མི་རབས་གོང་མའི་ཤུལ་བཞག་ཚོགས་པ་འདིའི་དམིགས་འདུན་སྲ་བརྟན་རྒྱུན་གནས་ཡོང་རྒྱུར་འགལ་རྐྱེན་མི་འཕྲད་པའི་འགན་ཁུར་རྒྱུན་སྲིང་བྱ་རྒྱུ་དང་། སྤྱི་དོན་ཟུར་བཞག་གིས་སྐྱེ་བོ་སྒེར་སོ་སོའི་མིང་དོན་ཁེ་ཕན་ལ་དམིགས་ཏེ་དོན་གནད་ཆུང་ཚེགས་ཐད་ནང་ཁུལ་མི་བདེ་བ་ལྟ་བུ་ཡོང་སྲིད་སྟབས། མདོ་ཁམས་ཆུ་བཞི་སྒང་དྲུག་གི་སྒྲིག་འཛུགས་འདིར་དོ་སྣང་ཆེན་པོས་འགན་སྲུང་མི་ལྷོད་པ་གནང་རྒྱུ་གནད་ཀྱི་སྙིང་པོ་ཡིན་ཟེར།
མདོ་དེ་རིང་ཕྱི་ཚེས་ ༡༦ ཉིན་གྱི་སྔ་དྲོའི་ཆུ་ཚོད་ ༧ དང་ཕྱེད་ཀའི་སྟེང་། མདོ་ཁམས་ཆུ་བཞི་སྒང་དྲུག་དབུས་སྤྱི་ཁྱབ་རྒྱུན་ལས་ཁང་གི་གོ་སྒྲིག་འོག་ངྷ་ས་ལྷ་རྒྱ་རིའི་མཆོད་ཁྲའི་ཐང་དུ། ཕྱི་ལོ་ ༡༩༥༨ ལོར་བོད་ས་ལྕགས་ཚ་གྲི་གུ་ཐང་དུ་མདོ་ཁམས་ཆུ་བཞི་སྒང་དྲུག་བོད་ཀྱི་བསྟན་སྲུང་དང་བླངས་དམག་སྒར་དབུ་བརྙེས་ནས་མི་ལོ་ཧྲིལ་པོ་ ༥༣ འཁོར་བའི་དུས་དྲན་སྲུང་གཙི་བྱས་ཡོད་པ་དང་། དུས་དྲན་མཛད་སྒོའི་ཐོག་དམིགས་བསལ་སྐུ་མགྲོན་བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་ལགས་དང་། བོད་མི་མང་སྤྱི་འཐུས་ལྷན་ཚོགས་ཀྱི་རྒྱུན་ལས་སྐུ་ཚབ་པདྨ་མ་འབྱུང་གནས་ལགས་གཙོས་པའི་སྤྱི་འཐུས་རྣམས་པ། རྡ་ས་ས་གནས་འཐུས་ཚོགས་ཀྱི་ཚོགས་གཙོ་དང་ས་གནས་མགོ་འཛིན། ས་གནས་རང་བདེན་ཚོགས་གཙོ། གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་ཀྱིས་མཚོན་པའི་སེར་སྐྱ་མི་མང་རྣམས་མཉམ་ཞུགས་བྱས་ཡོད།
སྐབས་དེར་སྤྱི་ཟུར་བསོད་ནམས་དགྲ་འདུལ་ལགས་ཀྱིས། མདོ་སྟོད་ཆོལ་ཁའམ་ཆུ་བཞི་སྒང་དྲུག་དབུས་སྤྱི་ཁྱབ་རྒྱུན་ལས་ཁང་གི་དུས་དྲན་མཛད་སྒོའི་ཡིག་ཆ་སྒྲོག་སྦྱོང་གནང་དོན། དེ་རིང་གི་ཉིན་མོ་འདི་ནི་བོད་ལྷོ་ཁ་ལྕགས་ཚ་གྲི་གུ་ཐང་དུ་དཔའ་བོ་ཨ་འབྲུག་མགོན་པོ་བཀྲ་ཤིས་ཀྱིས་དབུ་ཁྲིད་པའི་བོད་ཀྱི་བསྟན་སྲུང་དང་བླངས་དམག་སྒར་མདོ་ཁམས་ཆུ་བཞི་སྒང་དྲུག་དབུ་བརྙེས་ནས་ལོ་ ༥༣ འཁོར་བའི་དུས་ཚིགས་ལ་འཁེལ་ཡོད་པ་ཚང་མས་མཁྱེན་གསལ་ལྟར། ཉེ་ཆར་བོད་ཀྱི་བསྟན་སྲུང་རང་དབང་སླར་གསོའི་ཆེད་དུ་ཨ་མདོ་རྔ་པ་ཀིརྟི་དགོན་པའི་གྲྭ་ཕུན་ཚོགས་ལགས་ཀྱིས་རང་སྲོག་བློས་གཏོང་གིས་སྐུ་ལུས་མེར་བསྲེགས་བཏང་བ་དང་། རྒྱ་ནག་གཞུང་གིས་རྔ་པ་སྡེ་དགོན་གཉིས་ལ་དྲག་གནོན་ཤུགས་ཆེན་བྱེད་བཞིན་པ། དེ་བཞིན་ཉེ་ལམ་ཆབ་མདོ་ས་ཁུལ་གྱི་འཇོན་མདའ་རྫོང་དང་། ནགས་ཆུ་ས་ཁུལ་གྱི་སོག་རྫོང་། དཀར་མཛེས་ས་ཁུལ་གྱི་ཉག་ཆུ་རྫོང་དང་རྫ་ཁོག སྐྱེ་དགུ་མདོ་སོགས་ཁམས་ཁུལ་གྱི་ཡུལ་ལུང་མང་པོར་བོད་བསྟན་སྲིད་ཆེད་ཚེ་སྲོག་བཏང་བ་དང་། ཡིག་ཆ་བཀྲམས་པ། ཟས་བཅད་ངོ་རྒོལ་མཁན་ཚང་མར་རྒྱ་གཞུང་གིས་མནར་གཅོད་དྲག་གནོན་བྱེད་བཞིན་པར་གདུང་སེམས་མཉམ་སྐྱེད་ཀྱིས་མྱ་ངན་ཞུ་བ་དང་ཆབས་ཅིག འཛམ་གླིང་གི་དྲང་བདེན་རྒྱལ་ཁབ་ཡོངས་ལ་བོད་མིའི་དཀའ་སྡུག་སེལ་ཐབས་ཐད་འབོད་སྐུལ་ཞུ་བཞིན་ཡོད། ཅེས་བརྗོད་སོང་།
ཡང་ཁོང་གིས་མདོ་ཁམས་མི་མང་རྣམས་ལ་ཆེད་དུ་ཞུ་རྒྱུར། ད་ལྟའི་གནས་སྐབས་འདིར་མདོ་ཁམས་ཆུ་བཞི་སྒང་དྲུག་གི་སྒྲིག་འཛུགས་དང་ལས་དོན་བྱེད་ཕྱོགས། མང་ཚོགས་ཀྱི་རྒྱབ་སྐྱོར་དང་དཔལ་འབྱོར་གྱི་མཐུན་རྐྱེན་སོགས་གང་ཅིའི་ཐད་ནས། བོད་ཀྱི་འཐབ་རྩོད་ལས་གཞིའི་དམིགས་ཡུལ་བསྒྲུབ་བྱ་ཇི་ལྟར་ཡིན་པའི་བརྒྱུད་རིམ་དང་། མི་རབས་གོང་མ་རྣམས་ཀྱི་ལག་རྗེས་རྩ་མེད་དུ་མ་སོང་པར་ཇི་སྲིད་བོད་དོན་བདེན་མཐའ་མ་གསལ་བ་དེ་སྲིད་དུ་གནས་བཞིན་པ་ལགས་ན། སྤྱི་དོན་ཐོག་ཚང་མས་འགན་ཁུར་མཉམ་ལེན་གྱིས་ནུས་ཤུགས་གཅིག་ཏུ་སྤུངས་ཐུབ་པའི་ཐབས་ལ་བརྩོན་རྒྱུ་ཧ་ཅང་གལ་ཆེན་རེད། མི་རབས་གོང་མའི་ཤུལ་བཞག་ཚོགས་པ་འདིའི་དམིགས་འདུན་སྲ་བརྟན་རྒྱུན་གནས་ཡོང་རྒྱུར་འགལ་རྐྱེན་མི་འཕྲད་པའི་འགན་ཁུར་རྒྱུན་སྲིང་བྱ་རྒྱུ་དང་། སྤྱི་དོན་ཟུར་བཞག་གིས་སྐྱེ་བོ་སྒེར་སོ་སོའི་མིང་དོན་ཁེ་ཕན་ལ་དམིགས་ཏེ་དོན་གནད་ཆུང་ཚེགས་ཐད་ནང་ཁུལ་མི་བདེ་བ་ལྟ་བུ་ཡོང་མི་སྲིད་པ་མིན་སྟབས། མདོ་ཁམས་ཆུ་བཞི་སྒང་དྲུག་གི་སྒྲིག་འཛུགས་འདིར་དོ་སྣང་ཆེན་པོས་འགན་སྲུང་མི་ལྷོད་པ་དགོས་རྒྱུ་ནི་གནད་ཀྱི་སྙིང་པོ་རེད། ཆུ་སྒང་རྒྱུན་ལས་སྐབས་བཅོ་བརྒྱད་པས་མ་འོངས་དབུས་རྒྱུན་སྐབས་བཅུ་དགུ་པར་རྩིས་སྤྲོད་རྩིས་ལེན་གྱིས་ཕྱི་གསལ་ནང་གསལ་བྱ་རྒྱུ་ཡིན་པ་ལྟར། རྒྱ་ཆེའི་མང་ཚོགས་ནས་དོ་སྣང་བྱ་རྒྱུ་ཧ་ཅང་གལ་ཆེ་ལ། མི་མང་གི་རྒྱུ་དངོས་དང་། མི་མང་གི་སྐུ་ཚབ་རིམ་པས་ལས་དོན་ཇི་ལྟར་བྱས་ཡོད་མེད་དང་དགེ་སྐྱོན་ཡོ་བསྲང་ཇི་ལྟར་བྱས་མིན་སོགས་ཤེས་རྟོགས་བྱ་དགོས་རྒྱུ་གལ་ཆེན་པོ་རེད། ཅེས་བརྗོད་སོང་།
དེ་རྗེས་སྤྱི་འཐུས་རྒྱུན་ལས་ཀྱི་སྐུ་ཚབ་དབུས་གཙང་སྤྱི་འཐུས་པདྨ་མ་འབྱུང་གནས་ལགས་ཀྱིས་བརྗོད་དོན། ཆུ་སྒང་བསྟན་སྲུང་དང་བླངས་དམག་གི་སྒྲིག་འཛུགས་འདི་ཉིད་ཆེད་འཛུགས་ཀྱིས་དགྲ་བོར་གཡུལ་འཐབ་སྔ་རྗེས་ལན་མང་བཤམས་ཏེ་རྒྱལ་སྲུང་ཞབས་འདེགས་རླབས་ཆེན་བསྒྲུབས་པར་མ་ཟད། མཐར་མང་སྣེ་ཉུང་གིས་མ་བརྟན་པར་བོད་ས་ཡོངས་རྫོགས་རྒྱ་དམར་གྱི་དབང་འོག་ཏུ་ཤོར་ཏེ། ༸གོང་ས་མཆོག་གིས་དབུས་བོད་མི་ཁྲི་ཚོ་བརྒྱད་ལྷག་རྒྱ་གར་འཕགས་པའི་ཡུལ་དུ་རང་དབང་སླར་གསོའི་ཆེད་བཙན་བྱོལ་ཏུ་ཕེབས་དགོས་བྱུང་སྐབས་ཀྱང་། མགོན་པོ་མཆོག་གི་ཆིབས་ཞབས་སུ་བཅར་ཏེ་ཉེན་སྲུང་ཞུ་སྒོ་ལྷོད་མེད་བསྒྲུབས་ཡོད་པ་བཅས་ལ། ད་རེ་གོ་སྐབས་འདི་བཟུང་ནས་བཀའ་དྲིན་རྗེས་དྲན་དང་འབྲེལ་གུས་འདུད་ཞུ་རྒྱུ་ཡིན། ཞེས་བརྗོད་སོང་།
ཡང་ཁོང་གིས། རང་རེའི་རྣམས་བཙན་བྱོལ་དུ་འབྱོར་ནས་མི་ལོ་ ༥༢ ལྷག་ཕྱིན་ཟིན་པའི་རིང་བོད་མིའི་རྩ་དོན་ལྷད་རྒྱ་ནག་དང་ལྷན་དུ་ཐབས་ལམ་ཡོད་དགུ་དང་། གཉིས་ཕན་ལྷག་བསམ་གྱིས་ཀུ་ཡངས་གནང་རྒྱུ་ཡོད་ཚད་གནང་ཡོད་ནའང་། རྒྱ་ནག་དབང་འཛིན་པ་ཚོས་ད་དུང་དབང་ཤུགས་དང་མགོ་སྐོར་བསླུ་བྲིད་ཁོ་ནས་དུས་ཚོད་སྐྱེལ་ཐབས་བྱས་ཡོད་སྟབས། བོད་མི་རྣམས་ཀྱིས་ཀྱང་ཇི་སྲིད་བོད་དོན་བདེན་མཐའ་མ་གསལ་བ་དེ་སྲིད་དུ་བདེན་པའི་འཐབ་རྩོད་བློས་གཏོང་གནང་སྟེ་བར་མཚམས་འཇོག་མི་སྲིད་པ་བཞིན། རང་རེའི་སྒྲིག་འཛུགས་ཁག་དང་མང་ཚོགས་བཅས་ཚང་མས་སྔར་བས་མཐུན་ལམ་དང་། སྟོབས་ཤུགས་ཆིག་སྒྲིལ་ངང་ནུས་པ་འདོན་དགོས་པའི་དུས་མཚམས་དམིགས་བསལ་ཞིག་ཏུ་བསླེབས་ཡོད་པས། དེ་དོན་ཚང་མས་ཐུགས་ཁུར་གནང་དགོས། ལྷག་པར་ཉེ་སྔོན་༸གོང་ས་མཆོག་གིས་བོད་མིའི་འདི་ཕྱི་ཚེ་རབས་གཏན་གྱི་མགོན་སྐྱབས་ནམ་ཡང་མི་འབྲལ་བར་དགོས་མཁོ་ནམ་བྱུང་ལ་གཟིགས་སྐྱོང་ལམ་སྟོན་མཛད་རྒྱུའི་ཞལ་བཞེས་བཀའ་དྲིན་གནང་ཐོག དེ་ནི་འཛམ་གླིང་སྤྱི་སྲོལ་དམངས་གཙོའི་ལམ་སྲོལ་དང་སྒོ་ཀུན་ནས་མཐུན་ཞིང་། མ་འོངས་བོད་མིའི་བདེ་ཐབས་ཁོ་ནའི་སླད་དངོས་ཡོད་གནས་ཚུལ་དང་མཐུན་པའི་དགོངས་བཞེས་བླ་མེད་མཛད་དེ། སྐབས་བཅུ་བཞི་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་གཅིག་པའི་ཐོག་གསུང་འཕྲིན་རིན་པོ་ཆེ་སྤྱི་བསྩལ་ལྟར། བོད་མིའི་བཅའ་ཁྲིམས་ནང་གསལ། མགོན་པོ་གང་གིས་སྐུ་དབང་ཡོངས་རྫོགས་མང་ཚོགས་ཀྱི་འོས་འདེམས་བྱས་པའི་མགོ་ཁྲིད་རྣམས་ཀྱི་ལག་ཏུ་ཆ་ཚང་གསོལ་བསྩལ་དང་། རྩིས་སྤྲོད་གནང་བར་རང་ཅག་བོད་མི་རྣམས་ཀྱིས་གོ་དོན་ལོག་སྒྲུབ་དང་། གཡམ་རྒྱུགས་ཀླན་ཀ་འཚོལ་བའི་རིགས་སོགས་མི་ཡོང་བར་མགོན་པོ་གང་གིས་མ་འོངས་སྔོན་གཟིགས་ཀྱི་ལམ་སྟོན་ཡིན་པ་བསམ་ཤེས་ཐུབ་པ་གནང་སྟེ། ཚང་མས་དངོས་ཡོད་ལག་ལེན་གྱི་སྟེང་ནས་དེང་ལེན་ལྷོད་གཡེང་མེད་པ་ཞུ་དགོས་པའི་འབོད་སྐུལ་ཤུགས་ཆེ་ཞུ་རྒྱུ་ཡིན། ཅེས་བརྗོད་སོང་།
མདོ་ཁམས་ཆུ་སྒང་དབུ་བརྙེས་ཀྱི་དུས་ཚེས་ལ་ཚང་མར་འཚམས་འདྲི་བཀྲིས་བདེ་ལེགས་ཞུ་བ་དང་ང་ཚོ་ཚང་མས་ཚོགས་པ་འདི་ཐོག་མར་༡༩༥༨ལོར་འཛུགས་སྐབས་ཀྱི་སྐྱེ་བོ་དག་གི་དགོངས་གཞི་དང་མཐུན་པར་ཕྱག་ལས་འཇུགས་སྐྱོང་ལ་བྱ་སྨོན་ཞུ། བོད་མི་མང་སྤྱི་འཐུས་ལྷན་ཚོགས་ཀྱི་འཐུས་མི་ངོ་ཕེབས་ལ་དགའ་བསུ་དང་བོད་མིའི་ཆིག་བསྒྲིལ་གྱི་ཙ་དོན་ལ་ཕན་པ་བྱུང་སོང་སྙམ།
དབུ་བརྙས་མ་རེད། དབུ་བརྙེས་ཞེས་བཅོས་རོགས། ཁ་བྱང་གི་ཡི་གེ་ནོར་འདུག
ཆུ་བཞི་སྒང་དྲུག་ཚོགས་པར་མདོ་སྟོད་ཀྱིས་བདག་གཉེར་གནང་བཞིན་པ་གཟི་བརྗིད་ཅིག་ཡིན་ནའང་། ཆོལ་གསུམ་བོད་མི་མཉམ་རུབ་ཀྱིས་བཙུགས་པ་ཞིག་ཡིན་པས། བོད་སྤྱི་ལ་ཁྱབ་ཀྱི་ཡོད་ལ། ལྷག་པར་དུ་བཙན་བྱོལ་བོད་གཞུང་གི་སྒོ་བརྒྱབ་པ་ནས་འགན་དེ་ལས་ཆེ་བ་ཞིག་ཕྲག་པར་བབས་ཡོད་པའང་ཚབ་མས་ཤེས་གལ་ཆེ་སྙམ།
མདོ་ཁམས་ཆུ་བཞི་སྒང་དྲུག་གི་འཁྲུངས་སྐར་ལ་བཀྲ་ཤིས་བདེ་ལེགས་ཞུ། དེ་དང་ཆབས་ཅིག་མི་རེ་ཉིས་ཞིག་གི་ང་ཡག་ཁྱོད་སྡུག་དང་ཟ་ཡ་མང་ཉུང་སོགས་མ་རྩོད་ནས་ཆེ་ས་ནས་རྒྱལ་ཁབ་དང་མི་རིགས་ཆུང་ས་ནས་མདོ་སྟོད་མི་མང་གི་བདེ་སྡུག་གཟིགས་པ་གལ་ཆེ་སྙམ།
སྤྱི་འཐུས་པདྨ་འབྱུང་གནས་ལགས་མདོ་ཁམས་ཆུ་བཞི་སྒང་དྲུག་གི་ཚོགས་ཐོག་ཏུ་ཕེབས་པ་འདིས་ཆིག་སྒྲིལ་གྱི་རྣམ་པ་ཞིག་སྟོན་ཡོང་གི་འདུག་པས་ཡག་པོ་འདྲ་ཞིག་མཐོང་སོང་། དགའ་པོ་བྱུང་། དེའི་གོང་དུ་སྤྱི་འཐུས་ཚོགས་གཙོ་སྤུན་པ་རྒྱག་པ་ཕེབས་ཡོད་ན་དེ་ལས་ཡག་པོ་ག་འདྲ།
ཆིག་སྒྲིལ་ཆིག་སྒྲིལ་ཟེར་ནས་འབོད་བཞིན་འབོད་བཞིན།
ཆུ་སྒང་ཆུ་སྒང་ཟེར་ནས་གཏོར་བཞིན་གཏོར་བཞིན།
མི་ལོ་ཉེར་ཤུའི་རིང་གི་ཁ་མཁས་ཁོག་ནག
ད་ནས་རྐུབ་བཀྱག་བཞག་པའི་དུས་སུ་བབ་སོང་།ཧཧཧཧཧཧཧཧཧཧཧའདི་སུ་ལ་ཐུག་གམ། གཅིག་གསུང་དང་།
མདོ་ཁམས་ཆུ་བཞི་སྒང་དྲུག་གི་སྐུའི་འཁྲུངས་སྐར་ལ་འཚམས་འདྲི་བཀྲ་ཤིས་བདེ་ལེགས་གྲངས་མེད་ཞུ་བ་དང་ཆབས་ཅིག བོད་སྤྱིར་སྨན་གྱི་ལས་དོན་གང་ཅི་ལེགས་ལམ་ངང་འགྲུབ་པའི་སྨོན་ལམ་ཡང་རྒྱུན་སྲིང་བྱེད།