྗེ་རིམ་པ་འདིས་བདེན་དཔུང་ཐུབ་ཀི་རེད་དོ།།
༤༽ མང་ཚོགས་ཀྱི་དབུ་ཁྲིད་ཡིན་མདོག་སྟོན་མཁན་འགའི་ཤུགས་རྐྱེན་གྱིས་སྐབས་འཕྲལ་ཙམ་ལ། དབུ་ཁྲིད་ཀྱི་རྣམ་པ་ཐོན་རུང་། ཁོང་ཚོའི་མ་རུང་ཁོག་བཅུགས་ཀྱིས་སྒེར་གཅོད་སྒེར་འཛིན་གྱི་གཏིང་ནག་གི་སྲིད་བྱུས་འདི། དེང་སང་མི་དམངས་སྤྱི་ཡོངས་ཀྱི་ཤེས་རྟོགས་རྙེད་བཞིན་པའོ།།
གལ་སྲིད། དམར་ཕྱོགས་ཚོགས་པ་རྩ་གཏོར་གཏོང་དགོས་ན། ཕྱོགས་རིས་པའི་གཞུང་ལུགས་མེ་བསྲེག་གཏོང་དགོས།
གལ་སྲིད། དམར་ཕྱོགས་ཚོགས་པ་རྩ་མེད་གཏོང་དགོས་ན། ཁ་དོན་མི་མཚུངས་པའི་ལག་ལེན་དེ་རྒོལ་དགོས།
གལ་སྲིད། དམར་ཕྱོགས་ཚོགས་པའི་སྒྲོམ་གཞི་གཏོར་དགོས་ན། མ་རྩ་ཆེ་བའི་དཔལ་འབྱོར་གྱི་མ་རྐང་གཏོར་དགོས།
གལ་སྲིད། དམར་ཕྱོགས་ཚོགས་པ་མེད་པར་གཏོང་དགོས་ན། རྐུབ་སྟེགས་བརྟན་པའི་དཔོན་ངན་རྣམས་རྫོགས་དགོས།
གལ་སྲིད། དམར་ཕྱོགས་ཚོགས་པ་ཤུལ་མེད་དུ་གཏོང་དགོས་ན། ནང་ཁུལ་གྱི་འགལ་ཟླ་ཆེ་རུ་གཏོང་དགོས།
གུང་ཁྲན་ཏང་ཁ་འཐོར་དུ་འགྲོ་ཐུབ་པའི་རྒྱུ་རྐྱེན་བཞི་ནི།
དང་པོ། གུང་ཁྲན་ཏང་གི་དཔལ་འབྱོར་འཕེལ་རྒྱས་ལྐོག་ཟ་རུལ་སུངས་འདིས་དམངས་སེམས་ཉོ་མི་ཐུབ།
གཉིས་པ། གུང་ཁྲན་ཏང་གི་ཤུགས་ཆེ་བའི་དྲིལ་བསྒྲོག་རང་གིས་རང་བཀྱག་སྐྱག་པས་རྐུབ་བཀྱག་པ་འདིས། ནམ་ཞིག་རང་གིས་ཚིག་ལ་རང་དང་རང་མིས་ཞེ་ལོག་པར་འགྱུར་ངེས།
གསུམ་པ། གུང་ཁྲན་ཏང་གི་དྲག་གནོན་སྲིད་བྱུས་ཕྱིའི་མཐའ་མཚམས་སྲུང་སྐྱོབ་ལས་ལྷག་པའི་རང་མིར་དུག་རྩུབ་ཀྱི་འགྲོ་འགྲོན་བཏང་ཆེས་དྲགས་ནས། རྒྱ་རིགས་དང་བོད་རིགས་ཤེས་ཡོན་དང་ཕྱི་མིར་ངོ་ཚ་ནས་རང་ཤི་རྒྱབ་རྒྱབ་ཆོག་ཆོག་ལ་བསྡད་པའི་དུས་ཚོད་ཅིག་ཤར་རན་ཡོད།
བཞི། མང་ཚོགས་དང་དམར་པོའི་དབུ་ཁྲིད་ཡིན་མདོག་སྟོན་མཁན་འགའི་ནོར་འཁྲུལ་ཆེ་མགོ་ལས་རྨ་ཆེ་བའི་ཤུགས་རྐྱེན་གྱིས། རྒྱ་ནག་གི་རྩ་ཁྲིམས་ཞིག་རལ་དུ་འགྲོ་བར་ཐེ་ཚོམས་མེད། ནག་ཕྱོགས་ཕམ། དཀར་ཕྱོགས་རྒྱལ། དྲང་བདེན་རྒྱལ་ལོ། དགེའོ། དགེའོ། དགེའོ།