ས་བདག་ཆུ་བདག་གཡོག་པོར་ཉར་བ་འདི་ཡག་པོ་མ་རེད།

ཕྱི་ཟླ་ ༦ པའི་ཚེས་ ༡༢ ཉིན་ནི་རྒྱལ་སྤྱིའི་བྱིས་པའི་ངལ་རྩོལ་ངོ་རྒོལ་གྱི་ཉིན་མོ་ཡིན་ཞིང་། བཙན་བྱོལ་བོད་མིའི་སྤྱི་ཚོགས་ཆུང་ཆུང་འདི་ལ་མཚོན་ན་ཡང་ཉིན་མོ་འདིའི་གླེང་གཞི་ཞིག་གམ། ངོ་རྒོལ་བྱེད་ཡུལ་ཞིག་ཏུ་མི་འཇོག་ག་མེད་ཡིན། རྒྱ་གར་ལྷོ་ཕྱོགས་བོད་མིའི་གཞིས་གྲོང་ཁག་དང་ལྡི་ལི་བོད་སྒར། ངྷ་རམ་ས་ལ་སོགས་ཀྱི་བོད་པའི་ཚོང་ཁང་དང་ཟ་ཁང་། མགྲོན་ཁང་། ཐ་ན་ནང་གི་བྱིས་པར་ལྟ་སྐྱོང་བྱེད་མཁན་ལའང་རྒྱ་གར་བའི་གཡོག་པོ་ཉར་ཀྱི་ཡོད་ལ། དེ་བཞིན། ངྷ་རམ་ས་ལའི་རྒྱ་གར་བའི་ཚོང་ཁང་དང་ཟ་ཁང་འགའ་རེའི་ནང་། གླ་དངུལ་ཧ་ཅང་དམའ་བོའི་ཐོག་བོད་མི་གསར་འབྱོར་བ་གཡོག་པོར་ཉར་ཡོད་པའང་མི་ཉུང་བ་ཞིག་ཡོད་པར་བརྟེན། ངྷ་རམ་ས་ལ་ནི་ཉིན་མོ་འདིའི་ནག་ཉེས་ཆེ་གྲས་ཀྱི་ས་ཁུལ་ཞིག་ཏུ་བགྲང་ཆོག 

ན་ཚོད་མ་སྨིན་པའི་བྱིས་པ་གཡོག་ལ་བཀོལ་བ་དང་། དུས་ཚོད་ཚད་ལས་བརྒལ་བའི་ལས་ཀར་བཀོལ་བ། གླ་དངུལ་ཚད་ལྡན་མི་སྤྲོད་པ། ངལ་རྩོལ་བྱེད་མཁན་དང་ངལ་རྩོལ་ལས་ཀའི་ལྕི་བབ་དོ་མཉམ་མིན་པ། ངལ་རྩོལ་བར་མནར་གཅོད་གཏོང་བ་སོགས་ནི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་གི་ཡོད་པ་མ་ཟད། རྒྱལ་སྤྱིའི་ངལ་རྩོལ་ཁྲིམས་གཞི་དང་། ཡུལ་ལུང་སོ་སོའི་རྩ་ཁྲིམས་དང་བཅའ་ཁྲིམས་ལ་ཡང་རྩ་འགལ་དུ་སོང་ཡོད། ལྷག་པར་དུ་བཙན་བྱོལ་བོད་མིའི་སྤྱི་ཚོགས་ལ་མཚོན་ན། གཡོག་པོ་དང་བདག་པོའི་བར་ནས་དོན་དག་མང་པོ་ཞིག་འབྱུང་བཞིན་ཡོད་ཅིང་། དེ་ནི་བདག་པོས་གཡོག་པོར་བཙན་གཡེམ་བྱེད་པ་དང་། གཡོག་པོས་བདག་པོའི་དངུལ་དངོས་རྐུ་འཁྱེར་བྱེད་པ། གཡོག་པོ་འཚར་ལོངས་བྱུང་སྐབས་བདག་པོ་ལ་འཁོན་ལན་སློག་སྟེ་སྤྱི་ཚོགས་གཉིས་བར་འགལ་ཟླ་བཟོ་བ་སོགས་ཀྱི་གནས་ཚུལ་མང་པོ་ཞིག་ཡོང་གི་ཡོད།

བྱ་སྤྱོད་འདི་རིགས་ཐད་དབུས་བོད་མིའི་སྒྲིག་འཛུགས་བཀའ་ཤག་གིས་ས་གནས་མགོ་འཛིན་ཁག་བརྒྱུད་དེ། མི་མང་ལ་འབོད་སྐུལ་ཡང་ཡང་ཞུས་ཡོད་ལ། བོད་མི་མང་སྤྱི་འཐུས་གྲོས་ཚོགས་ནང་དུའང་གླེང་སློང་བསྟུད་མུར་བྱུང་ཡོད། དེ་བཞིན། ངྷ་ས་ཁུལ་གྱི་གཞུང་འབྲེལ་མིན་པའི་ཚོགས་པ་ཁག་ཅིག་གིས་ཀྱང་ལོ་ལྟར་ངོ་རྒོལ་གྱི་ལས་འགུལ་སྤེལ་གྱི་ཡོད་ཀྱང་། སྣང་ཚུལ་འདི་ལ་བཟང་ཕྱོགས་ཀྱི་འགྱུར་བ་གང་ཡང་མེད་པར། སྒེར་སེམས་ཆེ་བའི་བོད་མི་བཙན་བྱོལ་བ་འགའ་རེ་དང་། སྙིང་རྗེ་བྲལ་བའི་རྒྱ་གར་ཚོབ་ལས་པ་རེ་ཟུང་གིས་སྔར་བཞིན་མི་ཆོས་ཀུན་སྤྱོད་དང་འགལ་བའི་བྱ་སྤྱོད་འདི་རིགས་ལག་བསྟར་བྱེད་བཞིན་ཡོད།  

ད་ལོའི་རྒྱལ་སྤྱིའི་བྱིས་པའི་ངལ་རྩོལ་ངོ་རྒོལ་ཉིན་མོ་དང་བསྟུན་ཏེ། སུད་སིར་བརྟན་གཞི་བྱས་པའི་༼ འགྲོ་བ་མིའི་གོམ་སྟབས༽ ཚོགས་པའི་ངྷ་རམ་ས་ལའི་ཡན་ལག་འབྲེལ་མཐུད་པ་འཕྲིན་ལས་ལགས་ཀྱིས་བསྒྲགས་ཡིག་ཅིག་འགྲེམས་སྤེལ་བྱས་པའི་ནང་། “ བོད་མི་ཚོས་རྒྱ་གར་གྱི་བྱིས་པ་གཡོག་ཏུ་ཉར་ཡོད་པ་འདི་དག་ལ་ཟླ་རེར་ཧིན་སྒོར་ ༡༠༠༠ རེའང་རག་གི་མེད་པ་དང་། ནངས་སྔ་མོ་ནས་མཚན་གུང་བར་ལས་ཀ་བྱེད་ཀྱིན་ཡོད། བྱིས་པ་འདི་དག་ལས་མང་ཆེ་བ་རང་ལོ་ ༡༥ སོན་མེད་པ་རྐྱང་རེད། དེ་བཞིན། བོད་པས་བོད་པ་གཡོག་ལ་བཀོལ་བ་དང་རྒྱ་གར་བས་བོད་མི་གསར་འབྱོར་བ་ཡོག་ལ་བཀོལ་གྱི་ཡོད་པ་མང་པོ་ཞིག་ལ་ཟླ་རེར་ཧིན་སྒོར་ ༢༥༠༠ ལས་ལྷག་རག་གི་མེད་པ་མ་ཟད། གུང་གསེང་ཡང་མེད་པར་ཉིན་རེར་ཆུ་ཚོད་ ༩ ལས་ལྷག་པར་ལས་ཀ་བྱེད་ཀྱི་ཡོད ” ཅེས་བཀོད་འདུག

ན་མ་སོན་པའི་བྱིས་པ་གཡོག་ལ་བཀོལ་མི་ཆོག་པའི་ཁྲིམས་ཡིག་ཁག་ནང་འདི་ལྟར་བཀོད་འདུག ༼ རྒྱལ་སྤྱིའི་བྱིས་པའི་ཐོབ་ཐང་གི་ཆིངས་ཡིག ༽ཞེས་པའི་ནང་། “དཔལ་འབྱོར་བཤུ་གཞོག་དང་གནོད་ཚབས་ཆེ་བའི་ལས་ཀར་ཞུགས་པའམ་ལས་ཀ་དེས་བྱིས་པའི་སློབ་སྦྱོང་ལ་གནོད་སྐྱེལ་བ། བྱིས་པའི་འཕྲོད་བསྟེན་དང་། ཡང་ན་ལུས་དང་སེམས། ཆོས་ཀུན་སྤྱོད། སྤྱི་ཚོགས་འཚར་འཚར་ལོངས་བཅས་ལ་གནོད་པའི་ལས་གནས་རྣམས་ལས་སྲུང་སྐྱོབ་བྱ་དགོས་པའི་ཐོབ་ཐང་བྱིས་པར་ཡོད་པ་རྒྱལ་སྤྱིའི་ཚོགས་མི་རྣམས་ཀྱིས་ངོས་འཛིན་བྱེད” ཅེས་བཀོད་འདུག ཡང་༼ རྒྱ་གར་གྱི་རྩ་ཁྲིམས ༽ནང་འདི་ལྟར་བཀོད་འདུག “རང་ལོ་ ༡༤ མ་སོན་པའི་བྱིས་པ་གཅིག་ཀྱང་བཟོ་གྲྭ་དང་གཏེར་ཁ་སྔོག་འདོན། ཡང་ན། གནོད་ཚབས་ཆེ་བའི་ལས་རིགས་གང་དུའང་བཀོལ་མི་ཆོག” ཅེས་དང་། ༼ གཞོན་ནུའི་དྲང་བདེན་གྱི་གསོ་སྐྱོང་དང་སྲུང་སྐྱོབ་ཁྲིམས་ཡིག ༽ ཅེས་པའི་ནང་། “མི་སུ་ཞིག་གིས་དངོས་སུ་བྱིས་པ་ཞིག་གམ་གཞོན་སྐྱེས་ཤིག་ལ་གནོད་ཚབས་ཆེ་བའི་ལས་ཀར་བཀོལ་ཆེད་བསླུ་བྲིད་གཏོང་བ་དང་ཚེ་གཡོག་ཏུ་ཉར་བ། གཞོན་སྐྱེས་དེའི་གླ་དངུལ་རྣམས་མི་སྤྱོད་པའམ་ཡང་ན་རང་གི་དམིགས་བྱའི་ཆེད་དུ་བཀོལ་ཚེ། མི་དེ་ཉིད་ལ་ལོ་ངོ་ ༣ གྱི་བཙོན་འཇུག་ཁྲིམས་ཆད་གཅོད་དགོས་པ་མ་ཟད། དཔལ་འབྱོར་ཉེས་ཆད་ཀྱང་གཅོད་ཆོག” ཅེས་བཀོད་འདུག

ཡང་རྒྱ་གར་ནང་གི་ལས་ཀའི་གླ་དངུལ་དང་གུང་སེང་སྤྲོད་ཕྱོགས་སྐོར་ལ། ༼ གླ་དངུལ་ཆེས་ཉུང་བའི་ཁྲིམས་ཡིག ༽ ཅེས་པའི་ནང་། “ཕྱི་ལོ་ ༢༠༡༡ ཟླ་ ༤ ཚེས་ ༡ ནས་བཟུང་རྒྱལ་ཡོངས་ཀྱི་ཆེས་དམའ་བའི་གླ་ཕོགས་ཉིན་རེར་ཧིན་སྒོར་ ༡༡༥ ལ་སྤར་ཡོད” ཅེས་དང་། ཁྲིམས་ཡིག་ཐོ་གཞུང་རེའུ་མིག་ནང་། “ཟ་ཁང་དང་མགྲོན་ཁང་གི་ལག་རྩལ་གང་ཡང་མེད་པའི་གླ་བྱེད་པར་ཡང་ཉིན་རེར་ཧིན་སྒོར་ ༡༢༠ སྤྲོད་དགོས” ཞེས་བཀོད་འདུག ༼ བདུན་རེའི་གུང་གསེང་གི་ཁྲིམས་ཡིག ༽ ཞེས་པའི་ནང་། “ ཚོང་ཁང་དང་ཟ་ཁང་། ཟློས་གར་ཁང་བཅས་སུ་གསང་བའི་ཐོབ་ཐང་དང་། ཡང་ན་འཛིན་སྐྱོང་གི་གོ་གནས་ཡོད་མཁན་མ་ཡིན་པའི་ལས་མི་ཚང་མར་བདུན་ཕྲག་གཅིག་གི་ནང་དུ་ཉིན་ཆ་ཚང་བ་གཅིག་གི་གུང་གསེང་ཡོད་དགོས་པ་དང་། དེའི་སྟེང་དུ་ཉིན་ཕྱེད་ཀ་ཞིག་ལ་སྒོ་རྒྱག་པའམ་གུང་གསེང་གཏོང་དགོས། ཁྲིམས་ཡིག་འདིས་ཁྱབ་པའི་ལས་ཀ་བ་རྣམས་ཀྱིས་ངལ་གསོས་པ་དང་། གུང་གསེང་བཏང་བ་བཅས་ལ་བརྟན་ཏེ་གླ་ཕོགས་གཅོག་པ་དང་ཉུང་དུ་གཏོང་བ་སོགས་བྱེད་མི་ཆོག དེ་བཞིན། བཟོ་གྲྭའི་ལས་བཟོ་བ་དག་ཀྱང་བདུན་ཕྲག་གཅིག་ལ་ཆུ་ཚོད་ ༤༨ ལས་ལྷག་པའི་ལས་ཀར་བཀོལ་མི་ཆོག ” ཅེས་བཀོད་འདུག 

འདི་ལོའི་རྒྱལ་སྤྱིའི་བྱིས་པའི་ངལ་རྩོལ་ངོ་རྒོལ་ཉིན་མོ་དང་བསྟུན་ཏེ། འགྲོ་བ་མའི་གོམ་སྟབས་ཚོགས་པའི་འབྲེལ་མཐུད་པ་འཕྲིན་ལས་ལགས་སུ་བཅར་འདྲི་ཞུས་པར་ཁོང་གིས་ཚོགས་པ་དེའི་དམིགས་ཡུལ་སྐོར་བརྗོད་དོན། ང་ཚོའི་ཚོགས་པ་འདིའི་ལྟེ་བ་སུད་སིར་བརྟན་གཞི་བྱས་ཡོད་པ་རེད། རྒྱ་གར་ངྷ་རམ་ས་ལར་ཚོགས་པའི་འབྲེལ་མཐུད་པ་འཇོག་དགོས་པའི་རྒྱུ་མཚན། བཙན་བྱོལ་བོད་མིའི་སྤྱི་ཚོགས་ཁྲོད་རྒྱ་གར་གྱི་བྱིས་པ་ལོ་ན་མ་སོན་པ་མང་པོ་ཞིག་གཡོག་པོར་ཉར་ཏེ། བྱིས་པ་དེ་དག་གི་སློབ་སྦྱོང་གོ་སྐབས་འཆོར་བཞིན་ཡོད་པ་མ་ཟད། མི་ཚེ་ཡང་འཕྲོ་བརླག་ཏུ་འགྲོ་བཞིན་ཡོད་པ་དེ་ནི། རྒྱལ་སྤྱིའི་ཁྲིམས་ལགས་དང་རྒྱ་གར་གྱི་རྩ་ཁྲིམས་གཉིས་ཀར་འགལ་ཡོད་པ་རེད། ཅེས་བརྗོད་བྱུང་། ཡང་ཁོང་ལ་རྒྱ་གར་གྱི་ས་གནས་རེ་ཟུང་ནང་གྲང་ལྟོགས་ཀྱི་འཆི་བཞིན་པ་མང་པོ་ཞིག་ཡོང་གི་ཡོད་པ་རེད། ས་ཁུལ་དེ་དག་གི་བྱིས་པ་ཚོ་བོད་མིས་གཡོག་ལ་ཉར་ཏེ་ལྟོ་རྒྱབ་སྤྲོད་ཀྱི་ཡོད་པ་མ་ཟད། གླ་དངུལ་ཡང་གང་འཚམ་ཞིག་སྤྲོད་ཀྱི་ཡོད་སྟབས། དེ་ལ་ཁྲིམས་ཐོག་ནས་ངོས་འཛིན་གང་འདྲ་ཡོད་དམ་ཞེས་དྲིས་པར། ལྡི་ལི་དང་ངྷ་རམ་ས་ལ་ཁུལ་གྱི་རྒྱ་གར་གཡོག་པོ་མང་པོ་ཞིག་རྡོ་རྗེ་གདན་གྱི་ཉེ་འཁོར་བྷེ་ཧར་མངའ་སྡེ་(Bihar) འཚོ་བའི་གནས་སྟངས་ཧ་ཅང་སྐྱོ་བའི་ས་ཁུལ་ནས་འཁྲིད་ཡོང་བ་དངོས་ཡོད་རེད། འོན་ཀྱང་། ང་ཚོའི་ཚོགས་པའི་ངོས་ནས། བྱིས་པ་དེ་དག་གི་ནང་མིར་གྲོས་བསྡུར་བྱས་ཏེ། ཁོང་ཚོ་མོས་མཐུན་བྱུང་ན། ང་ཚོས་བྱིས་པ་དེ་དག་རྒྱ་གར་ཝ་ར་ནཱ་སི་རུ་(Alice project) ཞེས་པའི་སློབ་གྲྭ་ཞིག་ཡོད་པ་དེར་གཏོང་གི་ཡོད་པ་མ་ཟད། བྱིས་པ་དེ་ལ་གླ་དངུལ་ག་ཚོད་འབབ་ཀྱི་ཡོད་ན། དངུལ་དེ་དག་ང་ཚོའི་ཚོགས་པའི་ངོས་ནས་བྱིས་པའི་ནང་མི་ལ་སྤྲོད་རྒྱུ་ཡིན་ཟེར་གྱི་ཡོད། མི་ཆོས་ཀུན་སྤྱོད་ཀྱི་ཐད་ནས་ཀྱང་སྐྱབས་བཅོལ་བ་ཞིག་གིས་ས་བདག་ཆུ་བདག་གཡོག་པོར་ཉར་ཏེ་མནར་གཅོད་གཏོང་བ་འདི་ཡག་པོ་མ་རེད། ཅེས་བརྗོད་བྱུང་།

གསར་འགོད་པས་ཁོང་ལ། རྒྱ་གར་བའི་གཡོག་པོ་ཉར་ཡོད་པའི་བོད་པའི་མི་ཚང་དག་ལ་དངོས་སུ་ཕྱིན་ཏེ་སློབ་གསོ་བཏང་མྱོང་ཡོད་མེད་དྲིས་པར་འཕྲིན་ལས་ལགས་ཀྱིས་ལན་བསྐྱོན་དོན། ང་རང་ ༢༠༠༩ ལོར་ཚོགས་པ་འདིའི་ཁོངས་སུ་ཞུགས་པ་ཡིན། ད་བར་བཙན་བྱོལ་བོད་མིའི་གཞིས་ཆགས་ཁག་ཏུ་ཞིབ་འཇུག་བྱས་ཤིང་། ཞོར་དུ་མང་ཚོགས་ལ་གོ་རྟོགས་སྤེལ་བ་དང་ཟབ་སྦྱོང་སྤྲད་པ། ཡིག་ཆ་བཀྲམས་པ་སོགས་ཀྱི་ལས་ཀ་བྱས་པ་ཡིན། ཞིབ་འཇུག་གི་བརྒྱུད་རིམ་ཁྲོད་དཀའ་ངལ་མང་པོ་འཕྲད་ཀྱི་འདུག མང་ཚོགས་ལ་སློབ་གསོ་གཏོང་སྐབས་མི་རེ་ཟུང་གིས་སློབ་གསོར་ཉན་རྒྱུ་ཕར་ཞོག་རྣམ་འགྱུར་མི་ལེགས་པ་སྟོན་གྱི་འདུག ང་ལ་ཁ་པར་ཡོང་མཁན་ཡང་བྱུང་སོང་། རྒྱ་གར་བ་གཡོག་པོར་ཉར་མཁན་མང་ཤོས་དེ་ལྡི་ལི་བོད་སྒར་རེད། དགོན་པ་ཁག་གི་མགྲོན་ཁང་དང་ཟ་ཁང་ཚང་མའི་ནང་རྒྱ་གར་གྱི་བྱིས་པ་གཡོག་པོར་ཉར་འདུག དེ་ནས་ངྷ་རམ་ས་ལ་དང་རྡེ་ར་རྡུན་སོགས་རེད། ཅེས་བརྗོད་བྱུང་།

ཡང་ཁོང་ལ་ངྷ་རམ་ས་ལ་ཁུལ་དུ་རྒྱ་གར་བས་བོད་པ་གཡོག་པོར་ཉར་གྱི་ཡོད་པ་དང་། གླ་ཕོགས་ཚད་ལྡན་སྤྲོད་ཀྱི་མེད་པའི་གནས་སྟངས་ཀྱང་མི་ཉུང་བ་ཞིག་ཡོད་སྟབས། འདིའི་སྐོར་ལ་རྒྱུས་མངའ་ཡོད་མེད་དྲིས་པར་ཁོང་གིས། འདིའི་སྐོར་ལའང་ང་ཚོས་བསམ་བློ་གཏོང་གི་ཡོད། ངྷ་རམ་ས་ལའི་ལས་ཀ་བྱེད་མཁན་མང་པོ་ཞིག་ལ་གཟའ་མཇུག་གི་གུང་གསེང་མེད་པ་དང་། གླ་ཕོགས་ཚད་ལྡན་མིན་པོ་དངོས་ཡོད་རེད། རྒྱ་གར་གྱི་ཁྲིམས་ལུགས་ལྟར་ན། ཧི་མ་ཅལ་མངའ་ཁོངས་སུ་ཉིན་གཅིག་ལ་ཉུང་མཐར་ཧིན་སྒོར་ ༡༢༠ སྤྲོད་དགོས་པ་རེད། འོན་ཀྱང་ངྷ་རམ་ས་ལ་ཁུལ་རྒྱ་གར་ཟ་ཁང་དང་ཚོང་ལས་སྡེ་ཚན་རིགས་ལ་ལས་ཀ་བྱེད་ཀྱི་ཡོད་པ་མང་ཆེ་བ་ཉིན་ཕྱེད་ལྟ་བུ་རེད། ཅེས་བརྗོད་བྱུང་། མཇུག་ཏུ་ཁོས་ང་ཚོ་བཀའ་ཤག་ལ་ཐེངས་མང་པོར་བཅར་བ་ཡིན། འོན་ཀྱང་། ང་ཚོའི་ལས་དོན་ལ་རྒྱབ་སྐྱོར་ཡོད་ཟེར་བ་ཙམ་ལས་ཁ་ཡོད་ལག་ཡོད་ཀྱི་མཉམ་རུབ་ཅིག་གནང་མ་སོང་། ང་ཚོའི་རེ་བར་གཞུང་གི་ངོས་ནས་སྲིད་བྱུས་རང་བཞིན་གྱི་ཁྲིམས་སྒྲིག་ཅིག་ལག་བསྟར་བྱ་ཐུབ་པ་ཡིན་ན་ཕན་ཐོགས་ཆེན་པོ་ཡོངས་ས་རེད་དྲན་ཡོད། ཅེས་བརྗོད་བྱུང་།

གསར་འགོད་པ། དོན་འགྲུབ་བཀྲ་ཤིས།